زوجي يخونني طيب ككل فترة زواجنا

[حايرة حيرانه]

يعطيكم العافية ، قصتي باختصار اني متزوجة من ثمان سنوات والمفروض اني اخدت زوجي عن حب ، من اول يوم زواج بدات انصدم فيه ، كان جامد و قاسي وشوي وشوي بدت مشاكل بيننا بسبب او بدون ، كان يتركني وانا عروس زعلانه بالساعات وما يسال عني هاد غير الاهانات والتجريح، شوي شوي بدا ينام لحاله وكل مرة بسبب ، مرة البيبي بيزعجه ومرة لاني حامل ما بده يضايقني بنومته وهيك ، رزقنا ربنا بولدين حمدلله ومع هيك كنت دائما احس في شي ناقص وبس افاتح زوجي اني حاسه في شي غلط يصيح في و يقنعني انه الحياة هيك وانه انا ما بتحمل مسؤولية وانه قصص الحب هاي منشوفها بس بالافلام …. وصلت لمرحلة رضيت بالامر الواقع وقررت اتحمل عشان اولادي ، قبل حوالي سنه و فجاة زوجي تغير ، صار حنون و يجيبلي هدايا و يحترم اهلي ، انا نفسي ما كنت مصدقة ولا ملاقية تفسير ،

قبل كذا شهر اشترى جوزي تلفون جديد واعطى القديم لابنه…. اخدت انا التلفون و طبعا كان ماحي كل شي بس ما بعرف ليش كنت حاسه انه التلفون راح يدلني عشي … ولاني منيحة بالتكنولوجيا قدرت اوصل لتسجيل محادثاته القديم وهون كانت الصدمة …. زوجي كان على علاقة حب و كان عم يلتقي مع صبية معه بالشغل طول السبع سنين اللي مرقوا و مش بس هيك كانت علاقتهم من ايام ما انا وهو كنا لسا مش خاطبين بس عم نتقابل وهيك يعني من بداية ما عرفته وهو معها….. احاديث ومكالمات بينهم بالساعات ولقاءات وكل اشي ، كلام حب وغرام وكانه زوجي شخص تاني ….
للتوضيح زوجي اختارني انا بكامل ارادته يعني مش مثلا اختار هديك واهله رفضو لا ابدا هو اختارني وهي بحياته وتزوجني انا وانا ما كنت اعرف شي عن علاقتهم …. صارت قصة كبيرة بيننا وواجهته ، بس لانه كان اله سنة متحسن معي وعشان ولادنا رجعت بشروط ووعود منه ما عمره يحكيها … طبعا خبى كتير اشيا عن علاقتهم واصر انه هي اللي كانت وراه ولما صارت بدها تاخذه من عيلته تركها … استمر زوجي حوالي سنه طبيعي جدا ومنيح معي، صار يهتم في و في ولادنا يتصل يسال عني وانا في الشغل وانا جد ما كنت مصدقة ، وفي المقابل انا كمان صرت ادلله اكتر واهتم فيه اكتر و يشهد ربي اني ما قصرت معه باشي طول فترة زواجنا …..من جديد للاسف رجع كل شي متل قبل ، زوجي تقريبا بيروح ما بيحكي معي كلمتين …. وازا حكا بيحكي عشان ينتقدني ورجع لنفس اسلوب زمان تبع انه انا مقصرة ومن هالحكي…. بحس بكل دقيقه قديش هو مش شايفني حاولت احكي معه كتير وجربت كل الطرق اخليه يحبني بس ولا شي نفع … صارحته اني حاسة انه رجع يعاملني متل قبل صاح في واهانني و بهدلني ….حكيت معه عن الطلاق واني مستعده اتنازل اله عن كلشي حتى نفقة الاولاد بس كمان رفض ومصر انه ما يطلق ….. انا مش قادرة افهم طالما هو لاقى حبه الحقيقي معها و طالما مش قادر يحبني و يعيش معي وطالما انا مستعده اعطيه حتى دهبي اللي انا شريته مقابل يطلقني …. ليش رافض وليش ما يروحلها وليش من الاساس ما تزوجها …. انا عايشة تعيسه جدا … فكرت في الخلع بس اللي ذابحني هم اولادي عم بتخيل يصير ياخدهم كذا يوم بالاسبوع وانا ما اشوفهم انا ممكن بموت … ولادي لسا اطفال وانا ما بأمن عليهم معه لحاله لانه ابدا مش حنون عليهم …. بيصيح فيهم بسبب و بدون حتى هم صارو يتجنبوه وروحهم معلقه فيي تصورو انه ابني الكبير هديك اليوم بقللي ماما معلش تحملي ربنا شايف كلشي والولد ما صار لسا ٧ سنين….. حاسة حالي ضايعه ومش عارفة شو اعمل انصحوني وادعولي انا تعبت وداخله في دوامة مش عارفة اطلع منها …. حتى وظيفتي راح اخسرها لانه ما عندي طاقه نفسيه ولا جسدية اني اعطي …. بنام بدموع عيوني و بصحا تعبانه وهو ولا حاسس ولا راضي يسمع من حدا و فش علسانه الا اللي يطلع بايدك سويه … ساعدوني

 

[دانسميز]

