..سـآعدوووني ربي لايحرمني منكم .! مـآعندي أحد استشيره غيركم بعد الله ..!

ب

بنوته ستايل

New member
إنضم
2009/08/20
المشاركات
25
السلام عليكم ورحمة الله وبركاته

::

اخبارركم يـآ حوآئيـآت .؟!

::

هاذي اول مشـآركه لي .. حبيت تفيدوني =)

::

انا ملكت قبل شهر وشووي .. والحمدلله مرتـآحه مع زوجي بفضل الله ,,

بس في اشيـآء تضـآيقني منه

مثل /

- اذا ارسلت له قبل النوم مسج مثلا تصبح ع خير ليتني جنبك احضنك ,, مـآيرد على هالمسجـآت ابد

=(

ليش ؟! هل هو من النوع الي مـآيحب يتكلم بهالامور ؟!

كيف اخليه يتكلم عـآدي اؤ يرسل ؟

- مشكلتي اذا اتصل فيني .. دآآآآآيم سـآكته مـآ أسوولف وآجد .. هو يلمح علي سوولفي

بس مدري والله احس ماتطلع السوآلف ؟!

كيف احل هالمشكله ؟!

::

- كيف اعرف انه روومـآنسي ؟ - والله تفكيري مشتت ..

:tears:

سـآعدوني وعطوني معلومـآت تفيدني .. مالي غيركم بعد الله =(

محد موجود يرشدني ويعلمني :tears:

::

انتظركم بفارغ الصبر​
 
مدري حبيبتي بس احس ان فيها جرأه شوي بما انو لك فتررره بسيطه متملكه تقوليله هاالكلام (ليتني جنبك احضنك) >>المفروض هو اللي يقولها مو انتي

اثقلي شوي عليييه تغلي..
 
اذا ارسلت له قبل النوم مسج مثلا تصبح ع خير ليتني جنبك احضنك ,, مـآيرد على هالمسجـآت ابد

=(
انا ملكت قبل4 شهور ولا عمري قلتلو ابا ابوسك!!.او احضنك!! الحيا لازم منه ..الرجال يحب البنت الثقيلة والخجولة..حتى لو هوا تجرأمعاكي انتي تجرأي بس بحدووووود...عشان لا يحسك رخيصة!!!!
انتبهي..وعوديه هوا اللي يرسل دايما..واوصيكي بالدعااااااااء..والله يوفقك ويسعدك آميييين
 
سولفي له خلي هو يسولف انتي سألي فيه شسويت اليوم شنو تتمنى قعدي تحلمي معاه

سولفي له عنك <<ورطيه هو بالسالفه مثلا سويت كيكه وتنغصت لك نغصه منها

ترى مو حلو السكوت يزهق سولفي سوالف حماس موضو يشدك ويشده عن اراء الناس

الجال مايعرف يفتح مواضيع انتي فتحيله

خل اشياء واجد تربطك فيه
واذا على الرسايل
عادي كل الرجال من طينه وحده مو شرط يسرلك قوليله تدري اكثر شي يفرحني لاشفت ردك على رسالتي

نحزيله يعني انو رسايلك مهمه بالنسبه لي

تعرفين انه رومنسي من تصرفاته وهداياه وطريقه اهدائه لك

يعني مثلا يحب يكلمك ويحط موسيقى يجيب لك ورد هداياه لها رونق

عادي حبيبي شويه ششويه ونقدر نفرهم ونحطهم خاتم في اصابعنها

خخخخخخخخخ ياليت هم خواتم خخخخخخخخخخخخخخخخخ
 
قوه يا الغاليه
يا حياتي ستوووووووووووووووب
بديتي غلط عطيه فرصه ولا تستعجلين
وخلي عنج سوالف التلفزيووووون
الريال الشرقي يحب الغموض والثقل
خليه مع الوقت يكتشفك ولا تكشفيله الورق كله مثل ما يقولون
وعلى فكره مو كل الرياييل يعرفون يعبرون عن مشاعرهم
بس مع العشره اذا ما يعرف تعودينه بس لاحضي قلتلك مع العشره يعني مع مرور الوقت
ولا تعطين اذونك حق هاذي وهاذي لان اصابعك مو سوى
ويا الغاليه ممكن اذا ريلك كريم ريل فلاانه؟يكون بخيل؟؟؟
واذا ريلها يقول كلام حلو وغزل؟ممكن زوجك ما يعرف لانه مو متعود؟؟؟
وهاذا الاحسن.... اذا بتقوليلي ليش اقولج ( :
لانه ريال على ويها يعني ماله بالخرابيط ومو متعود وشلج بالي مقطع السمكه وذيلها ؟
لا تستعجلين مع الوقت يعرف انه الكلمه الحلوه تخليج تبتسمين (((( :
وانه الكلام الدفش راح يضايقج ويخليج تبوزين )))):
واذا صرتي عنده راح يحرص على وناستج عشان اهوا بالمقابل يستانس
وعوديه مثلا (ما قلتلي تصبحين على خير انت منت نايم...يلا عيل تصبح على خير)
ومثلا في ناس وايد ما يفولون الحمد لله بعد الاكل مثلا يعني........
(قولي انت ما شبعت ؟؟؟ ما قلت الحمد لله)
واذا لابسه شي جديد وبتورينه قولي ما اعجبك؟؟ بس لا ترضين يقولج حلو ؟؟؟ لا قولي قول انتي اللي محليته
انشالله تكونين فهمتيني يا الغاليه
وهالله هالله بزوجك ولا تقارنينه مع زوج اختك او صديقتج ترا غلط كل واحد له حسنات وسيآت
والله يوفقج ويصلح بينكم ويجمعكم على الخير والحب اللهم آمين
 
حبيبتي . .

اول شي اثقلي عليييييه وبتلآحظين الكلآم اللي تبغينه بيجي منه

ومن ناحية السوالف انا كنت مثلك اول شهر ماعندي شي اتكلم فيه بس بعدين لآآآآآآآ

خلآص زاد ارتباطنا ببعض وبتشوفين نفسك تلقائي تقولين شنو سويتي بالعمل او الجامعه

ووش طبختي . !

وحلو بعد انك تناقشينه ببعض المواضيع عشان تعرفين شخصيته وتتوضح لك اكثر . .

مثلا قولي له ايش رايك لو خلينا جلستنا مستقبلا ان شاء الله كلها رومانسية برومانسية ! :msn-wink:
تصدق أنا أموووووووووت بالشموع . ! أحب آكل على ضوئها !:cupidarrow:

وشوفي شنو يرد . ! بتعرفين اذا هو رومانسي حالم او لا:blush-anim-cl:

مثلا قولي له تصدق أحس اني مختلفة عن البنات في هذي اليومين ! هم دايم تفكيرهم سطحي باللبس والماركات . !
أنا أحب اقتنيها لكن مو هذا اهتمامي . ! انا طموحي واهتمامي كذا وكذا وكذا :icon31:

خليه يكتشف شنو انتي ! وانتي اكتشفيه وكبري نفسك في عينه :sly:


والله يوفقك ويسعدك والف مبروك مقدما
 
الثقل زين حبيبتي000ولا تستعجلين هالأمور000
وفالك التوفيق
 
الحياء مطلوب من أولها جرأة والرجل العربي يحب المرأة الحيية والله يوفقك
 
ياقلبي انا زوجي وعندي منه ولدين بس منفصلين لنا سته سنوات والحمدالله رجعنا البعض

الحين وقت الملكه وقسم بالله ماقلت له ولا مره ضمني او بضمك او زي هالكلام لحظي معي منه عيال

مجرد رساله احبك مشتاقه لك وحشتني لاكثر

حبيبتي اثقلي شوي نصيحه مني
 
الرومانسية اللي تريدينها هذي في الأفلام و المسلسلات و بس ..
ما أريد أصدمج لكن تقبلي الموضوع هذا هو الوااااقع .. و الناس الحالمين و الرومنسين من الرجال نادرين في الخليج .. لأن المجتمع يلعب دور كبير في هالشي ..
الرجل ما يعبر عن عواطفه الحقيقية للمرأة إلا بعد ما يعيشون في نفس البيت .. لكن أي شي قبل ما يكون مبني على أساس قوي ..
و ترا الرجل بشكل عام ما يصدق يتزوج و تكون عنده زوجة تهتم فيه .. يعني لا تخافين من ناحية الحب .. غصب عنه بيحبج .. لكن مش الحيييين .. اكيد فاهمة قصدي ..
و أنصحج خليه على راحته .. لأن يمكن بعدين تتفاجأين من أسلوبه في التعبير عن الحب اذا ضغطتي عليه .. الرجل ما يفكر بالأحاسيس و العواطف قدر ما يفكر بالأفعال .. و يمكن تجرين نفسج إلى أشياء بدري عليها ..
 
البنات معاهم حق ......... اثقلي عليه ....... وهالرسائل اتركيها عنك .......... ترى الرجال مهماكان جريئ يحب البنت الخجوله ................ فكوني خجوله او حتى مثليه ..........
 
حبيبتي انتي غلطتي يوم قلتي له ليتني جنبك واحضنك
لان توكم ماصاركم فتره طويله.. يعني لو هو معودج على هالكلام ودوم يقولج ..ذيك الساعه لو قلتي نفس الجمله عادي وبيرد عليج .. أما على طول جذي صعبه ..

اثقلي لان توكم .. وهو مع الوقت بيتعود وبيرسل لج من هالاشياء وبعدين انتي ابتدي تكلمي وقولي

وعلى سالفة انج ماتتكلمين .. عآآآآآآآآآآآآآآآآآآآآآآآآآآآآآآآآآآآآآدي جدا .. ومع مرور الوقت بتتعودين على الكلااام وبيطلع منج تلقائي .

الله يوفقج ويسخره لج
اختج
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل