حكاية طبية من احد المشافي ..وفائدة

احصائياتى
الردود
0
المشاهدات
284

راجيه الرضا

مراقبة و متميزة أقسام نسوة
معلومات راجيه الرضا
إنضم
18 فبراير 2017
المشاركات
14,538
مستوى التفاعل
9,650
النقاط
113
حكاية طبية من احد المشافي ..وفائدة
"دكتور أحمد عندنا حاله عاوزين ناخد رأى حضرتك فيها "

بهذه الجمله المقتضبه ، و بحماس و سرعه أخبرنى نائب طب الأطفال بالأمر ، فى المستشفى الجامعى الذى أناوب فيه .

" حالة إيه يا دكتور ؟ " ...

حالة حراره مستمره بقالها ٣ شهور مبتنزلش .

- طيب هات زمايلك الدكاترة وطلبة الامتياز وتعالى نشوفها سوا .

دخلت الغرفه ، فإذا بطفل ١١ سنه ، يبدو طبيعياً وبصحة جيدة ، لا توجد علامات ضعف أو هزال أو أعراض ظاهرة لمرض معين .

بهدوء تكلمت :

" بصو يا دكاتره ؛ أهم حاجه فى الكشف كله التاريخ المرضى ، اه الفحص مهم ، و التحاليل مطلوبه ، لكن لو خيرتنى أسيب كل ده و اعمل حاجه واحده ،، هسمع الشكوى بالتفصيل الممل ، الحل يكمن فى التفصيل "

ثم أردفت باهتمام :

" اتفضلى يا أمى إحكى اللى حصل بالتفصيل .."

الولد يا دكتور بقاله ٣ شهور بيسخن ،، الموضوع بدأ بمغص ووجع بطن ، إسهال ، بعد كده حراره عاليه مبتنزلش غير بالخافض ، شويه وترفع تانى ..

المهم ، رحنا كشفنا وقالولنا حمى تيفود ، وبدأنا كورس إبر مجابش أى نتيجة خالص .

على تالت إسبوع والحراره مستمره بدأ يظهر حاجه غريبه جداً ..!!

حوالين عينه الشمال بدأ يورم جامد ، و بعدين انتقل لليمين ، وبعدين الوش كله ورم ..

- ضيقت عينى بتركيز وأنا أسألها محاولاً استبعاد الأسباب "

" طيب لون البول مبقاش غامق ولا البول قلّ ولا اتقرص في عينه ولا الورم انتشر للجسم مثلاً ؟؟؟ ! "

أبداً يا دكتور ..

" مكانش بيوجعه جامد الورم ؟ "

لأ ... بس الدكاتره عملو تحاليل لمرض بيورم الجسم و طلع معندوش * ...

أومأت برأسى محفزاً إياها على إكمال الروايه :

المهم رحنا لدكتور تانى و مع استمرار الحراره شخصها حمى بحر متوسط وبدأنا كولشيسين

قاطعتها قائلا :

" رغم إن الحراره كانت مستمره ومش بتيجى أيام آه وأيام لأ ؟؟ "

بالضبط يا دكتور بالعكس ده وجع البطن بعد ما كان بدأ يهدا رجع تانى مع الكولشيسين و عملنا الجين الوراثى طلع معندوش حمى .

" طيب و كل ده الحراره شغاله !!!"

احنا كده وصلنا للشهر التانى للحراره والله ما خفت يوم يا دكتور !! ظهر بعدها شئ غريب ..
بدأ الولد يعرج على رجله ، بيمشى بالعافيه ،، وبقاله كده شهر كامل !!

أُرهق مخى بشدة وأنا أعتصر ذهنى للبحث عن سبب ..:

" أيوا يعنى المفاصل ورمت ؟؟ ظهر طفح جلدى ؟؟ ركبه وجعته ؟؟...

- لا يادكتور والله هوا بدأ يعرج بس و الحراره ى ما هيا عاليه !!

قلت فى نفسى : حتى الحمى الروماتيزمية فى الأطفال اللى كنت ناوى أعتمد عليها طلعت مش معانا .. الحاله صعبه فعلاً ..

فى خفوت أردفت

"طيب وبعدين ... ؟"

أجابت بنفاد أمل ..

ولا قبلين يا دكتور وحاله زى مانتا شايف لغاية دلوقتى حراره مبتنزلش و بيعرج بقاله شه ...

قاطعها الطبيب النائب بحزم :

" بص يا دكتور أحمد ؛ احنا عملنا رنين لقينا ان في خراج متجمع عند رأس عضلة السمانه هوا اللى عامل العرجه دي . "

سألته باهتمام :

طيب يا دكتور عملتو تحاليل الحراره المجهوله ، عملتو تحاليل الدرن و صور الدم وسرعة الترسيب مزرعة الدم و سونار البطن و وتحاليل البول والبراز و ..

" عملنا كل ده و الوحيد اللى طالع عالى جداً سرعة الترسيب .. الباقى كله طبيعي "

طيب نام كده يا حبيبي على السرير أكشف عليك .

استلقى الطفل ذو الإحدى عشرة ربيعا على سريرالفحص ، و قد بدا عليه علامات الترقب ، الفحص سليم ، لا شئ يثير الاهتمام ، و مع فحص البطن وجدت أغرب شئ يمكن تخيله ...
على الإطلاق ..

