فضفصة و طلب مشورة

[ديمة ديمة]

السلام عليكم

انا من متابعي المنتدى الرائع هذا ..و الي لقيت فيه أشياء كثيرة فادتني .. و لهالسبب سجلت .. لأني حبيتكم .. و حسيتكم أهل .. حسيت اني أٌدر أحكي لكم الي بخاطري .. حسيت اني أقدر أستشيركم ..

ما عندي مشكلة كبيرة الحمدلله .. لكن هي شوية مشاكل صغيرة ممكن تؤدي لنهاية سيئة ..

اسمي ديمة .. عمري 23 سنة .. متملكة .. امي و ابوي مطلقين من زمان ..

قبل فترة تقدم لي شخص كان يعرفني في الدوام .. حبني رغم انه ما شافني .. بس من تعاملي معه .. ما كان بيننا اي علاقة حب .. كان كل احترام و عمل فقط ..

المهم بداية اهلي رفضوه لسبب بسيط ان قبيلته ما تناسبنا .. و كمان لانه من عائلة بسيطة جدا .. و انا اهلي وضعهم المادي فوق الممتاز ..

بس انا كنت مقتنعة فيه .. لسبب واحد لانه جدا خلوق .. و اول ما اعجب فيني تقدم لي مباشرة بدون لف و دوران برغم انه باقي صغير و ما كون نفسه ..

طبعا واجهت أهلي و مريت بأسوأ فترة بحياتي لأني كنت أستخير كثير و في كل استخارة أحس ان الله يقربني منه اكثر و احس انه أنسب انسان لي .. تمسكت فيه و هو كمان تمسك فيني رغم رفض أهله لزواجنا لأنهم ما تعودو يزوجون من برا العائلة

طبعا صارت مشاكل كبيرة وقتها ..

و لكن الحمدلله بتيسير و توفيق من الله تمت الملكة ..

بعد الملكة اكتشفته أكثر و في كل مرة أتأكد اني ما كنت غلطانة أبدأ ..

الحمدلله يا رب ..

بعطيكم نبذة عن زوجي عشان تعرفوه و تحكمو ..

طبعا من جميع النواحي أشوفه كامل .. شكله وسيم .. محافظ على صلاته و حافظ للقران رغم انه شاب عادي يعني مو ملتزم .. طموووووووح لابعد حد .. يخاف ربه في كل اموره ..

فوق هذا كله معيشني ملكة .. ما عمري طلبت منه شي و رفض .. و الله لو أطلب لبن العصفور جابه لي .. يشوفني أجمل و أحلى نساء الأرض ..

ما عمره زعلني بشي .. أقسم لكم بالله لنا أكثر من 6 شهور متملكين .. ما عمر زعلنا من بعض استمر أكثر من ساعة وحدة ..

يعني انسان كامل و الكامل وجه الله ..

عشت معه أجمل أيام عمري

لكن للأسف .. نقطة عدم تقبل اهلي واهله مسببة مشكلة بحياتنا ..

يعني اخواني مثلا دايما ينظرون له بنظرة دونية .. رغم انه ثقافة أعلى منهم .. وظيفة جدا مرموقة .. سيارته أحسن منهم .. و فوق كل هذا مدلعني رغم اننا في الملكة بس ..

بس لا زالت عندهم نظرة ان اهله غير و من قبيلة عادية .. و من هالامور الي ترفع الضغط ..

اهله العكس .. يشوفوني مغرورة و شايفة نفسي مع اني و الله ما قصرت معاهم بشي و اعاملهم مثل اهلي ..

المشكلة الي اعاني منها الان .. ان زواجنا قرب و الى الان ما سوينا و لا شي .. و السبب اهلنا ..

انا امي بعيدة عني كثير .. ابوي مشغوووووووووووووول .. عماتي ما يصدقون الزلة عشان يبدون حش و كلام يعور القلب من وراي ..

ما خلو كمة شينة عن زوجي ما قالوها و لا عيب ما طلعوه فيه و اخرتها كل واحد جاي يتلزق فيه عشان يوظفه لاني زي ما قلت لكم وظيفته مرموقة ..

طبعا احس اني تعبانة ما اعرف من وين ابدا .. لان اهله كمان متخلين عنه و ما حد فكر يساعده بشي .. و فوق هذا كل شوي يطلبون شي لانهم عارفينه يجمع للزواج ..

الحمدلله ربي ميسر امورنا .. و مو محتاجين لاي احد .. لكن و الله العظيم كثرة النقد و الكلام يذبح ..

الي يقولي تراه بيلعب فيك فترة و يرميك .. بس عشانه حبني قبل ما يتزوجني .. و الي يقول مستحيل يعيشك بنفس المستوى .. و اخواني بالداخلة و الطالعة يرمون كلام احيانا جد و احيانا مزح ..

آخرتها جاب لي هدية فستان .. هو مجتهد و كلنا نعرف ذوق الرجال .. فكان الفستان مو حلو مرة .. أو موضته قديمة شوي .. انا انبسطت و قلت في نفسي راح البسه عنده بس .. و لا من شاف و لا من دري .. المهم شافته اختي بالصدفة .. قالت بديتي تتأثرين بهم .. لو سمحتي ترى بصير اتفشل منك و بجد ما راح اعزمك لو صار عندي شي ..

و لما حكيت لاخوي عن اخوانه سألني .. شفتيهم ؟؟ يفشلون ؟؟ بيتهم زين و لا خرابة ؟؟ و من هالكلام اللي يعور قلبي ..

احيانا اتضايق من شي او ابغى استشير احد بشي .. بس ما اقدر .. ما القى احد يسمعني .. اخاف احكي شي و يمسكونه علي .. و انا اعرف الزعل ما يدوم .. لحظات و انا انسى .. بس هم بيستمرون يعايروني ..

صرت احس نفسي في حووووووووسة لحالي .. تجهيز .. زواج .. سفر .. بيت .. و كلنا ما نعرف و لا شي بهالأمور ..

المشكلة الكبيرة اني من كثر الكلام الي اسمعه عنه .. بديت أتأثر و أخاف في يوم انظر له كمان نظرة دونية ..

مع اني و الله احبه .. و انا متأكدة من حبه لي ..

بس و الله تعبت من الكلام .. اخاف بكرة احد يعاير عيالي بكلمة ..

اخاف بكرة هو يحس بشي ..

اخاف تتغير نظرتي له ..

يمكن ما اعيش مشكلة حقيقية ..

بس بخاطري اشياء كثيرة و محتاجة افضفض و اول الغيث قطرة ... و هذي القطرة ..

تصبحون على حب

 

[أم سعوودي]

ياحياتي

اللي يشتريك اشتريه لو بكنوز الارض \
واذا على تعليقات اخوانك سكتيهم بانه احسن من يجي واحد ولد ناس ولايقدرني اهم شئ انه شاريني مايهمني شئ والمحبه ترى ماتنشرى باالماديات

 

[مشاعر مهمله]

حبيبتي اذا انتي و وياه متفقين ما عليك من كلام احد صدقيني السعاده مو الفلوس والمظاهر الكذابه

 

[RedRose]

انا من رائي تجلسي مع اخوانك ,,, اجميعهم في يوم كلهم ,, البنات والاولاد ,,, وتكلمي معاهم

قوليلهم هذا زوجي واللي يسمه يمسني وانا ما اتمنى ابدااا يكون بينكم اختلاف ,,, انا ما ابغى اخسركم ولا انتوا تبغون تخسروني وكمان ما ابغى اخسر زوجي ,,, وانا كل اللي ابغاه منكم انكم تتعاملو معاه معاملة كويسة ,, وما تحسسونه انه اقل مننا بشي ,,, هذا زوجي وان شاء الله بيكون اوب عيالي وانا ما ترضوا احد يقول شي عن اولاد اختكم

وقوليلهم انا ما اسمح لكم ابداا تعايرونه ,, ورجاء لا تترقيون عليه ابدااا قدامي ,, وعاملوه معاملة كويسة

لا تحكون عليه عشان عائلته ,,, الشاب غير عن اهله ,,, ومو ذنبه ان اهله ناس بسطاء وذوقهم مو حلو ’’’ الناس اذواق

واحنا ربي انعم علينا ومو حلو نتريق عالناس ,,,, الخ من الكلام


طبعا مع زوجك لا تسبين اهلك ابدا قدامه ,, وحاولي انك تقولين له انهم يحبونك ودائما يمدحونك ,,, وبرضو اعملي عن نفس مع اخوانك ,,, يعني قوليلهم فلان يقول عنك انك ذكي مثلا والثني قوليله فلان معجب بشخصيتك ,,, اي كلام انت اختاريه

اتفقي معاه على التجهيزات كلها ,, مدام محد ساعده مو لازم يسأل احد يساعده

احجزوا قاعة بدون ما تستشيرون احد
واحجزوا تذاكر السفر ,, والبيت والاثاث ,, كله اعلموه لوحدكم ولا تقولوا لاحد على شي

خليك رسمية مع اهله ... حتى لو قالوا مغرورة ,,, خليك مغرورة باحترام لا تنزلي من نفسك ابداااا عشانهم



والله يوفقك ويسخر لك زوجك ,,,

 

[صدفة الشاطىء]

انتي قلتي انك استخرتي وان شاء الله الله ما بيخيبك واما كلام الناااس فارميه ورا ظهرك واحقريه ترا الناس ماهمهم غير الكلام والقيل والقال
وانتي حاولي ما تتكلمين له عن اي كلمة يرمونها عليه اهلك عشان ما يتاثر زيادة والشيطان شاطر
والله يريح بالك وباله

 

[انشودة المطر1]

إذا كان يقدرك فلا يهمك احد

 

[راجيه الرضا]

يغلق الموضوع