ثقة عمياء - بقلم مال الشام

[مال الشام]

ثقة_عمياء_بقلم_مال_الشام

-1-

كانت عيوني معلقه بباب الصالة، ناطرتو يجي و يشوفني بالفستان و الطرحه، هلا خلص رح يصير الي
و صير الو
رح تبلش حياتنا مع بعض… عنجد مو مسدئة الحمدلله يارب..

ام احمد: روان وين جمانه ليش ما اجت؟
روان: ماما ما عزمتها
ام احمد: شوووو!!! بتحكي من عقلك؟؟!
روان: ايه…، مو مهم اصلا ( و دمعتي بعيني) … مو مهم
ام احمد: يا بنتي مابجوز ما عزمتيها ع الخطبه و هلا عالعرس! عيب والله عيب..

طبعا بتقول الاسطورة انو البنت بس تنخطب و تتزوج بتقاطع رفقاتها لسبب نفسي ما اكتشفو العلم صح؟!
بس لا انا سببي والله بيختلف كتير..
سرحت بخيالي لبعيد..

#بالمدرسه
جمانة: تخبي انتي تحت الطاولة
روان: لك لا والله بتشوفني الانسه
جمانة: لا تخافي انا رح طلعها من هون فورا انتي انزلي تخبي و امسحي المكياج عن وشك بسرعه..
… ……………….. ……. ..
#بالشارع
جمانه: تعي معي ع البيت امانه
روان: لا لا مابدي خلينا نشتري بوظا و كل وحده تروح ع بيتا
جمانه: ما حزرتي رح ناخد بوظا و نشتري ذرة ? و نروح ع البيت، امانه تعي و بعملك بوشار
روان:وامي؟؟؟!
جمانة:انا بحكي معا امشي بقى
……………………………….
#بالامتحانات
روان: لك والله ميته رعبه ياربي معقول ارسب بالبكلوريا… ياربي
جمانة:لا تحكي هيك و انا خايفه بس خلص هانت ضل هالامتحانين و منتخرج قومي اعملي قهوة و كملي دراسه
روان: يييي قلتلك ما بشرب قهوة
جمانة: لك مشان تضلك سهرانه صارت الساعه 3 يلا بسرعه ضل معنا 4 ساعات سكري الخط و ادرسي
روان: لا خلي الخط مفتوح ازا احتجنا شي منسال بعض فورا مافي داعي كل 5 د ندق لبعض
………………………………
#بالمطبخ
روان: ههههههههههههه هلا هاد الكيك الي قلتيلي بشهي و الكل بحبو من تحت ايدك؟؟
جمانة: لك خلص وليه انحرق شو اعمل يعني… اسالي امي والله بالعاده بطلع بشهي معي
روان: خلص سدئتك ههههههه هاتي صورو
جمانه: لا والله ما بتصوريه ما في مافي بعدي وليه روااان
…………………..

كانت جمانه رفيقتي من 7 سنين
كانت اغلى علي من روحي كنا عطول سوا و فتنا جامعه مع بعض، بالجامعه بلش كل شي يتغير
بسبب التوتر و ضغط الدراسه صرت اكول كتير و وزني زاد بشكل فظيع بعد ما كان جسمي متل العارضات صرت بال80
هون بلش شي يتغير بيني و بين جمانه
كانت تضحك علي و تسمعني كتير حكي انها بتخجل تمشي معي و بأي فرصه تجرحني بالموضوع حتى لمل نروح نجيب اكل تتمسخر علي قدام العالم بحكي جارح متل (( جيبولها كل الاكل الي عندكن)) …. (( بتكفيكي 7 سندويشات؟؟ ))
هاد كلو ما هز علاقتنا لان كانت اكبر من هيك بس كان يجرحني كتير..
بالسنه التالته وضع اهلي المادي صار صفر و صار علينا ديون. قعدي معي ابي و باس جبيني و طلب مني وقف دراستي سنه و رح يعوضني..
ما كان عندي حل الا انو اقبل!
و من هون علاقتي بجمانه انتهت بالتدريج، كنت حاول احكي معها دايما و ضل زورها بس هي كانت تتجاهلني بحجة انو مضغوطه بدراستها و انا ما عندي لا شغله و لا عمله و فاضيه للنق و الحكي…
بصعوبه قدرت ابعد عنها
انشغلت بحالي و بحياتي و كنت كل يوم ناطره اتصالها او سؤالها بس انقطعت انقطاع كامل… عملت ريجيم قاسي لمدة 8 شهور و فعلا نزل وزني و رجعت متل ما كنت نفسيتي كتير تحسنت الحمدلله …
و رحت زرتها و بشرتها و حسيتها عادي انبسطتلي..
هيك لصارت اخر محادثه بيناتنا طلبت تزورني و عزمتها ع الغدا ورفضت ك العاده
هون قررت انسى هالمخلوقه و طلعها من بالي لان ما ضل فيها خير بنوب… و كرامتي ما بقى تتحمل اهانات اكتر

