قصصي مع الخادمات وكيفية الأستغناء عنهم

[بسمة]

السلام عليكم ورحمة الله وبركاته00

اولا حبيت اشكر هالمنتدي والقائمين عليه وجزاكم الله خير على هالمجهود الطيب

الحمد لله بعد زواجي ماأحتجت لخدامات لاني كنت ساكنه في بيت أهلى وبعد مرور 8 سنوات سكنت في بيتي الجديد
وقعدت سنتين من غير خدامه وكان الشغل متعب وكنت صغيره في العمر وبيتي مليان من الضيوف والله تمر على أيام وكنت اصيح من التعب وقررت اجيب لي خدامه وكانت هنديه وكانت ماتعرف هندي ولاأنجليزي ولا عربي وبعد ست شهور صارت بلبل في العربي وطلعت عيوبها وطلع لسانها وحلفت ماتكمل عندي وبعد 7 شهور جبت اندونيسيه وجننتني وكملت 8 شهور وسفرتها وبعد 5 شهور جبت سيلانيه وبعد طلعت لعينه وتحب الرياييل وايد واشردت معاهم بعد وكنسلتها
وبعدها بفتره جبت اندونيسيه وكملت سنتين عندي بس بالأخير ماطقتها لانها بدت تتعرف على الرياييل اللي برع وقعدت سنه او اكثر اجيب خدامات مؤقتات او من بيت اهلى ومرت الأيام وعرفت وحده هنديه وتقول ان بنتها ممتازه في كل الأمور وجبتها بعد طلعت الروح لانها بنت ولازم تكون على كفاله من بلدها المهم جات وكملت سنتين وطبعا فيها عيوب بس تغاضيت عن بعضها وبعد فتره حسيت انها تميل للرجال وتحب تسولف معاهم وضحكتها وايد ماصخه وفوق هذا تسرق كل اللي تبغيه وتصدره حق امها وهذا غير لسانها الطويل تقولون الهنديات ماركتهم في لسانهم معروفين :crazy:

الحين من سافرت كملت 8 شهور صحيح تعبانه من البيت والعيال بس نفسيتي مرتاحه ولقيت مكتب يجيب لي الخدامه لين البيت والساعه بعشرين درهم والحين هي تجيني كل يوم ساعتين تكوي وتغسل الحمامات اما باقي الشغل على
وامس اشتركت في المنتدي وقريت الموضوع اللي كاتبته أ. ناعمه الهاشمي الله يفرج عليها وييسر امورها وضحت لنا امور كثيره عنهم وحسيت اني غلطانه بأسقدامي خدامه لبيتي علشان تخربه وخاصه ان عيالي في مرحلة المراهقه
يعني ممكن تقص عليهم بأي طريقه :dunno:

عندي غساله اتوماتيك ونشافه وحتي غسالة صحون وبيتي انظفه اول بأول وعلمت بناتي على شغل البيت ودائما اخلى يوم الجمعه يوم التنظيف العالمي :icon30: ونشتري غدانا من المطعم وان شاء الله بستمر بعزيمه وبقوه لان موضوع خادمات ولكن شجعني على هالقرار واعتقد ان البيت بينظف من كل شئ بإذن الله

اي سؤال انا حاضره عن شغل البيت اذا عندي خبره فيه :shiny:

 

[UMM-ATEEQ]

يعطيج العافية وعساج على القوة

 

[نسائيات]

انا عشت حوالي 3 سنوات بدون خدامه لانه اسرتي كانت صغيره زوجي وانا وطفلي بس لما انجبت بنتي تعبت وايد وخاصه في النفاس ما عندي احد يساعدني
وما اقدر اجابل البنت والبيت صار شيء فضيع فيبت لي خادمه بالساعه بس بعد ما تنفع
لانه بعد احتاجه بعد الظهر

 

[بسمة]

الله يعافيج ياأم عتيج منوره موضوعي بردج :cupidarrow:

هلا الغاليه حكاوينا :blush-anim-cl:

وانا وش اقول عيل عندي الله يخليهم 6 ومطلعيلي الشيب :crazy:

خبريني شو عندج عقب الظهر مهم :essen:

وتسلمين على المشاركه في الموضوع :blushing:

 

[@ بسمة أمل @]

والله ياعيوني محاكيتس طلعت الشيب لزوجها علشان يجيب لها خدامه !!!!!!!!!!!!!!!!!!