*******************

انطلق ذهنى فى التفكير بسرعة البرق ...
ما هذا التجمع الكيسي المؤلم الذى أتحسسه تحت يدى ..
لحظه ..
ثم ما هذا المكان !
عضلة البطن العلوية تحت عظمة القصّ left rectus abdominus أبداً ليس بمكان معهود لتكوين صديد ؛ إلا إذا كان الطفل مصاباً بتسمم دم و خراريج صديدية ، وقتها ، الحاله العامة للطفل تكون غاية السوء وهذا الطفل ليس كذلك هو يتحرك ويلعب والوزن لم يتأثر !
إذن فلا بد من تفسير يجمع بين التجمع الصديدى فى السمانه ، مع هذا التجمع الكيسي في عضلة البطن .

أعيانى التفكير ، فطلبت من النائب أخذ عينة من الكتله و تحليلها ، لعلها تساعدنا فى التشخيص ؛
ونظرت لعينى الأم و بوضوح قلت :

" شوفى يا مدام. إحنا لغاية دلوقتى موصلناش لتشخيص ، مفيش حاجه واضحة تجمع بين كل الأعراض دي بسهوله ، هنعمل عينة من "الكتله " ونشوف هتطلع إيه .."

- .........

" ادعى بس وربنا الشافى "....

خرجت من غرفة الطفل وأنا أضرب أخماساً فى أسداس لصعوبة الحاله ،، كنت أعانى من قلة النوم ليلتها ، ولا أدرى وقتها أخذت أتمتم بكلمات غير مفهومه وانا أحدق فى الفراغ " علامة رومانا ،، علامة رومانا romana sign ".
ثم تبادلت الحديث مع الأطباء عن الحاله و عدت للبيت .

..............

مضى يوم ثم جاء اليوم الذى بعده و خلدت للنوم و لم ألبث إلا وأنا أصلى الفجر على خاطر غريب عن الحالة !!!

فأنهيت الصلاة وصرخت كالملسوع مثل أرشميدس حينما اكتشف قانون الطفو فخرج كالمجنون يجرى ويصرخ " يوريكا يوريكا وجدتها .. وجدتها "...

ولم أستطع أن أنام بعدها حتى بلغت الساعه الثامنه واتصلت بالنائب لأخبره بالسر الأغرب ..
الأغرب على الإطلاق ...

*************************

‏Trichenosis يا محمد .....

الحالة اللى عندك دى Trichenilla spiralis infection

أو عدوى دودة ترايكينيلاّ ...

- ......!

جمّع الخيوط كلها من الآخر للأول ...

إيه اللى يعمل خراريج أو emboli فى العضلات بالمنظر ده فى طفل حالته العامه كويسه ؟؟
مستحيل تكون خراريج بكتيرية septic emboli ...
بالتأكيد هيا خراريج طفيلية parasitic emboli ...

متنساش كمان إن التورم حوالين العين ده لو سببه عدوى فهوا من الحاجات المتسجله باسم نوعين طفيليات بس ، واحده فى مصر وهيا الترايكينيلاّ ، والتانيه فى أمريكا وهيا التريبانوسوما أو chagas disease وساعتها بتتسمى romana sign..

- طب والمغص والإسهال ووجع البطن اللى فى الأول ؟!!

ما هو دى دورة حياة الدوده دى ، بتبدأ لما المريض ياكل لحم غير مطهى كويس ، بعدين تتكاثر فى الأمعاء وتعمل الأعراض دى فى المرحلة المعويه intestinal phase ؛ بعد كده الجسم بيطلع أجسام مضاده ونتيجة الخناقة بين الجسم والدوده بتظهر على هيئة ورم عين ، شويه شويه الدوده تُمتص وتنتشر عن طريق الدم وتسكن فى الأنسجة والعضلات ..

- عشان كده لما راحت لعضلة السمانه كان بيعرج !!

أردفت فى حماس :

وعشان كده برضه فجأة لقينا كيس مؤلم فى عضلة البطن فجأه ..

وأكملت بتردد ...

بس يا محمد المفروض خلايا الحساسية Eosinophilic count تكون عاليه فى الحالات دى .. حتى لو مش عاليه أنا متأكد بإذن الله من التشخي...

قاطعنى بحسم :

لأ يا دكتور أحمد الخلايا عالية فعلاً فى أكتر من صورة دم وده ماشى مع الحاله .

انتا هتبدأ دوا الديدان ده دلوقتى حالاً متستناش ،، وبلغنى بالنتيجه أول بأول ..

****************

لم يحتجْ الطفل إلا ٤ جرعات فقط من الدواء ، و مع الجرعه الرابعه بفضل الله كانت الحراره اختفت وكأن لم يكن به شئ !!

وتم إكمال الدواء لأربعة عشر يوماً للتخلص من أى بقايا للديدان ..

نظرت للسماء بارتياح وامتنان لتوفيق الله عز وجل ..

و ظللت أتفكر فى عجيب صنع الله و أقداره ...

وأتدبّر ...

د.أحمد الخطيب .
 

من نحن ؟؟

موقع نسوة : هي شبكه عربيه تهتم بكل ما يخص المرآه وحياتها اليوميه يعمل منذ سنوات لمساعدة والمساهمه في انجاح كافة الامور الحياتيه للمرآه العربيه