قصه.تربويه ...انسان

[راجيه الرضا]

قصة تربوية بعنوان ..انسان...
اسمي.....غريب نوعا ما......اسمي انسان محمد .....
?
اسم غريب بيشد انتباه كل اللي بيسمعه
خصوصا مع شكلي
انا حد مكانش بيعرف يضحك
ولا يبتسم
دايما التكشيرة وتقطيب الجبين معايا...وكمان الفزع الليلي بأصحي اصرخ.....وانهج
..كأني طالع جبل ?
منطوي ورخم وكشري.....
بس احكي بقه عن نفسي
نشأت مع ام غلبانة اوي ...وعيانة اوي
مريضة سكر ومريضة قلب وضغط...
ليا اخ كبير اسمه احمد ...خلص دراسته وسافر وانا اصغر منه ب 10 سنوات
ابويا راجل مفتري
احمد هرب منه بالسفر
لكن انا....??
جالي تلعثم وتهتهة...
مبعرفش اتكلم من شخطه وافتراه
وضربه ليا ولامي.......كانت هزيلة اوي وبينزل بدراعه تتهبد هبدة علي جسمها?
انا دايما منطوي...
ودايما باعيط
وباراقب ضربه وافتراه علي امي المريضة
وانا عاجز عن الرد
والله العظيم باحب الخير وباحب ادافع عنها لكن مبعرفش
بانكمش وحوالي 10 مرات تبولت علي نفسي ف مكاني .
الي ان جاء اليوم الذي طرد فيه امي
واتي بزوجة جديدة....
ست غريبة عجيبة اصباغ فاقعة وحياة غريبة وملابس عجيبة ...
طرد امي وراحت عند خالي....
وانا معاها....
لكن خالي مرحبش بينا...
كنت باعيط من القهر والغلب ..
وفي يوم صحيت لقيت امي ماتت
وموتها قتلني قتل ...وانا 16 سنة....
احمد مظهرش برضه...
وخالي ومراته شغلوني مرمطون...
خدام....
عندهم وعند عيالهم...
وابويا غرق في سعادته...
كنت باتمشي لوحدي ساعات ع النيل واشوف صورة امي فيه.. .
واعيط...
مكنتش باصلي ...خالص...
لكن مرة انفتحت في العياط ..وانا ماشي في المنيل ع الكورنيش ...كنت جعان ...وما معييش....
لقيت راجل كبير بينادي....
كان ده اليوم اللي اتعرفت فيه علي عم كرم...
عم كرم. .....فاتح سوبر ماركت...
شافني..
قال لي مالك ..
عيطت...
قال لي انت جعان يا ابني؟ ؟ ؟
بصيت لقيته بيجيبلي ساندويتشين بطاطس مهروسة وكوباية شاي ....كلت...بنهم....
حكيت له حكايتي
اقسم بالله انه عيط....
شفت دموعه....
قال لي فجاة انا اسف ..
استغربت اوي
اسف علي ايه؟ ؟ ؟
قال لي بحماس:اسف ان فيه ناس معندهاش دم...
سامحني...
والله لاكون ابوك....
بس بشرط......
تصلي.....
الصلاة صلتك مع الله..
ازاي كلمت الراجل الغريب ده...
لكني كنت متدمر وكنا في الشارع...
من يومها بدأت علاقتي بعم كرم...
عرفت حكايته
مالوش حد
مراته ماتت
وما عندوش ابناء
عم كرم بقي بيديني مصروف
ويساعدني...
ويتابع معايا....
ابتسامته في وشي كانت بتساعدني استحمل قسوة عيلة خالي وجفاء ابويا
رغم اني مكنتش باعرف ابتسم في وشه
علمني ادعي لامي
واتصدق عنها
كنت بالاقيه اما في محله بشارع متفرع من شارع المنيل ...او في الجامع....
عمره ما نساني....
شجعني ....
وصرف عليا....
وقال لي لازم تكون اسم علي مسمي يا انسان...
مبعرفش ابتسم والله
وشي مكشر
وطبعي ناشف
بس باعيط كتير
وبسمع كلامه ومش باعمل حاجة غلط..
واخدت الثانوية العامة بمجموع معقول جداودخلت صيدلة . .. فرحته كانت الفرحة الكبيرة
اداني 300ج بحالهم ...
طبطبته كانت حلوة اوي...ودعاه كان رائع
