قبل عرسي بأسبوع..

[أنثى بعطر الورد]

صار معي موقف غيرلي كل حياتي،
وخلاني إلغي العرس وإتراجع!!

يوم مرضت ستي كتير،
رحنا ع المستشفى، أول ما وصلت لقيت جدي قاعد جنب باب العناية وعم يبكي..
قعدت حدو، وأول مرة كنت بشوفو هيك!!

قلتلو: عم تبكي يا جدي!!؟
مسح دموعو وقال: ستك تعبانة كتير..
قلتلو: انشاءالله بتقوم بالسلامة، إدعيلا..

هون جلس قعدتو وقلي:
ستك روحا حلوة، عيونا قصة،
بتعرفي يوم كنت بدي إياها شفتها رايحة مِن البيت،
ماسكة أخواتها بإيدا وعرقها ع جبينها وعم تضحك..
ضحكتها خلتني حبها..

قلتلو: طب كم مرة تقاتلت إنتَ واياها!!؟
وكيف لليوم بتحبوا بعض!!؟
قلي: يووووووووه ياما تقاتلنا بس ولا مرة قللنا إحترامنا لبعض..
هون تذكرت خطيبي يلي ع الطالعة والنازلة بقلل إحترامي وبعايرني بكل شي،
وإنو لازم وقف شغل!!
وبطل إحكي أصحابي!!
وما إلبس تياب قصيرة أو ضيقة!!

رجع كمل جدي وقال:
هي قطعة مِن القلب..
ﻃﺒﻌﺎً إستغربت، يعني جدي بالعادة صارم وَمِن جيل زمان، وكنت مفكرة إنو ما عندهم حُب ورومانسية متلنا!!

بهالوقت إجا الحكيم،
قام وحكي معو: طمني دخيلك!؟
جاوب الحكيم: منيحة الحمدلله وفيكن تفوتوا تشوفوها بس لا تطولوا..
فتت أنا وجدي وكان متل الولد الصغير اللي متلهف ع شوفة إمو..
والأحلى كانت نظرات ستي إلو..
أصدق مِن هيك نظرات ما شفت بحياتي..

ومسك إيدا وقلا:
هيك يا قطعة مِن قلبي بتقهريني وبتتركيني لأول مرة بحياتي!!؟
ضحكت ستي وقالتلو:
ما إنتَ تركتني قبل يوم من عمليتك..
قال: يعني اخدتي بتارك!!؟
قالتلو: لا، وما رح إتركك بالمرة..
وأنا مستغربة كيف علاقة عمرها 45 سنة وبعدا كلا حُب وحنان وإهتمام!!
وبالرغم مِن كل الظروف الصعبة اللي مرقوا فيها، بعدن كأنو ببداية التعارف والغرام..

بهالوقت إتصل خطيبي وكان معصب لأن ما عم رد عليه من الصبح،
وأول ما فتحت الخط ما خلى وما بقى!!
وتذكرت جدي لما قلي كيف إستمرت علاقتن وإنو الإحترام أهم شي..

قمت رديت ع خطيبي وقلتلو:
ما بقى تغلط معي!!
تفاجأ وقال: شو وعيت كرامتك هلق!!؟
هون أنا عصبت بزيادة وسكرت الخط!!

ﻃﺒﻌﺎً ب 10 دقائق كان باعت 100 رسالة سب وشتم..
وأنا سرحانة بجدي ماسك إيد ستي وهي نايمة وهو عبيصليلا..
وبلحظة إنهمرت الدموع من عيوني،
بكيت مع جدي..
بكيت ع ستي،
بكيت ع حالي!!
هلق خطيبي بحبني!؟؟
هيدا هو الحب!!؟
ولا الحب متل نظرات جدي لستي!!؟
خوفو عليها..
حبو إلها..
وكيف هالعمر قضوه مع بعض بإحترام..

وصلت ع البيت وطبعاً خطيبي بعدو عم يبعت بهالرسائل ويبهدل!!
وبلحظة وقفت كل تحضيرات العرس!!
بلحظة إنتهى كل شي..
وبلغت أهلي واعتذرت من خطيبي وتمنيتلو ايّام أحلى وبنت أحسن مني..
بلحظة ما فيها ضو قمر انتهى كل شي وأنا كنت مبسوطة..
وعم فكر بحياة جديدة وحُب حقيقي جديد كلو فرح واهتمام واحترام..

واليوم أنا قاعدة مع زوجي حبيب قلبي،
إجت بنتي وقالتلي: ماما بحبك..
قلتلا شو في!!؟
قالتلي: البابا بقول إنو بيحبك وكرمال هيك إنتِ بتحبيه..
وقتها عرفت شو يعني الحب والإحترام!!
شو يعني تتزوجي يلي بدك تختيري معو!!
اللي بدك ولادك يكون ابوهم قدوة الهن بكل شي..
واللي ما رح تخافي إنو شي يوم يجرحك أو يقلل من إحترامك قدامهم

 

[دانسميز]

قصة جميلة وفيها عبرة وموجعة.... سلمت يداك ?

 

[أنثى بعطر الورد]

ويداك اختي دانسميز نورتيني ?