كنت بدي اعزمها على خطبتي بس كانت 5 شهور مو محاكتني ابداااااا… ف قررت انو خلص كل وحده بطريق
و عالعرس نفس الشي بس كانت فرحتي كتير ناقصه بدونها

قطع علي كل هالافكار هي صوت زغاريد النسوان، و لمحت قصي ع الباب…. ياربي دخيلك قلبي صار يدق بسرعه
وصل لعندي… مسك ايدي و باسني ع جبيني و قلي مبروك…
و همس بادني (( صرتي مرتي))
كانت لحظات متل السحر
حسيت حالي سلطانه… حسيت نفسي خبيه جوات البي و سكر عليه قد ما بحبوو
ما بدي شي من الدنيا غيرك.. هيك قلتلو
ابتسملي و ضغط على ايدي..
قعدنا و كان الي بعيونا اكبر من كل الحكي…
بعد شوي وصلو مسج على موبايلو
ضحكلي و بعدا مسك موبايلو و فتح المسج..
تغيرت ضحكتو..
تبدلت نظرات الحب لنظرات صدمه و وجع..
ما تخيلت الا انو في حدا مات من عيلتو…
صارت ايدو ترجف…
رفع عيونو و تطلع فيني و انا قلبي صار متل النار
قلتلو حبيبي شو في؟
قصي لك حدا صرلو شييي!!!
لك يا قصي
و ما كان يرد علي و لا حرف
بس كان يتطلع فيني و عيونو لونن احمر متل الدم
و انا ما عادت عرفت شو فيها هي الرساله حتى قلبتلو كيانو هيك!!
شوو فيهاااا..
خلصت الحفلة و طلعنا بالسيارة على بيتنا..
كل الفرح الي بقلبي صار خوف… خوف عم يقطعني
ليش قصي هيك حالتو
ما عم يتطلع فيني
كان الطريق طوييييييل طويييييل…. ما وصلنا الا اعصابي تلفت..
فات قدامي… فتت و انا خايفه

روان: قصي بكفي احكي شووو فيييي
ما كان يرد فات ع غرفتنا و قفل الباب!!!!!
ركضت ع الباب و صرت اضربو بقوة و قلو شووو في شوووو في..
هيييك لحتى فتح الباب… و مسكني من ايدي بقوة حسيت ايدي رح تنقطع و ضار يصررررخ حكي مفهوم و حكي مو مفهوم..
انتي بلا اخلاق

-2-

#ثقة_عمياء

سحبت ايدي بصعوبه و قلتلو انا ما بسمحلك ما بسمحلك فهمان

قصي: الي ما بتسمحيلي لغيري بتسمحي مو؟
روان: لك شو يعني شو عم تخبص..

مسك الموبايل و رماه بوشي و اخد مفاتيح البيت و طلع
ضليت ابكي و خدي ورم من ضربة الموبايل
قمت حطيت تلج و انا عم ابكي و عم ادعي ربي يطلع هاد كابوس
معقول احلى ليلة بحياة كل بنت تكون بهالشكل البشع هاد!!
اااخ ياربي..