في يوم رحت لاقيت المحل مقفول وهو مش في الجامع اتخضيت
وعيطت...
كان في زيارة
زعل مني
مش عاوزك تعيط
الجأ للحي الذي لا يموت....
عم كرم ابويا باحبه اوي وباحب ربنا اللي رزقني بيه
بس مش باعرف اعبرله خالص ولا حتي ابتسم له..
شكل امي وموتتها وافتراء ابويا وقسوة خالي مدمرين مشاعري....
عم كرم كلم لي صاحب صيدلية كبيرة اوي في المنيل عشان اتمرن عنده...
وبقي اخيرا ليا راتب....
جبتله جلابية هدية....اول ما قبضت بس برضه اديتهاله من غير ما اعبر له ....
??مبعرفش
بس هو فرح....
كان بيحكي لي عن نفسه كتير ويقول خليك انسان...بجد ...حتي لو الناس معرفوش عامل رب الناس...
اتعينت في شركة دواء معروفة...
ربنا وفقني
انا لسة منطوي
بس اتحسن عندي التلعثم...
وتوقف نهائيا الفزع الليلي
واجرت اوضة اعيش فيها بالمنيل
محدش سال انا رايح فين
عم كرم بس اللي اهتم بيا
في الشركة
انا حد كشري ومش محبوب ومش بيعرف يشارك في اي انشطة اجتماعية
لكن....اي زميل مزنوق باقرضه...خاصة لو متجوز
اي راجل كبير بساعده
اي حد عليه شغل كتير باعمله معاه
اي تجاوزات بارفضها
الصلاة باصليها
لكن دايما متباعد...
5 سنين ماليش صاحب ولا زميلة ...
دايما ساكت ..
وعم كرم بيقولي اتجوز
عاوز يبقي جد
لكن انا متعقد..??...
بخاف من السيرة دي...
اخويا احمد طلق مراته في الغربة وبنتواصل اون لاين
احنا معقدين
اتفاجأت في يوم وانا داخل الشركة بهيصة
فيه حفلة
انا اخر من يعلم
او مش مهم يعلم...
لاني افشل واحد???
لكن اللي ذهلني
ان صورتي متعلقة
وكل الزملا حواليا...
اتفاجئت فيه ايه؟ ؟ ؟؟
المدير فك اللغز لما قال
كلهم اختاروك الموظف المثالي او الجندي المجهول يا انسان..
قمت من علي مكتبي
وانا مكشر كالعادة..
محدش يتريق عليا ??رجعت لوراء...كأني بأهاجم...
استغربوا اوي
لكن عايدة اتكلمت وقالت (في يوم المطر الشديد وقف لي تاكسي ودفع حسابه وشال لي حاجتي لحد الباب ومستناش كلمة شكرا )
احمد عابدين قال بتأثر (سلفني اول رمضان 700ج وعمره ما طلبهم)
احمد زين قال (شحن لي الموبايل ...لما اشتكيت له..)
احمد ابو المجد قال (سهر معايا يخلص معايا شغلي يوم 25 /6)
سميرة قالت (جاب العلاج لماما....من الصيدلية اللي كان بيتمرن فيها زمان..ومستناش اشكره )
صادق قال (كان بيدفع لي البوفيه...عشان عارف..ومشكرتوش...الا دلوقتي)
اييييه
اناااااااا
اناااا
عيطت
منهار
انا (...مبعرفش اضحك ولا ابتسم ولا اشكر...
انا انسان..المعقد ....)
كلهم صقفوا
بس انساااان.....
المدير قال لي....انت حد فعلا طيب. ....
عيطت. ....
كلهم بصولي بتأثر....
رجعت لعم كرم مذهووول
...
عم كرم ....فرح اوي
وفكرني بيوم الكورنيش وانا ف سن ال 15
وانا باعيط...
العطاء الناس كنز اوعي تحرم نفسك منه....
حضني...
النهاردة
اتجوزت
عايدة
هي بتحاول تعالج تكشيرتي
بس اللي مصبرها ان قلبي طيب ادعووولي.....
كل المعقدين اللي زيي....ساعدوا الناس وكونوا مع رب الناس ..?ربنا هيعوضك باجمل احساس
?
#ايناس_و_الاطفال

 

[Lena Dareen]

مشكورة حبيبتي راجيه على الموضوع ?​

 

[ها أنا ذا]

نحن نستطيع التأثير بقوه على حياتنا وحياه غيرنا ..