قصة أسرت قلبي

[راجيه الرضا]

_ليا صديقة متزوجة وعندها طفلة، بتحكيلي إن زوجها كان عنده مشروع تجاري صغير وللأسف بسبب الظروف الاقتصادية خسر كتير وبقى عليه ديون، ومكنش قادر يدفع إيجار شقته، والده أرمل وعايش في شقة إيجار قديم، قاله تعالوا اقعدوا معايا.. وفعلًا أخد مراته وبنته ونقل حياته كلها في شقة والده، واضطر إنه بعد كده يسافر برا مصر عشان يقدر يسد باقي الديون..
بعد سفره صاحب الشقة قلق إنه يكون ناوي يعيش مع والده عشان ياخد الشقة بعد وفاته فقرر يمشيهم أو يدفعوا إيجار أكبر ورفض مبلغ الإيجار اللي عرضوه عليه، والأب مسن ومريض معرفش يتصرف أو يقف قصاده ..

في الوقت ده صاحبتي كلمت مامتها بتحكيلها ومحتارة هيروحوا فين، بعد أقل من ساعة كان والدها واقف تحت العمارة ومعاه عربيات وقال لحماها أنا بستأذنك تسمحلي أستضيفك عندي شويا لغاية لما ابنك ينزل من السفر بالسلامة، كان رافض جدا وقاله خد بنتك وحفيدتك وأنا حتى أروح دار مسنين مش هتفرق، لكن والد صاحبتي صمم وأخدهم واخد العفش، وفرشلهم شقة في بيته، وقسمها بحيث بقى في غرفتين منفصلين بحمام وباب منفصل لحما بنته عشان يرفع عنه الحرج من الاختلاط بيهم ..

بتحكيلي إن والدها قعد حوالي سنة يخدم حماها، ويمرضه، ويطلع يسهر معاه هو أصحابه، ورفض إن زوجها ينزل من السفر ويعطل نفسه قاله والدك في بيته متقلقش عليه شوف شغلك انت ..
لغاية لما حماها توفى ربنا يرحمه، والدها قام بكل شيء يخصه لآخر لحظة..

ومن كام شهر توفي والدها الرجل الأصيل، الكريم، أتمنى تدعوا له بالرحمة والمغفرة ..

"الزواج مش مجرد زوج وزوجة، لا أسرتين بيحصل بينهم نسب وقرابة ودم، فاختيار الأسرة مش شيء ثانوي أبدًا هما أهلنا وأهل أولادنا وسندهم"

صالون رانيا وأخواتها ​