طلقني حسبي الله عليه بعد ماضربني جدام أهله ...

احصائياتى
الردود
163
المشاهدات
15K

أم_سوافي

New member
معلومات أم_سوافي
إنضم
11 مايو 2008
المشاركات
401
مستوى التفاعل
0
النقاط
0
طلقني حسبي الله عليه بعد ماضربني جدام أهله ...
مادري من وين أبتدي وشو اقول أحس إني مقهوووره من اللي صار حرقني وكسرني ما توقعت يصير لي هالشيء بس الحمدالله على كل حال ...


بخبركم السالفه كلها وأبغي منكم النصيحه الله يجزيكم خير ...

أنا متزوجه من ثلاث سنين ومن شهر العسل بدت مشاكلنا أنا وريلي وأغلب المشاكل يكون السبب الرئيسي فيها أمه حسبي الله عليها وعلى أسباب جداً تافهه وما تسوى بس ريلي من النوع اللي يسمع كلام أمه بشكل مب طبيعي أي شيء بتقوله هي يكون صح وما يحب يسمع منج رايج في الكلام اللي يوصله ولا بيفهم منج إنتي السالفه لا ... الكلام اللي تقوله هي كافي عنده وكل ما تصير مشكلة يقول الغلط منج إنتي وبس لا تحاولين تقنعيني بشيء ثاني وأنا خلال هالثلاث سنين سرت عند اهلي تقريبا ثلاث أو أربع مرات وكنت أيلس بالشهر والشهرين والثلاث ولا يسأل عني ولا يحاول يصلح الموضوع بينا في كل مرة أهلي اللي يتدخلون ويصالحون بينا عمره ما رفع التيلفون من عمره وقالهم أبغي حرمتي ....

حتى يوم كنت حامل بالشهر السابع صارت بينا مشكلة وسرت عند أهلي ويلست عندهم لين ما ربيت ..
وأنا ربيت قيصرية وكان لازم يتصلون عليه عسب ياخذون موافقته عسب يولدوني قيصري ويوم ربيت ما فكر حتى انه يدخل علي ويقوللي حمدالله عالسلامه لو بالجذب طرش إخته عندي عسب تاخذ الولد واطلعه عنده عسب يشوفه...

وعسب الولد مايسير بيت هلي ياني أبوه يبغي يراضيني ويخليني اسير من المستشفى لين بيت أهله ورضيت وقصرت الشر عشان خاطر ولدي وسرت ونسيت اللي بينا وحاولت ابتدي وياه من يديد ...

ويلست تقريبا سبع شهور وردينا للمشاكل من يديد وأحاول امسك أعصابي وطوفت واايد أشياء عرفت انه يرمس بنات عالمسن ويشوف أفلام إباحية تلوع بالجبد ويوم واجهته قالي لني مب مرتاح وياج ..
قلتله أنا بعد مب مرتاحه وياك وضايجه حيل بس مااسمح حق عمري إني اتعرف ع غيرك واخونك وأنزل مستواي لهدرجه ووعدني انه بيتغير ومابيرد حق هالسوالف وفعلا حسيت انه تغير من هالناحية ..

وردت عمتي اللي هي امه تضايجني وتسويلي مشاكل وسرت حق اهلي بعد ويلست عندهم ثلاث شهور وعقب تدخل خالي في الموضوع وصالح بينا وتمينا الحمدالله سنة بدون مشاكل وكنت مستانسة وياه
وحاولت كل ما صارت مشكلة بينا حتى لو كان هو اللي غلطان علي اعتذر منه وأحاول إني اراضيه لني مابغي أرد للمشاكل وعوار الراس ...

وصارت بيني وبين عمتي مشكلة والسبب انه هي طالع من البيت ويوم ردت طرشتلي الخدامه لين القسم العلوي الي أنا ساكنه فيه ويوم نزلت تحت قاتلتلي ولدج تعبان ومحموم عطيه أدول مسكت أنا ولدي وحطيت إيدي ع راسه عسب أشوف حرارته لقيته عادي ما فيه شيء بس قلتلها بطلع عقب شوي فوق وبعطيه الدواء ويلست شوي وردت تقولي يعني ليش ما تعطينه الحين ليش تعاندين قلتلها أنا ما أعاند بس أقول بيلس اشوي تحت وبطلع فوق عقب شوي وبعطيه ماصار شيء ردت اتقولي انتي بس تعانديني وما وتبغين تسمعين كلامي قمت أنا وخذيت الولد وسرت فوق ..

