بادئ الموضوع تاريخ البدء
  • المشاهدات 268
  • الردود 6

راجيه الرضا

مراقبة و متميزة أقسام نسوة
إنضم
18 فبراير 2017
المشاركات
12,085
مستوى التفاعل
7,804
النقاط
113
ندي بنت طيبه ومحترمه وجميله ومن بيت طيب
شافها عمر ابن خاله صحابتها لما جوز خالته كان عيان وعجبته وقرر يتقدملها بعد ما سئل عليها

ندي اعجبت بيه ولان كانت كل حاجه جاهزه وعمر عنده كمان فرصه شغل في دبي وندي طول عمرها تسافر وتشوف فرص جديده لحياه افضل تمت الجوازه في اقل من ٦ شهور

عمر في اول العلاقه كان بيحاول يبسطها
يخرجها
يقولها شكرا لما تعمل اكل او تساعده في المكوي
يتفرج معاها علي فيلم لما يرجع من الشغل

ندي كمان كانت بتحط مجهود كبير عشان ترضيه وتبقي زوجه ناجحه وكانت بتعمل اكل جميل وتعدد في الاصناف وطرق التقديم وتنضف وتروق
بس برضوا بيفضل عندها يوم طويل مليان ملل وحياه رتيبه شكلها حلو بس ممله جدا ومع الوقت عمر بقي كمان زهقان وبدء يحس ان مفيش كلام اوي بينهم والدنيا فيها فتور كده فبدء يرجع من بره يقعد علي الموبايل يسمعها وهو مش مركز اوي ويجاوب اجابات محفوظه عشان يظهر تجاوبه معاها في الكلام

تمام
حلو اوي
كملي
سمعك

ندي كانت بتتوتر وبيوصلها عدم تركيزه واوقات ده بيحبطها جدا وبيتفسر انه قله اهتمام بيها واوقات انها شخص ممل وفاضي ويزهق وان طبيعي ان جوزها يبقي مش حابب قاعدتها فكان ده بيوجعها اوووي وتحس انها لازم تشغل نفسها بعيد عنه

وتبتدي انها تحط مجهود جبار في انها تشغل نفسها عنه وتبين انها تقيله ومش فارق معاها قاعدته وبعدين تلاقيه قاعد مبسوط عادي فتحس بقهره وتلاقي نفسها فقدت السيطره علي نفسها
وانهارت في اتهامات كتير ليه
انه مش مهتم
هي مش فارقه معاه
وانه مش بيحبها
وانهم مختلفين عن بعض

واوقات حقيقي بتفكر تتطلق واوقات بتطلب الطلاق عشان تخلص من وجع احساسها انها شخص ممل غير مرغوب في وجوده

وترجع تهدي لما عمر يصالحها او يطبطب عليها او يفك الدنيا معاها

شويه وتحس بالامل وانه بيحبها وتهدي وعلاقتهم تتحسن

وبعد كام يوم ترجع تاني لنفس
المشاعر
الافكار
التصرفات

وعمر ابتدي يكره قاعدته في البيت والخناق والنكد ويحاول يتبسط بره البيت وده بقي بيعمق احساسها بانها مش فارقه معاه وخناقتهم بدأت توصل لمآسي وعلاقتهم بقي كلها توتر

علي السطح ندي بتقول انه مشغول ومش فاضي ليها
بس اللي حقيقي هي حساه شك رهيب في مدي صدق مشاعره ناحيتها وهل هو فعلا بيحبها
هل هي فعلا ماليه عينه
بس عمرها ما كان عندها الشجاعه انها تعترف بوجعها ده لانها خايفه تبان مش واثقه في نفسها او قليله قصاده
وفضل غضبها لغز بالنسباله مش عارف يفهم هو حقيقي يعمل ايه او غلط في ايه

وندي كمان اتكسرت اوي لان كل خناقه كان بيحصل منه تصرفات توجعها وبالرغم من ان هي كمان كانت بتوجعه الا انها عمرها ما اهتمت بده اد ما كانت في منتهي الحساسيه ناحيه وجعها هي وانه مش بيطبطب عليها وهي موجوعه بالرغم من ان هي كمان بتبقي ناشفه جدا معاه لما بيتكلم عن وجعه منها

عمر عارف انها كويسه وندي عارفه انه كويس بس فشلوا فشل زريع انهم يصلحوا المشاكل اللي بينهم

وبدأو يفكروا جديا انهم يطلقوا بس ندي عرفت انها حامل وبدات تحس انها لازم تستسلم لانها هتبقي ام وشكل الجواز كله كده
واني مش مشكله احاول اتكيف مع علاقه انا مش سعيده فيها واستسلمت انها تكون تعيسه في الحب ...

ونكمل الحلقه الجايه

حكايات جديده عن(استعاده السعاده الزوجيه )

نقلا عن صفخة الاستاذة سارة سيف
 

راجيه الرضا

مراقبة و متميزة أقسام نسوة
إنضم
18 فبراير 2017
المشاركات
12,085
مستوى التفاعل
7,804
النقاط
113
عمر وندي الحلقه التانيه ☺

عمر بقولك ايه احنا عايزيين ننزل نجيب حاجه النونو بقي مش عايزه اتزنق

نونو ايه !!!!! انت في الرابع !!!!

فيها ايه يعني هتفرق معاك في ايه ليه انزل واتزنق في شهور الحمل الاخيره يعني

اخيره ايه ده فاضل ٥ شهور انت شكلك فاضيه

لا انا مش فاضيه انا قدمت في دبلومه المنتسورى اون لاين عشان اتعلم اربي ابننا ازاي انت بقي ايه اللي غيرته فيك من ساعه ما عرفت انك هتبقي اب ؟؟ زي ما انت ولا اكن جايلك طفل

مهو طبيعي عشان التربيه دي مسئوليتك اصلا

ايه انت بتقول ايه ااااه يعني انا هربيه لوحدي طب بقولك ايه بما ان احنا اصلا مفيش بينا اي حوار ولا عاجبنا حاجه في بعض وهربيه لوحدي كمان يبقي بقولك ايه يا ابن الناس كل واحد يروح لحاله

مش فاهم عايزه تتطلقي يعني ؟ انت واحده مختله مش من عشر دقايق كنتي عايزه تنزلي تجيبي لبس النونو

انت بتقلل من كلامي وفاكرني بقول كلام وخلاص

ايوه ايوه بقلل منك ومن كلامك طلعي عقدك عليا

عقدي !!
عمر طلقني

ماشي عايزه تتطلقي كلمي ابوكي يكلمني انا مش واخدك من الشارع

لا احنا كبار كفايه وانا عايزه اطلق

معلش دي الاصول كلمي ابوكي

بقولك ايه سيبك من الحجج دي وطلقني وخليك راجل

انا راجل غصب عن عينك ومش هطلق

مفيش راجل بيخلي واحده تعيش معاه غصب عنه

لا في لما يبقي بيحبها عمره ما يفرط فيها ابدا حتي لو قالت له كلام يوجع زي اللي انت بتقوليه

يا سلام صدقت انا كده انت بتقول كده عشان خايف تطلق وتفشل مش عشاني

لا عشان عايز اعيش معاكي لحد ما اعجز حتي لو شوفتيني راجل فاشل وخواف ومش عايز اربي ابني ومليش لازمه في حياتك لدرجه انك عايزه تطلقي مني بمنتهي السهوله

انا عايزه اطلق منك عشان انا مش فارقه معاك

وانا بالرغم انك قولتي اني مش فارق معاكي برضوا متمسك بيكي

انت بتقول كده عشان انا حامل مش عشاني

طب ليه بس ليه مش مصدقه اني متمسك بندي وبحب ندي ليه شيفاني خايف من الطلاق والفشل وابني ليه كل الكلام اللي مش منطقي ده انت شيفاه منطقي الا اني بحبك يا ندي

بتحب فيا ايه يعني

كل حاجه فيكي بحبها

مش قادره اصدقك اللي يحب حد ميوجعوش ميحسسوش انه ملوش لازمه عنده

حقك عليا انا عمرى ما قصدت ده بس لو خدنا بكلامك ما انت قلتيلي ميت مره كلام يوجع واني مش راجل ومليش لازمه وكنتي هتموتي واطلقك من شويه افهم من كده انك مش بتحبيني

...........

