طفلك في جو الأعاصير محتاجة معاملة خاصة جدا:

١. كل أم تجمع عيالها وتخبيهم جوا البيت حالاً .
نأجل الخروجات لغاية ما الجو يهدا شويه ما فيش تمشية بره البيت دلوقتي ....

٢. جوا البيت ... بابا هيقلع هدومه اللي مليانه تراب علي الغسالة مباشرة... هنقفل الشبابيك والبلكونات كويس جداً ... ونكنس التراب اللي دخل في البيت .. وياريت نحط فوط أو ملايات مبلولة على فتحات الشبابيك أو البلكونات عشان ننقى الهوا من التراب.

٣. لو في طفل بيكح وطفل مش بيكح نوزعهم على الأوَض .. ضروري جدا نعالج بسرعه نزلات البرد .. نلبس ماسكات لو في كحة ومضطرين نقعد في نفس الأوضه ..ماتنسوش اننا قافلين الشبابيك ومافيش مصدر تهوية كويس.

٤. لو ضرورى الاستحمام يبقى منتعرضش للهوا واحنا خارجين ... تغير درجات الحرارة أكتر حاجة بتنتهزها الميكروبات عشان تنتعش.. أقصى حاجه مياه دافيه وفوطه واغسلي وش وعين وأنف طفلك عشان التراب ولو في حفاظات التغيير العادي كفاية اوي.

٥. السوايل الدافية هيا الحل السحري ماتوقفيش ينسون على كراوية على عسل على تيليو .. تهدى الصدر وتطرد البلغم خاصة لو ابنك بيجيلو حساسية..

٦. لو في رشح ماتستنيش... محلول ملح ( لايس او اوتريفين) بسرعة كل ساعتين .. وسوايل دافية ان شاء الله كفاية .

٧. اختاري الأكل الخفيف بلاش المسبك والحراق والفلفل الاسود والبهارات اللي ممكن تثير الجهاز التنفسي لطفلك وتخليه يكح .. مش ناقصه هيا 😂

٨. بلاش تتقِّلي أوي في اللبس لأطفالك وفجأه تخففي أول ما الموجه الترابية تخلص خير الأمور الوسط.

٩. لمرضى حساسية الأنف لو في رشح توكلوا على الله واستخدمو أدوية الحساسية وبخاخات الكورتيزون للأنف ( بوصف طبيب ) ومحلول الملح.

١٠. حساسية الصدر : ادي جلسة موسع شعب ( فاركولين) بوصف طبيب إذا لاحظتي على ابنك الأعراض التالية:
- كحة مستمرة
- نهجان شديد
- صوت صفير( تزييق) عالى
- ضيق النفس.

ربنا يحفظ أولادنا يا رب آمين. ❤


د.أحمد الخطيب