قسم بالله محتاجه كف

[ملكة باستغفاري]

لا اله الا الله
زعلانه من نفسي ابتلاني الله بزوج عقيم لي 12 سنه متزوجه واسكن بعيدا عن اخواتي في مدينه اخرى واذا زرت اخواتي كل شهرين مره يروح مع اصحابه بالايام وانا لوحدي ببيت امي الله يرحمها ومهما ترجيته يجي ما يجي الابعد كم يوم كرهت جيتي لاخواتي - هو ما راح يتغير بس انا ودي استقل عاطفيا عنه نفسي ما يهمني زي حريم زمان اشوف خالتي لو زوجها شهر يغيب عنها عادي ودي ما اهتم واطنش بس كيف والله تعبت وهو ما همه

 

[راهية الحس]

عزيزتي ترى الزوج مو كل شيء في رب في أهل وارحام
في نفس لازم تجعلين همك الأكبر كيف ترتقين فيها للفردوس
لا تجعلي همك متى راح ومتى رجع خلاص أثنى عشر سنه
كفايه تترجينه خليه على راحته مدام مو منحرف مصلي وصايم
وكثفي الدعاء والاستغفار بنية إن الله يسخره لك وكوني على
يقين إن القلوب بين اصبعين من أصابع الرب يقلبهاكيف يشاء
عيشي حياتج اطلعي ادخلي اشغلي نفسج. والله يقويج
ودعواتج

 

[الحائره2007]

اشغلي نفسج بأشياء وهوايات ثانيه
ثانيا اقري عن الاستقلال العاطفي ... وهالشي مايصير مره وحده ... طبعا بالتعود وبالتدرييييج
ولا تنسي الدعااااء اهم شي .... ( ربي لا تجعل همي الدنيا واجعل همي الاخره)
( اللهم اكفني بفضلك عمن سواك)


وان شاء الله الحريم يفيدووووج ,,,,

 

[سمر20]

هو مايهتم فيك لانه حاس بالعجز قدامك واذا شافك يذكر مشكلته انتي حاولي تدخلين البهجه عليكم شوي يعني كل جلساتك خليها فرفشه ولا تقولين له انت تطلع وتخليني ولا انت ماتحبني ولا شي طنش واذا جا سوي روحك مشتاقه له حتى لو مو صج بس لما بيشوف الاهتمام والتعلق فيه راح يحال يجلس يمك واذا طلع اشغلي نفسك باي شي واذا تضايقتي منه لاتقولين له انت سويت ولا ماسويت خليك لييين تروقين وبعدين جيبيها بطريقه لطيفه
او طنشيها عادي

 

[مسك الغلا]

حبيبتي اللي مصبرك كل هالسنين يصبرك زود زوجك هو جنتك ونارك أصبري واحتسبي الأجر ماتدرين رحمة ربك قادرعلى كل شيء وعليك بالدعاء

 

[ذابت نفسي لطفل]

اللهم نسألك الرحمه واللطف بنا
اللهم يا لطيف يا خبير يا مدبر الامور دبر امورنا فاننا لا نحسن التدبير

 

[رازيا]

انا مو عارفة وين المشكلة بالظبط اذا قصدك انك صابرة عليه علشان ما فيه اطفال بينكم انا من راي استخيري الله اكثر من مرة في امر بقائك معاه وانت من حقك يكون عندك اطفال وطبعا في الاول خذي بالاسباب يعني تعالجي وهو يتعالج واعملو انابيب اطفال وتابعي مع الدكتورة واستمري بالاستخارة
واذا شوفتي ما فيه امل استخيري الله
اتوقع لو العيب منك تزوج عليك من اول سنة بحجة انك ما تجيبي اطفال
واذا كان حبوب وكريم وطيب معك اصبري عليه وانظري للجانب الايجابي منه و ممكن تكفلي يتيم وتربيه عندك في البيبت
استمري على الاستخارة واخرجي صدقة والاستغفار والدعاء اهم شي

 

[N&A]

اختي انا مثلك ظليت فتره بدون طفل
كان العيب منه
فعلا الاخوات صادقات كان يتحاشاني
رغم اني اثبت له ان مو مهم الطفل مصير الله يرزقنا
و كان يسألني رغم اني ما فتحت الموضوع معه يقول:لو ما قدرت اجيب لك طفل بتطلبين الطلاق
يعني صار من يشوفني يفكر انه مو مالي عيني فيتهرب
بس سوينا طفل انابيب عند الدكتور محمد البقنه في مستشفى الحبيب و رغم انهم كانوا يقولون الامل
0%
الا ان ارادة الله فوق كل شي
رغم ان حنا حاولنا بكل انواع العلاج الطبيعي و الادويه و غيرها بس مانفع
كثرت من الاستغفار و الصدقه بنية الحمل و الحمد لله الحين بنتي عمرها سنه

و بيني و بينك شاف نفسه بعد ماجاتنا بنت
خلاص وثق انه مافيه عيب

الله ييسر لك امورك

 

[N&A]

اعتذر عن الارسال بالخاص لانه رفض يرسل
بس تجربتي مع الانابيب كالتالي:
مدحوا لنا وصفات الدكتور جابر القحطاني و رحت لصيدليته بنفسي
اسمها روح الطبيعه بالرياض
و اخذت وصفه بعد ما خلطها لنا على حسب تقرير طبي بحالة زوجي
و يوم افتحها كلها بهارات و عسل
كان الفلفل الاسود يفوح منها
ما جربت اخذها
بس كان زوجي يوم بس يجرب يحطها بفمه يطلعها بسرعه من حرارتها
و زوجي اكره ماله الفلفل
بس يقولون انها نفعت كثير ناس
زوجي ما كملها يقول يستفرغ لو يبلعها


اكثر من عياده و مستشفى جربناها و نفس النتيجه
الحركه و العدد و كل امل يقولون صفر %
كانت اخر الحلول طفل انابيب
رحنا الدكتور محمد البقنه في مستفى الحبيب في الرياض
و اعطيناه صورة تحاليل بس من البدايه و هو يقول لنا
مافيه شي مستحيل و كان واثق من نفسه
و فعلا بفضل الله ثم فضله رزقنا ربي بنوته بصحتها و لله الحمد
اخذوا مني 3 بويضات
و لقحوا 3
و فشلت وحده
و رجعوا 2 بس من الشهر الاول توقف كيس منها و ظل فاضي و آلمني كثير الين نزل من نفسه


و خالتي سوت نفس الشي
و عندها 3 توأم على يد البقنه

انتي استخيري و اتصلي عليهم
و خذي موعد لو استشاره بس
و شوفي ايش يقول لك
و طمنينا عنك

الله يرزقك
لاتنسين كان سلاحي الاستغفار و الصدقه و الدعاء بكل صلاه بنية الحمل
رغم ان زوجي اهمل بعض الشيء

 

[N&A]

على فكره كانت فيه حرمه تقول ماتصدق الانابيب
انهم يغشون فيها
بس انا و خالتي اطفالنا نسخه من ابوانهم
قالت لها امي ها طلعوا شبه الابوان و اخذوها تريقه
طولي بالك