عاجل للاخت وش بقى انتظرك

ه

همي وهم غيري

New member
إنضم
2010/09/24
المشاركات
108
وش بقى اتمنى تشوفي مشكلتي عرضتها قبل وتردي البنات ردوا ماقصروا ريحوني بس ابغى احد يكون قريب مني يقول سوي كذا وشوف النتيجة احس انك قريبة من تفكيري اتمنى تردي
 
ارسلي لها خاص ممكن هنا ماتنتبه للي كتبتي ....... الله يكون بعونك
 


ياحبيبتي ياهمي وهم غيري


اول شي قولي آمين

جعلك ماتشوفين الهم ولا يجيك بحياتك ..



والله احرجتيني وانا اشوف اسمي في موضوعك وشرف لي تطلبيني النصيحة


انا شفت موضوعك قبل كذا وعديت مارديت ، مرة آسفة لأن المواضيع هذي ماتجذبني كثير ..


يمكن لأني عديت المرحلة هذي وتجاوزتها من سنين <<< سالفة الهدايا والرومانسية ..



حبيبتي


تدرين زوجي نفس زوجك

اول ماتزوجت كنت اموت من القهر لأنه ماقد قال لي كلمة حب ولا يهديني الا اذا تزاعلنا .. يراضيني بهدية ..

ومن وين لوين نتزاعل الحمد لله ..



ابيك بس توسعين صدرك لكلامي ولحياتك معاه .. وطولي بالك قد ماتقدري


الحين الرجال انواع


فيه رجال يغرقك هدايا وكلام حلو ويبسطك من هذي النواحي ..

بس يتعب نفسيتك بتصرفاته اما قلة احترام ولاضرب ولا تقصير مع اهلك ولا خيانات والعياذ بالله ..

وفيه رجال يقصر عليك في اشياء مو اساسية في الزواج لكنه ملتزم في الأساسيات وبناء عليها تتم السعادة بإذن الله ..






انا بعد ماتعبت من زوجي في بداية زواجي.. قستها بيني وبين نفسي

طيب هو وش مميزاته ؟

وش عطاني ؟

ووش قصر علي فيه ؟

لقيته معطيني الحب عطا !

عطا في تعامله واحترامه

عطا في ماله اللي كله لي ولعيالي
وعطا في وقته اللي كله لي ..

عطا في تنفيذ طلباتي

الحمد لله وماشاء الله لاقوة الا بالله كل ماطلبت منه شي جابه لي ..


ياحبيبتي احسبي صح ..


شوفي وش يعطيك ووش يبخل عليك فيه


ترى بعض الرجال مايقدرون يعبرون عن المشاعر الا بتوفير الراحة والاحترام ودفاعه عنك وفزعته معاك اذا احتجتيه والبذل اما ينزلك السوق او يوديك عند اهلك او يقعد عندك في البيت او حتى يوفر عليك التعب والطبخ والنفخ ويجيب العشا جاهز ..
دلالة انه يحبك ويبي قربك وراحتك بس انه مايعرف يعبر ..


صدقيني ياغالية مع السنين والوقت بتجلسين تضحكين على نفسك لأنك بس تبين كلام حلو ومشاعر متمثلة في بعض التصرفات ..

يمكن الكل يخالفني لأني اشوف المشاعر فعل مو قول ..

والمشاعر ماتوقف على هدية ولا كلمة حب حلوة ..

الهدية تنعطي لأي احد .. حتى لبنات الليل اعزكم الله

والكلام الحلو ينصرف ببلاش لكل بنات العالم

بس العطا والوفا والوقفه والدفاع والبذل كل هذي ماتنعطي الا للغالي والحبيب ..


بس وسعي صدرك عليه وروحي عدي محاسنه .. لاتخلين صاحباتك يأثرون عليك بكلامهم وان زوجي جاب لي ولا زوجي عطاني ...


ياكثرهم صاحباتي اللي كنت ادري عن عمايل رجالهم في قفاهن وهن غرقانات في حلو الكلام والهدايا .. وكل اسبوع متهاوشات ومتمشكلات معهم ..

ولاتخلين الشيطان يوقف لك حياتك على كذا ..


انتي اذا شايفة ان الموضوع مأثر على نفسيتك ترى الشغله سهله ..

ارسلي له مسج وكلام حلو بشرط انتي اللي كاتبته مثلاً الليلة مشتاقة لك بشكل مو طبيعي ..

قعدت اتفرج على الصور وشفت صورتك فز قلبي ياليتك عندي الحين .. اشتقت لك ..
ياليتك عندنا والله مكانك خالي ولك وحشة ياعمري ..


كلمات بسيطة باسلوب تعبيري بسيط صدقيني راح تبسطه وتسعده وتخليه يرد لك على طول ..

كمان اهديه في المناسبات مثلاً ذكرى زواجكم .. وحسسيه انك راح تحتفلي وبتجيبين له هدية .. انا اسوي معاه كذا

الاقيه جايب لي هديه وفخمه وغالية جداً جداً .. حتى لو يدفع اللي وراه وقدامه ..

ذكريه ان فلانه زوج اختك جاب لها هديه تجنن وتمنيتي يشوفون هداياه لك .. راح يجيب لك بدون تفكير ان شاء الله ..

بس عيب هدايا النوع هذا من الرجال تجي بشحذه هههههههه مالها طعم ..

لكن اذا هو طيب وابن حلال ومريحك في حياتك احمدي الله عليه لأنه هو كله هدية ..

آخر شي بقول لك عليه

ريحيه في البيت واسعديه عشان تملكينه .. حاولي تطردين شي اسمه نق ومشاكل من بيتك .. وماتسمحين لشي يدخل بيتك الا الرضا والراحة وطيب الخاطر ..

ساعتها بتملكينه بإذن الله واذا قدرتي تملكينه بتاخذين اللي تبين ..
واذا انتي في بداية زواجك فأقول لك لساتك في اول الطريق وتذكري كلامي مع الوقت بوديك ويجيبك على كيفك بس يتعود على الحياة الجديدة ووجودك في حياته والوضع الجديد حتى لو لكم سنتين اعتبره جديد عليه ..

اصبري زي ماقلت لك ووسعي البال وسايسيه زي الصغير ..
والطلعات والتمشيات مجرد عقدة مؤقته عنده وبتنفك على يدك ان شاء الله ..
زي ماقالت وحدة من الأخوات ابدي معه بالطعات البسيطة والهينة عليه واذا بغيتي تروحين مكان معين ونفسك فيه سهلي له الموضوع قولي فلانة صديقتي راحت وتمدحه وتقول وناسة وبسطه ورخيص وفلان زوجها مرة استانس قال بنجيه مية مرة ..

تدرين ليه ..
فيه ناس يستصعبون بعض الأشياء ويشوفونها صعبه وزوجك شكله من النوع اللي مايعبر عن اللي في داخله بسهوله .. عشان كذا مايقدر يقول لك مااقدر امشيك لأنه صعب والمكان غريب او مايحب ياخذكم له او مبررات غبية .. مايقدر يقول انا اشوفه صعب ..

يبغى لك تسهلين له كل الأشياء اللي يشوفها صعبه ويعبر عنها بالرفض ..

وتذكري ان الحياة ابسط من انا نعقدها ..

فيه امور في حياتنا تافهه نشوفها صعبة وعراقيل في حياتنا بس اذا واجهتنا مشاكل اصعب نشوفها ولا شي ..



الله يوفقك اختي ويسعدك بحياتك ويسخر لك زوجك ويسخرنا وياكم لرب العباد ..










اتمنى اكون افدتك اختي وماخيبتك يوم طلبتي نصيحتي وآسفة جداً اذا ماكنت عند حسن ظنك ..
 
وش بقى...مابقى شىء,,,
كلام عين الصواب..
واشهد أنك وفيتي وكفيتي ,,
بس باقي التطبيق,,وربي يسهل ..
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل