معلومات ~UniQuE~
~زوجك يخونك و الا تغير فجأة بدون سبب ! ..تعالى اقري القصة ~
السلام عليكم ورحمة الله وبركاته
قصة ملهمة لامرأة انقلبت حياتها من الاجمل الى الاسوأ و عانت الكثير من العذاب الى ان تغير حالها للافضل سبحان الله فحبيت انقلها لكم لانه فيها الكثير من الفوائد و الحكم ...
.................................
موضوعي هذا ترددت في كتابته
بس ما حبيت ابخل عليكم بالنصيحه
بالبدايه حبيت اعطيكم فكره عن الموضوع اللي بكتبه موضوعي هذا مابي منه سوا الاجر من الله تعالى
حبيت اوجه رساله الى كل مهمومه من زوجها
الى كل زوجه احترق قلبها بالخيانه والعذاب والاهانه مع الزوج
اقسم بالله حياتي كانت شي واصبحت شي ثاني
والفضل كله يرجع لله تعالى
تبين تفاصيل قصتي
وشلون الله بدل حياتي مع زوجي من حال الى حال
ببدي اقولكم كل شي وخطوه بخطوه
بسم الله الرحمن الرحيم
بداية زواجي
تزوجت وعمري بحدود ال20سنه
كنت بنت على الموضه لبس كشخه وجمال ودلال ما كنت اهتم لاي شي ثاني
كنت شبه مغروره
كان زوجي اكبر مني ب 7سنوات
بداية زواجي فيه عشت ملكه في بيتي
كل شي متوفر لي دلع الى ابعد الحدود ... كان زوجي ما يحبني لا يا بنات كان يعشقني
كان بس يطالع فيني ويقول سبحان الله اللي رزقني بوحده مثل جمالج
مرت علي سنتيين كانو من اجمل سنين عمري استغنييت فيها عن صديقات الطفوله والدراسه حتى اهلي كنت ما اروح لهم ولا ازورهم لاني كنت بين احضان زوجي اعيش حياه لا توصف
مو محتاجه اي احد ثاني وانا عندي شخص معطيني الدنيا كلها
كانت المشاكل بينا شبه معدومه
حياة عشتها كانت اشبه بالحلم
رومنسيه لابعد الحدود ...حب ..شوق .. غيره
كنا عند الكل يضرب فينا المثل
الى ان جاء اليوم اللي حملت فيه
كانت فرحتنا لا توصف
حجز لي تذاكر وسافرنا (ببشارة الحمل)
رجعنا بعد اسبوعين وكنت مثل الاميره في بيتي
وكنت كل يوم يمر علي
احب زوجي اكثر واكثر
ومستحيل استغني عنه
وزوجي نفس الشي
كان يحبني حب جنوني وتعلق فيني اكثر واكثر
الى ان جاء يوم ولادتي
وجبت لي ولد
وكانت فرحته ما توصف
فرحنا كثير
الكل جاني وبارك لي كانت حياتي جدا سعيده
وفي فترة النفاس
وهذي كانت بداية حزني والمي وحسرتي
اتذكر الموقف يمر علي والاشياء اللي صارت وابكي على حضي
اللي اهي فترة النفاس
رحت فيها بيت اهلي
وكنت حيل فرحانه بولدي
ومشغوله فيه
وكان زوجي بين وقت والثاني يمر علي ويدق تلفون ويسال
وبعد اسبوعين من ولادتي
زوجي تغير وبدل الله حاله من حال الى حال
سبحانك ربي
صار كل ما ادق عليه تلفونه كله انتظار انتظار انتظار
كنت اقول يمكن يكلم رفيجه او امه او ابوه
كان يخليني على الانتظار ولا يرد علي
وبعدها يرد علي ولاول مره
باسلوب سوقي ومنحط
انتي شتبين؟ اذيتيني ؟
وبعدين معاج؟
شفتي انتظار سديه وانا ادق عليج؟
انا من الصدمه تبلعمت !
زوجي حبيبي يكلمني بهذا الاسلوب
وبعد مناقشات زعل وسد الخط بوجهي
قعت ابكي ... ابكي بحرقة قلبي ليش يعاملني جذيه
صد عني ولا يرد على اتصالاتي ولا مكالماتي ولا المسجات اللي ادزه له
الين جاء اليوم اللي بطلع فيه من الاربعين
ويوم طلعتي كان مواعدني نروح فندق ونقضي ليلتنا فيه
انصدمت انه يدز مسج ويقولي
خلي السايق يوديج بيتج؟
يعني طالعه من الاربعين واروح وارجع مع السايق
هذا الشي الثاني اللى اثبت فيه زوجي انه مستغني عني وما يبيني
وبعد ما تناقشت معاه واصريت انه يجي ياخذني
جاني ومرني في بيت اهلي
كنت بكامل زينتي
وكل اهلي انبهرو فيني
خليت ولدي عند اختي اللي تصغرني بسنه ورحت مع زوجي لشقتي في بيت حمولتي
علشان ناخذ راحتنا وولدي ما ياذيني وقت الليل
دخلت علي بيت حمولتي
الكل انبهر فيني
الكل يطالعني ويخزني
ويقول ماشاء الله تبارك الرحمن
كنت طالعه من الاربعين بشكل مميز
الا زوجي كان وده يفارقني وما يبيني عنده
دخلنا شقتنا
وسكرنا باب الفرح وراناااااااا
كل شي بزوجي تغير
لاحظت عليه التغيير من اول ما ركبت معاه السياره
كان حتى عيوني ما يبي يشوفها
التزمت الصمت ودخل عزكم الله الحمام ياخذ شور وانا بدوري غيرت لبسي وقعدت انتظره على فراشي وبغرفة نومي
دخل وشافني
قام يخزني
يطالع
لبس بجامته
وقال انا تعبان اليوم وباجر وراي دوام ولازم انام
من الصدمه ما عرفت ارد قمت وغيرت هدومي ولبست بجامتي وحطيت راسي على المخده وطالعت فيه وقلت
تصبح على خير
صد عني ومارد علي
قلبي لحضتها قام يشتعل نار
وماحبيت اساله عن الاسباب
وقلت اكلمه بوقت يكون فيه رايق
واهني راح ابدي معاكم مسلسل معاناتي مع زوجي
بعد ما شفتو بداية تغيره عليه
وحتى وقت طلعتي من الاربعين
استمريت على هالحال فتره
كنت كل يوم اساله يقولي مافيني شي
حاولت افهم منه الموضوع وشنو اللي غيره ولا شي
انسان صامت وغامض ولا تعرفين شنو اللي وراه
تحملت على شاني احبه
وللحين ما شفت شنو سبب تغيره
ولا ادري شنو السبب
حاولت ..بحثت
كرست كل وقتي وحياتي له بس اطلب رضاه وسعادته
ولا تغير فيه شي بالعكس الاهانه كل يوم قاعده تزيد
والاهمام والرومنسيه انعدمت بينا
زوجي انقلب حاله 180%
حياتي اصبحت تعيسه
نزل وزني و وجهي ذبل
صارت حياتي كلها اهانه وضرب وتجريح
الى ان جا اليوم اللي كشفت فيه السر اللي اتمنى اني انساه
لاني اللي شفته مو شويه
وفي مره من المرات طلعت انا وزوجي
واحنا في السياره اشتد الحوار بينا
وانا من النوع اللي حيل هاديه وما اصارخ ولانه يصارخ علي وانا اسكت ينقهر
فبلحظة غضب كان الوقت حزة المغرب واحنا في السياره
قام زوجي وشدني من راسي وانا جنبه وطق راسي بجامة السياره
موقف مر عليه اكثر من اربع سنوات بس للحين اذكر احداثه بالتفصيل
كان الشارع صوب الاشاره فاضي
وفجأة شافنا رجل بجانبنا مدري من وين طلع
شافني يوم زوجي يطقني شوي الا الرجال فاتح باب السياره اللي صوب زوجي
وسحب زوجي من صدره و رزه من دشداشته
وقام يطق فيه ويطق ويقوله كلام ويسب
قام يقوله تتقوى على مره يا جبان
حيلك على حرمه
انت على هالتصرف منو يصبر عليك والله يعينها عليك
اول شي انا كنت ابكي بس كنت اطالع المنظر وزوجي يدافع عن نفسه
صرت اشوف الرجال شلون يطق زوجي وانا من صدمه ما قدرت اسوي شي
اصلا مدري من وين طلع
المهم وبعد عراك معاه شوي صار الشارع فيه ناس يفرقونهم راح الرجال وركب السياره وطار
وزوجي يقول للناس حصل خير سوء تفاهم مع واحد من العايله مايبي السالفه تكبر
ركب السياره وبعيونه كلها شرررررررررر
كنا قراب حيل من البيت
قال انزلي واصعدي شقتج بسرعه
انا نزلت وصعدت شقتي وانا ارجف
شوي ولا داخل وراي وقفل باب الشقه
ودخل علي داري وعقبها
طقني طق كااااااااااااااااااااافر
ما انسى اللي سواه فيني لو شنوووو
ما انسى الاهانه والطق اللي جاني يومها
كاني خليت الرجال يطقه وحط حرته فيني
اتذكر الموقف كانه امس
طلع عقبها انا طايحه على ارض الغرفه احس اني انهنت وانجرحت كرامتي
