فلا تتركي بيتك.ولا تضغط عليها فتخرج

[راجيه الرضا]

من أهم النقاط إللي نفسي كل الأزواج تفهمها ، إنه من حق زوجتك إنك توفر لها البيئة الأمنة أنها تقدر تغضب جوا البيت
يعني إيه ؟

كلنا متفقين _ رجال ونساء_ إن فكرة ترك الزوجة لبيت الزوجية مع كل خلاف ، هى فكرة سيئة جدا وغالبا بتتسبب في ازدياد المشكلة وتضخيمها ، حتى لو كانت المشكلة تافهة ويمكن حلها بعد هدوء الطرفين والمعاتبة بينهما بعد ذلك
وإن ترك الزوجة لبيت الزوجية غالبا ما يتسبب في إدخال أطراف خارجية ممكن تُزيد الخلاف ولا تصلحه ، خاصة وإن دخلنا في دائرة
" هى سابت البيت فترجع لوحدها " و
" لو رجعت لوحدي هاقل من كرامتي والمفروض جوزي يرجعني "
.
وبالرغم من اتفاقنا على نصح الزوجة بعدم ترك البيت ، لكن للاسف ممارسات بعض الأزواج بتدفع الزوجة لده وتخليه هو الحل الوحيد
ازاي ؟
يعني زوج وزوجة حصل بينهما خلاف ما ، فالزوجة زعلت وأخدت جنب في البيت
فجأة الزوج يبتدي يمارس كل أنواع سخافات الكون عليها وقت الخلاف
( يقلل الأنفاق أو يقطعه - كل ما يشوفها يفضل يقول كلام سيء لا يليق - إهانات مبطنة أو ظاهرة بدون سبب - يزغدها مثلا بشكل مهين لو مرت من جانبه - يكسر حاجة بتحبها - يحملها ما لا طاقة لها به علشان عارف أنها مش هتعرف تجادله ...... )

دي بعض الممارسات وأحيانا الزوج يمارس معها كل الأنواع دي ، فضلا عن بعض الأزواج الأخرين اللي بيعمدوا للعنف الجسدي المباشر وقتها
.
فجأة الزوجة تحت وطأة الضغوط دي ، تلاقي المهرب الوحيد لها هو الذهاب لبيت أهلها ... وندخل في الدائرة اللي صعب نخرج منها ، بالرغم من أن الخلاف قد يكون بسيط في أصله وسهل إصلاحه ببعض الصبر والعتاب
...
في حالة حدوث خلاف ، مش مطلوب منك كزوج غير إنك تتجنبها _ إن كان هذا مفتاحها_ بس في نفس الوقت لا تقصر في واجباتك الأساسية من إنفاق ورعاية وتوفير منزل فيه أمان لها
مش معنى أن فيه خلاف ، إنك تسيب بيتك
لأ خليك في بيتك عادي ، ومارس حياتك الطبيعية في وجودها ، وبالشكل ده ومع وجودكم قدام بعض وكل واحد فيكم _ برغم الخلاف_ بيمارس واجباته بغير تعمد تقصير أو استفزاز ... فجأة هتلاقي كلمة حلوة طلعت منها ، ابتسامة منك خفيفة بعد زوال الاحتقان
وفجأة هتلاقي المشكلة انتهت كأنه لم يك بينك وبينها أي خلاف