لي مايقارب السنتين و8 شهور متزوجه ولكني لم اعيش مع زوجي الا مايقارب
الاربعه اشهر كنت مجرد ضيفة شرف في حياته لا طبخت لاكنست لا نظفت لا
غسلت كنت محاصره لاني سكنت مع اهله بعد الزواج حتى الغرفه الخاصه لي
رفضت امه انه يسوي لي بحجة اننا ماراح نستقر في البلد كنت انام بغرفة ماهي
غرفتي حتى الباب ماقفله بالمفتاح عشان لو احتاجو شي من الغرفه.
ماتهنيت بزواجي ولا بملابس عرسي كلها في الشنط اغلبها جديده مانلبست
كانت امه واقفه لي حتى الطلعه ماطلعها الا بعد ماسمع كم كلمه تهز بدني بها
تزوجنا على اساس انه طالع بعثه للخارج وبيروح يرتب وضعه والحقه , اللي صار
اني حملت من اول شهر قال هو واهله واهلي مافيه سفر الا بعد ماتولدين قلت اوكي
مو مشكله
ولدت وبدأت الامور تتغير الاهتمام من اهله اختلف والكلام اختلف وكل شي اختلف
يرمون علي كلام مافيه سفر وين بتسافرين مانتستغني عن البيبي !! وانا مطنشه
مارد عليهم ..
بعد ماولدت بـ 5 شهور قالي بجي زياره لكم بس ماراح تسافرين معي .. بعدها بشهر
بتلاحقيني لان الاوراق والفيز ماخلصت قلت اوكي تعال ماحبيت احرمه من شوفت
اهله .. وفعلا جاء وقعد اقل من 10 ايام في هالعشره الايام
انواع الكلام ينرمي على من امه لاتدلعها لا تطلعها لالالالا وكنت امشي ولا ابين له اني زعلانه ابد والله
واكتشفت في جهازه صور لبنات شي لحالهم ومن اشكالهم باين انهم عربيات وصور له مع بنات طبعا
واجهته في البدايه عصب ووو وفي النهايه يوم شافني انهرت بكاء رجع يعتذر ..
ومن الاشياء اللي اكتشفتها انه صار مدمن شات وفتح موقع الشات قدامي وعادي انا
ماهتميت بالموضوع وقتها لاني كنت واثقه فيه وسافر بعد مانتهت اجازته اللي
صار ان الرجال تغير علي تغير غريب مع العلم انه ارسل الاوراق وخلاص كلشي
منتهي مابقى الا نسافر (طبعا اهله رافضين فكرت السفروبالاخص امه لانها تغار مني عليه وهالكلام هو قاله لي اول ايام زواجنا )
يوم حسيت ان الرجال متغير قلت في نفسي اكيد ان وراء التغير حرمه خطفته مني
عصرت مخي عصر الين تذكرت اسم الشات اللي كان يدخل له ودخلته وليتني
مادخلته شفته يكلم البنات من كل بقاع الارض كنت ادق عليه وهو على الشات
ومايرد واذا دقيت اكثر من مره يرد ويسوي نفسه نايم وكنت امشيها له ..
تدرون وش سويت صرت ادخل الشات واسولف معه بأسم مستعار طبعا وهو
مايدري اني زوجته ,, وفي يوم قالو في الشات ان فلان اللى هو زوجي يحب فلانه
من جنسيه عربيه وطبعا يكتب لها كلام حلو وحب ويهديها اغاني وهي نفس الشي
وماتخليه يكلم احد من البنات لانه حبيبها وتغار عليه وانا انحرق في مكاني حاولت
ابتعد عنه في الشات وصرت مراقبه له من بعيد لبعيد ولا اكلم احد وربي غيره
ورجع هو يكلمني في الشات لاني على قولته غير البنات اللي في الشات
(وانا فعلا غير لاني ماعمري دخلت هالاشياء ويوم دخلت الشات دخلت عشانه هو )
كان يمدح فيني قلت لها لا تكلمني دام لك حبيبة وعشيقه
في هالشات قال اعطيني رقمك واعلمك بالسالفه كلها وطبعا رفضت لاني راح ينفضح امري
المهم اصر وانا ارفض وقلت هاك المسنجر واخذت ايميل صديقتي واعطيته ودخل وقال انه
مايحبها بس هي تحبه وتموت فيه وهو مايشوفها الا اخت لا اقل ولا اكثر ومستمر
معاها لانه عارف نفسه انه ماراح تتغير احاسيسه اتجهها لا سباب ذكرها .. الفتره
هذي كان متغير معي مررررره وانا ساكته ماكان يرد على اتصالتي الا نادرا طلبته
رقم زوجه صديقه عشان اسالها عن بعض الامور وش اخذ معي وش الوان الحجاب
المنتشره هناك طبعا اخذه وارسله لي (الاخت الله يهديها ماصدقت اني اتصلت
وماخلت شي الا وقالته لي عن زوجها وزوجي والمجموعه اللي معاهم تشتكي لي
منهم مع العلم ان كل الكلام اللي اشتكت لي منه انا اعرفه عن طريق زوجي ..
وغلطتي اني وثقت فيها وقلت لها انى من زمان ودي اجي وكل مره يتأجل سفري
وان اهله معارضين قالت لي لا عاد تاجلين سفرك ولو قالو لك اجلي اطلبي الطلاق)
قفلت مني وراحت دقت على زوجي وقالت له ترا لو ماخذت زوجتك تراها بتطلب
الطلاق وكلاااام ثاني مدري وشهو الين الحين )
طبعا اتصل على الرجال مايرد وانا غلي قلبي عليه اخر شي رد قال وش تبين قلت
وش فيك قال اسالي نفسك وش قلتي لفلانه وكانه كان قنبله موقوته انفجر فيني ( انا
مابيك انا ماحبك انا وانا وانا وجرحني بكلام كثير مرررررررره )
طبعا تكنسلت السفره بطلبه من اهلي بحجة انه جاي وبياخذنا معاه
رحت اشتكيت لاهله لاني مابي اهلي يدرون في البدايه ابوه قال ابشري باللي
يرضيك ولكن حتى هو تغير علي بسبب الام ولاخوات .. الله يسامحهم .
استمرت علاقاته في النت مع عشيقته الساقطه وانا اراقبه واتكلم معه وهو مو
عارف اني زوجته
طلب تحويل بعثته للدوله اللي تقيم فيها بنت الحرام طبعا قال في الشات انه بينقل
وسألته عشانها قال لي لا وانكر لي في الشات انه عشانها لانه يبي يخلي صورته
نضيفه قدامي ..
وللاسف في منتدى خاص بأمور الابتعاث وكنا ندخل له دايم دخلت
المنتدى الا والقاء كاتب انه يبي يحول عشان له اخت هناك تحمل الجنسيه وانه
بيسكن معاها !!
انا صعقت يوم قريت كلامه واتصلت على اخته في البدايه حاولت تدافع عن اخوها
وفي اخر المكالمه جرحتني جروح ماراح انساها الين اموت
جا البلد في فتره النقل حاول يخذني معاه بيت اهله ورفضت ورفض ابوي وقال
ماعاد لها رجعه عندك الا تاخذها معاك وتسافرو مع بعض طبعا رفض وتعذر
وتحجج انه رايح لبلد جديد ولا يعرفه وطبعا اهله واقفين معاه ضدي ورفضو انه
ياخذني معاه
طبعا اللي مجنني هل قابل البنت هناك ؟ هل عاش معاها ؟ هل تزوجها ؟ عاش معها
بالحرام !!
علما ان ظروفه الماديه يالله تكفيه الا اذا كانت هالبنت غنيه وبتصرف عليه هذا شي
ثاني
طبعا انقطع عن الشات وونااادر ماصار يدخل .. ليش مدري !! هل هو بسبب الدراسه او ان البنت ماتسمح له يدخل
الحين له سنه من تزعلانا وانهدمت العلاقه بيننا وله سنه من سافر للبلد الجديد
وله وله سنه و6 شهور هاجرني كزوجه
وله رجعه خلال هالفتره يمكن الشهر هذا او الجاي
طبعا من بعد مانقل صار يكلمني في الشهر مره وانا ارد عليه بكل برود يعني
كاني اكلم غريب وعلى فكره حتى رقمه هناك ماعرفه تصورو زوجي ولا اعرف رقمه !!
مادري وش قرر عليه هل له نيه ياخذني انا وطفلي معها ام لا !
طبعا انا مابقى قدامي الا الطلاق لاني مستحيل اقعد اكثر من كذا معلقه لاني متزوجه
ولا ني مطلقه وفوق كل هذا خانني وباعني عشان وحده ماتسوى التراب اللي امشي عليه
واحس اني لو طلبت الطلاق بترجع لي كرامتي وبرد اعتباري
وبصراحه فقدت كل شي الثقه والامان والحب معاه جرحني في كرامتي في انوثتي
كنت احبه واموت فيه كنت حنونه الى ابعد مدى معاه كنت البي له كل طلباته كنت
طيبه وصادقه ومخلصه ومتفانيه ومتغاضيه عن اشياء كثيره كنت اخلاقي عاليه معاه ومع الكل ..
كان يحبني وحنون علي بس كان كلام اهله يأثر عليه
ودي اتطلق وافك نفسي من الهم واللي يمسكني من يدي اللي تعورني طفلي اللي من
جا على الدنيا ماعاش مع ابوها ولا يعرفه ماودي يعيش يتيم وابوه عايش ولا ودي
اذا كبر تتعب نفسيته من عدم وجود الاب بس انا ماعاد اقدر اصبر اكثر من كذا
وطلب الطلاق بالنسبه لي هو الحل الوحيد
انصحوني وش اسوي ؟؟؟
واعذروني على عدم ترتيب الكلام لاني والله نفسيتي تعبانه ومندمره مرررره
