قاطعوا الكوفيرات...........

[موجة غلا]

...يغلق لانه منقـــول....​

قـــــــــــاطعــــــــــــــــوا الكـــــافيـــــــــرات

ياهلا ومرحبا بـ..بنات خفووق....
لي مده مادخلت هالقسم ....​

قلنا اليوم نمر ونسلم....​

انشاء الله تكونوا بخير....​

وبمااني مااعرف بالمقدمات بدخل بالموضوع على طول.....​

اكيد سمعتوا او قريتوا بالحمله اللي مسوينها بنات السعوديه ,....​

لمقاطعة الكوفيرات..>>>ياحبني لكم يابنات ديرتي.....​

صراحة الوضع مره زاد عن حدّة ..​

ولازم كلنا نوقف ضدّ هالنهب والسلب اللي قاعد يصير قدام عيونا .....​

مو حاطين أي اعتبار لنا ،‘ وكأنو يستغفلونا واحنا نضحكْ ....​

المشكلة أنهم فعلاً عارفين بهالشي .. ويتريقون بيناتهم على هالموضوع ......​

انتم شراااايكم بالموضووع....
انا مع الحمله قلبا وقالبا ....
والله يوفق ويسعد صاحبة الحمله....​

بعطيكم نماذج وانتوا ....فكروا شوي......​

لا يخفى عليكم إن..... إن السبب الحقيقي اللي إنوجد له الميك اب ....​

هو إبراز مواطن الجمال في الوجه .....​

وإخفاء العيوب الموجودة فيه .. بطريقة ماتبيّن انك حاطته اصلا ويصير الشكل ناتشورال وكيوت .....​

راح اعرض عليكم التشويه اللي حاصل واكيد كلكم مرّ عليكم سواء في زواجات او مشاغل وغيره ....​

بسألكم.....​

تشوووفون في هالميك اب جمال.....
نقول كل واحد وذوووقه صح؟؟...
طيب مامرت عليكم مثل هالوجيه في زواجات او مناسبات....​

بالله كم يندفع على هالتهريج.....
اقل من 250 ماااافيه....
وكلهم مثل بعض.صحيح السعوديه احيان تكون اهون لانها تعرف ذووق بنات ديرتها ....وكذا بس الغالب نفس الحركااااات....​

ماااطول عليكم بالحكي ....>>بس من القهر اللي اشوفه ..​

استغلال عيني عينك واستغفال بعد.....​

هذي بعض الصور عن الحمله ....ياليت نكون يد واحده ....​

​

​

الموضوع بدا يزيد عن حده بشكل مخيف....
بنات احنا محاسبين على كل ريال قاعدين نصرفهم....
حاولوا بس تفكرون شوي بالمبالغ وشوفوا وش يطلع معكم...
وربي لو وقفنا ضد هالاستغلال بيعرفون هالكوفيرات....​

كيف يتعاملون معنا....
اول شيء واهم شي باحترام...
وثاني شي وكل شي باحترام...​

بنات والله والله ما تتخيلون ..!​

انا من تجربة شخصية احكي لكم ..​

قبل 5 سنوات ..كانت بدايتي في الجامعة المهم دخلت قسم بايخ واعتذرت في البيت .. ​

وجلست في البيت ..الا مدري وشلون امي ورطت نفسها في شراكة في مشغل !!​

المشكلة مو هنا ..تورطوا مالقوا لهم احد يمسك المشغل ..​

وكلهم إلتفتوا علي بما اني فاضية وجالسة في البيت .. ​

قلت طييييييييب وش ورانا بروح اداوم هناك تجربة جديدة ​

وتبدأ هنا مرحلة إكتشاف اللعب ع عقولنا ..​

ماشاء الله شغل كله مكياج حلاوة شعر صبغة استشوار بديكير مانكير كل شيء في العالم يقــالكم يعرفونه ...!!​

اول شيء ..​

المكياج الله لا يوريكم ..مكياج افلام رعب مو طبيعي !!
وتطلع من عندهم الزبونة وهي فرحاااااااااانة ..
بديت احس انه فيني شيء غلط !!
انا شكلي مو طبيعية ..معقولة فرحانين ..​

قلت طيب مو مشكلة وسااااكته ما ابي اطير اللي يشتغلون ..