وبعد ساعتيين بالضبط طلعت ورحت بيت اهلي
قعدت فتره زمنيه عندهم ورجعت بيتي
ولو اكمل في التفاصيل ماراح اخلص
وللحين مسلسل الاهانه مستمر
طقني واهاني
واشياء كثيره يا بنات
وفي مره من المرات
وهذي الصدمه اللي ما عقبها صدمه
عشت ثلاث سنوات بهم وحيره وقهر
كل شي في زوجي تغير
كل شي توقعته منه
بس عمره ما طرى في بالي انه يكون يخوني
كان اليوم الاسود اللي عرفت فيه خيانة زوجي
ومن متى كان يخوني وشلون وانا وين
بقولكم شلون
يومها كان زوجي تعبان
حيل حيل
لدرجة انه ما يقدر يقوم من الفراش
اخذوه اخوانه للمستشفى
ثاني يوم رحت عنده كاان يطالعني بنظرات يا بنات مو طايقني
يصد عني الرجال ما يبيني
كنت ادوس على قلبي لاني للحين احبه
وثالث يوم من كان في المستشفى
رحت له وسبحان ربي صدف اني قبل ما ادخل كان عامل مصري شايل بوكه ورد كبير
وبيدخله لغرفة زوجي اخذته منه وقريت الكرت
شفت فيها صدمة حياتي
طلع زوجي له صديقه يعرفها من ثلاث سنيين ونص
عرفت التفاصيل بينهم كلها والحين اقولكم شلون
قريت الكرت كان فيه كلام حب وغزل واسمها وتوقيعها
انصدمت عيوني غرفت دموع
شلون ما حسيت وعرفت كل هذا
ويني عنه طول هالمده
كنت اداريه واجابله واسوي كل شي يبيه
وكل هذا جزاه الخيانه
كتمت غيظي
واخذت الورد وحطيته في ركن بعيد في المستشفى
وشقيت الكرت ..دخلت عليه
من غير ما احس اول ما شفت عيونه
دمعت عيوني وتحسسرت على عيشتي معاه ..حسيت اني بالفعل مغفله
غبيه
ويني عنه ما حسيت بكل هذا
طالع فيني قالي شلونج وشلون ولدي
تمام كلنا بخير نسال عنك
كمل صدته
ماكو فايده
قاعدين سايلند
كل منا ساكت
ولا احد يتكلم
وانا ادري لو بنطق بكلمه راح ابكي وما اتحمل
سكت انتظرت
عنده
وطلعت على طول
الشك ذبحني
رحت افتش باوراقه
وبسيارته
ما تتخيلون اني عشت طول هالسنيين مغفله
غبيه
لقيت بدرج السياره خط ثاني في ارقام بنات
ويسالون عنه
ويقولون وينك يا القاطع
لقيت منديل فيه روج حمره
تذكرت اني قبل كم شهر لقيت علامه في رقبته وسالته قال جرح وتوني اسوعب انه شي قذر
يعني اتضح لي انه يمارس الج*** معاها
كان يقوم من الصبح ويكلم بتلفونه ويقول جاهز يا قلبي امرك
<<<كان يسوي نفسه انه يكلم رجال واهوه يكلم رفيجته
ما كنت افطن انه يكلم حرمه
كان يدخل الحمام ويتروش ويحلق جسمه كامل ويطلع
ويرجع لي بعدها باربع ساعات مستانس ومرتاح وسرحان
وان طالع فيني قال اطلعي برا عني مابيج
كل هذا فسر لي شي واحد
حسيت اني صج مسكينه وعلى نياتي
وحسيت انه ما يستاهلني واخبث انسان على الارض
يعني في الوقت اللي اكون محتاجه له
كان يروح مع غيري ويمتع نفسه
بعد ما عرفت هذا
كان جسمي ينتفض وانا اكشف كل شي قدامي
سكت وقلت بشوف للنهايه
وبعدها طلع زوجي من المستشفى
استقبلته عادي نام على السرير
وراح في سابع نومه
بطلت تلفونه
فتحت الصور
لقيت صور بنات من تصويره
في تلفونه واهوه معاهم
لقيت مسجات خلاعيه
يدزها لهم ويدزون له
انصدمت اكثر واكثر
قمت ابكي وابكي وابكي
ونمت وانا على فراشي
وعقب ما قام من النوم
صارحته بكل شي وقمت ابكي بحرقه
طلعت له المنديل والصور وتلفونه
تتوقعون شنو ردت فعله
طقني وشدني من شعري وطردني من البيت
وقالي روحي بيت اهلج مابيج
تخيلوا !
بعد كل اللي سوووه قال مابيج
وحط كل عيب فيني
رحت لاهلي
وانا عيني فيها رضه
جسمي كله كدمات
اهلي شافوني و استخفّوا
اخواني قالو امشي نرفع عليه قضيه
ونوديه ورى الشمس
امي تطالع فيني وتتحسر على حالة بنتها
احس اني مكسوره
ضعيفه ومحتاجه لاحد يسندني
رفضت القضيه ورفضت ان احد يكلمه وقلت لحد يدخل
وبعد اسبوع دق وحاول يراضيني وانا رافضه
مابي اطول عليكم
بقولكم بختصار
رجعت بعد شهرين الى عش الحياة الكئيبه
كنت ابي اجذب زوجي لي
بكسبه
ابيه يرجع مثل قبل
يتبع في المشاركة الثانية
التعديل الأخير:
اسم الموضوع : ~زوجك يخونك و الا تغير فجأة بدون سبب ! ..تعالى اقري القصة ~
|
المصدر : القصص والروايات الواقعية