خلاصة البرد في10 نصائح

[راجيه الرضا]

?خلاصة البرد فى ١٠ نصايح ?

١. جميل جداً لما الأم تكون ناصحة وفاهمة طبيعة ابنها ،، في أطفال بيجيلهم برد عادى - وفي أطفال حساسة (حساسية أنف أو صدر) ،، يعنى لما البرد بييجى بيطووووول سواء رشح أو كحة .
مهم كمان تلقطى ايه اللي بيتعب طفلك ؟
#هوا ساقع ؟؟ يبقى خروج الصبح بدرى بكوفية وغطا رأس ..
#شهر ٣-٤ ؟؟ يبقى حساسية ربيع وحبوب لقاح نبعد عن الجناين الوقت دا..
#قطط وكلاب وريش حيوانات ؟؟ نخلص منهم ..
#حشرة فراش ؟؟ لأ لازم تغلى الملايات واكياس المخدات وغطا الفرش على ٧٠ درجة اسبوعياً !

٢. الأحلى لما نبقى فاهمين أكتر طبيعة التعب ...
هل هوا على مستوى الأنف (رشح ، خنفرة،زكام ، هرش ، عطس ) وهل هوا بسيط محتاح تسليك بس بمحلول ملح أو ماء بحر ،، ولا متوسط محتاج نقط الاحتقان ( اوتريفين واوكسيميت) مع زرتك مثلاً ،، ولا شديد محتاج بخاخات كورتيزون !
ولا هوا أصلاً البرد نزل على الصدر ومحتاج ادوية كحة زى موسعات الشُّعب أو الكورتيزون أو حتى جلسات بخار بال Nebulizer ..

٣. النقطة المهمة هنا جداً ...
ان ناس كتير بتحكم ابنها محتاج مضاد من عدمه بوجود حرارة ... سخن = مضاد ..
لأ ممكن جداً يكون مش سخن ولازم ادى مضاد ،
تعالوا نشوف البروتوكولات الأمريكية في إعطاء المضاد لأطفال "التهاب الجيوب الأنفية " - بوصف طبيب فقط- :
١. لو الحرارة ٣٩ مع رشح أصفر (مش أخضر) ٣ ايام متتالية .
٢. لو الطفل تعب وبعدين حصل انتكاسة حادة فى الاعراض (رشح وكحة وحرارة) شديدة حتى لو يوم واحد .
٣. لو الاعراض (زكام ، كحة ، رشح) استمرت ١٠ ايام متتالية رغم العلاج .

الفكرة هنا ان الكلام ده محتاج "تقييف" عالطفل "وتظبيط" على الحالة !! ودكتور صبور ميبدأش بالمضاد .

٤. أخطاء قاتلة تخلى البرد يستمر مع طفلك !
( من واقع حالات العيادة)
* استمرارك فى مرواحه للمدرسه أو الحضانه رغم الكحة والرشح .
* الخروج بيه بدرى جداً أو بالليل فى الهوا المباشر
* الاستحمام والخروج في مكان بارد او هوا من غير ما نلبس الطفل .
* ترك الرشح والبرد والكحة فترة طويلة بدون علاج او كشف باعتبار ان دا ال Default بتاع ابنك ،، لأ يا مدام دي حساسية !
* التقبيل من الفم ، السماح للغير أصلاً بالتقبيل وانتى مش عارفه عنده برد ولا جاى منين وجايب معاه ايه !
* التواجد ربع ساعه في غرفة مغلقة مع أى شخص بيكحّ ، او القرب مسافة ١٥ سم من الفم !
* إعطاء مضاد حيوى بدون أى تلاتين لازمة وبالذات سبترين اللى كل الأمهات اتفقوا مع بعض انه مطهر للحلق ? وزثروسين وزثروماكس اللى برضه الأمهات أجمعوا انه مضاد "خفيف" ? وانتو عارفين طبعاً الأمهات لا تجتمع على ضلالة ?
* " الآراء الخزعبلية " في تخفيف وتتقيل الهدوم خصوصا مع الجو المتقلب ده !! الحسبة بسيطة ،، متخففيش الا لو في البيت او خارجة بالنهار وضامنه ترجعى بالليل ، لو هتليلّ عليكى خدى حاجة تقيلة !!
*"هوس الحموم" ٣ مرات يومياً بحجة النضافة المبالغة وتعريضه للهوا بعدها وحاجات كده استغفر الله العظيم تودى ف التهاب رئوى عدل ?

