دلوعة مملكتنا
New member
- إنضم
- 2006/12/19
- المشاركات
- 1,003
فن الدعاية والتسويق .. من منظوري الخاص ..
اهلا ..بنوتات .. اتمنى انكم تستفيدون من مواضيعي .. يارب ..
كثير من التجار عنده راس مال .. ويفتح مشروع ولكن يفشل
وبعض من التاجرات بدت بالتجارة وتوقفت بعد فترة بسيطة بسبب الفشل او بالاصح عدم تصريف بضاعتها بسرعة او لم تجد مردود .. منها ..
ليش ؟؟ وين يكمن السبب ؟؟
السبب الرئيسي في هذا الفشل التجاري هو اختفاء عامل اساسي هو التسويق ..
انا باتكلم عن التسويق للبضائع المنزلية بشكل عام(بكل المسميات ) كتاجرة انترنت .. او تاجرة شنطة او تاجرة بالبيت ..
يعني مو كل من عندها .. فلوس قدرت تشتري بضاعة .. بتنجح .. لا لا الموضوع اكبر من كذا ..
ومهم بعد نوع البضاعة المشتراة .. هل تناسب المنطقة ؟؟ هل هي من الاحتياجات بمنطقتها ؟ جودتها ؟؟ سعرها ؟؟
نفترض كل الامور السابقة ضبطت .. بس توقف البيع ..في موضوعنا هو المشكلة ..؟؟
لان البضاعة بتقعد بالكبت او بالدولاب وما بتمشي نفسها (لان ما عندها رجول خخخخ )اذا ما مشيتيها انتي ياصاحبتها
نبدأ نتكلم عن طرق التسويق :
( 1) لا تنتظري الزبونة تجيك .. انتي ابحثي عن الزبونة .. اوصلي لها لين عندها .. كيف ؟؟
*أ*اعمل ( بروشور )كتالوجات صور واسعار وارسلها رسايل خاصة على قد ما اقدر واكثر من منتدى ..
بهالطريقة انتي جيتي للزبونة ونتوقع لابد يجيج زباين ما كان عندهم نية الشراء ولكن لما شافو صور البضاعة عجبتهم واشترو ..
*ب*لو كنتي تاجرة بالمنزل خلي خدامتج او استاجري مندوبة تدور على البيوت .. لابد من كل بيت بتطلع لو بمبلغ بسيط .. من غير انج عرضتي لما يحتاجون بيتصلون عليج ...بهالطريقة انتي جيتي للزبون ما انتظرتيه يجيج
** توصيل الطلبات باليداو بسهولة طبعا في حدود الامكانية اللي عندج .. هالشي يعتبر عامل مساعد بعد
(2)كتابة موضوع بشكل متكامل بالمنتديات بالنت يشتمل على ( عنوان جذاب ملفت - نبذة مختصرة عما سوف يعرض – الشروط ان وجدت – الصور الواضحة – الاسعار مع العملة – طريقة التواصل( ايميل او تليفون ) – طريقة الدفع وطريقة الاستلام )
بنستلم كل نقطة بالتفصيل :
*أ* طريقة كتابة العنوان الجذاب.. ماتكون مملة ورتيبة .. وواضحة ..
غالبا بالنسبة لي احب يكون اغلب العناوين على هيئة تساؤل .. مثلا :
×تحبين زوجج ؟حابة تهادينة شي حلو ؟؟ عندي لج كبكات ماركات .. واشيا اخرى ..×
×تمللتي من حياتك الزوجية ؟؟ تبين اتجددين ؟؟ تعالي عندي ×
×معاي انا انتي غير مثل جدة غير ..تعالي شوفي اش جبت لج ..؟×
×الدفعة ال0000 من فناجيل الماركات بعد الاقبال الشديد .. لحقي عليها ..×
هذي امثلة لعناوين جذابة .. وممكن بعد تلاقين عناوين جذابة ولكن المحتوى ما يسوى .. بس جذبتي الزبون انه يقرا عروضج ..
** الصور :
صار الحين التصوير ولله الحمد متيسر للجميع الله يخلي التلفونات ..
بس مواي تليفون تصويره واضح .. استخدمي مثلا انا كنت مخصصة n90 نوكيا تصويره حلو وواضح .. او اي جهاز جوال بكون فيه فلاش وزوم حلو ..
حطي خلفية سادة او للجذب حطي مخدة او كورنر حلو ببيتج حتى لو التسريحة او الكرسي وحوله اكسسواريز بشرط ما يغطي على الغرض المراد تصويره ..
خذي اكثر من صورة لانه ممكن بعد ما تتكبربالكمبيوتر ما تطلع حلوة او واضحة فيكون عندج بديل ..
وخذي صور اكثر للتفاصيل الجانبية او الداخلية ..
ومهم جدا للمصداقية وضع شيءلمقارنة القياس او الحجم ستاندر وغالبا نستخدم تليفون لانه احجامها معروفة للجميع بكل مكان .. او غرشة ماي صحة بعض الاحيان . .
**طريقة التواصل :
يفضل اذا توج جديدة وما عندج زحمة ..تتواصلين مع الزبونة مباشرة بالتلفون او بالمسنجرلتقليل التكاليف .. لتطمن على حسن اسلوبج وامانتج .. وتجاوبينها على كل التفاصيل وقد تقنعينها بسلع اخرى فبدال الطلب منتج واحد يصير اكثر اكثر من منتج اعطيتيها فكرة اوضح عنهم بالتواصل .. المباشر ..
ولكن اذا كنتي مضغوطة والمعلومات واضحة .. خلي التواصل بالرسالة الخاصة ا و الايميل ..ولكن ارجع اشدد تواصلي بمسج على الاقل انه تم ارسال طلبيتج اليوم الساعة كذا .. حتى تجهز الزبونة نفسها ..ماديا ومعنويا وما تطنش او تكون مسافرة في يوم وصول الطلب او عندها ظرف او نص الشهر مفلسة .. الخ ..
فمن حقها ومن صالحج اتبلغينها وقت ارسال الطلب واذا كان مناسب لها .. او لا.؟
من صالحج حتى لا تطنش وتخسرين قيمة التوصيل .. او قيمة الاتصالات والمسجات الخ مع المندوب ..
** الاسعار:
تنكتب بالمووضوع افضل .. ليش ؟؟
لان بعض الزباين ما تتجرأ تسال عن السعر لان تخاف يكون غالي عليها وتنحرج .. وبعضها تجزم ما دام ما انذكر السعر بالعام معناته غالي بس تبي تصيدنا على اللفة خخخخخ ..يعني تبي تجر الزبونة وبعدين تدبسها فيبتعدون عن السوال .. وبعضها ما تسا لخوف من الكلمة اللي صارت معتادة ما احلل من تسالني عن السعر وهي ليست جادة بالشراء فبلاها سوال احسن ..
** طريقة الدفع و التوصيل jمترابطتان
افضل نظام عالمي انساني هو طريقة سلم واستلم .. باليد ..ولكن ..
(أ) اذا كان التوصيل للبيت مجاني( سلم واستلم ) ( مثل ما قلت بموضوعي السابق : يوم واحد اتواعد مع 5 او 6 زباين بنفس الموعد ونفس المكان اللي يكون قريب للكل ويفضل مجمع تجاري حتى لا تتمللين من الانتظظار وحتى الزبونة تكون متطمنة ما تخاف الانفراد مع التاجرة ..
(ب)واذا كان الدفع وقت التسليم بعد احلى .. ولكن بلغي الزبونة بنفس يوم الاستلام تجهز المبلغ ..
(ج)اوالدفع بالتحويل بالصرافة او بالايداع البنكي .. بحسابج خلي لج حساب خاص فيج احسن تستفسرين يوميا من اللي اودع الى اخره لايكون لزوجج او لاخوج ويكسل يسال لج عن الايداعات وتتتلخبط امور البنات ..
وهنا طريق الويسترن يونيون طريقة عالمية وسريعة مثل البرق نفس لحظة التحويل يمكن الاستلام وباشرة تشحنين الغرض .. بدون انتظار معاملة ايداع البنك .. ولكن لها سلبيات لازم يوميا تطلعين تستلمين تحويل
واي استفسار اكثر او ادق عن طرق التحويل انا حاضرة ..
(3) الاشتراك بكثير من المنتديات ..
لانه ممكن يجيك على الاقل من اي منتدى زبونة وحدة . اقل حاجة .. هذي ..
وفيه طريقة انا كنت اسويها .. اسوي بحث بالجوجل .. مول .. او ركن تسوق .. تاجرات قطر .. بيع وشراء .. الخ .. وكل اللي يظهرون لي اسجل . معاهم .. واضيفهم بالمفضلة ويوم اكتب موضوع .. كوبي بيست على طول كل المنتديات ..
والشغلة ما تغلب .. ولا شي .. كلها كوبي بيست ..وكل يوم طلي على صندوق الرسايل بالمنتديات واحد واحد ..
وللتنبيه الهام
( ينكتب موضوعج بالوورد اولا وتحتفظين بنسخته عندج لان ممكن المنتدى اللي كتبتي فيه يصير فيه صيانة او يقفل الخ .. والصور ايضا تحتفظين فيها على جهازج .. لان التحميل فترة محددة وتختفي الصورة من الموضوع )فيكون اللاصل موجود .. وممكن تكتبين الموضوع بصيغة جديدة .. وبصور الاصلية مع تغيير الخلفية او بعض التعديلات ..
( ينكتب موضوعج بالوورد اولا وتحتفظين بنسخته عندج لان ممكن المنتدى اللي كتبتي فيه يصير فيه صيانة او يقفل الخ .. والصور ايضا تحتفظين فيها على جهازج .. لان التحميل فترة محددة وتختفي الصورة من الموضوع )فيكون اللاصل موجود .. وممكن تكتبين الموضوع بصيغة جديدة .. وبصور الاصلية مع تغيير الخلفية او بعض التعديلات ..
((4)) التوقيع :
خليه توقيعك يعبر عن بضاعتك .. بصور اذا كان مسموح لك .. او بعناوين وروابط عروضك التجارية ..
وين تكمن فايدة التوقيع ؟ ؟ مثلا لو تبيعين ادوات مطبخية او منزلية شاركي باقسام الامهات واقسام الاطباق حتى لو بكلمة تشجيع .. او دعوة حلوة .. او بكلمة طيبة ..
لو تبيعين ادوات مدرسية او بنوتية .. ادخلي قسم البنات .. والدلع ..
ولو تبيعين مكياج قسم التجميل .. مكان هام للماكييرات .. والبنات .. اللي بيلفتهم عرضج بالتوقيع ..
الخ ..
((5))الاطلاع والمعرفة والشمولية :
دايما اطلعي على قسم التسوق وما الجديد فيه .. لانه ممكن تلاقين بضاعة جديدة حلوة اوخصومات تفيدج .. او ممكن تلاقين اسعار منافسة لبضاعتج فتحسنين عرضج بجوائز او خصومات .. الخ ..((6)) الموضووع ومتابعته ..
يجب المتابعة المستمرة والردود فيه لازم تكون يوميا .. للتواصلين مع الزباين وتعطين موضوعج فرصة اكبر للبقاء بالصفحة الاولى .. احذري او ابتعدي عن كتابة للرفع .. او فوووق .. اب .. وينكم بنات ؟؟ يعني اشترو مني غصب .. محد شرى مني ..
هذي الكلمات تقلل من قيمة البضاععة بشكل ما .. لانه بيقولون بضاعتها طايحة بكبدها .. وتبي تصرفها ..
كما انج تظلمين باقي العروض لاخواتج التاجرات اذا كل شوي بترفعين ..
وتكون ردودك لبقة .. وحلوة .. وممتنة .. للي طلو على موضوعج عشان يعيدوها .. ويكتبون لج عشان كلامج الذوق ..
فيه طريقة انا اتبعها .. لما يكون مثلا عندي 5 ردود كلهم يقولو بالتوفيق يعني مرور بس مش طلب او استفسار ..
ارجع ارد على واحد بس كل يوم .. يعني اليوم اقول شكرا فلانة على المرور الرائع والكلمة الطيبة مع اقتباس ردها
بكرها او بالليل اكتب نفس الطريقة على الرد الثاني واللي بعده وهكذا .. بحيث يكون رفع الموضوع له معنى ..
(( 7 )) وضع مندوبات ثقات /
اذا كان فيه امكانية تتوزع البضاعة على المندوبات بعد الثقة فيهم واختيار ناس خبراء (مندوبة فهلوية او لهلوبة) مش ناس توها بتبدا ومالها معارف وتستحي ... اما وضع المندوبات وحبذا لو من المعروفات بكثرة تعاملاتهم .. وارسلي الكمية المتوقع انها تروح بدون دفع مسبق حتى تكون التاجرة المندوبة مرتاحة اولا وحتى يكون الطلب جاهز في حال انطلب لان الانتظار ينفر الزباين وينسون اللي طلبوه او يتكاسلون هم التحويل والبريد فلو كان ببلدهم على طول ياخذونه ..
((8)) الاحتفاظ بارقام الزبائن ( بعد موافقتهم طبعا )
ارسال مسج دوري بالجوال يحتوي البضاعة الجديدة ..او عروض التخفيضات والخصومات او السحوبات .. او حتى التهنئة بالمناسبات مثل الاعياد او الجمعة او رمضان .. تحسس بالالفة والراحة .. والتواصل بينج وبين الزبونة .. ((9)) التعاون مع بعض التاجرات المقربات الطيوبات ..
كيف ..؟ يعني يصير تبادل للبضائع بينكم وتسويق لكل وحدة منكم .. للاخرى .. فيه فترات ااذا جاني طلب لعية زوجية او اي غرض احسب الحبة للتاجرة بسعر مخفض .. حتى تستفيد وترجع تسوق لي معاها عند زباينها .. لان اذا ما خفضتي وهي تطلع بدون فايدة فبتوقف الخدمات ( وكما قيل بالمثل (( لا يخدم بخيل ))..
وطريقة اخرى .. ورقة دعائية لكل تاجرة بارقامها وصور بضاعتها او بزنس كرت لكل تاجرة ينحطون في كيسة كل طلبية تجيكم كلكم يعني كل وحدة تسوي دعاية لغيرها .. والحمدلله استفدت واستفادو معاي ..
(10)الزبونة الذهبية او الخيط الذهبي ..
هي الزبونة اللي تكون لسانها حلو .. وتسوي دعاية حلوة .. ولها علاقات وتجمعات عائلية او بدوامها .. تكون لي كخيط للي بالدوام .. وممكن من الودامات كل وحدة تودي لاهلها بيوم جمعتهم .. والمهم التوصية على الزبونة الذهبية هدايا مجانية خصم .. نسبة من المبيعات .. تخليها تتشجع توسع دائرة الزباين اكثر وبالاخير انتي المستفيدة ..هذا اللي اسعفتني فيه ذاكرتي اذا تذكرت شي لاحقا باكتبه ..
واي خدمة انا حاضرة ..
