خيانة الشرقي وكيف تعاملت معاه

[زوجة شرقي]

مرحباً عزيزاتي ?

أنا زوجة شرقي ، قديمة جداً ولكني غير نشطة للأسف ، كنت معاكم في منتدى الدكتورة ناعمة ونشيطة ولكن بعد مانتقلتوا هنا طفيت ، بحاول أتكلم بلهجتي المريحة وراح تشوفوني كثير إن شاء الله .


قررت أرد العطاء وأبدأ أتلحلح .

دايم كان يغيضني أن مواضيع الشرقي قليلة ، وأكثر نمط مكتسح القروب الشمالي ههههه سواء الشمالي الغربي أو الشمالي الشرقي .

أكثر موقف وقفني وقررت من بعدها إني راح أكتب لما حصلت خيانة جنسية مع الشرقي وكنت مثل المجنونة أبحث بمنتدى نسوة وكل المنتديات عن التصرف الصح لكن للأسف مالقيت شي يفيدني وأنا بحالتي المنهارة .

خلوني أعطيكم نبذة عن زواجي وزوجي :

زوجي الشرقي إنسان حبوب وكَ أي شرقي إنسان منظم ومرتب ووسواسي وأهم أولوياته أسرته وعمله .

عشت معاه 15 سنة ومامريت بأي خيانة ، مو معناته مافي مشاكل لااا ، كانت في مشاكل بس تمشي الحياة ، وتعرفون زعل الشرقي ( يمشي لك أول مره وثاني مره وبعدها يعطيك درس ويجلس زعلان من يومين إلى أسبوع ) ، وأنا حياتي ماشيه كنت أدرس وأقرأ الكتب والمقالات وأخذت العديد من دورات الدكتورة ناعمة ، ووصلت للإستقرار وكنت أحس بحبه لي ويمكن هذا اللي خلاني أكون شوي مغتره وشايفه حالي إن أثق فيه ثقه عمياء ، ودايم أسمع أن الشرقي مخلص ومايخون ف زاد الغرور أكثر .



كانت هذي مقدمة لقصتي مع خيانة الشرقي ..

 

[سماء عالية]

مرحبا فيك عزيزتي من جديد،،
وكلنا اذان صاغيه،،،
ننتظرك 

 

[زوجة شرقي]

وهو من عشاق السفر ، ونسافر على طول أنا وهو والأولاد وسفراته مع أصدقائه قليله قليله لاتذكرر ..

مرت الأيام وصارت مشكلة بيننا وكنت متوقعة كالعادة راح يمر بالكثير أسبوع ونتصالح ، ومر الأسبوع وجلسنا نبي نتفاهم وارتفع صوته وارتفع صوتي ويابو زيد كنك ماغزيت ، رجعنا نكمل الهوشة ومر الأسبوع والأسبوعين ودخلنا بالثالث وأنا حاسه بضيقه لكن زوجي ماحسيته متضايق كالعاده حسيت مستانس وفي شي مفرحه شنو ! ماعرف .

وتعرفون الشرقي شقد يحب البيت يعني بيتوتي بحت ، لكن بهالفترة صاير يطلع كثير لدرجة واضحة وصاير يسهر عند ربعه ( والصديق هذا جديد في حياته أقصد ماكانو بهالعلاقة القوية ) . وأثار شكوكي وقلبي مو مرتاح حسيت في شي غلط .


وزوجي متعود مني إني ماأمسك جواله أبد أبد ، والله يابنات أمسكه يمكن بالسنة مره وألقاه نظيف ، فهالشي مخليني متطمنه وغير إنه مو حاط كلمة مرور بجواله ، فزاد الثقه عندي .


وبيوم من الأيام كان حاط جواله عالشاحن وهو جالس برى الغرفة مع الأولاد ، قلت هذي فرصتي وأقفل الغرفة وأفتح جواله ، وأفتح محادثة صديقه الجديد ولقيت مرسل له صور مراقص في دولة عربية ، ويقول له عن الأماكن والأسعار ولقيت حجوزارت له ولصديقة في الفندق .


