عاوزك تساعديني أصلي ...احترسي من تلك العبارة

[راجيه الرضا]

بسم الله،

[أنا عاوزِك تساعديني عشان أواظب على الصلاة]

الجملة دي بتتقال غالبًا في الرؤية الشرعية!
منقدرش ننكر إنها جملة مؤثرة وبتجيب نتيجة والعروسة بتصدق وبتوافق، وكمان بتعتبر مجرد رغبة الخاطب في الصلاة علامة تدين وإخلاص حتى لو هو مش مواظب فعليًا عليها!

وغالبًا هي مش بتفوق من الوهم غير بعد الزواج لما بتلاقي نفسها قايمة تصلي الفجر وهي بتفكر ألف مرة قبل ما تحاول تصحي زوجها خوفًا من الخناقة اللي اتعود يعملها لما بتتكلم معاه في موضوع الصلاة أو بتصحيه عشانها لأنها بتقلق منامه وهو عامل المنبه على ميعاد الشغل!

ساعتها بس بتفكر بعقلانية وبتسأل نفسها:
_انا ازاي رضيت اني أتهاون في تاني ركن للإسلام عشان يبقى اسمي اتجوزت وخلاص؟
_انا ازاي عـصـيت أمر النبي ﷺ اللي أوجب علينا اختيار ذي الخلق والدين؟
_انا ازاي صدقت ان انسان مش قادر يلزم نفسه بالصلاة اللي هي أساس الدين ممكن يكون معين ليا على البر والتقوى عشان نوصل مع بعض للجنة؟
_انا هعمل ايه لما يبقى عندي أولاد عاوزة أربيهم على الدين والصلاة والمفروض ان أبوهم قدوتهم؟

الغريب جدًا أن كل التساؤلات دي اتقالتلها كتير قبل الزواج لما كانوا بيحاولوا ينبهوها قبل ما توقع نفسها بس هي ماكانتش شايفة ساعتها غير مرتب العريس وشقته وعربيته وفستان الفرح والفوتوسيشن!
.