واول ما طلعت دقت حق ريلي وقالتله أني رفعت صوتي عليها ويلست أراددها وأنا والله كنت أكلمها بكل هدوء ولا رفعت صوتي ولا صارخت لنه الموضوع ما يسوى ومابغي اسوي مشكلة وياها ..

واليوم ثاني سرت عندها عادي وسلمت عليها وحبيت راسها وهي لفت ويها الصوب الثاني ولا رمستني
سكت أنا وماقلت شيء ..وكل يوم على هالحال أنزل تحت وأول ما أشوفها أسلم عليها وأحب راسها وهي ولا ترمس بكلمه وتمت جيه تقريبا شهر ...

ومن أسبوع كنا بنسير أنا وحرمت أخو ريلي كارفور عسب ناخذ اغراض البيت حق هالشهر وكانت هي سايرة ويانا بيوصلها الدريول عند إختها وكانت هي يالسة فالنص وسلفتي يالسة عند الباب ويوم ييت أنا بركب أشرت حق سلفتي عسب تبعد شوي عسب اروم أيلس أنا هي يوم شافتني سويت جيه صارخت علي وقالتلي سيري الصوب الثاني سكت أنا وماقلت شيء وسرت من الصوب الثاني عسب أركب ويوم ركبت أنا نزلت هيه وقالت حق مرت ولدها تنزل عسب تيلس هي عند الباب ومرت ولدها تيلس بينا وتمت فالدرب ترمس وياها عادي وتسولف وتضحك ...

ويوم ردينا البيت رد ريلي عقبنا بساعه وكان هاليوم يوم زاوجنا ويلست أنا أتعدل وأكشخ ومستانسه وعالساعه 12 تقريبا نزل ريلي تحت عسب بيطلع ولدنا سيف لنه كان يلعب تحت وأنا يلست أترياه وانا متعدله وأقول ف خاطري الحين بيستانس يوم بيشوفني جيه ...

وطلع وياليته ما طلع ياني جنه بركان يلس يصارخ علي أنا أستغربت قلت شو السالفه شو صار أنا ما سويت لها شيء ..وسرت عنده المكتب وقلتله شو السالفه شو صاير أنا شو سويت قالي أنتي شو سويتي في السيارة قلتله ماسويت شيء قالي مب إنتي قلتي مرت أخوي بعدي شوي لني مابغي ايلس عدالها قلتله أنا قلت مابغي أيلس عدالها ؟؟ والله العظيم ماصار هالشيء وقالي امي قالت انها هي كانت راكبه فالسيارة وأنا ييت بركب ومرت أخوه كانت وراي وأنا ييت قلتلها تعالي أنتي ركبي جدامي لني ما بغي أيلس عدالها ..
قلتله حبيبي أمك كانت يالسه فالسيارة ومرت أخوك يالسه عدالها أنا ييت عقب ابغي أركب فأشرت حق مرت اخوك عسب تسويلي مكان عسب أيلس عقب أمك يلست تصارخ مادري ليش وقالتلي لفي الصوب الثاني لفيت ونزلت هي وركبت عالطرف ويلست مرت أخوك مكانها .. قالي عيل تعالي تحت عندها وقولي هالكلام قلتله اوكي وسار هو قال حق مرت أخوه تيي عسب تقول اللي صار ..

وفعلا قالت الحرمه الكلام اللي صار عمتي ما عيبها الموضوع ويلست تقولها إنتي ما تبين تقولين وإنتي تغطين عليها قلتلها ليش بتغطي علي أنا مب مسويه شيء والحرمه قالت الصدق ما جذبت ولا ألفت علي ..

بس إنتي الكلام ماعيبج وتفسرين كل شيء ع كيفج .. يلست تصارخ علي وتقول إنتي مب محترمه ولا متربية وإنتي وأهلج مصيبه قلتلها لا ترمسين عن أهلي المشكلة بيني وبينج ليش تدخلين أهلي في الموضوع وتمت تقولي إنتي مب متربيه وأهلج ماربوج عصبت أنا وقلتلها لا ترمسين عن أهلي خليهم بعيد عن السالفة قام ريلي يصارخ علي ويقول لا ترفعين صوتج قلتله ما تشوفها كيف هي تصارخ وتغلط علي

وقام في نص الصاله جدامها وجدام حرمت أخوه وجدام ولدي اللي عمره سنتين ضربني وعقب ماضربني قالته ماله داعي تضايج عمرك وقال حق حرمت أخوه عقب ما ضربني جدامها خلاص روحي ورد يلس مكانه !!!