٥. الرشح اللي بيطوّل ..!!

دفيتى الواد ؟؟
عالجتي الرشح ؟؟
غيبتيه من الحضانة أو المدرسة ؟؟
الدكتور إتأكد انها مش حساسية أنف واستخدمتى بخاخات الأنف ؟؟
عملتى آشعة عاللحمية واتأكدتى أنها مش لحمية؟؟
بعدتيه عن أى "حدّ" بيكح او عنده برد ؟؟؟

٦. لزملائى الأطباء : الكحة اللى بتطوّل ..!!

إتأكدت انها مش سببها "الحنفية اللى فوق" الأنف ؟؟
قفلت الحنفية ؟؟
لسه في كحة ؟؟
إديت موسعات شعب ومهدئات سعال ومفيش فايدة ؟؟
الكحة بتتكرر ومعاها نهجان او تزييق و سامع الصدر مقفول وبدأت علاج حساسية الصدر ؟
برضه مستمرة ؟؟
الطفل تحت السنة وشاكين فى ارتجاع داخلى للبن على الصدر وخدنا مضادات ارتجاع وكمان مستمرة ؟؟
إتطمنت على القلب ؟؟
شكّيت فى التهاب بكتيرى وإديت مضاد وكمان مستمرة ؟؟
لأ كده تحولها لاستشارى صدر أطفال يكشف عليها !!

٧. للأطباء : متلازمة الخناق ( Croup )

*ببساطة صوت غليظ مميز للكحة ساعات مع الشهيق اختناق -الفيديوهات على جوجل -.
* معناه التهاب في الحنجرة أوالاحبال الصوتيه وهنحتاج كورتيزون يا ولدى ..!

* المضاد مش واجب إلا لو فى علامات التهاب بكتيرى وده ناااااادر جداً فى الكروب ..
* إوعى تعالج التهاب الحنجرة ده وتسيب الأنف بتنزل افرازات كل شوية تلهبها تانى ،، معظم حساسية الحنجرة معاها حساسية انف .. نركز هاه ?

٨. أيوا متخرجيش بالطفل تحت السنة والسنتين كتير فى الجوّ ده !!
متخرجيش إ لا لو الخروج مفيد والله !
ولو عالفسح نختار النهار ، اليوم الدافى ، المشمس ،، ونعمل حسابنا لو اتأخرنا واخدين معانا لبس تقيل عشان منعياش ..

٩. مش معنىٰ كده إنك تقعدى في البيت كاتمه العيال ،، لأ التهوية مهمة جداً ومطلوبة جداً ،، الخروج بحساب وفى أوقات صح مهم طبعاً ..

١٠. للمرة المليار بعد الدشليوون ...

مفيش حاجة إسمها رشح متكرر جداً من غير ما نفكر في حساسية الأنف واللحمية !
مفيش حاجة اسمها كحة متكررة ومعاها نهجان وصفارة من غير ما نفكر فى حساسية الصدر!
مفيش حاجة اسمها أدوية من غير ما تدى سوايل دافية وتسلكى الأنف كويس - الفيديوهات ماليه جوجل - وتدفي الطفل ولو هتبدأى إدّى أعشاب.
مفيش حاجة اسمها كحة مبتتعالجش ...اعرفى السبب يبطل العجب ..!
مفيش حاجة إسمها علاج حساسية بدوا شرب بس لازم بخاخ إلا المستوى البسيط من حساسية الأنف !
مفيش حاجة اسمها هيتعود عالبخاخات الا لو كان العيا والمرض والكحة عندك أحلى من البخاخات !

مفيش حد هيستنجد بربنا ويخذله ولا يلجأ ليه ويكسفه ،، ولا يتصدق بنية الشفاء ولا يستجيب له ..?

د.أحمد الخطيب