وهنا كانت الصاعقة لي ورجعت الجوال مكانه بكل هدوء ، وأطلع من الغرفة ووجهي بلا أي تعابير ولا زلنا مانكلم بعض فماراح يشك بتعابيري ..


جلست أبحث وأدور بكل المنتديات عن الشرقي وكيف أتعامل ، رحت شفت لو في مجال آخذ إستشاره عن د ناعمة مالقيت كلها فل لمدة سنة قدام ، رحت أرسلت للمشرفات هنا بالقروب زوجات الشرقي محد رد ..



كنت حاسه نفسي بالمعنى الدقيق جسد بلا روح ، أمشي وأشتغل وأتكلم وأنا بعالم ثاني ..

 

[زوجة شرقي]

الحين عرفت إنه راح يسافر من المحادثه ، وأتذكرت إستشارية قديمة عندي وأحترمها جداً ودائماً أسمع عن نجاحها وكيف تحل الأمور بطريقة ذكية ، وبحثت عن رقمها وطلعت وكلمت السكرتيره خذت موعد بنفس اليوم .


كانت كل ساعة بهذا اليوم تمر كأنها ساعااات ، لما جاء وقت الموعد وشرحت لها القصة بالكامل ، قالت كم باقي على سفرته ؟ قلت 4 أيام ، قالت الحين الحين تسكرين مني التلفون وترسلين له رسالة ( وش حيلة المشتاق ) ، وأنا تعابير وجهي كذا :30::30::30::30::30::30::30: .
شلووون الحين أقولك المشكلة تقولين أرسلي هالكلمة !!!!!!!!!!!!!

قالت وإذا جا تستقبلينه بالأحضان ولا كأن شي صار بينكم وتعيشين ليلة جنسية جميلة ، ولاتوضحين له إنك تدرين أبد وبكرة نكمل مع بعض شنو الخطة ، وسويت مثل ماقالت وكانت الساعه 10 بالليل والأولاد نايمين ورحت لبست وتكشخت وتعطرت وهيئت الغرفة وأرسلت الرسالة على طول رد وقال لي ( يله جاي ) ، ماتتخيلون شقد صدمني رده لأني أرسل له رسايل قبلها ولا يرد ، ورجع وعشنا ليلة جميلة ولا وضحت له أي شي وعاتبني على أخطائي ووضح لي شكثر مشتاق لي ، وكيف إني أنا سبب نفسيته التعبانه ، قال مآخذ إجازة أسبوعين كرهت الدوام منك ، وماأطلع ولا آكل بالبيت منك ، وطلع كل عيوب الدنيا ، وقال لي إنه راح يسافر مع صديقة سياحة ..

تعبت من الكتابة ، الجزء الجاي شنو قالت الإستشارية وكيف خطتنا .

 

[أم عمر العمانية]

شوقتيــــــــــــــــــنا أختي زوجة شرقي

كملي، ننتــــــــــــــظرررررك

 

[أم شبيب]

اختي ممكن توضحين زوجج شنو شرقي جنوبي ولا شمالي ؟؟ شكله جنوبي ههههههه

رفع

 

[زوجة شرقي]

اختي ممكن توضحين زوجج شنو شرقي جنوبي ولا شمالي ؟؟ شكله جنوبي ههههههه

رفع

الغالب الغالب شرقي ودون الغالب شمالي ..

 

[زوجة شرقي]

نرجع نكمل :

ورجعت للإستشارية قالت لي يافلانه زوججك يحبك ويموت فيك لكن أنتي بإهمالك له قاعد يبتعد منك ، بنات كل شي موفر له أكل وملابسه مرتبه وبمكانها لكن عنده حب التملك ويبيك فاضيه له وماتنشغلين بغيره أبد ، وأنا إنسانه كنت مشغوله بكذا شغله في الفترة هذي ، المهم قالت لي هو رايح رايح وحاجز ماراح يكنسل ، فالحل كالتالي :
1- أشبعيه جنس خلال الاربعة أيام كل يوم حتى لو مايبي ، تذكرون كلام الدكتورة ناعمة عن نظرية الزوج الجائع والشبعان ، المهم هي قالت نفسها أن خليه متخم من الجنس وكل شي سويه دبل الكشخه والدلع والاهتمام ، طيب ليش ؟ عشان يروح شبعان وفرق اللي يروح من زمان عن الجنس ودايخ له والشي الثاني حتى لما يفكر بالجنس أو أي خيانه يحس بتأنيب الضمير .

2- حاولي تذكرينه بالله والخوف من الله ، وكانت هذيك الفترة صلاته رديئة جداً ، وحاولت ألمح بس ماكنت قادرة أبد أصرح بس ماتكلمت كثير معه من هالناحية .


3- أن لما يسافر أكلمه من بعد الساعه 10 الليل لأن هنا الوقت اللي تبدأ السهرات والخراب ، فكنت أرسل له صور لي سناب بالليل صور خاصة وأكلمه ، وإبتديت هالسوالف من بعد ثاني يوم وصول للمنطقة وهو بيجلس 4 أيام ، وأرسل له مقاطع لأولاده بنته تبكي أبي بابا مشتاقتله وولده يوصف شكثر مشتاق له ، الزبدة أننا مانخليه بحاله ونكون على باله على طول ، وكل ماصارت مشكله أتصل له يافلان شنو أسوي وكيف ، وصلت الفكرة ؟





وعدت الأربعة أيام ورجع البلاد .

 

[زوجه تائه]

كيف مشغوله عنه بالابناء او بالوظيفه ياليت تتطرقين اذا مافي احراج

 

[زوجة شرقي]

كيف مشغوله عنه بالابناء او بالوظيفه ياليت تتطرقين اذا مافي احراج

كنا بإجازة وكنت مشغولة بالطلعات والزيارات والضيوف ، مو معناته مهملته لا وربي بس مو مثل إهتمام قبل ، وإذا عندك شرقي تعرفين شكثر الشرقي دلوع ويحس إنه مو دلع ومن الضروريات ، مع إني دايم أوحي له وأحاول أوصل له إنك بنعمة وإننا بنعيم ووووالخ ..

 

[زوجه تائه]

كنا بإجازة وكنت مشغولة بالطلعات والزيارات والضيوف ، مو معناته مهملته لا وربي بس مو مثل إهتمام قبل ، وإذا عندك شرقي تعرفين شكثر الشرقي دلوع ويحس إنه مو دلع ومن الضروريات ، مع إني دايم أوحي له وأحاول أوصل له إنك بنعمة وإننا بنعيم ووووالخ ..

انا زوجى شرقي شمالى بفصيله الدم
ولا صفاته الشماليه والشرقيه متساويه وكنت دايم اتعامل معاه ع انه شمالى بس جديد اكتشفت ان الفصيله لها اثر بالصفات

بس عكسك يبغانى اكون مبسوطه وانبسط واغير جو خصوصا مع اهلى يقولى اطلعو استراحه ونامو فيها يومين ثلاثه لانه لنا سنتين ماطلع يمشينا وسافرنا ويبغانى اغير جو مع اطفالى
وانا اعطيه ايحاء انى ابغاه برضوا يطلع ينبسط مع اصحابه مع انى ما احب علشان يغير جو وياخذ شاليه معهم بس مجرد يحس انى مو كابته عليه ويخفف من ضغط العمل والتفكير بالبيت والعمال
وانا دايم اشتغل ع الايحاء انه مافي مثل راحه البيت والجلسه في البيت وان جلسه الاكل في البيت مافي مثله وانك ما تقدر تستغنى عن ياحياتى بدونى تضيع

 

[زوجة شرقي]

انا زوجى شرقي شمالى بفصيله الدم
ولا صفاته الشماليه والشرقيه متساويه وكنت دايم اتعامل معاه ع انه شمالى بس جديد اكتشفت ان الفصيله لها اثر بالصفات