ساكته ليه ؟

انا اسفه اني قلت لك كلام يوجعك بس انا كان قصدي اوصلك اني مش راميه نفسي عليك وانك لو مش عاوزني انا كمان مش عاوزاك

طب انا عاوزك يا ستي

وانا والله عوزاك انت مش متخيل انا بتوجع اد ايه لما بتصور انك مش بتحب تقعد معايا ببقي هتجنن واقول لنفسي اكيد عشان انا قاعده في البيت وانت اتجوزت مهندسه اكيد انا ممله وسطحيه وازهق

لا انت قمر

انت بتقول كده عشان تجبر بخاطرى

بصيلي كويس يا ندي ده منظر واحد بيكدب انا مستغرب بجد انت ازاي مش شايفه انك قمر وشخصيه جذابه واني مقدرتش اتصور حياتي من غيرك وجريت اتجوزتك وعملت البيت ده عشان اعيش معاكي فيه ليه اعمل كل ده مع حد ميستاهلش يتحب يا ندي ليه

😭😭😭😭😭😭😭😭😭😭😭

بتعيطي يا روحي طب تعالي في حضني انا عمر ما كنت اتخيل انك بترجمي ارهاقي وفصلاني بعد يوم شغل طويل انه عدم رغبه فيكي!!!
انا فعلا ببقي مرهق ومحتاج افصل قسما بالله انا بعشقك بس فعلا غصب عني يا ندي ببقي فاصل

طب مكنتش بتقول ليه ؟؟

لا حرام عليكي بجد انا ياما قلت يا ندي ياما قلت اني فاصل ومش قادر ومش مركز بس انت كنتي بتولعي البيت حريقه ومكنتش بحس انك حاسه بيا كان نفسي اوي يا ندي تعمليلي مساج تعمليلي حاجه منعشه اشربها جو كده يساعدني استرخي واستعيد طاقتي

معاك حق انا اسفه انا طول الوقت كنت بحس انك رافضني انا مش عايزني

اوعي تقولي كده تاني واوعدك هعوضك في اجازه السنه الجديده حددي كده نفسك نعمل ايه وانا بتاعك هوريكي انا بحبك اد ايه حتي لو عاوزه تروحي الفندق الغالي اللي مرضتش اوديهولك انا معاكي 😂

انا بحبك واسفه بجد

انا حسيت بيكي وفهمتك والله بس انا عايزك تبقي واثقه في حبي ليكي اكتر من كده

انا حاسه اني مش واثقه في نفسي مش فيك

حبيبتي عادي ولو حابه تروحي تتكلمي مع حد يساعدك تتجاوزي ده انا معاكي

انا فعلا حجزت جلسه وهروح الاسبوع الجاي

حلو اوي ان شاء الله يطلعوا شويه قلق وراحوا لحالهم

ونكمل الحلقه الجايه

#استعاده_السعاده_الزوجيه
 

راجيه الرضا

مراقبة و متميزة أقسام نسوة
إنضم
18 فبراير 2017
المشاركات
12,085
مستوى التفاعل
7,804
النقاط
113
عمر وندي الحلقه التالته

احمد كويس انك جيت انا عملت بنصيحتك واحتوتها يومين يا معلم ورجعت زي الاول نفس القمص والنكد ومتقوليش الحمل دي كده من اول يوم عرفتها فيه وبصراحه انا بيطلع عيني في الشغل انا مش متجوز طفله اداديها عندها مشاكل نفسيه تروح تتعالج بس انا ذنبي ايه ده حتي الاكل بقت تعمله نص الاسبوع وبقيه الاسبوع تتحجج بص انا قررت انزلها مصر تولد بقي وتقعد هناك شويه افصل منها لان انا فعلا بفكر اطلقها

-ربنا يعملك الخير بس هي مش راحت جلسه عشان تتكلم مع حد غيرك وتفك عنك شويه

-راحت ورجعت تقولي اصل لغه حبنا مختلفه طب والنبي ايه علاقه الحب بانها زوجه فاشله لا عارفه تبسط جوزها ولا تخلي بالها من بيتها واكيد بعد الخلفه هتبقي اسوء

-انت صح نزلها مصر وكبر دماغك ولما تعوز ترجع قولها شروطك انت شكلك فعلا كنت متساهل معاها زياده عن اللزوم

--ده حوار تاني تخيل كم التمثيل اللي انا بعمله ده وبرضوا مش عاجب اومال لو فعلا قلت لها الحقيقه واد ايه وجودها بقي مرهق ومزعج وضاغط ليا فكرك هتسمع ولا تصلح من نفسها لا خالص هتطلعني نرجسي وبنتقدها لكن هي تنتقد فيا اربعه وعشرين ساعه ومتبقاش نرجسيه ولا حاجه

-لا ما هم مبيسمعوش هما مظلومين علي طول

-وقال عايزاني اسافر معاها افسحها انا هتلكك بأي حاجه ميبقاش نكد وتغريم وتروح هناك تطلع روحي في كل تفصيله ومهما عملتلها تتنك انا فعلا مبقتش عارف اقعد معاها ربع ساعه من كتر نكدها وكلامها المؤرف

-حقك والله وانت اصلا خدت مجهود عشان تتعاطف معاها وتكبر دماغك عن كلامها وطلبها للطلاق فمش بعد كل ده ترجع زي ما كانت

بالظبط ربنا يعدي الكام شهر دول علي خير بفكر اسفرها الشهر الجاي قعدتها اصلا مكلفه جدا وفوقيها النكد

ربنا يسهل

ونكمل الحلقه الجايه

#استعاده_السعاده_الزوجيه
 

راجيه الرضا

مراقبة و متميزة أقسام نسوة
إنضم
18 فبراير 2017
المشاركات
12,085
مستوى التفاعل
7,804
النقاط
113
عمر وندي الحلقه الرابعه

ندي بقولك ايه انا بفكر ان احسن تروحي تولدي في مصر عشان مامتك تخلي بالها منك وانا هنزل بعدها اخدك ونرجع علي هنا بعد ما تكوني قمتي بالسلامه


وانت مش هتبقي موجود وانا بولد 👿👿

لا هحاول اجي بس علي حسب اجازاتي انا شايف انه احسن اجي بعدها عشان نرجع مع بعض

لا انا بفكر اولد هنا واعمل واخلي ماما تجيلي تقعد معايا الفتره دي بصراحه انا عايزاك تبقي موجود لحظه ولاده ابننا وتحس بالفرحه معانا

مامتك تيجي فين يا ندي الولاده هنا مكلفه اوي وكمان مصاريف مامتك كده كتير اوي ما كل مراتات اصحابي بينزلوا يولدوا في مصر عمرى ما سمعت الاختراعات دي وبيني وبينك انا محتاج بريك شويه احنا قاعدتنا مع بعض بقت عباره عن خناقات ومشاكل يمكن لما نبعد شويه الدنيا تهدي

تمام بعد ٦ شهور جواز محتاج بريك ده بدل ما تحل المشاكل لا تهرب منها

اه طبعا اهرب منها لانها مشاكل ملهاش حل مهما عملت مش هترضي ولا هتهدي ولا هتتبسطي ولا هترتاحي انت اصلا مش مرتاحه مع اي حد لا شفت لك صحاب ولا اخواتك علاقتك بيهم كويسه حتي باباكي ومامتك علاقتكم غريبه لا عمرى شفتك بتكلمي مامتك تفضفضي معاها ولا تعرفي حاجه عنهم ومكالمتكم فاتره واخواتك كل واحد في وادي انت مشكلتك مش معايا انت عندك مشكله مع كل الناس حتي اهلي كل تصرفاتهم بتفسريها بمحمل سئ وتفتعلي مشاكل من الهوا وبقيت مطلبش منك تكلميهم ولا تعملي علاقه معاهم عشان خايف من المشاكل

ياااااه ده انا ست وحشه اوي

بقولك ايه هو انا كل ما اكلمك تعملي دراما ما تردي علي كلامي اللي بقوله ده صح ولا غلط انت شايفه نفسك علاقاتك طبيعيه بأي حد !!!! بصي يا بنت الناس انا الاول كنت بكتم في نفسي واجامل واحايل بس انا فعلا قررت ابقي صريح معاكي ويا تصلحي عيوبك يا فعلا كل واحد يروح لحاله لكن انا مش هستحمل اعاشر واحده بالدماغ دي

عندك حق انا فعلا كده وعندي مشاكل في كل علاقاتي حتي اقرب الناس ليا حتي جوزي فشلت اني اعمل علاقه معاه واكيد هبقي ام فاشله برضوا وانت فعلا مش ملزم تستحملني فانا شايفه اني فعلا انزل مصر وناخدها فرصه نفكر احنا هننفع مع بعض ولا لا

ندي مش معني ان فيكي عيوب تبقي فاشله كل انسان فيه عيوب ومميزات يعني بالرغم من انك علاقاتك مع اللي حوالليكي مش تمام انت مليانه مميزات تانيه بس العيب ده هيبوظ علاقتنا

طيب ممكن اعرف ايه العيب اللي انت شايفه فيا مبوظلي علاقاتي

الثقه معندكيش ثقه في اي علاقه وبتفسري تصرفات اللي حوالليكي ديما انه رفض ليكي او تجاهل وبتبقي مش قادره تصدقي بحال من الاحوال ان تصرفاتهم ليها اي معني تاني غير انهم قاصدين يتجاهلوكي او يبعدوا عنك

عشان هما فعلا بيعملوا كده

طيب تعالي نتناقش بالعقل انا بتجاهلك ازاي ؟

بترجع من بره تاكل وتقعد تلعب علي الموبايل ولو جيت اتكلمت معاك بتبقي مش باصص اصلا ولو طلبت نعمل اي حاجه مع بعض مش بتوافق مش بتوافق تعمل اي حاجه غير العلاقه غير كده طول الوقت بتبقي قاعد بعيد

ايوه ده بيحصل بس كمان امبارح بعتلك فيديو عن العربيات وانت شفتيه ومردتيش ومن يومين بعد ما خلصنا شرا طلبات البيت طلبت منك نروح مع بعض ناكل حاجه حلوه ومن تلت والاسبوع اللي فات صحيت يوم الاجازه حضرت الفطار وصحيتك تفطرى معايا وشربنا الشاي ونزلت صليت الجمعه كل ده كانت محاولات مني اني اقضي وقت معاكي بس انت عايزاني طول الوقت مرحب بالتواصل معاكي ولو ده محصلش بتشوفيه تجاهل يمكن تكوني محتاجه وقت اكتر بس انا ظروفي متسمحش بوقت اكتر بس ده مش معايا بس يعني مع ماما لما عرفت انك حامل وقالت لي وانا في الشغل خليها تكلمني لما تروح عملتي حوار وقعدتي تقولي هي اللي المفروض تكلمني وهي بتنجاهلني مع انها هي اللي طلبت تكلميها انا وقتها فسرت ده ان ده اسهل لها عشان هي مش عارفه رقمك ونظرها ضعيف وتعبانه فحبت تفرح معاكي بشكل تاني بس برضوا انت سودتي عيشتي اسبوعين ان اهلي مش بيحترموكي واني مش باخد موقف
انت عايزاني اخد موقف من امي عشان قالت لي لما تروح كلموني عشان اباركلها !!!

انا فعلا من زمان بحس ان كل الناس بتتجاهلني ومش بتحب تصاحبني حتي لو ليا اصحاب كتير بحس اني لو مسئلتش هما مش بيسئلوا فباخد جمب والاقي العلاقه باظت بعد فتره

ايوه بالظبط بتتعاملي بحساسيه زياده مع ان ممكن عادي لو جيتي قعدتي جمبي ولقتيني فاصل متقفشيش فكيني شويه
او هزرى او تعالي وقت تاني انا بحسك اضربتي بطلقه ومش بتستحملي وكمان انك معندكيش ناس حوالليكي طبيعي هتحسي بوحده انا مهما حاولت مش هعرف املاها

انت صح بس انا طول عمرى بتعامل بحساسيه حتي مع بابا وماما بتكسف اطلب منهم حاجه او اقرب منهم لو هما مش متاحين ديما كنت بقضي الوقت لوحدي في البيت ولو رفضولي طلب مكنتش بعرف ازن زي اخواتي كنت فعلا بقفش او بتقهر واسكت انا واضح اني محتاجه فعلا احل الموضوع ده بس برضوا انت بتتهرب مني كتير

لا مش منك من الخناق واللوم والنكد اللي حتي لو اليوم ابتدي حلو بيقلب نكد علي اي حاجه بعد كده لكن لو انت مفرفشه وفاكه هبقي تمام .

بس انت بتطلب مني ابقي طول الوقت كده انا بني ادمه اوقات ببقي متضايقه ومحتاجه حد جمبي

ليه ؟

ليه ايه ؟؟

ليه كل ما تضايقي تبقي محتاجه حد جمبك ما انا بتضايق كتير بس لما بيبقي اللي مضايقني تفاهات بستحمل عادي وبروح افك نفسي واجيلك مفرفش مش بحملك الهم ليه انت عايزه حد جمبك واللي مضايقك حاجات عاديه ما تتعلمي تفكي نفسك هو انت شايفه انه طبيعي كل يوم ابقي مضايق اشيلك الليله

يعني انا بتجوز عشان ابقي لوحدي اومال انت لزمتك ايه

لزمتي ايه طب بصي يا ندي اقغلي الحوار علي كده عشان مش عايز اتخانق ونكمل كلام بكره ممكن

😒😒😒

برضوا قلبتي وشك !!!
مفيش فايده 😡😡

ونكمل الحلقه الجايه

#استعاده_السعاده_الزوجيه
 

راجيه الرضا

مراقبة و متميزة أقسام نسوة
إنضم
18 فبراير 2017
المشاركات
12,085
مستوى التفاعل
7,804
النقاط
113
عمر وندي الحلقه الخامسه

صباح الخير يا دكتوره
اهلا بيكي قالولي انك مستعجله عشان تلحقي تنجزي وتشتغلي علي نفسك قبل ما تولدي 😊

اه ده حقيقي حسيت اني عندي مشاكل كتير ومحتاجه اللحق اصلحها في نفسي قبل ما ابوظ حياتي اكتر ما هي بايظه

ليه وصفتي حياتك انها بايظه

كل حاجه فيها بايظه انا اتخرجت من هندسه عماره ومعرفتش الاقي شغل اتجوزت وجيت هنا دبي مع انسان كريم ومحترم كام شهر وابتدي يحصل بينا خلافات عنيفه وللاسف شاف وش سئ جدا ليا حتي اصحابي محدش فيهم بيعبرني من ساعه ما سافرت وحتي لما بعلقلهم علي الfacebook بيردوا عليا اكني غريبه يعني انا لا فلحت في شغل ولا جواز ولا صحاب فعايزه اعرف بجد انا فيا ايه مبوظ حياتي كده

تفتكرى انت ايه اللي فيكي ؟

مش عارفه

تحبي نستكشف ده مع بعض ؟

ياريت انا والله نفسي اعرف انا فيا ايه مخليني كده

مخليكي ازاي ؟؟

مكتئبه ووحيده وحساسه وعصبيه ومحدش بيحب يقرب مني

محدش زي مين ؟

جوزي وصحابي وحتي اهلي هما بيعاملوني كويس بس اكني مش موجوده مش عارفه انا عارفه اوصفلك ولا لا يعني في حاجه كبيره ناقصه حقيقي مش عارفه هي ايه

انا لاحظت ان عينك مليانه دموع خدي راحتك لو عاوزه تعيطي

لا لا مش عايزه ازعج حضرتك خلينا نكمل

حبيبتي انت بتترعشي من التوتر علي مهلك خالص وخدي راحتك

انا اسفه اني اتوترت بجد مش عارفه انا ليه مؤرفه كده وبضايق كل اللي حوالليا بضعفي ونكدي

حاسه بيكي اد ايه انت بتنزعجي لما يكون عندك مود وحش وبتتمني لو كان مزاجك يفضل كويس علي طول

بالظبط خصوصا لو الموضوع طول بحس وايه ذنب الناس في اني انكد عليهم كده وان ليهم حق ميحبونيش وميستحملونيش

ايوه فهماكي بتقلقي جدا من اثر المزاج السئ ده علي اللي حوالليكي وعلي علاقتكم ببعض

ايوه ايوه بقلق فعلا جدا مش بقلق انا بترعب لدرجه اني ممكن افقد السيطره علي نفسي وافضل ازعق واصرخ اكيد وقتها بيشوفوني مجنونه او مريضه نفسيا مش طبيعيه

ايوه مشاعر كتير ملخبطه جواكي فجأه بتطلع علي السطح رغم انك بتحاولي تخبيها

جدا جدا بحاول اخبيها طول الوقت وافرفش واخرج واعمل مود حلو ومش بحمل حد هم اي حاجه بشيل كل مشاكلي والضغوط دي بس في الاخر بفشل وانفجر وارجع اندم واخبي وانفجر واندم

ايوه تحسي انك داخله في دايره مفرغه مش عارفه تتجاوزيها

مش عارفه اتجاوزها بالظبط بالظبط هو حضرتك ازاي فهماني كده بجد انا فعلا مش عارفه اتجاوز الدايره دي خاااالص بقي ونفسي نفسي اخرج منها

تعرفي توصفيلي الدايره دي ؟

اااه دايره وجع بس توتر وقلق من كل حاجه توتر اني اكلم الناس وتوتر اني مكلمهمش لا عارفه ابقي لطيفه ولا عارفه ابقي حزينه احكي اللي جوايا ولا اخبيه اعمل حاجات حلوه واكسبهم ولا خليني بعيد

ونفسك ايه اللي يتغير في الدايره دي

اعرف ايه الصح

بمعني ؟

اعرف اقرب ولا ابعد ولا اعمل ايه بالظبط ايه الصح بجد

الصح اللي هيوصلك لايه ؟

لعلاقه مريحه ليا وللناس انا مش مرتاحه في اي علاقه

تمام انا حابه نوقف هنا النهارده عند رغبتك في ان علاقاتك تبقي مريحه ولحد الجلسه الجايه عايزاكي تفكرى امتي عدي عليكي ده في حياتك وكان ايه اللي في العلاقه دي موصلك انها مريحه 😊

تمام شكرا يا دكتوره 🧡

ونكمل الحلقه الجايه

#استعاده_السعاده_الزوجيه
 

المواضيع المتشابهة

المواضيع المتشابهة


كلمة المدير

جميع المواضيع والمشاركات المكتوبة تعبّر عن وجهة نظر صاحبها ,, ولا تعبّر بأي شكل من الاشكال عن وجهة نظر إدارة المنتدى .

عن منتديات نسوة

نسوة أكبر تجمع نسائي في العالم العربي لكل ما يخص عالم حواء والحمل والولادة والزواج والثقافة الجنسية والسعادة الزوجية وطرق الجماع وقصص وحكايات رومانسية وتسريحات وكياج لكي أن

تابعنا على المواقع الاجتماعية


إتصل بنا

 

أعلى