سنة أولى زواج ..والأحلام والخيال

[راجيه الرضا]

قالت : كنت بصحى الصبح كل يوم على "صباح الخير "

راحت فين المشاعر دى يادكتور بعد الزواج ؟

يا حبيبتى :

فى التواصل الافتراضى "الخيال" بيلعب دور كبييييير جدا فى تفسير الكلمات و تلقيها و فى تخيل دوافعها و ارسالها

انتى كنتى بتتخيلى انك اول حاجة بتيجى على باله
و يمكن كان نايم بيحلم بيكى
و يمكن كان بيفكر فيكى و بيتخيل قبل ما ينام
فصحى و كتب "صباح الخير "
بتتخيلى انه قايم من النوم بيبتسم
و عينيه كلها حب و حنية
و شعره متسرح و ريحته حلوة و بيقول صباح الخير بصوت حنين مع قبلة رقيقة او لمسة حانية

و بتعدى تحلمى لما يجمعكم بيت واحد هتبقى صباح الخير دى ازاى

انتى كل الى حصل انك اخدت كلمة " صباح الخير " و رسمت عليها قصة خيالية من تأليفك و إخراج مخك انت

و هو ممكن يكون باعتها و هو فى الحمام مثلا

و بعد الجواز بتتصدمى
بتشوفى الحقيقة

الحقيقة انه لابيفكر فيكى و لا بيحلم بيكى بالليل بيفكر فى الديون الى عليه و هيسددها ازاى
الحقيقة انه صاحى الصبح مزاجه مقريف و مكشر و منعكش و ريحته عرق كأى راجل صاحى من احلاها نومه علشان ينزل الشغل
الحقيقة انه دلوقت كل همه انه "يفطر" قبل ما ينزل شغله مش انه يقولك :صباح الخير

هو بيتغير علشان مشاعره بتتغير بعد الزواج و دا طبيعى جدا جدا

مشاعر "الخيال" الى انتى رسمتيه غير مشاعر الواقع خالص

انتى لما بتتخيلى انك سافرت مكان جميل غير خالص لما تروحى المكان نفسه
لما تتخيلى انك اشتريتى حاجة نفسك فيها من زمان غير خالص لما تبقى الحاجة بين ايديكى
لما تتخيلى انك بتاكلى حاجة نفسك فيها غير خالص مشاعرك و انتى بتاكليها

الخيال بيصور لنا الحاجة كاملة مفيهاش غلطة
لكن الواقع بيخلينا نشوف الغلطات او القصور او حاجات كتير تانية مكنتيش شايفاها

و دى مشكلة التواصل الافتراضى فى العلاقات الآن

انه بيرسم صور خيالية زيادة عن اللزوم بتتحطم على أرض الواقع و تعمل صدمات

البنات و خيالاتها الرومانسية
و الشباب و خيالاتهم الجنسية

و كله بيتصدم

علشان كدة بنقول ان سنة اولى جواز دى أصعب سنة لاننا لسة بتعرف فيها على الواقع الحقيقى الى غالبا ملوش علاقة بالاحلام و الخيال الى فى مخنا

#دعاء_راجح