أنا ساعتها حسيت الدنيا دارت فيني وبغيت أموووت من اللي سواه صارخت عليه وقلتله الحين توديني عند أهلي مالي يلسه معاك وورقة طلاقي توصلني قالي روحي إنتي طالق وسرت دقيت حق إختي وقلتلها تعالو خذوني من هنيه مابغي أعيش معاه قالتلي شو صار قلتلها انه ضربني جدام أهله وطلقني

وياني أخوي وخذني وسرت عقب يومين المحكمه ورفعت عليه قضية إثبات طلاق وأطلبه بكل حقوقي
وخذوا مني رقمه عسب يتصلون فيه يخبرونه إني رفعت عليه دعوى وموعد الجلسه بيكون الخميس الياي
قالهم أنا طلقتها بس ابغي أردها قالتله البنت الي دقتله إنزين ليش ما سرت عند أهلها وقلتلهم إنك تبغي تردها وتفاهمت وياهم قال أنا مابردها هم بيرجعونها لي !! بكل وقاحه يقولها ...

عقب قالتله تعال انت موعد الجلسة وتفاهم وياها لنه الحرمه عندها شروط ولازم تتفاهمون ...

وهاذا كل اللي صار وياي والحين أنا يالسه أتريا موعد الجلسة ومليون فكرة تدور في راسي ..
شو أسوي فيه ..

حاسه بقهر وضيجه من اللي سواه فيني ..زعلانه على عمري وعلى وقتي اللي ضيعته عليه ..

كل ما أتذكر انه ضربني جدامهم احترق احس اني أبغي أذبحه وأحرقه.. فيني غصة أبغي أبرد خاطري منه ..

كرهته حيييل وكرهت عمري اللي عشته وياه مايستاهلني والله ما يستاهل إني أحبه ...

ليش هنت عليه ؟؟ليش كسرني جدامهم وصغرني ؟؟

أحس إني تعبانه وضايعه ..

ساعدوني لو بكلمه ابغي نصيحتكم ..دخيلكم لا تبخلون علي

أبغي انسى اللي صار أبغي أفقد الذاكرة ...ماتحمل اللي صار أحسه أكبر مني
 

انا فاطمة

New member
معلومات انا فاطمة
إنضم
13 يونيو 2008
المشاركات
13
مستوى التفاعل
0
النقاط
0
حسبي الله و نعم الوكيل....و الله انني مت من الصياح و أنا أقرا...شهالقلوب؟؟؟رب العالمين قال"و جعلنا بينهم مودة و رحمة" يعني ود مب حب يعني يحافظ على مشاعرج على الأقل و رحمة...يرحمج اذا مرضتي أو تعبتي أو حتى أنظلمتي.. ينكسر خاطره عليج.. لكن واحد جذيه ولد أمه..ما عمري شفت...حبيبتي أذا بتردين له لازم تتعالجين من هالمشاعر و أجتهدي بالدعاء لنفسج و له... الله يمسح على قلبج و يهدي نفسج و يطوف أيامج على خير...حسبي الله و نعم الوكيل:(
 

المنقبة

New member
معلومات المنقبة
إنضم
17 يونيو 2008
المشاركات
823
مستوى التفاعل
0
النقاط
0
الموقع الالكتروني
www.youtube.com
لا حول ولا قوة الا بالله حسبي الله عليه ما عليج الا الصبر ة فكري في ولدج قوليله ادا يبي يردج يكون لج بيت لحالج اشرطي عليه و الله يصبرج حبيبتي
 

حبيتك

New member
معلومات حبيتك
إنضم
8 مايو 2007
المشاركات
117
مستوى التفاعل
0
النقاط
0
الإقامة
دار الزين
والله لو مكانج ما رديت ..........اونه اهلها بيرجعونها لي ..............زوين عايش هالانسان ..........جيه بنات الناس مب لعبه لا عنده و لا عند امه ..............اسمحيلي ع هالكلام بس والله فيه غصه منه و من امه ..........و انتي حبيتي لو بغيتي اتردين ........لازم تتصرفين و يا امه .....زز لو تطلعون بيت روحكم بس بعد لازم اتغيرينه لانه متمسك امه بصوره مخيفه صراحه ............ الله يعينج على هالريل و هالعمه.........
 