المهم في يوم من الأيام طلعت الزبونة وهي مبسوطة وشكلها كان مرعب يا حرام ..​

قالت لي هااااااا اشرايك مش تجنن انا وجهي صار كذا بصراحة هو يبغاله كذا وكذا وكذا ولا هو حلو عموما بس التفاصيل يعني لك عليها .. قالت الزبونة طلبت كذا !!! ​

قلت طيب اوكي هي حرة ..ومرت الايام وجت (بالصدفة) وحدة تبي تسوي مكياج ..​

الا دخلت الغرفة حقت الميك اب ..وقلت لها معليه ادخل معاكي لو سمحتي ابغى اشوف..​

قالت ايه عادي حبيبتي .. ​

قلت حلووووووو ..
المهم الحرمة جالسة تلطخها بالاساس اول شيء..​

يوم الحرمة ناظرت نفسها ..قالت لاااااا وش ذا .. ​

انا في نفسي اقول الحمد الله واخيرا احد اعترف بالإجرام اللي قاعدة تسويه ..​

الا قالت وش ذااااااا ابغى اصير أبيضّ من كذا !!!! حطي اساس زيادة ​

انا كان ودي اقطع ملابسي ومن العصبية تركت المكان ورحت جلست في المكتب وانا اقول ياربيه وشفيه الذوق العام خرب!!​

وبعد كم اسبوع كنت فاتحة التلفزيون واتفرج الا يجي فيديو كليب لـ بيونسي وكان شعرها اشقر ..​

وفجأة طلع (شوشو=الشيطان) وقال يلا يا حنان روحي اصبغي شعرك اشقر اللحين اذا بيونسيييييييييي وهي سمراء لايق عليها كيف انتي !!! اكيد بتطلعين تجنينننننن​

ودامني في المشغل 24 ساعة ليه ما ألعب بنفسي ..طبعا امي محذرتني ألعب في شعري لأنه خلقة ملونّ وفيها اكثر من لونة طبيعي ..​

المهم قلت بس ..وحطيت راسي للشيطان وفجأة طلعت النسخة المشوهة من شاكيرا ..!​

اول شيء قعدت اصيح وقلت لنفسي استاهل انا السبب اجل اشوف شغلهم واروح برجلي.. ​

وبما اني ماشية ورى كلام امي قلت بكابر ع اللي صار واسوي انه عاجبني ..​

رحت البيت ..الا فجأة اشوفهم كلهم متشقلبين ع ظهرهم من الضحك ..​

وامي ناظرت بعصبية كذا ..بعدين جلست تضحك كركركر واااااااااك وااااااااك ..
انا تدمرت نفسيتي ..​

وقررت اكشف كل خفايا هذا العالم الجَشع حق المشاغل ..​

صبغت شعري اسود اول شيء.. ​

ورجعت بكل إحترام للمشغل عشان أكشفهم وأستقعد لهم ع الحبة.. ​

-إكتشفت انه المكياج اللي يستخدموه من ابو ريالين ! ويروحون يشترون الستاند حق أي ماركة ويعبونه بمكياج ابو ريالين ..!​

لما قلت لهم ليه كذا؟ طيب إشتروا لهم ماركة او شيء ..​

قالوا الثنتين لا يا حبيبتي لما تجي وحدة وتبغى مكياج بأرخص ثمن تستاهل ينحط ع وجهها الرخيص.. ​

يشترون التقليد من اللي تجيك في شارع الخزان الظاهر ..​

-إكتشفت انه أول ما تطلعين من الباب رح يحشون فيكي ويقطعون لحمك لين ما تقولين آمين..​

زي وحدة جت تتزين لزوجها , وحطت مكياج وصلحت شعرها ..​

يوم طلعت وتأكدوا انها طلعت , قاعدين يضحكون يقولون الله يعين زوجها بيجلس يشيل كل هالطبقات من ع وجهها وبعدين يقوم الصباح يشوفها ع بشاعتها !​

-إكتشفت انه تنظيف الوجه , إسمه توصيخ الوجه ..​

يروحون أبو ريالين , يجيبون لك ماسكات خيار و مقشر نيتروجينا وآلة بخار وكان الله غفورا رحيما..​

وطبعا انتي مغمضة عينك ما تدرين وش قاعد يصير .. ​

تدفعين 100 ريال و فوق ع ماسك خيار ونيتروجينا !!!!!!!!!!!!!!!!! ​

الله يعافيك جيبي قدر وفيه بخار وحطي وجهك فيه وإشتغلي تقشير بالمقشر وبعدين ماسك عشان تسدين المسامات و شيء عشان تشدين البشرة فيه زي بياض البيضة ..!​

واذا بشرتك مرة تعبانة روحي مركز طبي أعرف بستين ألف مرة من المشاغل النصابين !!

-إكتشفت انهم شايفينا بنك متحرك ..! يعني ما ترخص لك ولا ريال ليه لأنها برأيها انه عندك وهي أولى بها الفلوس ..وشايفة انه شغل يدها يسوى كذا واكثر ..​

بنات والله تقطع قلبي في ليلة العيد ..​

أم حبشية ومعها بنتين وولد صغير .. المهم شكلهم غلبانين .. ​

وولدها توه صغنوننننني ..قالت تبي تستشور شعر البنتين وتفرد شعر الولد ..​

وحنا متفقين انه اناظر فيهم وهي تعطيني السعر..​

المهم يوم ناظرت قالت لي شعر البنت الوحدة بـ 80 ريال ​

والولد فرده بـ 50 ..​

يوم قلت كذا للحرمة قالت لاااااا مرة غالي وحنا كنا نجي دايم هنا للعيد عشان افرحهم واستشور لهم شعرهم ..​

حاولت أقسى واقول هذا بزنس ..قلت لها معليه والله هذي الاسعار..
الموقف اللي ما تخيلته ..انه اخذت عيالها وبكل حزن قالت يلا نروح البيت ..
دوروني هنااااا حسيت نفسي وحشة
قلت لها تعالي تعالي .. كم تبين ؟​

قالت مدري اي شيء بس مو هاالسعر ..

قلت طيب ..​

شعر البنت بـ 30 و الولد بـ 10
انبسطت مرة وانا قلت عيد ليه نكسر فرحتهم ..!!​

وفجأأأأاة تجي وتمسكني ع الجنب قالت هذا سعر؟؟؟ وش تسوين انتي ؟!!​

قلت عيد فرحيهم وسوي لهم شعورهم ..​

قالت وشغل يدي؟ ​

قلت يجيكي راتب صح ولا لأ ..!​

قالت وامسك شعورهم الافريقية بيديني واتعب وانا استشور لهم و افرد للولد اللي شعره #$#!$ وقالت كلام مرة ينرفز ..!!​

قمت قلت لها شوفي يا تشتغلين اللحين ولا بتصل ع امي ودبري نفسك الشهر الجاي..!!​

هذا شغل وإحترمي الاسعار اللي احطها ..

اشتغلت اوكي..بس لو تشوفونها كيف تعاملهم بكل وصاخة , تشد شعر البنت بوقاحة والولد تشتغل كل شوي وتقول اوف اوف ..!!
-اكتشفت انهم يشوفون العيب منا احنا مو منهم لما يطلع المكياج بايخ ..!​

يا تقول هي اصلن بشعة ..! ​

يا تقول هي طلبت مكياج فلانة وش تحسب نفسها إليسا ولا هيفاء وهبي واااااااك كاكاكا ههههه وضحك واستهزاء ..​

يا تقول انتم سعوديات كذا تحبون تبيضون نفسكم ​

ولا يقبلون اي نقد ع مكياجهم ..!








خلاص جيبي اي وحدة تحط المكياج وإنتهينا وشعر اي كلام واي استشوار ..

مكياج المشاغل وصصصصصصصخ جدا !! وعادي يستعمله اي احد ولا ينظفون الفراشي ولا حاجة !​

فراشي الشعر والاستشوار وصخة ومليانة قرف وحتى لو كان المشغل معروف ومشهور.. ​

كم زبونة بتجي باليوم ؟ بيفضون ينظفون الفرشاة بعد كل وحدة ؟!​

المقص كم شعر وحدة قص؟ كل شعورهم نظيفة؟​

الخيط حق المشاغل ؟ نظيف ولا لأ؟
الكحل من جددددددددددددكم تستعملون من عندهم ؟!!!
اذا مرة مغلوب ع امرك وش تسوي وتعرفين وحدة تضبط المكياج ..​

خذي مكياجك معك !!! لا تستعملين من عندهم ولا شيء!

الشمع !! تدرون بعض المشاغل من قوة البخل اللي فيهم ..!​

وش يسوون شفتوا القماشة اللي تشيلين فيها الشمع ..! تخيلوا يغسلونها ويرجعون يستعملونها.. ​

العود اللي ينحط ع الشمع عشان تشيلين منه , يحطونه ع جلد زبونة يرجع يحطونه عليكي انتي وش ضمنك الزبونة اللي قبلك مو مريضة في جلدها؟ سالفة انها تاخذ العود وتحطه ع جلدها وترجع مرة ثانية للشمع اضمني انه كل الشمع صار وصخ!​

طبعا بعض المشاغل وما يخفى علينا يسوون البكيني واكس..​

تخيلي المرأة هذي فيها مرض جلدي من زوجها في المناطق الحساسة ..
تجي تنقله لك انتي وفرضا كنتي بنت بالله وش تفسرين للدكتورة ..
تقولين شمع ؟ تقول لك انتي الغلطانة ..​

طبعا هذي الاشياء سويها بنفسك ماله داعي مشاغل وخرابيط ..

واعذروني ع طولة الرد بس إقتنعوا انتم تسوون احسن منهم بألف مرة ..!​

بشوف ارائكم ...
اشياء حصلت لكم شخصيا...
ياليت نفيد بعض باسماء كوفيرات خبيرات واسعارهم حلوة....
كل الود لقلوبكم....​

يدا بيد لوقف الاستغلال ....​

خلـــوهــم يخســــرو مثل ماخسرونــــــــا​

 

[أناوالقمرأصحاب]

وانا معك ضد هالمشاغل

 

[بنت عز وما تنهز]

معاك ميه ميه بس صدقيني المره في اشياء كثيره محتاجه مثلاام قصه اوتسريحه او-- المفروض الوزاره تتدخل او-- يوحدواالاسعار

 

[Doritos]

أنا والله ودوي اقاطعهم بس وش اسوي محد يزبط فرد شعري الا المشغل على انه مافيه الا شفط كل 6 شهور يشفطون مني 150 ريال وربي يعين شكلي ببدا اسحب عليهم

 

[$لورا$]

يسلمووو حبيبتي

صحح والله شئ يقهررر
بسسس مالنا حيلة

 

[دبدوبه حيل]

والله انك صادقه ياقلبي من جد ناس عديمة احساس

 

[دنيا حظوظ]

والله ياحبيبتي كلامك صح وعين العقل
بقولكم تجربتي الله لايسامحهم
رحت المشغل في شبكة اخويه وماعجبني الميك اب كان فاتح مررررره وصارت رقبتي لون مختلف فطلبت من الكوافيره تعدله ومارضيت قمت وغسلته عندها وكلمت اختي تجيب لي اغراضي عشان الوقت وسويت انا لنفسي الميك اب ويوم شافوني الحريم سالوني مين صلحك قامت الكوافيره قبل مااتكلم وقالت هذا شغلنا قمت وقلت لاوالله كذابه انا سويته ووريتهم الاغراض عشان يصدقو وربي كذا وحده طلعت وماتصلحت
وانا وربي ماقصدت اقطع رزقها بس تستاهل ليه تكذب عيني عينك
وبس

 

[فروووحتي!]

والله صادقه ..
احنا نعرف نسوي احلى .. من جد توبه

 

[●QùîêT şмįŁe●]

المشاغل كلها شي مو زينة انا اكره شي عندي اسمو مشغل اكرهه اكرهه آخر مره رحت مشغل قبل سنه عشان اقص شعري بعدها ما طبيت ولا مشغل الا عشان تفصيل مريول << يازين ايام الطفوله خخخخخ
حتى الحين مره شايله هم وش اسوي في زواجي ماعندي احد يصلح لي مكياج وتسريحه والمشاغل شغلها ..... << احس اني ببكي

الله يحاسبهم

 

[جروح ساخنه]

والله اختي ما حد يرضى احد يضحك عليه
صور الميك اب صدق مو جميل
واكيد ما حد يرضى يسوى فيه كذا
بس كل واحد ع حسب اقتناعه بالميك اب
في اشياء ما فهمت شو تقصدين منها مثل المشغل ما اعرف شو قصدك او شو احنا نسميه يمكن تقصدين مسطلح مثل الكوافير
بس ف النهايه ما كل شي نفس الشي
واكيد البعض ويمكن الكل يتبع العادات السليمه والصحيه للعمل ولا ما كانو يفتحون هالكوافير والمشاغل بدون تصريح
ف النهايه هذه وجهة نظري
وتقبلي مروري

 

[بصمة ذهبية]

والله صادقة شيءيقهرررررررررررررررررررررررررررررررررر لازم نحط لناحل على الناصبات الااكلونااكل حسبي الله ونعم الوكيل

 

[ملاذالشوق]

انااااا معك ومو معك!! شوفي ..شيء عن شيء ثاني ..
فيه مشاغل غير عن بعض فيه مشاغل خرابيط بس لطغ الوان وتقوول ميك اب لا .. بس فيه مشاغل الميك اب روووعه كانك على الطبيعه ورووعه صح بس حرام نقوول كلها لا فيه شيء يفرق عن شيء ..
تقبلي مرووري لا عدمناك ... خيتوو

 

[رامااا2009]

انا معاااااااااااااااااااااااااااااكم ضدهم
والله يشفطووووووووووووووووووووووووووووووووووووون شفط موب صاحي
خاااااااااااااصه بالشرقيه

 

[اوراق ملونة]

انا اشوف كل واحد....عنده عقل صح...........

ال مايبى تنسرق امواله .....لايروح...........

وتعلموا اتحطون لنفسكم ...بيكون انظف وارقى واحلى...........

وفى نفس الوقت الكوافيرات بتضطر تقلل اسعارها..بس هذا يباله صبر ووقت

 

[سوما الرياض]

احم احم انا كوفيرا بس ترا مااستهبل الااذا طلبت الزبونه هع هع هع
الا ان في حريم لازم يكون المكياج عندهم زي اللي في الصور والكريم الاساس أفتح درجه عوجه الارضومهما اقنعتيها ماتقتنع عشان كذا تضطرين تسوين اللي تبيه اتذكر مره جتني زبونه عمرها تقريبا 27 المهم جت تسوي بروفه طلبت مكياج صارخ جدا جدا جدا والكحل واصل للإذن وسويت لها نفس الصوره بس على اخف لأن من جد كانت الصوره بشعه المهم ماعجبها نادت العامله لثانيه وقالت ابي افخم ومسحناه وجت زميلتي تصلحها وش أقولكم بس والله ان الحاجب رفعته فوق الحاجب الطبيعي بمسافه بعيده وحطينالها تقريبا 5الوان والكحل مابقى الاكم خطوه ويوصل لإذنها تقولون رايحه لحفله تنكريه ويوم شافت نفسها وش تتوقعون قالت
قالت:مافي أفخم من كذا؟
احنا انصدمنا وسكتنا وبعدها ماعد جت تقول مكياجكم خفيف هههههههه
بس انا الحمدلله اشتغل في البيت يعني موفي مشغل واكثر زبايني بنات عماني وجماعتنا
اول بداياتي كنت في مشغل وكل اللي ذكرتيه فعلا كان يصير خصوصا الحش لمن تطلع الزبونه ياااه حدث ولا حرج
بس صدقيني في مشاغل تهتم بالنظافه من ضمنهم المشغل اللي اشتغلت فيه والله كانو نضيفات وماكان في اجانب كلنا سعوديات وبعدين في بلدية تجي من فتره لفتره تشرف عالنظافه وتشوف الامشاط وتحسب مخالفه اذا كان وسخ والادوات وسخه
بس فعلا اللي ذكرتيه يصيرررر بس لازم كوفيره للتسريحه والقص موالكل يعرف يضبط نفسه والا المكياج سهل

 

[العجيبه]

صآآآآآآآآآدقه بس كلها تكون في ذمتهـــــــــــم ربي راح يحاسبهم ..

 

[FloOowers]

عن نفسي بطلت من زمااااان اسوي ميك اب
عند الكوافيرات >>>>> باستثنااااء الخبيرات في التجميل في حالات ناااادره
مو خبيرات في التخبيص!!!!!

الحمدلله انا احب المكياج واتقنه
واحاول ابرز جمالي مو زي بعض الكوافيرات
يسووا مننا شخص ثااااني مخيف

اشكرك على الطرح

 

[وفآء]

كلآمكم صحيح 100%
وآلله شغل يدي آحسن بمليون مرة ,
يعطيكم آلف عآفيه ,

 

[محبة النبي محمد]

:icon26:تصدقي قلتي كل اللي في خااااااااااطري وانا من زماااااااان تركتهم :icon30:..
واصلا حتى من قبل ما ني راعيت مشاغل الا ناااااادر:bigsmile: ..
وجهي وجسمي اشيله انا بالبيت:icon31: ..
حواجبي اشقرها انا واعمل صبغه لشعرررررري انا :blush-anim-cl:؛؛؛؛؛
واستشور شعري انا عاد شعري ناعم مره ما يحتاج الحمدلله:icon26: ..
واعمل مكياااااااااج انا ياربي لك الحمد والشكر ...
والتسريحات اخذ تسريحات من النت تسريحات راقيه جدا وكيوت ناااااااعمه مره واعملها لشعري اذا كان اللبس يناسبه الرفع :bigsmile:
والحمد لله اقسم لك بالله اني مشهوره انا ووخواتي
وكلن يتكلم بذوقنا وانقتناااااااا الحمدلله :icon30:..
تصدقي هالمكيااااااج المخيف اذا شفته في المناسبات استغرررب واقول في نفسي معقوله انسانه بكامل قواها العقليه تحطه !!
عجيب صرررررراحه شويه مهرج بجد مخيف وبشع بشكل :sad_1:..
المكياج حلاته خفيف او ثقيل بسنع يكون مكياج راقي مو كذا :detective2:

 

[موجة غلا]

والله اختي ما حد يرضى احد يضحك عليه
صور الميك اب صدق مو جميل
واكيد ما حد يرضى يسوى فيه كذا
بس كل واحد ع حسب اقتناعه بالميك اب
في اشياء ما فهمت شو تقصدين منها مثل المشغل ما اعرف شو قصدك او شو احنا نسميه يمكن تقصدين مسطلح مثل الكوافير
بس ف النهايه ما كل شي نفس الشي
واكيد البعض ويمكن الكل يتبع العادات السليمه والصحيه للعمل ولا ما كانو يفتحون هالكوافير والمشاغل بدون تصريح
ف النهايه هذه وجهة نظري
وتقبلي مروري

قصــــــــــــدي كوفيـــــــــرهـ
شكــــــرا على مرورك نورتي صفحتي