شو نمط زوجك.. تعرفي عليها..
عشان نحاول نفهم عليه أكثر..
اكتبي بعض صفاته لو سمحتي

 

[حايرة حيرانه]

زوجي نرجسي جدا يعني بيهتم بنفسه اولا وكل شي بيجي بعده حتى اولاده …. مش حنون ولا عاطفي معي بس معها العكس تماما … مش كريم ولا بخيل عادي بس مثلا ما عمره صرف علي انا بصرف عحالي بحسه بيعتبر اي شي بيصرفه علي مخسر … قاس جدا و متكبر وانا صدقا مش قادرة افهم شخصيته لهلا

 

[دانسميز]

شو زمرة دمه؟

 

[دانسميز]

ممكن تساعد زمرة الدم بتحديد النمط أحياناً..
يعني لو زمرة دمه B ممكن يكون غربي ولو O ممكن يكون شمالي وهكذا.. عشان هيك عم أسألك..

 

[haskha]

الرجال اغلبهم كذا

 

[Ƙհɑժɾɑ]

حبيبتي ،،

ربي يفرج همك ويسعدك ،، بصراحة زوجك رجع لأصله الغريب هو تغيره وتحوله لإنسان لطيف ،، لا تفكري وتحللي كثير لأن هذا سيدخلك في دوامة متعبة و مارح تقدري تطلعي منها بإجابة ،، هو تغير لأنه أراد التغيير ورجع لأصله لأنو هذا اللي بدوا ياه ، كلما فكرت وحللت استهلكت الكثير من طاقتك التي أنت بأمس الحاجة إليها.


لا ألومك أبدًا على تعبك وانهيارك ، ردة فعلك في محلها ،، عيشي ألمك واسمحي لنفسك بأن تشعري بمشاعرك لكن لا تنسي أبدًا لماذا أصلًا بقيتي مع زوجك. ألم تبقي لأجل أطفالك ، إذن أين أنت منهم ؟! لو إنتي تعبانة لدرجة ما عم تقدري تروحي الشغل وهو ما يصرف عليكم من سيهتم بتلبية إحتياجاتك وأطفالك. أطفالك محتاجينك كأم أيًا كان الذي تشعرين به قاومي لأجلهم ، انهضي واذهبي للعمل ، جهزي أكلهم وشربهم واهتمي بنظافتهم وتابعي دراستهم وقومي بدورك كأم لأنهم مالهم غيرك ، وبدون تواجد الأب أو قسوته وانهيارك صدقيني حالتهم ليس أحسن من اليتامى. أي ألم يعيشه ابنك اين السابعة ليحدثك هكذا كمن شاخ وشاف أهوالًا !! هل ينام الليل أم يبقى ساهرًا يفكر في حالك وحال عائلته ؟!! صدقيني أطفالك بخير بقدر ما تكونين بخير ، لكن لو أنت الكبيرة والعظيمة ومثالهم وقدوتهم انهرت أكيد حاسيين أن حياتهم كلها انهارت ، بالنسبة لطفلك أنت القشة التي يتمسك فيها في بحر مظلم هائج ، أنت آخر أمل له في النجاة. هم لسه أطفال مارح يقدروا يتحملوا كل هذا ما بيكفي هو ، لا تزيديها عليهم ، ليه يقلقوا عليك ، ليه يحملوا هما همك ، لساتهم صغار .


زوجك كما قلت قبل حتى أن يتزوجك كان يخون وبعد زواجكم بقي يخون والآن يخون ، لا شىء تغير. قصة الحب بينكما بقيت ماضي ، نصيحتي لك مزقيها لأنها مصدر عذابك ، شوفيه لا بعين الماضي ، بل كما هو اليوم بقسوته وظلمه وخيانته.


لربما خسرت الحبيب ، وهذه خسارة عظيمة لا أقلل منها أبدًا ، ابكي وعبري عن كل ألمك ، لكن بنفس الوقت لممي من ذاتك ، لو خسرت حب الحبيب فالله رزقك حب الأبناء ، ما خسرتيهم لسه ، ما خسرت نفسك لسه ،، لكن أنت على شفا حفرة فلتستيقظي .

كلما عدت للتفكير ب ليش اختارتك ولم يتزوجها وليش تحسن وتغير وليش وليش أوقفي كل هذه الأسئلة وقولي خطر بباله أن يتزوجني فتزوجتي ، خطر بباله يتحسن ثم يتغير فعمل هيك ونقطة انتهى ، ركزي فقط على ما يجب عليك فعله الآن ، هذه اللحظة ،، هذا اليوم وبس . علقي في كل مكان بالبيت الأشياء المهمة التي يجب عليك فعلها ، وعبارات مشجعة لنفسك.


كلي فيتامينات ، اهتمي بصحتك ، الرياضة مفيدة جدا لك والخروج للحدائق ، شوفي طبيبة وعلاجي اكتئابك وصدمتك لو شعرت بأنك بحاجة لشخص يمسك بيديك ، واستعيني بالله ولا تعجزي ، استعيني بالصبر و الصلاة ، هذه ليست نهاية العالم صدقيني ، حزنك له نهاية فلا شىء دائم في هذه الحياة.

موفقة ،،