بس عكسك يبغانى اكون مبسوطه وانبسط واغير جو خصوصا مع اهلى يقولى اطلعو استراحه ونامو فيها يومين ثلاثه لانه لنا سنتين ماطلع يمشينا وسافرنا ويبغانى اغير جو مع اطفالى
وانا اعطيه ايحاء انى ابغاه برضوا يطلع ينبسط مع اصحابه مع انى ما احب علشان يغير جو وياخذ شاليه معهم بس مجرد يحس انى مو كابته عليه ويخفف من ضغط العمل والتفكير بالبيت والعمال
وانا دايم اشتغل ع الايحاء انه مافي مثل راحه البيت والجلسه في البيت وان جلسه الاكل في البيت مافي مثله وانك ما تقدر تستغنى عن ياحياتى بدونى تضيع

شوفي شرقيي يدور وناستي بس مو مع غيره ( يمكن غيره ) ، لما أكون معاه يحاول مايقصر معي بشي لكن مشكلته مع غيره ( لو حبيت أطلع مع أحد من أهلي أو صديقاتي يا آنه يوافق على مضض أو أنه يرفض ويتعذر بأعذار سخيفه ، مو مشكلته بالأماكن مشكلته مع الناس .. ومو دايم هالمشكلة بس عادةً ، خصوصاً لو راح آخذ وقت طويل معاهم أو حس إنه ممكن يهمل به ..

 

[زوجة شرقي]

ورجع للبلاد وإستقبلته أحسن إستقبال وكأني بلهاء وماعرف شي ، وسوالف وضحك ..

وراح قال باخذ شاور سريع ، وتعرفون الفضول اللي فينا خصوصاً إن عندي خلفية عن موضوع ، بس كنت أبي أتأكد وكان داخلي يقول يارب ماشوف شي يعور قلبي ، وأمسك الجوال وأشوف الصور مافي شي وأروح أفتح الواتساب رسايله مع صديقه اللي سافر معاه ، ولقيت الفاجعة بالنسبة لي ( كان يسأله ها كيف ليلتك وزوجي يقول تمام وأنت شسويت والحبوب خذت مفعولها ؟ ويسأله أسأله والله أستحي أكتبها ، بس طلعو الأثنين مآخذين بنات وكل واحد بغرفه ) .


وجلس أرجحف وقلبي يددددق بقوة لدرجة أحس بيغمى علي من المصيبة ، وتركت الجوال مكانه وأكلم الإستشاريه ماترد والله حسيت نفسي أختنق ، وأرسل لها أرجوك ردي بس دقيقة تراي تعبانه وأرجف من اللي شفته ، وعلطول إتصلت وأعتذرت أن عندها زحمة بمكتبها ، وقلت لها اللي صار وقالت سووي التالي :

1- ضروري ماتوضحين أنك تعرفين أي شي .
2- قالت لي والله لتآخذين حقك يافلانه بس بشويش خلينا نحبكها صح .
3- حاولي توضحين كيف أن ياحلو الحلال ومن هالسوالف ( طبعاً ماقالت لي الالية لكن جتني فكرة بقولكم تحت .
3- تعيشينه ليلة جميلة .



الفكرة اللي طرت على بالي هذي التمثيلية :

طلع من الشاور وجالس مع أولاده وسوالف وضحك ويعطيهم الهدايا ، وأنا صامته وبس مبتسمة وهو يعرفني كيف أنا أسوي جو معاهم ، حطيت الأولاد بغرفتهم ورحنا لغرفتنا وسألني شصاير ؟

قلت وحدة من البنات داقه تستشيرني وكدرت خاطري ، قالت منو البنت قلت لاا مستحيل أقولك ، قال طيب شنو سالفتها ؟ قلت تخيل إكتشفت زوجها يخونها بالفراش ! وأقول له والله غثتني السالفه ، ويجلس يبرر للرجال ومن هالسوالف وقلت له كلمة ( قلت ياررربي مايخاف من الأمررراض ) شوفوا الصدمة شنو قال : قال الواحد لما يبي مو يآخذ أي وحده يآخذ وحدة نظيفة ، وأنا حسيت دمي يفور يفور من كلمته قلت بقلبي والله لأخليك تتحسف على كلمتك هذي ، نظيفه هاا بتشوف ، وبدأ كيد النساء يشتغل بمخي بس بقولكم بعدين شنو فكرت فيه .