لمسة حنين

New member
معلومات لمسة حنين
إنضم
29 مايو 2008
المشاركات
1,275
مستوى التفاعل
3
النقاط
0
حبيبتي لو بغيتي تردين طلبين بيت بروحتج علي الاقل بترتاحين من مشاكل امة وهو ايضا راح تتغير معاملتة لانة محد سوف يوزة عليتج ادري صعب تنسين بانة ضربتج جدامهم ولكن مع مرور الايام سوف تنسين والايام هي تداوي الاجروح لا تخصرين ريلتج علشان ا مة حاولين تكسبينة يوم بيكون بيت بروحكم وشرطين علية كل اللي تبينة في ا لمحكمة مادام انتج قدمتين شكوة علية لا تتنازلين عن حقوقتج مهما يكون تراء الريايل مافيهم خير بس نحن الحريم شواء نسوي ما بيدينا حيلة
 

أم_سوافي

New member
معلومات أم_سوافي
إنضم
11 مايو 2008
المشاركات
401
مستوى التفاعل
0
النقاط
0
أنا مستحيل أرد أعيش معاها في نفس البيت ولا متخيله إني أرد أعيش مع هالإنسان بشكل طبيعي !!!

ودام انه ضربني ورفع إيده عليا مره مب بعيد إنه يسويها مره ثانيه .. ولو رديت له أكيد بيذلني ...

بس انا مابغي أضعف الحين أبغي اخليه يندم على هالشيء اللي سواه ...

ابغي أقوي شخصيتي مابغي أضعف بس مب عارفه كيف ...؟؟؟

تدرون يوم دخلت المحكمه حسيت إنه كل اللي يالسين في المحكمه يعرفوني ويعرفون سالفتي !!

حسسيت إني متفشله ومب عارفه شو اسوي حتى يوم سرت عند البنات اللي يشتغلون هناك ولازم اخبرهم شو السالفه وأنا ليش يايه وقفت تقريبا ربع ساعه عسب أروم أتكلم والبنت اطالعني مستغربه تقولي شو بلاج خايفه قلتلها أول مره ادخل هنيه قالت إمبين عليج ..

ويوم خبرتها سالفتي وانه ضربني يلست أصيح قالتلي إنتي مب خسرانه شيء بالعكس هو اللي بيخسر وحتى لو تطلقتي عادي عيشي حياتج بشكل طبيعي ...

وهو ملزوم يوفرلج نفقة لج ولولدج وبيت واييبلج خدامه وهاذا غير المؤخر اللي لازم يدفعه لج وغير انه الولد بيتم وياج يعني هو اللي بيتعب مب إنتي ....

بس أنا خايفه مب عارفه ليش ؟؟
 

سوسوكبيرا

New member
معلومات سوسوكبيرا
إنضم
28 ديسمبر 2007
المشاركات
257
مستوى التفاعل
0
النقاط
0
العمر
41
بصراحه بصراحه
انتي معذوووووووووره في اللي سواه مو شوي
ما عليك اختي الا انك توجهين وجهك لله وحده وهو ما يخيبك وعليك بصلاة اليل والدعاء وربي بيجيب لك حقك لين باب بيتكم وبالنهايه خلي ذكر الله على لسانك وكثري من الاستغفار والصدقه .....
وبالنسبه للافكار لا تفكيرن ولا تتعبين عمرك توكلي عالللي ما تنام عينه واذا كان مقدر لك تنفصلين عنه او لا مالك الا تسلمين بالقدر وتوكلين الله بكل امورك ....
ولك مني خالص الدعوات باللي يهدي خاطرك

اختك سوسوكبير ا
 

*المفكره*

New member
معلومات *المفكره*
إنضم
9 فبراير 2008
المشاركات
36
مستوى التفاعل
0
النقاط
0
الحمد لله الي فكك منه ... وكونك تفكرين انك صرتي ثيب ومطلقه ..هو اسوء منك هو ثيب ومطلق

ولا يقدر يدير بيت .. ما عنده الا انه يسمع من الناس ويصدق ويجي يجرب ويطيح بمقلب امه ..

اللانسان هذا لسا ما عقل وتزوج وهو ما يدري كيف يعيش ..يحسب الزواج حرمه وبس ....

عيشي حياتك ....بعد يوم الخميس كأنك ولدتي من جديد ... يا عزيزتي انتي طلقتي المشاكل ...وافتكيتي

وهو بيندم وبيعرف قدرك ... لقد ولدتي من جديد بس لا يهزك كونه ضربك ... الكرما لا يضرهم ضرب اللئام

كما انه لايضر الصخر ضرب الموج....... ابدي حياة مع الله ..سبحانه هو الاجدر بأن يمضي الزمن ويقطع الوقت في طاعته وإذا جاك ولد حلال حنون ..وطيب واهم شيء ما يسمع للغلط ...لا مانع انك تجربن...

واذا الدكتوره ناعمة لديها نصيحة مغايره من نضرة ثاقبة ..فأولى الأخذ بها ...
 

me~4~you

New member
معلومات me~4~you
إنضم
17 يناير 2008
المشاركات
265
مستوى التفاعل
0
النقاط
0
اذا انتي شاريه ريلج رديله بشرووط وبعد ماتحسسينه بذنب اللي سواه ومفروووض ماجادلتيه قدام اهله قلتي اللي عندج صدق صدق ولا برايه ..هاي نقطه واللي فات مات
ومن شخصيتج عرفت انج انسانه عصبيه بس على حقش بس انتي ناااااار لو عصبتي
ونصيحه لكل حرمه يووم تعصبين لاتييبين طاري الطلاق لان الريال ماعنده لج غير الطلاق هي 3 كلمات مو مربوطه بسلاسل في لسانه ممكن في اي لحظه يقوله محد تتحدى او تطلب الطلاق اذا كانت شاريه بيتها انا ماالومج اللوم امه السوسه اللي فرقت من بينكم حسبي الله عليها وعلى فعايلها ولو رديتي فديتج بينج وبينها رسميات وبس وانتي في بيت وهي ببيت اللي جيه الواحد يبعد عنها خلي ريلج يحس ان طلب مو امر انج تعيشين بعيده لان ريالج ممبرمج على شي وصعب فجأه يغيره يباله وقت عنده نقطة الضعف امه ولابصدق فيها موليه خليج واثقه وانتي الحين طالت حق يبى اهلا وسهلا مايبى الله يستر عليه ومسكيه من الضرب لانه اهانه وصعب الواحد يرضاها ...وبعد يبى اهلج ردونج والله ان عينه قويه ...ومشكوره فديتج وانشاء الله اخر الهموم وتفتحون صفحه يديده .انتي وريلج وولدج .
 

لاهنت

New member
معلومات لاهنت
إنضم
8 يونيو 2008
المشاركات
18
مستوى التفاعل
0
النقاط
0
الله يفرج همج يارب....بس حبيت اعرف انتي وهو كم اعماركم لاني احس انكم متزروجين صغار..المهم رديله بشروط واعرف حاله تشبه حالتج بس عقب ما استقلوا في شقه وااااااااااااايد تغير وياها للاحسن وتعالي شوفيهم الحين,بس باقوللج ملاحظه الريال ولد امه صح متعب لكن دايما يكون طييييييب وانتي وشطارتج لازم تخلينه يقتنع فيج ويحترمج
 

لاهنت

New member
معلومات لاهنت
إنضم
8 يونيو 2008
المشاركات
18
مستوى التفاعل
0
النقاط
0
نسيت اقول اتحملي الرجعه تكون من طرفج حتى لو حد خايف عليج حاول يقنعج وكوني هاديه وقويه في نفس الوقت خليج في البدايه معظم الوقت ساكته قليله الكلام هالشي وايد ياثر في الريال
 

عنااايد

New member
معلومات عنااايد
إنضم
11 ديسمبر 2007
المشاركات
312
مستوى التفاعل
0
النقاط
0
موب صاااااااااااااااااحي يطقكك علشان موضوع صغير زي كذا والله امه هذي عقلهااا اصغر من عقل ولدك اللي عمره سنتين
انا رايي تعطينه درس ماينساه يضربك علشان مكان بالسياره وعلشان دافعتي عن نفسك وش تبي امه وش تبي من الحياااااااااااااااااااااااة تطاقكك وتخلي ولدها يعيش بنكد كذا بترتاح يعني
الله ينصرك عليه وعلى امه اهم شيؤ استخيري والله العظيم هالرجاجيل انهبلووووووووووووووا
 
معلومات هند بنت عتبة
إنضم
3 مايو 2008
المشاركات
7,275
مستوى التفاعل
2
النقاط
0
الإقامة
قلب حبيبي
الله يكون بعونج الغالية ويفرج همج

بس لازم ترفعين نفسج وما تتنازلين عن حقج اذا فعلا هو شاريج فاشترطي عليه انج ما بترجعين الا بعد ما يحطلج بيت بروحج و بعد ان يعطيج وعد ويتعهدلج جدام المحكمة ان ما يصدق كلام امه قبل لا ياخذ بموقفج وانه يوزن الامور قبل لا يتهاوش ويضربج واذا رفض هالشروط فالله يعينج ويعوضج بالي احسن منه
 

البحر غدار

New member
معلومات البحر غدار
إنضم
2 يونيو 2008
المشاركات
449
مستوى التفاعل
1
النقاط
0
اااااه ومن ثم ااااه زكرتيينى بعمرى وبمشاكلى يلى راحت والله انضربت وانهنت وتشرشحت وعلى يدى طفليين صغار ومالهم زنب وتقلعت عالشارع مثل الكلاب ورجعت كرمال ولادى ااااه زكرتينى بالماضى يلى بدى انسااااه الله يعينك على زوجك وامه الله لايوفقها بجاه النبى
 

أم_سوافي

New member
معلومات أم_سوافي
إنضم
11 مايو 2008
المشاركات
401
مستوى التفاعل
0
النقاط
0
حسبي الله ونعم الوكيل عليها وعليه

الله يفرج همي ويعوضني خير في ولدي حبيبي ...

والله مايهمني شيء دام ولدي عندي ...

الحمدالله على كل حال وأنا راضية باللي الله يكتبه لي ...
 

الزعول

New member
معلومات الزعول
إنضم
9 مارس 2008
المشاركات
91
مستوى التفاعل
0
النقاط
0
شوفي حبيبتي انا اشوف ان الغلط منج....
انت نزلت من قدر نفسج من أول شي ...
كل ماصارت مشكله قلتي اسكت علشان ابعد عن المشاكل وكل ما تهاوشتي معاه شلتي شلايلج ورحتي بيت أهلج ولعبتي دور المظلومه ....وين تقديرج لنفسج وذاتج
الحين انت فيها ...لما رحتي المحكمة وطالبتي بحقوقج
حسيتي انج قوية وعندج سند وقادره انج اتحطين عينج بعينه ... لا تتنازلين طلبي بيت حقج بروحج ..قعدي مع نفسج وشوفي انتي شنو تبين وخلي الطلاق الحل الأخير زوجك طيب بس الله يهدي أمه واسامحها حاولي تتفقين معاه وتتفاهمون بهداوه بعيد عن زن أمه وبدون معرفتها بأخباركم اذا كان فعلا شاريج
وسامحيني اذا في كلمة زعلتج
بس الطلاق مو حل والريال ما يحب المرأة الضعيفة
ولا تتواجهين مره ثانية مع امه أو غيره انتي قلتي الصج واللي مو امصدق وادور على عوار الراس خل ادوره بعيد عنج وعن راحتج (كوني واثقة من نفسج)

أنا أتمنى انج اتردين حق زوجك في بيت أو شقه خاصه فيكم
والله المستعان .....أختي عليج بالدعاء وقيام الليل وفكري بطريقة ايجابية وخلي الانتقام يولي وردتج لزوجك اهي الانتقام

 

ذكرياتي

New member
معلومات ذكرياتي
إنضم
14 ديسمبر 2007
المشاركات
58
مستوى التفاعل
0
النقاط
0
الواحد شووو بيقوووووووووووول

بس فكري في كرامتج لو حتى رديتيله لا تردين إلا وانتي متأكده انا ما بيعيدها مره ثانيه وان ندمان....

بس قلبي عوووووورني عليج واااااااااايد...

بس لا يفكر ان الحب بيرد مثل قبل بعد ما كسرج...


استغفر الله الذي لا إله إلا هو الحي القيوم (ردديها دائما)
 

جاكلين

New member
معلومات جاكلين
إنضم
6 مارس 2007
المشاركات
78
مستوى التفاعل
0
النقاط
0
الله يكون بعونك حبيبتي واستخيري قبل اي خطوه تخطينها

والله يسرلك امورك
 

من نحن ؟؟

موقع نسوة : هي شبكه عربيه تهتم بكل ما يخص المرآه وحياتها اليوميه يعمل منذ سنوات لمساعدة والمساهمه في انجاح كافة الامور الحياتيه للمرآه العربيه