دروس من الحياة المهنية ..أنت والعمل

[راجيه الرضا]

من أهم الدروس اللي اتعلمتها في حياتي المهنية

1- انت بتشتغل عشان تجيب فلوس ،هدفك الاساسي مش الاستمتاع ممكن ربنا يكرمك و تستمتع بشغلك و تكسب فلوس برضو لكن دي رفاهية ربنا مبيرزقش بيها الكل

2- انت بتشتغل عشان تتعلم و تفهم اكتر في المجال اللي اختارته و لو مش بتتعلم بس بتكسب فلوس كويسة خد من الفلوس دي و اتعلم على حسابك توقفك عن التعليم = توقفك عن النمو جوه شغلك و بالتالي مش هيزيد دخلك

3- شغفك مكانه مش لازم يكون في الشغل، ممكن نشتغل عشان نستمتع بشغفنا بعد الشغل، تسافر مع اهلك تجيب حاجة كان نفسك فيها، تقضي وقت اجازتك مرتاح عشان الحمد لله عندك شغل

4- الشغل وسيلة، الشغل وسيلة، الشغل وسيلة نقول كمان الشغل وسيلة مش غاية، لو كنت مريض و بتاخد دوا مبتتأمرش على الدوا و تقول اصله طعمه وحش ولا الحقنة بتوجع!! خد الدوا ينصلح حالك و ربنا يتم شفاءه عليك لان الدوا وسيلة مش غاية و كذلك الشغل وسيلة تحقق بيها غايات تانية اهم

5- مش المفروض الشغل ياخد كل حياتك لو صحيت لقيت نفسك مربوط في شغل بيبلع وقتك و بيستهلكك ابتدي خطط لانك تلاقي شغل آدمي يحترم حياتك و وقتك اكتر من كده

6- الوظيفة مش استعباد في المطلق، الوظيفة هي تبادل تجاري، انت اختارت انك تقلل المخاطرة بتاعتك و تجيب حد يتحمل المخاطرة بدالك بتاعة المكسب و الخسارة ( صاحب العمل) صاحب العمل ده ما بيكسبش كل شهر فيه شهور بيكسب و شهور بيخسر فالطبيعي انه يقسم اجرك على السنة كله مكسبها بخسارتها و يكون اقل من اللي انت ممكن تكسبه لو اشتغلت بنفسك مش موظف، لكن التقسيمة دي بتحصل عشان يقدر يستمر في انه يديك الاجر بتاعك في معاده غير كده هيفلس

7- ربنا سبحانه و تعالى مطلبش منك غير السعي النتايج دي بتاعته هو رزق و مكتوب فارض برزقك تكن اغنى الناس

#learn_today_lead_tomorrow

أحمد سالم