$$حذار حذار من ذكرهم بالسوء أمامه $$
أكيد عرفتو من المقصود !!
ومن فيه غيره .. حبيب القلب .. زوجك طبعاً !
ومنهم ذول ؟
فيه غيرهم .. فيه أحد يهمه أمرهم عقبك أنت وعياله غيرهم ..
اللي الله عز وجل وصاه من فوق سبع سموات ببرهم ووصلهم !!
الحين اعتقد عرفتيهم ؟
أهله .. أمه .. أبوه .. أخوانه .. أخواته .. واللي يحبهم من بقية العائلة
أختي الحبيبة ..
احنا ما نختار أمنا أو أبونا أو أي حد من أخواننا .. ننولد نلاقي نفسنا محاطين بمجموعة من الناس اللي تحبنا وتخاف علينا حتى لو اختلفنا معاهم تبقى المحبة مثل ما هي ما تتغير .. نفرح لفرحهم ونزعل لزعلهم .. تقوم الدنيا عندنا وما نقعدها أحياناً لأن حد ذكرهم أمامنا بسوء .. لا ويمكن تظل قلوبنا شايلة عليه مهما قدم من اعتذارات .. يكفي أنه في يوم جرحنا يوم ذكرهم بالسوء ..
أنتي معاي في هالكلام والا لا ؟
زين هذا الكلام ينطبق على شريك حياتك ..
هو له أهله اللي ما اختارهم .. بمزاياهم وعيوبهم .. يحبهم ويخاف عليهم .. يفرح لفرحهم ويزعل لزعلهم .. يقوم الدنيا وما يقعدها لأن أحد ذكرهم بسوء .. وبعد يظل قلبه شايل عليه مهما قدم من اعتذارات ..
حتى لو كنت أنتي ..
أيوه حبيبتي ياللي تقرين الحين كلامي ..
حتى لوكنتي أنتي !!
تصدقين .. سألي مجرب ..
يا الغالية ..
لأسف احنا المتزوجات من نشوف محبة أزواجنا لنا ونلمس مكانتنا عندهم انظن خلاص اننا امتلكنا قلوبهم وحلينا محل أي حد آخر في حياتهم ..
وللأسف هذا الاعتقاد خاطئ .. أهل الزوج يظلون في قلبه مهما كان غلاك عنده أو غلا عياله .. يمكن يشفع الزوج لزوجته في البداية إذا جابت طاريهم بالشين .. لكن بعد فترة ومع كثرة ذكرهم بسوء والشكوى منهم راح ينفجر .. ويمكن تكون ردة فعله عنيفة وما تتوقعينها ..
باعطيك مثال من واقعي :
واحد من قرايبناالله يصلحه ويهديه .. كان ما يرضى على زوجته أو عيالها من الهوى الطاير .. وهي طبعاً استغلت هالشي فكانت دائماً توشي زوجها على أهله بمكر طبعاً ..
لا وتيوده من اليد اللي تعوره .. عياله ..
دائماً بعد كل زيارة .. تبدأ الشكاوي ..
أختك قالت .. أمك سوت .. عيال أخوك .. أخوانك ..
وهو طبعاًً المسكين ما يصدق يسمع هالكلام إلا ومنطلق على أهله .. ليش قلتوا وليش سويتوا ..
وأهله مساكين مستحملين ..
طبعاً ما استمر الوضع على هالحال .. لما قربوا يكملون 19 سنة .. الله حط حيلهم بينهم .. انقلب السحر على الساحر .. طبعاً رد كله عليها .. زادت بينهم الخلافات .. وصار يحذرها من طاري هله بالسوء ( مل من كثر ما سمع ) حتى في يوم من الأيام طرش لها ورقتها ..
تصدقون .. ورجع لأمه وخواته في النهاية ..
الحين صارت هي الرخيصة .. وأمه وأهله مستحيييييييل
يرخصون .. سمعتوني ؟؟
حبيبتي يا بخت من اتعظ بغيره .. هذي عبرة ناخذها من هالقصة عشرته معاها 19 سنة مب سنة ولا سنتين .. 19 سنة ما شفعت لها ..
بتقولي وحده ما آقدر استحمل ؟
بعض المواقف معاهم تطلعني من طوري !!
باقولها حبيبتي استحملي .. وباسألك سؤال ..
تطلعين من طورك والا تطلعين من حياته؟؟
أختاري يا عمري ..
وان شاء الله للموضوع بقية اذا لقيت منكم تفاعل
اسم الموضوع : $$حذار حذار من ذكرهم بالسوء أمامه $$
|
المصدر : الزوج والزواج