صفحة من مذكرات زوج فاهم

احصائياتى
الردود
0
المشاهدات
345

راجيه الرضا

مراقبة و متميزة أقسام نسوة
معلومات راجيه الرضا
إنضم
18 فبراير 2017
المشاركات
14,538
مستوى التفاعل
9,650
النقاط
113
صفحة من مذكرات زوج فاهم
النهاردة رسميا يبقى عيد زواجي الثالث عشر على زوجتي الطيبة أم يوسف ^^
النهاردة وأنا بافكر في السنين إللي مرت في زواجي افتكرت حاجات كتير جدا
.
افتكرت لما قررت أتزوجها وأنا كنت لسة في الجامعة , وبالرغم من استحالة تنفيذ الأمر طبقا لحسابات البشر , لكن رب البشر ذلل لنا كل الصعاب وتزوجنا
.
افتكرت في بداية زواجي لما كان الأكبر مني بيشحنوني ناحية زوجتي بكلام من نوعية
" انت الراجل إياك تخلي مراتك تبقى كلمتها بكلمتك "
" لازم مع أول غلطة ليها توريها العين الحمرا علشان تحترمك وتخاف منك"
افتكرت إني كنت ساذج جدا مش فاهم حاجة , فكنت بانفذ
لحد ما انتبهت وتعلمت إن كل طرف لازم يسد ودنه عن كلام الناس , وإن كل أسرة لها طابع مختلف لازم يوصلوا ليه بالتفاهم
.
افتكرت في أول حمل لزوجتي لما تعبت جدا وماكنتش قادر تقوم بمتطلبات البيت , والأكبر مني من مدراء أو زملاء يقولولي
" ده دلع نسوان" ,
" ده الستات زمان كانت تولد وتقوم تكمل شغل "
" شوف فلانة أهي حامل وزي القرد بتتحرك عادي"
كنت أخد الكلام وأروح البيت مشحون وأفتعل مشاكل , وإنها وبتدلع والستات التانيين بيبقوا حوامل وبيتحركوا عادي !
بس ماكنتش فاهم وقتها إن دي فروقات فردية بين النساء , وبتختلف حسب طبيعة جسد كل واحدة
..
افتكرت لما وقعت في ضائقة مالية وهى أصرت تبيع الدهب
ولما جبتلها دهب هدية بعد انفراج الأزمة , أصرت واحنا عند الصائغ إن الفاتورة تتكتب باسمي , وقالتلي
" لا عشت ولا كنت لما أكتب حاجة باسمي وانت على وش الدنيا"
.
افتكرت لما أصريت أحكم رأي في مواقف كتير _علشان أنا الراجل وكلمتي لازم تمشي_ وطلع رأيها هو الصح في النهاية
لحد ما فهمت إن كل شخص مننا عنده خبرة في أمور غير التاني , لحد ما بقت هى متحكمة في نوع من القرارات وأنا الباقي ,,, بعد المشاورة بيننا
.
افتكرت لما مالك ابننا اتولد ومات , وازاي فضلنا شهور بنكره بعض في صمت وكل طرف نفسه يحمل الطرف التاني سبب موته
لحد ما فهمنا وأدركنا إنه كان صعب يعيش بالمرض إللي عنده في السن الصغير ده
.
افتكرت مواقف سيئة كتير جدا مني ومنها
ومواقف جميلة جدا منها ومني
.
وفهمت إن العلاقة الطيبة بيني وبينها دلوقتي , ماهى إلا نتاج كل المواقف السيئة إللي عملناها واتعلمنا منها , والمواقف الجميلة إللي هانفضل فاكرينها لبعض طول العمر
وإننا لو كنا توقفنا عند كل غلطة من إللي وقعنا فيها , كان عمرنا ما هانكمل مع بعض , إلا بالتفكير في الغلط والاعتذار عنه , والتعهد بعد تكراره
.
وفهمت إن البيت النموذجي مش هو البيت إللي مافيش فيه مشاكل
البيت النموذجي هو إللي أصحابه بيعرفوا يتعلموا من المشاكل


علي عبد الله علي
 

من نحن ؟؟

موقع نسوة : هي شبكه عربيه تهتم بكل ما يخص المرآه وحياتها اليوميه يعمل منذ سنوات لمساعدة والمساهمه في انجاح كافة الامور الحياتيه للمرآه العربيه