زوجي ودراسه ارجوكم عطوني حل

[البرنسيسه22]

السلام عليكم
انا من زمان ازور المنتدى ولكن ماسجلت فيه
بس الحين لمن حسيت اني ابيكم تساعدوني في مشكلتي هذي
مشكله كنت اعاني منها من بداية زواجي
واهي الدراسه خليني اقول لكم قصتي من البدايه
انا انخطبت عمري 15 سنه طبعا موافقتي على الزواج كان مزاجي يعني تقولون قلد او ابي اكتشق شنو الزواج اللي يتكلمون عنه شفت موافقتي كانها تجربه والمشكله ان اهلي فرحو بس ماشفت احد كلمني وقالي ايش قصة الزواج بس فكرة تمشيه وناسه ودلع
بما اني كنت بنت متفوقه جدا في دراستي وبالنسبه عند اهلي اني ذكيه ولا ينخاف علي
وتفكري اكبر من سني
انخطبت لمده سنه ولمن جاء وقت الملكه شرطت اني اكمل دراستي هذا الاهم في حياتي
طبعا بيني وبينه قالي لي الثانوي قلت له اذا وصلت لين الثانوي يصير خير طبعا اهو مادرس الا ابتدائي طبعا ملكنا وحسيت من الملكه انه على طول وده يكسر ثقتي في نفسي ويجبر كلامه علي طبعا انا ماخذه الامر طبيعي جدا وعلى طول انزين وحاظر على فكره كان عمره في الملكه 20 وتزوجنا في العطله وكنت رافضه اني احمل وحنا في هالوقت
لا ماعرفنا في البدايه كيف نمانع وخفت على نفسي
من حبوب اوشي
انصدمت اني في شهر واحد اني حامل
فرحت لكن ماتوقعت ابد في وقت اني توني فاهمه الجنس على اولاد
ماطول عليكم دخلت الثانوي
مع الحمل وتبهدل جاهد نفسي مجاهده كبيره عشان انجح بطبع كان زوجي يسوي لي حركات وقت الدراسه وبس يشوفني ماسكه كتاب يسوي سالفه من لاشي وكنت انتظر لين مايروح الدوام واذكر بس تكثر المشاكل وقت الاختبارات وبما اني مجتهده مااقبل اب اي نتيجه الا الامتياز بكيت كثيرا وانا على هذه الحاله حتى على ولدي يقول انتي اهملتي بيتك عشان دراسه وهو يعرف اني ماهملت ولا شي خلصت الثانويه بصعوبه جدا طبعآ حملت مره ثانيه كان متعمد يبي يورطني اكثر المهم خلصت وانا عندي بنت ولد
كانت امي متبرعه انها تطبخ لي الغدا وتمسك اولادي
دخلت الجامعه ومن هنا الرجال ماتحمل قالي تطلعين نص سنه درستها مشقه حسيت اني هني تعبت من المشاكل وقلت يابنت تنازلي وخلي امك ترتاح اشوي
وقلت بوقف هالسنه
وكان عندي خدامه من جد طفشت اول سنه ماتحملت حاطه ايدي على خدي مو عارف شنو اسوي دخلت دورة مكاج وانا بس بضيع وقت بعدين من الطفش حطيت اعلان اني احط مكياج في بيتي ماحبيت هذي الشغله بس قلت احسن من الفراغ
وكل مره افتح الدرج اشوف شهاداتي اتحطم على نفسي واحس اني ابي ابكي
ماحبيت شغلة ربت منزل طبخ وغسيل وتربيه ماحبيت طريقة تامر الزوج كاني جاريه عنده
لان بعد كانة حياتي بيت اهلي تختلف تماما منعزله في غرفتي تلفزيزني كمبيوتري كتبي
فقط وهناك الاجواء هادئه جدا ماعمري سمعت امي تقولي سوي اسوي انا بنفسي عادي بس ماحد يامر علي وابوي في شغله ماتذكر عمره كلمني بطريقة الامر
حاولت اصبر على عصبيته الجنونيه وعلى معاملته لي اللي بس يبي يسمع كلمة حاظر بدون نقاش من جد مليت هذي السنه اخر سنه يقبلون الحكومه شهادتي حس جاني جنون
بفجرها فيه خلاص لعيال كبرو برحون لروضه وانا جالسه قررت قراري اني بدرس هذي السنه بسجل في جميع الكليات والجامعات حتى لو كانك بمبلغ مادي حاولت اكثر من مره ان اقنعه بدراستي لكن يرفض بشده وبدون تفاهم احس كسر النفسي وصل حده
الحين ابي رايكم اكبر السالفه وسوي مشكله وهو قالي مجرد ماتفكرين ترجعين لدراسه رجعي بيت اهلك ورجع بيت اهلي
او ارضخ للامر الواقع واسكت وكسر نفسي خلاص عن الدراسه
والله انا ماابي مشاكل بس احلامي راحت وتعبي هالسنين صارت في الدروج
افيدوني لاني محتاره اسوي اللي في راسي ولا اسكت عشان اولادي بس اذا سكت بصير محطمه احس جاني اكتئاب اصدقائي كلهم خلصو وتخصصو حتى اللي انا اول اجلس ساعات افهمهم صارو احسن مني من جد ياليتني ماتزوجت وصرت نفسهم ماحسدهم طبعا بس اتمن اني اشوف نفسي معاهم وفيهم متزوجين ويدرسون وعندهم اولاد ليش مو راضي يفهم​

 

[تررف القصيد]

الله يعينك ...........بس اللي أوله شرط أخره نور .........
هذا شي ربي كاتبه عليك ..........
ثاني شي حاولي يتدخل في الموضوع أحد فاهم من طرف أهله أو أهلك...........وربي ييسر امرك

 

[سنجار]

صدقيني شهادات الدنيا كلها ماتسوى السعاده اللي تحسها الأنثي بالامومه وان لها بيت وزوج ولابد من مشاكل لكن ان مشكلتكي انتي صنعتيها بالأصرار على الدراسه وشوفي المشاكل اللي في المنتدى كلها إهانات وخيانات وانتي ولاشئ من هذا يعني تقدرين تصنعين السعاده في البيت واطرق كثيره جدا

 

[بووسي]

حبيبتي والله حاسة فيكي ...اتمنى اكمل الجامعة درست سنة وسحبت ماكملت

بس لظروف عمل زوجي وتنقله من مدينة لمدينة ...لكني صابرة ومحتسبة وان شاء الله بكمل

حاولي تقنعيه باسلوب جديد غير اسلوب المشاكل والعناد

قوليله ان الحياة تغيرت وان التعليم اهم شي مو بس عشانك بكرة اولادك يكبروا ويحتاجوا

مساعدة بالدراسة تقدري تساعديهم ...حاولي بطريقة حلوة توصلي الفكرة وان شاء الله يقتنع بدون

مشاكل ولا عناد ... واوعديه انه ما تقصري بحقه او حق الاولاد... شوفي بايش ممكن يرضى ويقتنع

وخلي الفكرة اللي عنده ان دراستك تنفع اولادك اولا واخيرا والله يلهمك الصواب يارب

ادري طولت عليكي بس بقولك كيف زوجي اقتنع اني اكمل ....

كان عندنا جار متزوج وعنده اولاد ماشاء الله هو مهندس وزوجته مدرسة واخوه واخته دكاترة في اميريكا

كان يتكلم كيف ابوه توفى وهو صغير 4 سنوات وامه كيف علمته هو واخوانه بشهادتها وتعليمها

كلمه وحدة قالها لزوجي :لولا الله ثم شهادة امه كان يبيع بليلة على الشط اللحين

زوجي اقتنع لمصلحة اولاده ومصلحتي كمان انا ما نحتاج احد لو لا سمح الله صار عليه شي

بس حبيت اقولك هو اللحين يقولي خلينا نستقر بمدينة ووعد اخليكي تكملي ... من غير ما اتكلم انا

بس شوفي ايش يقنع زوجك والله يوفقك...وان لا سمح الله ما اقتنع وظيفة الامومة احلى وظيفة

الله يخليلك اولادك و تحقق فيهم اللي ما قدرتي تحققيه لنفسك

الله يسخر لك زوجك ويهنيكم يار ب

 

[دنيولا]

أول شئ يالغلا أنا معاك في قرار الدراسة مية بالمية ...

ثاني شئ هذا شرط من شروطك لاتتنازلين عنه ...وخلي عندك كيد الأنثي ...

خلي أبوك يكلمه بهدوووووء ويناقشه ...إجلسي معاه قوليله أنا أفتخر فيك وأفتخر إني إتزوجتك وأشوف

إني سعيدة معاك ليش ماتكمل فرحتي وتخليني أكمل هاذي الدراسة مو عشاني ولا عشانك عشان

عيالنا في المستقبل ...المسؤوليات راح تزيد وودي أوقف معاك وأرد لو شئ بسيط ....

حاولي تعرفين نقطة ضعفه ومدخله إللي تدخلين منه عشان تقنعينه وإستغفري الله وأدعيه لإنه

هو إللي بيده مفاتيح الرزق ...

 

[اشراقه جديده]

الله يوفقك ويسر امرك
موفقه

 

[الزمان البعيد]

السلام عليكم ورحمة الله
اول شيء احتسبي عند الله تعالى
واعلمي انه هو جنتك ونارك
ثانيا انا افهم ما تمرين به تماما
واشعر به
لماذا لا تقنعيه هو الذي يكمل دراسته
لان بعض الرجال لا يحبون تفوق زوجته عليه
وان يشعر بالدونية
سواد بالدراسة
او المستوى الاجتماعي
اوغيره
فاقنعيه يكمل دراسته وشجعيه على ذلك
وانه يقدر على ذلك
مما ستكون فائدة له ولكم
او الطريقة التي تقنعه
الى ان يقتنع
ويكمل دراسته
اعلم انك ستقولين انه مشوار طويل ولكن اقول لك الصبر
هو خير طريق
ومن ثم اكملي انت دراستك فلن يشعر بالفارق بينكما حينها
وسيساندك ويقف معك
ولا تنظري الى شهاداتك والايام الغابرة
فانت مازلت تعيشين وان هناك امل
اشغلي نفسك بعمل انت تحبينه
وابتكري اشياء تعود عليك بالفائدة والنفع
واذا كنت لا تستطيعين الا ان تدرسي
فاقنعيه بالجامعة المفتوحة
اسئلي عنها وابحثي عن طريقة الانتساب
وتكون دراستك منزلية
ولن تهملي بشيء
ولا تفكري بالطلاق لاجل دراستك
قد تربحين الدراسة والعمل بعده
ولكنك ضيعت اولادك
لانهم يحتاجون للاستقرار الاسري
والنفسي

والله يوفقك


​

 

[بالاحلام]

أغلب الرجال مايحب تكون زوجته أحسن منه صدقيني
يعني دايما يبي مرته اقل منه في الشهادات وفي الوظيفة وفي الراتب
يعني يبيها دايما محتاجة له كماان
واختي كانت مثلك رفض زوجها تدرس يبيها دايما بحاجته وكانت توصل للضرب وكان ابوي الله يحفظه حاط شرط انه تكمل الدراسة ومايمنعها من الوظيفة
وفعلا رضى بالامر الواقع وكملت وكان ضاغط على نفسها وماعندها شغالة و3عيال الله يحفظهم وتدرس على حساب خواتي بالجامعة ويجمعون لها كل ترم وصبرت على كل هالظروف ضرب واهانة وملابسه لازم تغسلها هي بيديها والاكل لو مايجي وهوجاهز كسر راسها الحمد لله اللحين باقي لها سنة وتتخرج
وانتي لازم تتخذين موقف وتروحين لهلك ويجتمعون عليه ويكلمونه بالمعروف عشاان تكملين وانتي اقنعيه حاولي قولي له اني بكمل عشان اساعدك وماتدري يمكن يصير لك شيء اقدر اعيش عيالي ومن هالكلام اذا كاان رايق ولاتجيبينها من عنااد واضربي له امثاال من مخيلتك قولي من صديقات امي مات زوجها ولولا الله ثم وظيفتها كان ضاعوا عيالها ,,,,,,,,,,,,,,,,,,,,,,,,,,الخ
ونصيحتي حااااولي كل ماتقدرين
حاااولي بكل قواك
مافييه مثل الشهادة
الله معاك

 

[قطـــــريه]

شوفي اختي لو انتي مب سعيده البيت كله بيكون متوتر ومب سعيد .. اسمحي لي التعليم والشهادة سلاحج الوحيد .. صح هو جنتج ونارج بس اسفه انه ما ينأمن صوبه .. من الحين وهو يتأمر ويتشرط ويهاوش ومتسبب .. لا لا تتخلين عن حلمج واذا اصر روحي بيت اهلج .. صدقيني لو بتخسرين شي ماراح يكون اكثر من خسارتج لو تنازلتي عن شرطج وحلم حياتج لو جارت الدنيا ومد يده ولا تزوج عليج ولا خانج ولا ولا ولا .. انا ضـــــــــــــــــــــد عدم اكمال البنت لشهادتها وربي سلاحكم في هالزمن لاننا في زمن لا اب ولا اخ ولا زوج ولا ابن ينضمن .. اختي فديتها كانت نفس حالتج .. وامي ما خلتها ولا سكتت على ريلها وعاونتها لين خلصت الجامعه وهو كان يتسبب ويسكر عليها الباب ايام الامتحانات وتروح لها امي وتوديها الامتحان والحين ماشاء الله عليها شايله بيتها كله وراتبها كبير وريلها فنشوه وما يشتغل ..

لا لا تتنازلين محد بيندم الا انتي ..