معادلةصعبة
ملكة متميزة
- إنضم
- 2009/06/24
- المشاركات
- 2,505
في حيّنا (( ملقوف )) .. !!
للكاتب الاستاذ
عبدالرحمن بن حمد العتيبي
للكاتب الاستاذ
عبدالرحمن بن حمد العتيبي
:
:
مع كل صباح تقابله وأنت تهم بركوب سيارتك ..
ويسألك وهو يعلم أنك ذاهب ترزق الله ..
الى أين تذهب بصيغته الخاصة (( على وين مع هالصبح )) .. ؟؟
وترد بينك وبين نفسك يالله صباح خير .. !!
يوقفك لمدة نصف ساعه على الأقل ..
يسوق لك تقرير بأهم أحداث اليوم المنصرم .. وتوقعات اليوم الجديد ..
البيت الفلاني (( ولدهم )) أوذاني بالتفحيط ..
اذا مر بي فالشارع حذف السيارة علي ..
والبيت الأخر (( أمهم )) نقلوها للمستشفى لأرتفاع السكر معها ..
وراعي البقالة يبيع (( التتن )) على الوراعين ..
واللي ساكن بأقصى عاير في الحارة البارح كان عنده عشاء ولاعزمني ..
وأنا اقول في نفسي بعذره .. أجل يجيب (( الغثاء )) لنفسه ولضيوفه ..
وقبل أن اكمل حديثي لنفسي يفاجأني بقوله :
بس أعجبك (( قلطت )) عليهم وتعشيت معهم وأخذت علومهم واحد واحد .. !!
حاولت التخلص منه .. وركبت السيارة وقلت عن (( أذنك )) ..
وبادرني بسؤال يكرره له عدة أيام : (( الشنطة )) اللي في المرتبة الخلفيه وشهي له .. ؟؟
وجاوبت ذات الجواب وقلت : فيها أوراق خاصة .. !!
ويرد : شلها ترا الحرامية كاثرين هاليومين ..
بيشفونها ويحسبون فيها (( فلوس )) ويكسرون (( قزاز )) السيارة ..
والا أنا خابر أن ماعندك الا (( الضعوي )) ..
تراهم كاسرين قزازة سيارة ولد عم لي قبل مده ..
قلت ولد عمك هذا عنده (( ضعوي )) والا ماعنده .. ؟؟
قال : أأأأأيه .. بنبرة حادة ..
وبدأ يقص لي قصته بالتفصيل (( الممل )) ..
ركبت السيارة بعد أنفلاتي منه ..
وقررت أني أشيل الشنطة عشان أختصر 10 دقايق من قرقه اليومي ..
ومن الغد يصيدني في نفس الموعد ..
وبعد نشرته اليومية المعتادة يطل في المرتبة الخلفية ولايجد الشنطة ..
فيسأل : الشنطة وين .. ؟؟
أرد عليه : شلتها في البيت عشان مايكسر قزاز السيارة ..
فيسأل بأستغراب ممزوج بشي من (( الوجل )) المصطنع : عساك ماخليتها في الملحق ..؟؟
مثل ماسوا ولد خالي ولقوها (( الوراعين )) ورموها في نار المشب ..
وأحترقت أوراقه المهمه اللي فيها شهاداته ودفتر (( العائلة )) ..
وبعد نطق العائلة (( رقّص )) حواجبه من باب الأستفزاز ..
قلت : مافيها أوراق مهمه ولاشهادات ولاعندي دفتر عائلة .. وطبعاً مارقّصت حواجبي مثله .. !!
قال : خابر أن ماعندك الا (( الضعوي )) .. !! وركبت سيارتي ومشيت .. !!
من الغد تفاجأت أني مالقيته بنفس الموعد ..
سألت عنه وقالوا أنه (( منّوم )) في المستشفى ..
بعد ألتهاب (( المرارة )) عليه .. قلت من (( المرارة )) اللي سقاها الناس ..
ذهبت لزيارته ووجدته خارج للتو من تأثير البنج ..
ولسانه ثقيل وأنينه واجد وحيله مهدود ..
سلّمت عليه وأول ماجلست قال :
الشرطة مامسكوا الولد اللي أوذانا بالتفحيط في الحارة ..
قلت : لا الشرطة .. ماعندها الا (( الضعوي )) ..
وهنا (( رقّصت )) حواجبي وطلعت .. !!
********************************
