زوجي بعد ان ساعدته هجرني

[أغلا ورده]

اعذروني قصتي طويله تحملوني

ابغى الحل من الخبيرات اي حل الا الطلاق

انا زوجه ثانيه وقبل ماتحكمو علي اعرفو ظروفي ... عانيت من سحر تعطيل الزواج لمدة عشرين سنه ثم تزوجت بقدرة الله اعتقدت اني شفيت من السحر لكن ماقدرت اكمل طلبت الطلاق من ثاني يوم
تطلقت وبعد اربع سنوات خطبني صديق اخويه متزوج وكان راح يتزوج سواء مني او من غيري رضيت لانه فيه كل المواصفات اللي كنت احلم فيها
كان عايش في هم مع زوجته وطلقها من قبل ورجعها عشان عياله ... تزوجته وعمري 37 وهو اكبر مني باسبوعين عشت معاه احلى ايام حياتي كان رجل راقي بمعنى الكلمه
ولكن زوجته كانت لنا بالمرصاد قالت ابغى اشوف زوجتك اللي غيرتك .. وطلبني وترجاني عشان اوافق يمكن ترتاح بس للاسف جت بيتي واستقبلتها احسن استقبال وطلعت وهي تدعي لي وتقول الله يسعدك ويهنيكي
وبعد ماشافتني حرقت الدنيا ... حياتي ماعادت مثل قبل صارت تقول ياتطلقني ياتطلقها ولان زوجي الشمالي مايقدر يعيش بعيد عن عياله صار يداريها ويراعيها عشان ترضى
طلقها وانا اللي جلست اقنعه يرجعها لاني شفت الهم بعيون حبيبي وماتحملت
انا اللي كنت اقول له داريها وحاول تعوضها ... انا اللي كنت اوصيه على عياله واقول له كيف يتصرف معاهم .... انا اللي كنت اقول له اترك شغلك شوي وطلع عيالك يغيرو جو

قالت له غيرتك زوجتك وقصدها تغير للاحسن
وعلى الرغم من انه صار يعطيهم نص وقته وشغله النص الثاني انا ضعت

كنت الحبيبه والزوجه والممرضه والام والبنت كنت كل شي له يجي من بيته مهموم انسيه همه يجي مريض اداويه واسوي له المساج والاكل والاعشاب عشان حبيبي يكون بخير
قالي ماراح القى زوجه مثلك لو الف الدنيا

وفي يوم جا وقالي انا قلت لها اني طلقتك ولانها تراقبه ماصار يجي عندي يقول اصبري وضع مؤقت بس الين تهدا المشاكل معاها ... اخاف يطلقني من جد

يابنات انا احبه بجنون مو متخيله ان قصتي وحبي معاه انتهى كيف استرجع كرامتي واماني معاه

ما اقدر اطلب الطلاق وضعي صعب لاني مو موظفه وما ابغى ارجع اعيش عند اخواني ما ابغى اخسر بيتي وحريتي

ادعي ربي وعندي ثقه كبيره ان الله بيفرج همي وينصرني على من ظلمني
بس ودي ارجعه لحضني يشهد علي الله اني ما ابغى طلاقها ولا خراب بيتها بس انا كمان زوجته ولي حق فيه

 

[ارق عاطله]

الله يكون بعونك
بس بصراحه انتي غلطانه انتي الي خليتيه يتركك ويروح لها




لو انا مكانك حاربتها مثل ماتحاربني

 

[السحابه الثلجيه]

ليش يتعب نفسه
خليه يكون انسان واضح يحترمونه الناس واول وحده زوجته
انتي غلطتي الي وافقتيه لانه بيخليك ويداريها
لاتزعلين لوغاب عنك بحجة ماتشوفه
قوليله يعلمها انه يكدب وانتي لك كرامه لاتخافين من احد وهدا حق من حقوقك
موفقه

 

[فتاهـ الهلال]

الله يسعدك ويهنيك ويبعد عن قلبك كل هم ويخلي لك زوجك يارب

 

[الاميرة سنفورة]

الله يعيينك يارب

 

[نبراس الهداية]

أولاً أعذريني عزيزتي على كلامي اللي بقوله لك لو كان قاسي بس هذا رائي .... في أول كلامك قلتي لا تظلموني بس إنتي ظلمتي زوجته لما وافقتي تزوجيه وزوجته رافضة وحاطة طلاقها شرط .. من قالك أنه لو ما خذاك راح يأخذ غيرك يمكن الله تعالى كان سيحدث بينهم أمر ثاني ويمكن كانت راح تفكر أكثر لما تشوف زوجها فعلا ناوي ع الثانية .....بس أعذريني يا أختي إنتي ما صدقتي إنه أحد تقدملك واخذتي هالكلام عذر ليش وما فكرتي غير بنفسك وعشان كذا لما شفتيه مقصر فيها وفي أولادها نصحتيه عشان تشيلي الأحساس اللي داخلك إنك ظلمتيها وعشان يحبك أكثر. دائما شعور الزوجة الثانية غير عن شعور الأولى خاصة إذا هي حسيت أنه يحبها أكثر تشعر أنها ملكت كل شئ وعشان تريح ضميرها تنصحة يعطي شويه اهتمام لأولاده.. بس خلي نفسك مكانها وحسي بالحرقة اللي داخلها خاصة إذا كان هو اللي ظالمها ... شفتي كيف الحين حسيتي لمجرد أنه أهملك فكيف هي شعورها وهو دخل على حياتها انسانة ثانية ...

هو قال ما مرتاح معها وإنها صاحبة مشاكل ما هو لازم يقول كذا عشان يبرر لنفسه الزواج الثاني طبعا أنا ما أدافع عنها لأنه ما ندرى اللي بينهم ومن السبب ولكن من خلال القصص هنا في المنتدى شفتي البنات كيف مظلومات الرجل هو اللي يسوي المشاكل بعدم اهتمامة وتجاهله وقسوته وبعدين يقولوا للزوجة أنتي السبب وأنتي النكدية .... طبعا هو الحين مرتاح معك لأنه بيتك هادي وما فيه ربش

اسمحيلي اذا كان كلامي قاسي .... بس هذه الحقيقة من وجهه نظري

الحين بما إنه كل شئ صار ... هي شكلها حاطة طلاقك شرط لإستمرارهم بس هذا الوضع مو طبيعي ومصيرها بتعرف إنك بعدك على ذمته .. الوضع الحالي كأنك تعطي واحد إبرة مسكن بس مصير الألم يرجع ... أجلسي مع زوجك جلسة مصارحة وقوليله إنك ما تقبلي تعيشي بهذه الطريقة ولازم يخبرها الحقيقية وتكون الأمور واضحة وفي نفس الوقت حاولي تزوريها أو تكلميها يمكن سبحان الله تقدروا تتفقوا إن كل وحده في بيتها وما لها علاقة بالثانية وتحاولي تستميلي قلبها .. وزوجك لازم يكون واضح ويحط النقط على الحروف ..
أحيانا خوفنا من القادم والمجهول يخلينا نخاف نتخذ اي قرار أو خطوة للأمام مع أنه يمكن هذه الخطوة يكون فيها حل للمشكلة نفسها....
هذا والله أعلم

 

[نبراس الهداية]

طبعا هو الحين مرتاح معك لأنه بيتك هادي وما فيه ربشة عيال وأولاد .. طبعا هو يحب عياله أكيد بس يحب الهدوء بعد .... توقعي انه ممكن يصير معك مثل ما صار معها ...

 

[قصه عشق]

اصبري يااختي وادعي الله ان يرد زوجك ردا جميلا لك مو ظلم انك وافقتي تكوني الزوجه التانيه دائما يحملون التانيه بمصيبه الاولى وانه هذا الشي مكتوب عليكي وعليها وعليه
زي ماهو مقدر ان الاولى تكون زوجته انت كمان مقدر تكون زوجته .... ادعي الله لانك لو خسرتيه راح يقول الناس ماهي قادره تتحمل المسئوليه هذه مو حقت زواج اتصلي عليه وحنني قلبه وقولي ابغى اشوفك لو من بعيد واذا جاء عندك قوليله كل الى ابغاه منك تتطل على كل فين وفين واذا جات رجله بكثره ريحيه ولو باتسامه شوق وان شاء الله يكون وضعك احسن من قبل
وهي طنشيه وفكري بنفسك فان الله يحب المومن القوي ولي عوده باذن الله

 

[نبراس الهداية]

قصة عشق ... أنا مو ضد الوحده إنها تكون زوجة ثانية بس المهم مو على حساب خراب بيت الأولى وخصوصا أنه عندها عيال ... لأن في النهاية هي راح تدخل معهم في نفس دوامة المشاكل لأنها راح تكون جزء منهم وهذا فعلا اللي صار..
يعني أعرف حريم هم خطبوا لأزواجهم وحريم اضطروا ووافقوا على اساس كل وحده في صوب بس المهم ما يتزوج وهو اصلا فيه مشاكل وطلاق وغيره ...

عموما هذا رائ وأكيد كل إنسان له رأي .... بس الضرة حرقة قلب وهذا ما يختلف عليه أثنين وأنا أنقهرت لإني حطيت نفسي مكان الأولى بعيد الشر .... وفي النهاية لكل حاله وضعها وظروفها .. أتمنى أن الله يوفقهم ويتفاهمو لأنه خلاص اللي صار صار .... أنا أقول تحاول االحين بالطيب والحسنى تستميل قلب زوجته عشان هو بعد يرتاح ويرجع لها

 

[أغلا ورده]

شكرا لكم يالغاليات لكل من نصحت ودعت

نبراس بسألك سؤال ... لو زوجك قالك احب شعرك طويل واسود ورحتي قصيتيه وصبغتيه وش تتوقعين شعوره

لو قالك اجلسي في البيت وانتبهي لاولادك وذاكري لهم واولادك كل سنه يسقطو وانتي طالعه داخله زيارات وسفر وغيره

لو جا في يوم وصار يبني لك بيت العمر عشان يطلعك من الايجار هل بتطالبينه انه يغير لك الوان جدران البيت اللي هوه ايجار وبتجلسي فيه كم شهر

لما يرجع من شغله متاخر ويطلبك حقه الشرعي وانتي ترفضي بحجة انه ليش رجعت متاخر ....

كل هاذا نقطه من بحر .... انا لو على كلامه كان قلت يكذب بس الكل كان يشهد له انه معيشها اميره وهي مو عاجبها اهله واقاربه وزوجات اصحابه

انا كنت اظن انه اللي مصبره حبه لها بس الحقيقه انا شفت كيف متعلق باولاده تقدري تقولي انه عايش عشانهم

ولما تقولي احاول اتفاهم معاها ... صدقيني حاولت قلت بفهمها اني ماابغى اخذ منها شي قلت بطمنها اني ماابغى لها الشر واني راح اكون في حالي بعيد عنها وعن بيتها بس هي مارضيت صارت تسب وتشتم وترسل رسايل على الجوال وانا ماارد احترام لزوجي ولاني مااحب اكون في هالموقف

لدرجة انه لما يقولها ليش تتحرشي فيها ايش تبغي منها تقول ليش هيه تسوي نفسها محترمه وماترد عليه

ولما قلت لك انه كان راح يتزوج مني او من غيري لانه فعلا كان مكلم خطابات

انا مااقول انه هو كامل وهي غلط لا اكيد كان فيه غلط منه ... لكن انا اتكلم عن عشرتي معاه ومعاملته معايه مايقصر لا في مصروف ولا حب ولا اهتمام رجل بمعنى الكلمه وهاذا اللي مخليني متمسكه فيه

 

[نضوج أنثى]

نصيحتي لك انتي مو بوضع مواجهه مع زوجك ابداً لأنه بتصير مشاكل وغالباً لا قدر الله تنتهي بالطلاق وطبعاً وضعك غلط ومو طبيعي قدامك حل واحد جربي وبتشوفين النتيجه بإذن الله مرضيه الجأي لله بس ولا تضغطين على زوجك ولا تحاولين معاه اي محاوله مبدئياً حل مشكلتك بيد الله ادعي يومياً لا تخلين يوم يمر بدون دعاء انه ربي يرد لك زوجك ويسخره لك ويفرج همك وثقي بالله ثقه تامه إنه بيستجب لك ويفرج همك كل اللي عليك تسألين عنه و تخففين عليه الضغط وخلي الباقي على رب العالمين كلنا مابيدنا شي غير النصيحه وممكن تكون نصائحنا صائبه وممكن خطأ لكن ربنا بيده يصلح الحال ويقلب موازيين الامور فوضي امرك لله وحده واتصدقي ولا تخلين التحصين والاستغفار والصدقه