ياختي انا انسانه كسوله ماحب اشتغل وماتحمل الوساخه ؟؟؟؟؟؟؟؟؟؟؟؟؟؟


على العموم باقي ماقدمنا على المكتب والا الفيزه قد طلعناها


الله يسخرلي بنت الحلال ياااااااااااارب ويعطيني من خيرها ويكفيني شرها ياااااااااااااااااااااااااااااااااارب

 

[اميرة بس بدوية]

CENTER]] بسمة انت حكيتي قصة حياتي ومازلت عليها واخاف بعد خدامتي الحين ماتستمر معاي وهي جنسيتها اندونيسية والها معاي 6 شهور ونص وهي تقهرني مررررررررررررررره وكسوووووووووله وخشمها في راسها واي كلمه مني انا يريد سافر بلاد وخاصه اني عندي ثلاث عيال بنتين وولد وانا اعترف اني كسوله مره ومااحب الحركه شووووو اسوي [/CENTER]

 

[بسمة]

منوره الموضوع اختي الغاليه حياة والله يعطيج خيرها ويكفيج شرها وتسلمين على الرد

حبيبتي اميره بس بدويه

نصيحتي لج سفريها لان الخدامه اللي تطلب السفر معناها خلاص مكتفيه منكم
شوفي اتفقي معاها على انها تقعد سنتين واذا رفضت تشتغل قولي لها بتشتغلين شهرين من غير معاش وتتسفرين بمعاشك وساعتها بتحس انها راح تشتغل على الفاضي واذا رجعت في كلامها وحبت تقعد هدديها انها ماتفتح سالفة السفر مره ثانيه وانها اذا كملت مدتها راح تشترين لها ولعيالها هدايا

هي كم عمرها اذا صغيره في السن الله يعينج عليها
اما اذا متزوجه وعندها عيال راح تقعد صدقيني
انتظر مشاركتج بالموضوع وحياج الله

 

[اميرة بس بدوية]

نصيحتي لج سفريها لان الخدامه اللي تطلب السفر معناها خلاص مكتفيه منكم
شوفي اتفقي معاها على انها تقعد سنتين واذا رفضت تشتغل قولي لها بتشتغلين شهرين من غير معاش وتتسفرين بمعاشك وساعتها بتحس انها راح تشتغل على الفاضي واذا رجعت في كلامها وحبت تقعد هدديها انها ماتفتح سالفة السفر مره ثانيه وانها اذا كملت مدتها راح تشترين لها ولعيالها هدايا

اذا سفرتها صعبه مادام انا وهي حاليا ok مومشكله بس بعدين اذا صار شي تقول مايريد شغل وبعدين اذا قلتلهل بشغلة شهرين بدون معاش ...الخ على طول بترفض وبتطالب اول شي بمعاشها لان اول مااشتغلت عندي كانت تطلب معاشها شهر بشهر بس الحين الها كم شهر ماخذت معاشها واصعب شي عندها اني اهددها لانها بترفض الشغل على طول هي من النوع الاستقلالية جدا وماتحب احد يتدخل فيها واذا قلتلها سوي شي ماتسويه الا بعد ساعه بالعاني عشان تقهرني هذا خاصه اذا اتأخرنا في معاشها .