وعقب إنغث هو من كلامي وتهجمي ، وقال خلاص قفليها ، وتقفلت وبعدها عشنا ليلة حلووة وقلت له يااحلووو الحلال وظل ساكت وعدت هذي الليلة .

 

[زوجة شرقي]

وطبعاً هو نام قرير العين وأنا أفكر وأفكر شنو أسوي ومخي شغال وكلمته أن الواحد يآخذ نظيفه صداها في أذني ، وجات لي الفكرررررة ، والشيطان واقف على جنب يصفق لي ها ها ها ها ، ( دعابه ) .


جاء اليوم الثاني ولما جا وقت العصر قلت له يافلان ماتحس بشي !
قال لا شنو !
قلت لا خلاص خلاص آنسى ومشيت اليوم الأول عادي ( وطبعاً قلت للإستشاريه خطتي وعدلت عليها شوي حتى تصير بإحتراف هههه ) ..


واليوم الثاني رجعت أسأله يافلان ماتحس بشي ؟ قال لا شنوو قلت مادري أحس إني مو طيبه وأحس بتعب وبحرقه في البول الله يكرمكم ، ووجهه تغيير قال لا عادي .
وجلست أتسدح طول اليوم وأروح الحمام الله يكرمكم وأرجع ( ترجيع ) وأشتكي من ظهري وبطني ، وهو يسوي أنه ماله شغل بالسالفه أبد وبريء ، ومشى اليوم الثاني .



جا اليوم الثالث ورحت الدوام ولما جات الساعة 9 الصبح أرسلت له رسالة بغيت رقم المستشفى الفلاني أذكره عندك ( وهو صدق عنده الرقم ) كنت أقدر أسوي بحث بقوقل أطلعه بس بغيت يعرف ، وأرسل الرقم ، وعقب أرسلت له تقدر تطلع من الدوام ؟ وإتصل علي على طول وقال شفيه؟

قلت له إتصلت عالدكتوره أستشيرها وقلت لها شنو أعراضي وقالت ضروري ضروري تجين مايصير بالتلفون ، ورحت للطبيبة فعلاً ودخلت عادي لأني كنت حامل فدخلت مراجعة للحمل ، وطبعاً هو مايعرف .


يتبع

 

[سماء عالية]

ههههههه الجزء الاخير يهبببل ويفطس ضحك
بردتي قلبي ،،
كملي علشان نشوف ردة فعله!!

 

[زوجة شرقي]

ولما طلعت منها قال ها شنو قالت ؟
قلت للحين خذت بس مسحه للرحم بس مدري ماريحتني ، قلت تخخخيل قالت زوجك متزوج ؟ والله كنت بضربها ، وغير هالشي وجهها ماطمني بس قالت تعالي بعد يومين ضروري تكون النتيجة طلعت ، ولا عطتني شي آكله أبد حتى مسكن قالت بعد يومين اذا طلعت النتيجة ، وقالت ضروري تسويين سونار ( التراساوند ) قبل تجين عندي .


وعشت بدراما معاه هاليومين قبل أشوفها وأتشكى وغير هالشي زدت بعيار الحب والحضن والكلام الطيب والاهتمام ، وهو مو طيب أحس زدت عليه مصيبته .



ولما جا بعد يومين اللي هو اليوم الموعود موعد النتيجة وأشوف الدكتوره ، رحنا أول شي أسوي سونار بمركز غير العيادة ، والله من طلعنا من البيت وهو صامت ولاكلمة أبد أبد ، وأول مادخلنا قالو لي يله تعالي الغرفة ، ووجهه والله بلا أي تعابير وجهه مصفوق وخايف وأنا عادي وأسولف وكأني بريئه ، قال أدخل قلت لا بيسون فحص داخلي ( وهو حياته مادخل معي في أي سونار لأي واحد من عياله ) ولما طلعت من السونار قال شنو قالو وفي نبض للبيبي او لا ؟ قلت النبض فيه بس الباقي ماعرف قالو دكتورتك تقولك .



ورحت للدكتوره ومعي الاوراق ، ومايقدر يدخل لأنه قسم نساء ، كل شوي متصل ها كم باقي قدامك ؟ وكل شوي ارد باقي 4 باقي 3 .. لما جا دوري أرسلت أنا بغرفة الفحص وبعدها بدخل عالدكتورة ، وبعدها أغلقت الواتساب .



ويتصل حوالي 5 مرات وبرسل وأنا ماأرد ، قلت خليه يعيش بقلق وأنا مستانسه من داخل ، وبعدها بنص ساعه أرسلت له تعال أنا برى !

وعلى طول إتصل مارديت ، وجاا وهو يمشي بسرعه قال هاااا شنو قالت وأنا ( كنت مآخذه معي قطرة عيون وقطرت بعيني قبل أطلع ) فحط عينه بعيني ويقول يافلانه شصار وانا عيوني دموع وقلت مابي أتكلم ، ونمشي للسيارة ونركب .



ولما ركبت قال قوولي شصاررر تكفين ، وأنا ساكته ولافه وجههي وعرف أن في مصيبه وعرف غلطته بدون ماتكلم ، ويترجاني تكلمي قولي شصاررر وانا سااااكته بس اطلع صوت خفيف اني أبكي هههه ، وواقفين بالسيارة قلت فلان إمش وأقرب صيدلية وسكت .


وجلس يضرب السكان ويضرب نفسه ويقول الله يلعن الشيطااان قالها يمكن من المستشفى 500 مره ، ويكلمني ماأرد عليه ، ولما وقفنا عند المستشفى قال ماراح افكك قولي شنو صاير قلت ( فيني مرض جنسي ، قال شنوو اسمه ؟؟؟؟ قلت اسمه الكلاميديا ويصرخ يالللللله استرررر علي ، قال طيب يضرك ؟ قلت يضرني ويضر البيبي ويضرب السكان كذا مره زين ماتكسر :| ، وانزل الصيدلية وجا بينزل قلت لوسمحت لاتنزل ( خفت يكشفني هههه ) ..


ورحت الصيدلية وقلت له ابي كريم للفطريات للرجال وابي معقم للمناطق الحساسه للرجال وعطاني .

وشريت اغراضي الناقصه هههه .

وركبت السيارة وعطيته الكيسة وقلت هذا علاجك .



ومن ركبت وهو انا اسف يافلانه والله اسسف ، والله من اسبوع وانا احترق من داخل ، يافلانه شنو تبين والله اللي تبين بسويلك بس سامحيني ، وانا ساكته ولاكلمه ، الطريق حوالي اكثر من نص ساعه ولا سكت طول الوقت يتكلم لدرجة جلس يبكي ( لأول مره في حياتنا الزوجية أشوفه يبكي ) طبعاً ماشفته لأني مالتفتت عليه بس أسمعه ، وتكفين قالها مية مره وأنا ياجبل مايهزك ريح ، سكتت لما وصلنا البيت .


ولما وصلنا دخلت غرفتي علطول وانسدحت يعني ابكي ودخل وقفل الباب وجا عندي ويرجع يترجاني وأنا اسف ضررريتك واسف على كل شي ، بنات كنت مصدومة منه الشررقي اللي دايم رافع راسه وهيبته قدامي وقدام الكل ( شغله نفس كذا بالحرام سوت بحياته وهيبته كذا :| ) .


ولا تكلمت والف عنه ولما يقرب يبي يلمسني أبعد عنه وضحت له إني متقززه .


وراح وتوضأ واستخدم ادويته ههه ، وجلس يصلي عندي وطول بالصلاه .


يتبع

 

[سماء عالية]

هههههههه
والله انك ذيبهه،،وبنت رجال

 

[ريمة 2]

عجبتني الفكرة روعة يا سلام على دهاء النساء

 

[زوجه تائه]

حلوووه مره فكرتك يااااارب ترزق كل مبتليه بزوجه حسن التدبير

 

[زوجه تائه]

للاسف عند المصيبه مافيه لاكيد ولا حسن تصرف
كأن العقل منشل
يااااارب تحفظنا من الحرام ومن الابتلاء