زيد وعبيد

[راجيه الرضا]

زيد وعبيد خريجين دفعة واحدة !
الاتنين ربنا أكرمهم بوظايف محترمة جدا
زيد اتجوز وربنا رزقه بتلات أطفال زي الورد
عبيد ماتوفقش لحد انهرده في الزواج !
بعد عشر سنين اتقابلوا على الفيسبوك ، عبيد مشيّر صورته في مدينة (IMG) الترفيهية في دبي وهو راكب (Roller coaster) مع صديقه حسن (عازب برضه) ، ومشير صور تانية ببدلة الغطس في جزيرة لانكاوي في ماليزيا مع صديقه حسين (برضه عازب) !
بينما زيد مشيّر بوستات كلها عن مصاريف المدارس وغلاء المعيشة ، وشوية نكت عن الزواج والخلفة من صفحات الألش المشهورة !
زيد بيتفرج على صور صاحبه عبيد بمنتهى الألم والحسرة ، وبيقول في نفسه : ياااه ، دبي ، ماليزيا ، حسن وحسين وعبيد !! هي دي العيشة ولا بلاش ! الواحد اتدفن في التراب بعد الجواز والخلفة !! ياريتني أقدر اتفسّح والف العالم زيكم ، لكن للأسف ، القرش اللي داخل على قد اللي طالع ، ومصاريف المدارس والعيال ما بترحمش !! .. انت اللي عايش والله يا عبيد .. انت اللي فعلا مبسوط وعايش صح يا صاحبي !
عبيد بيقلّب في بروفايل زيد بحسرة ، وبيقول في نفسه : ياااه على الجمال ! ياريت ياخدوا مني فلوسي كلها واتحرم من كل الفسح دي في مقابل إني أرجع البيت ألاقي زوجة حنونة مستنياني ، وطفل صغير يدخل السرور على قلبي !! بدل مانا عمال أسافر وأصرف كل فلوسي عشان أحس بشوية سعادة لحظية مؤقتة ، وفي الاخر برجع البيت حزين لوحدي بين أربع حيطان ! لا حد يسمعني ولا يحضنني ولا يحتويني .. انت اللي عايش والله يا زيد .. انت اللي فعلا مبسوط وعايش صح يا صاحبي !
.............
زيد وعبيد قصص واقعية بسمعها وبعيشها كل يوم !! وسبحان من قال : " نحن قسمنا بينهم معيشتهم في الحياة الدنيا ، ورفعنا بعضهم فوق بعض درجات " !
اللهم زوّج كل عبيد وآنس وحشته ، ووسع على كل زيد واغنه من فضلك ياكريم

عماد الشريف ​