هي كم عمرها اذا صغيره في السن الله يعينج عليها
اما اذا متزوجه وعندها عيال راح تقعد صدقيني
انتظر مشاركتج بالموضوع وحياج الله

لا موصغيره وايد يعني حليوه ومتزوجه وعندها عيال على فكره اول ماجتني كانت في البداية رافضة الشغل معاي بس لولا عمتي ماكانت قعدة عندي هي الي هدتها وروضتها عشاني

 

[نسائيات]

السالفه مو شو عندي لبعد الظهر
لكن انه يكون وقتج كله طبيخ غسيل كوي من تقومين لحد ما تنامين والله يهد الحيل
حتى زوجك مالج نفس تجابلينه من التعب
وخاصه لما يكون البيت كبير وفيه حوش شو بتسوين

 

[بسمة]

خلاص لازم تتحملينها بعلاها والله يعينج عليها وطنشيها اذا مانفذت الشئ اللي تبغينه مادام هي تنفذه

انا من رأيي انج تعطينها جدول بالشغل يعني بالساعه وهي راح تشتغل من غير ماتشاورج يمكن يناسبها هالشئ

ههههههههههه زحكتيني ياحكاوينا

انا كنت مثلج احس ان شغل البيت ماخذني عن كل شئ

شوفي حضري الغدا والعشا مره وحده

مثلا سوي صينية دجاج بالفرن وحضريها بالطريقه العاديه وخليها بالثلاجه وبعد المغرب دخليها الفرن
وسوي سلطه الظهر وكثري منها ولاتتبلينها وخذي الكمية اللي تبغينها حق الغدا وخلى الباقي حق العشاء
مع اضافة جبن او معكرونه

والغسيل حددي له وقت وخلى في بالج ان شغل البيت مايخلص حتي لو تشتغلين من الصبح لين الليل

 

[درة الأكوان]

أنا كنت ساكنة عند أهل زوجي ولم أحضر خادمة خاصة بي مع أني كنت أشتغل بذمة وأنا متعودة لأني تزوجت بدري وفي بيت أهلي لا يوجد خادمة,وبس طلعت ببيتي الخاص لم أطلب خادمة وكثيرا كان يطلب مني طبيبي الذي يعرف تاريخ أمراضي باحضار خادمة ولكني كنت أتجاهل ذلك لأني لا أريدها مشاركتي مملكتي
وجلست أكثر من 3 سنوات بدون خادمة إلى أن من الله علي بحمل جديد وكان زوجي يعلم جيدا حالتي الصحية
وأحضرنا خادمة فلبينية فعندما وجدت نفسها محاصرة أطفال صغار وزوجي لا يعيرها اهتمام بدأت تشكي من آلام في الظهر ودون سابق انذار فسفرتها
وباقي على موعد ولادتي شهرين فأحضرت أخرى أندونيسية وكانت صغيرة وبها بعض العيوب وتخاف مني كثيرا لدرجة أن تأكل الفاكهة بالسرقة وعندما كشفتها لم أحرجها و أنبني ضميري حيث كنت بالشهر الأخير من الحمل المتعب جدا..لأنني لم أكن أعطيها حصتها من الفاكهة عن جهل مني بأن هذا ملك لكل من في البيت وتأكل على راحتها

فقلت لها أنت هنا مثلنا مثلك كلي ما يحلو لك
ودائما أضع لها طعامنا قبل أن نأكل نحن..وكنت كلما رأيت فعلا منها لا يعجبني أكلمها بالكلمة الطيبة وأحضر لها أشرطة كاسيت دينية بلغتها تسمعها وهي بالمطبخ أو أثناء الكوي وكنت قد أحضرت لها مسجل خاص بها
ولله الحمد كانت تستجيب وتحجبت عندي وقالت قبل مغادرتها لنا من أجل الزواج أنها ستبقى متحجبة واشترت لنفسها عباءة جديدة قبل سفرها وجلست عندي أكثرمن3 سنوات كنت قد أحببتها فعلا لأنها تريد العمل كي تتزوج فقط

وأحضرت بعدها أندونيسية أخرى وكل يوم تبكي وبدها ترجع لبلدها إلى أن انتهت المدة وأحضرت أخرى من نفس البلد
وجلست عندي حواي 9 شهور فهمت خلالها أنها كانت تعمل بالسعودية ولا يعجبها تدخلي أنا يعني تريد الكلام مع الكفيل فقط فأفهمتها كل بيت وله سياسته وأنا زوجي ليس متفرغ لنا حتى يتفرغ لك معنى الكلام انسييييييييييييييييه تماما..وبعد عدة أشهر الأخت بدأت بحالات هستيرية فظيعة كالمس أو الجنون وليس تمثيل لأنها كانت في غير وعيها كانت تتخبط بالأرض وترفع راسها فوق وهي راقدة وتخبطه بالأرض أحضرت لها الأسعاف والنجدة وكنت مسيطرة على نفسي ولي خبرة مع شيخ يقرأ القرآن فلم أخف منها بل هي التي تخاف مني وبقيت3 أيام وسفرتها فورا
واتصلت بها عدة مرات وتطمنت عليها إالى أن أصبحت بعد فترة من الزمن أفضل من السابق
وختمتها أيضا بواحدة أندونيسية بقيت 2 سنة ثم غادرت وبها أخطاء كثيرة كنت أتغاضى بعض الشئ مادام دينها بخير..وحصلت لنا مشكلة لم أستطع احضارغيرها ..وقاربت حوالي سنة وأنا بدون خادمة استعنت بخادمة جديدة عند أقاربنا لم تترك ولا آلة كهربائية إما تخربها أو تنهكها من التعب إلى أن حرقت الميكروويف ولا أحد بالمنزل غيرها وتحلف أنه بدون أن تفتحه انحرق والله لم أأنبها بل سألتها كيف ينحرق وانت فقط عنده والأولاد وأبوهم غير موجودين
فقالت أريد العودة حق كفيل فأرجعتها وقلت الحمدلله اللي جات منك
ومشاكل الخدم لاتنتهي أنا فعلا مجهدة بدنيا ومريضة ولا أستطيع القيام بكل أعباء المنزل الكبير جدا
ولله الحمد نفسيتي مرتاحة واللي أقدر عليه أعمله ....... وادعو لي بخادمة ملتزمة ونشيطة لأنني فعلا محتاجة لخادمة
شر لابد منه

 

[بسمة]

هلا والله بدرة الأكوان

والله يرزقج بالخادمه الملتزمه والنشيطه ويفرجها عليج
وماتشوفين شر يالغاليه

انا بعد مرضوني الخدم اكثر من ماريحوني وصدقيني ماعاد يهمني كلام أحد
انا فعلا مرتاحه نفسيا وتعبانه جسديا على الأقل لين مايكبرون عيالي ويعدون مرحلة الخطر
وانا مثلج عندي حساسيه مزمنه ولازم ماأقرب من أدوات التنظيف
بس خليته على الخادمه المؤقته
انا اذا جبت خدامه بخليها على طول خارج المنزل يعني في الملحق وكل الشغل هناك بيكون
من طبخ وغسيل وكوي
لان عندي بنت مريضه بالشفه الأرنبيه وتحتاج عمليات واكيد محتاجه احد يساعدني اذا دخلت المستشفي
بس الله يرزقني الخدامه اللي تريحني وتعوضعني عن الباقيات
لان الحين انا ماعندي مكان لها في بيتي عندي 4 غرف نوم وصاله ومطبخ
كل بنتين في غرفه وولدي في غرفه وانا وزوجي وبنتي الصغيره في غرفه
والصاله مكشوفه وماعندي مكان للخادمه
كل الخدامات خليتهم ينامون في بيت أهلى ومن الصبح لين الليل عندي وبعدين ينامون هناك
إلا الأخيره الهنديه خليتها عندي وطلعت ولدي في الصاله علشان حاجتي لها وندمت اني دخلتها بيتي
حسبي الله عليها ونعم الوكيل جننتني 000000000000

واتمني اعيش فتره طويله بدونهم واذا احتجت خدامه بتفق مع خدامات اهلى يساعدوني

مشكورين على مشاركتكم لي في هالموضوع

 

[غدير الحب]

هلا اختي

اناصارلي اكثر من سنة ماعندي خدامة وكنت بالبداية تعبانة وماقدرت امشي ع رجولي من كثر التعب

بس عقب تعودت مشكلتي بالفترة الاولى بدا فيني حماس بس عقب تغيرت اقول ليش اهلي واخواتي وجراتي عندهم خدامات اشمعنى انا فانحبط مع اني اقدراييب شغالة بس الوحدة في بيتها تشتغل احسن وخاصةاني بغير وظيفةوعندي5اطفال عسن مدارس وواحد ولدسنة ومااحباحديدخل بمحيط اسرتي

تكوم علي الكوي بس تخيلي لوعزمت بخلصه باقل من ساعتين


بس مشكلتي ارجع واتكاسل وانحبط

واحب انام بعد مايروحوا العيال المدرسة والمصيبة اقعد الساعة 10او11مرات واحس الشغل يتاخر


فشو تنصحيني؟

 

[هدأة الغسق]

أختي رجاءً راجعي القوانين

http://www.uaebalqees.com/vb/showthread.php?t=3569

 

[بسمة]

سامحيني اختي والله ماكنت ادريبهالقوانين إلا الحين وان شاء الله بنفذها بحذافيرها

حبيبتي غدير الحب مشكوره على المشاركه اولا

وثانيا حبيت اوضح لك شيأ

اذا صحوت من الصبح ولا الساعه 10 الشغل ماراح ينتهي

انا ساعات اصحو من الصبح واشتغل وساعات من الساعه 10 أو 9 أبتدي الشغل

ساحاول اعطائك نبذه عن حياتي اليوميه << الله يعيني على اللغه الفسحه احسا صعبه ومو متعوده عليا

دائما او ماتصحين من النوم على طول نظفي غرفه غرفه مع كنس كل غرفه واغلقي الأبواب وأتركي
الأطفال يلعبون في غرفه واحده ليظل البيت نظيف لساعات طويله اغسلي الحمامات كلها مره وحده وانا الصراحه اغسلهم مرتين في الأسبوع وحاولي تعودين نفسك على الترتيب المستمر وخلى الأطفال ينظفون أغراضهم بأنفسهم
وعوديهم على الترتيب بالنسبه لكي الملابس اشتريت طاولة طعام لاربعة أشخاص وحولتها لكي الملابس ولاحظت ان الكوي يخلص بسرعه بهذه الطريقه حتي الخدامه المؤقته معجبه بالطاوله 000
بالنسبه للمطبخ نظفيه على راحتك وتقدرين تغسلين الأرز وتظعينه بالثلاجه وقطعي كمية كبيره من البصل وأحفظيه في اكياس وظعيهم في الفريزر وقشري كميه من الثوم وظعيها في علبة بلاستك واتركيها في الثلاجه
ولاتتعبين نفسك بالشغل ادري ان يدور في مخك ماغسلت مامسحت مارتبت ماطبخت مثل الدوامه تمر عليك
خلي في بالك ان الشغل مو تعذيب لك بالعكس رياضه وصحه وراحه نفسيه
وعلى طول اذا حسيتي انك متضايقه من الشغل اذهبي الي اي هوايه تحبينها او زياره احد من الأهل
وستلاحظين بعد عودتك الي منزلك انك تستطيعين التنظيف بكل فرح وسرور

 

[غدير الحب]

تسلمين انا معودة عيالي ع الترتيب والحمدالله

بس يبقى معاي المعضلة الي هي الاحباط وكاني غلطت يوم ما تكون عندي شغالة

وماعندي وقت اطلع لجاراتي الصبح احس مخنوقة مرات اتوقع مااقدراضيف الجيران لاني وحيدة واحيانااحس اني بحاجة للنوم ع الساعة 3 او4 او 5 بعني تتلخبط اموري

بس ان شاءالله اغير من تفكيري وتسير الامور على احسن وجه

 

[أميرتي 2007]

أنا عضوه جديده رحبوا فيني لا تقولون مافيه وقت هههههههههههه

كيفكم وش أخباركم والله عني أنا معاناه في بداية حياتي مع أهلي كان

عندنا خدم وبعد ما تزوجت جلست سنه عند أهلي بسبب عمل زوجي في مدينه ثانيه

وجلست أربع سنين معاه وخلفت 3 أطفال ههههه قطوه وبعدين أنهد حيلي رجعت قدمت شغاله هنديه

في الأول طيبه مره وبعدين طلعت المواهب جلست سنتين وطلبت إجازه وجلست ثلاث أشهر ورجعت

بلسان مترين طوله بس اللي مصبرني عليها طيبتها لعيالي ولمن شافتني حامل قامت تسويلها أفلام هنديه

مره تقولي زوج خربان ومره بيبي أنا دورعلىماما ومره تقول خلاص ماما أنا في سفر علشان أهي عارفه إني

بحاجتها وعلى وشك ولاده والله زهقتني وقلت لها خلاص ذحين سفر روحي جيبي أغراضك إلا وترجع في كلامها

وتقول لأخلاص ماما تعبان لازم أنا إجلس المضحك فيها يوم خلاص بتسافر أنا أطلع فيها وهي تدور مية شغله وشغله

زي اللي تبغى الطياره يروح موعدها ........... وجلست بعدها أربع سنين وحملت وقدمت على شغاله أندونسيه والله

والله يابنات إنها تعبتني أكثر من الهنديه كل يوم وهي تقول بطن عور ومره تقول زوج في بلد أنا ممكن أنا روح

بعدين زوج غضبان والحين خلصت سنتين وتقول مدام أنا أبغوا سفر وشوفوا وقت سفرتها طلع على حملي

وش رايكم إذا سفرتها أجيب غيرها ولا لا أنا عندي مقوله وهي {{ تعب الجسد ولا تعب القلب }}}

ودمتم سالمين سامحوني على الإطاله لكن والله أحس إني أرتحت بعد الفضفضه

 

[بسمة]

حبيبتي غدير انت من وين ؟؟؟

لان عندنا بالأمارات مكاتب للخدم المؤقتات وممكن تستعينين بوحده مثل ماأنا استعين فيها

انت عندج مشكله في الطبخ ؟؟؟

اتمني تخبريني باللي يدور في تفكيرك علشان اقدر اساعدك من هالتفكير المستمر


هلا بأميرتي 2007
نور المنتدي بوجودك حبيبتي

واشكر لك تواجدك في موضوعي والمشاركه فيه

اذا تقدرين هاتي سيرلانكيه مسلمه

اكره جنسيتين عندي الأندونيسيه والهنديه
شوفي لازم تكون الخدامه جديده علشان انت تتحكمين فيها على كيفك
وفي البدايه بتتعبين بس احسن من وحده تعرف كل شئ وتوقعي انها تسوي اي شئ
من سرقه و من معرفة الشباب او من الهروب من المنزل
الحين انت محتاجه للمساعده
حاولي تكلمين امك تجيب الخدامه لك كل يوم وتخلص لك بعض الأمور

 

[صاحبه السمو]

الله يعطيج العافيه وانا اشجعج لاتيبين خدامه جابلي بيتج وعيالج واجرج عند الله.......

 

[بسمة]

الله يعافيج ياحبيتي صاحبه السمو

وان شاء الله هذا اللي بيصير

تصدقين اقعد على راحتي والبس واتكلم واعيش على راحتي من غير نكد

ولما اسمع بعض صديقاتي يشتكون من خدمهم احمدالله ان ماعندي خدامه

تسلمين على المرور :clap: