الفشة الأولى
يعني عفواً .. عدم المؤاخذة .. والله بعرف أنو كل بني آدم على وجه البسيطة ان كان فقير والا أمير .. ان كان طنبرجي والا وزير .. أنه الا ما يطلعله ريحة عرق .. وأنا موافق كتير على هالحكي وما عندي أي مشكلة معو أبداً .. وأنا موافق أكتر على أنو فصل الصيف حصراً دوناً عن باقي فصول السنة بتزيد فيه الروايح الكريهة اللي بتقتل والتي تهف من تحت الابط بشكل خاص .... موافق جداً على هالكلام وكمان ماعندي أي مشكلة أو اعتراض عليه .. وأنا موافق جزيلاً على أنه مجرد المشي تحت اشعة الشمس الحارقة لمدة ربع ساعة ممكن يسبب هففان إبطي مقطوع النظير .. أنا موافق فيري ماتش على هالحكي .. وأنه الشوب قاتل وسبب كل علة شميمية .. بس ياحزركن أنا على شو ماني موافق .. ؟
أنا ماني موافق أبداً .. وعندي مشكلة كبيرة جداً .. مع بعض الإخوة المواطنين والمواطنات .. واللي أنا مسميهن حثالة القذارة والتنابل اللامباليين ..
يعني أنا لما بشم ريحة خمة من مواطن الساعة سبعة الصبح .. وهو يادوب طالع من بيته لسا .. فشو بده يكون مصير ريحته ومصير شاممها الساعة 12 الضهر ؟.. أو تنتين بعد الضهر ؟.. ياجماعة الله وكيلكن عم صادف ناس بجم , بتلاقي من صباحية الله كل واحد ريحته يا متل خرقة المجلى المعفنة .. أو متل صحن اللبنة المحمض .. أو متل البصلة المصنصنة .. أو متل البندوراية المعسقلة .. أو متل البيضة المسلوقة المكسورة أثناء عملية السلق ..
يعني شي مو طبيعي .. يا أخي والله الشغلة موصعبة .. وما بدها نفقات عالية وجهد كبير .. مجرد حمام الصبح ورشة ديودوران وخالصة الأمور .. طيب بلا الديودوران لأنك فقير .. ومامعك تاكل ومو ناقصك حق ديودوبطيخ .. بس ع الأقل اتحمم .. حط بودرة أطفال بيمشي حالها .. اتصرف يا أخي جيب مسكة من البذورية انقبر على قامتك اعميل أي شي المهم لا تقتلنا بريحة عرقك من صباحية الله وتنزعلنا صباحنا وتطرمخلنا مخنا أكتر ماهو مطرمخ من قلة النوم .
أنا عم بحكي عن فئة لا بأس فيها وخاصة الطلاب أو المهندسين أو أصحاب الأعمال الإدارية .. وماعم لوم العامل أو البلاط أو المعمرجي المساكين .. رغم انو عندي اعتقاد شخصي أنو حتى المعمرجي بيقدر يخفف من ريحته الطالعة قدر الامكان إذا التزم بالحمام الصباحي وقايس عن 75 ليرة بالجمعة أو الجمعتين وبخله بخة مزيل عرق كل يوم .. قبل ما يتيسر على شغله . . يعني شو المانع يكون معمرجي وريحته حلوة ؟.. أو مالو ريحة بشعة .
الله وكيلكن فيه موظفة بدائرة حكومية معينة .. ريحة عرقها من صباحية الله بتنيم مغناطيسياً .. وشعرها مزيت ومتروس ترس بالقشرة .. لدرجة إني ماقدرت طس بخلقتها وهي عم تمشيلي وراقي .. ويومها طول ماعم بتعامل معها وأنا عم بتنفس من تمي وحابس نفس مناخيري .. طيب ليش هالتنبلة كلها والقذارة ؟ .. مشان شو ؟.. مشان ماتكتي طاستين مي يا شرنـّة على حالك قبل ماتنقبري وتنهفي على وظيفتك ؟..
العمى بقلبك والعين تطرقك انت وكل امثالك المعفنين .. لك أنا ماني مضطر أتعامل معك .. بس للأسف مضطر لأنو وراقي عندك .. لك النظافة من الإيمان .. لك إي النظافة تبع الشكل والبدن والمظهر مو بس النظافة من جوة ومن المعدن .. مين المتخلف يا أخي المواطن اللي قلك أنو إذا كنت نضايفي واتحممت كل يوم وطلعت على شغلك وريحتك طيبة ومعطرة أنك طنط ؟.. ومين المتخلف اللي قنعك أنو إذا كنت وسايخي وعفايش وريحتك طالعة بتزيد وبتلمع زلوميتك ؟.. وفهّمك المقولة المعفنة أنو الرجال ما بيعيبه شي .. ؟.. لك الرجال بيعيبه أكتر من شي ..
ماعجبك الحكي ما ؟.. إي لهمي "مشان ماقول شي تاني "..
وياسيدي طز فيك وباللي قنعك بهالمقولة وباللي اخترع هالمقولة أساساً .. وباللي تبناها وباللي اتأثر فيها وباللي حس أنو رح يتأثر فيها .. وباللي شعر أنه ممكن يتأثر فيها .. وباللي خطر على باله لوهلة أنو قد تكون مقولة خرج أنو بيوم من الأيام يتأثر فيها .. منيح هيك والا كمان ؟..
لك آآآآآآخ .. الله يجيبك بالسلامة يا أبو النور ..