شوي وتزكرت انو موبايلو هون!!
ركضت متل المجنونه و فتحتو فتحت المكالمات لقيت في رقم
هاد الرقم مو غريب علي… ياربي دخيلك هاد رقم حمزة!!
مين حمزة؟!
لما كنت بالصف العاشر غلطت!!
غلطت وحبيت شب كان ينطرني عند باب المدرسه…
كان عقلي صغير و سدئت انو بحبني و بس اكتشفت انو واحد وسخ فورا قطعت علاقتي فيه… بس شو جاب رقمو لهون العمى!!
مدة المكالمة كانت 3 ثواني يعني مو حاكين شي..
رحت ع الرسائل مافي شي
رحت ع الواتس،، و هنيك فهمت كل شي..
كانت رسالة من رقم غريب باعتلو سكرين شوت.. (صورة شاشة)
صورة وحده دمرت حياتي
كانت هي الصورة لمحادثه الي انا و حمزة..
و النص كالتالي بالحرف:
روان: حبيبي امانه تعا احكي مع اهلي انا بدي عيش معك لك كتير بحبك
حمزة: جد بتحبيني لهالدرجه؟
روان: طبعاً و اكتر
حمزة: طيب اثبتيلي
روان: كيف؟
حمزة: تعي لعندي عالبيت، بكرة الساعه 8 الصبح خلينا نقعد لحالنا..

كان هيك بالحرف… المحادثه الها بقية بس مو مبعوته .. خليني انا كمللكن ياها

روان: نعم؟؟؟،!!!!
حمزة: شفتي انك ما بتحبيني؟
روان: لا انا شفت انك واحد ندل وواطي متل ما حكولي
يا خسارة بس…

……….

تركت الموبايل من ايدي… و صرت ارجف
مين بعتها؟!!!
و لييييش!
ليش عملو فيني هيك… ليش ياربي ليش
المشكلة اني مو حاكيه لقصي عن حمزة
و المشكلة الاكبر هو الجزء الي شافو من الحكي معقول مفكرني رحت لعندووو!!! معقول ياربي..
اسودت الدنيا بوشي و ما لقيت الي سند الا جمانه!
ايه جمانه للاسف ما كان الي غيرها لانو هي بتعرف كل شي و انا بدي حدا يساعدني
اتصلت فيها و انا عم ابكي و رح يوقف قلبي مو عارفه شو مخبالي بعد..

جمانه: الو
روان: جمانه جمانه مشان الله مشان الله ساعديني
جمانه: لك شببببك انتي مو اليوم عرسك؟؟
و بسرعه قلتلها كل شي صار…
جمانه: العمى يييييه هاد اكيد حمزة بدو ينتقم منك
روان: ايه اكيد هو بس بدي تساعديني
جمانة: انا؟ اه اوك بس كيف؟
روان: انا هي المحادثة صورتها و بعتلك ياها بتتزكري؟ وقتا جيت ابكي و بعتلك ياها كامله… امانه ابعتيلي الصور لان حزفتهن زمان
لازم جوزي يشوف بعيونو انو ظلمني و اني ما رحت و ما صار شي بيناتنا مشان الله
جمانه: بس انا كمان حزفتهن من زمان شو بدو يخليهن عندي لهلأ!
روان: ياااربي دخيلك يا الله شو اعمل شو اعمل
جمانة خلص اهدي انا بكرة بجي لعندك طيب؟
روان: اي امانه تعي نلاقي حل

و ضليت استنا قصي يرجع لاعترفلو بكل شي و فهمو الحقيقه
بدلت فستاني و غسلت و حطيت عشا…
و ضليت استنا..
و استنا..
استنا..
لوقت ما نمت من التعب..

قصي: قومي.. اصحي خلصينا
روان: قصيييي؟؟ اجيت حبيبي؟ ليك انت مو..
قصي: هس… و لا حرف
انا مابدي رجعك ع اهلك، بس ما بدي ياكي
بتقعديلك هون شهر.. شهرين
و بعدا بدون ولا حرف بتضبي غراضك و بتمشي ع بيت اهلك اوكي؟
روان: هههه بتحكي جد؟
قصي راح قعد ع الكنبايه و نزل راسو و قلي
قصي: انا حبيتك والله ، بس صعب اقدر كمل معك
يمكن هاد ماضي، يمكن كان عندك عذر
بس انا اسف ما بقدر اتقبل هيك ماضي و لا سامحك على هيك عملة..
انا كان حلمي ببنت محدا لمسها غيري… و بما انو غيري لمسك ف تحرمي علي… بعتذر منك

كلامو نزل علي متل الصاعقة
حسيت جسمي انقسم نصين
سهم فات بقلبي… جسمي كلو تخدر…
قام بدو يطلع و قبل ما يكمل طريقو ابتسمت و قلتلو انت ما بتستاهلني… خسارة فيك بررلك او دافع عن حالي قدامك..
بعد شهرين رح ارجع ع بيت اهلي
و يكون بعلمك انا ما لمسني مخلوق و فشر بني ادم يحكي على اخلاقي…

ضحك ضحكة دبحتني… حسيتو بقلي كذابه
حسيتو بقلي انتي مو شريفه
كسرلي عضامي بضحكة
مجرد ضحكة من بعيد ، وجعتني عن عمر…

قمت غسلت و لبست و تعطرت و جهزت حالي لاستقبال اهلي و اهل قصي ع اساس ما في شي..

اجو و استقبلتهن بضحكة… و ضحكنا و مزحنا

ام احمد: قصي بنتي امانه عندك ها امانه تفرحها و تنتبه عليها

قرب قصي مني و حط ايدو ع كتفي و شدني لعندو و انا صار البي يدئ بسرعه و استغربت تصرفو و قلها له يا مرت عمي ما بدي توصايه عليها هي رورتي..
طلعو الكل و سكرو الباب وراهن… و دفشني قصي عنو كأنو قرفان
نزلت دمعه من عيني
يا الله معقول انا عروس هيك يصير فيني
معقول قصي الي كان يدوب على نظرة مني هيك يتصرف كأنو قرفاااان!! ياربي
ما تحملت حالي و صرت صرخ قلتلو لك ليييش لييييش حرام عليك هاد الي شفتو كزب كزب

كان عم يحط فحم بدو يعمل اركيله…
قلي اها يعني انتي بريئة؟
حسيت في امل قلت يمكن الله حنن قلبو
قلتلو ايه والله بريئة سدئني…
رفع الفحم عن الغاز و زتهن ع الارض بالمطبخ
قلي ازا بدك تدافعي عن حالك و تثبتيلي انك بريئة
امشي ع الجمررر
من عندك
لعندي
يلا…
انتي مو مربايه!!!

_3_
روان: ليش هيك بتعمل؟
قصي: خايفه ع رجليكي؟ ما انا قلبي احترق بسببك… طفي جمر قلبي يلا… امشي و تعي لعندي.. يلا روان تعي اثبتيلي… يلا
روان: هالشي رح يثبتلك؟
قصي ابتسم و هز براسو بمعنى انو ايه…

كنت خايفه كتير بس الطعن بالعرض صعب صعب كتير
مابعرف كيف كنت عم فكر و شو صرلي بس بدون ما حس مشيت
و من اول خطوة صرخت بصوت عالي و صرررت ابكيييي
و هو ركض لعندي و رفعني و ركض فيني
و يقلي وليه مجنونه… ولك مجنونه انتي شو هاد شو هاد
و انا ضليت ابكي من الوجع و ما رديت بحرف…
جاب كريم و حط ع رجلي و لفلي ياها..
و قعد عالأرض.. صار يتطلع فيني…

راح الوجع شوي تجلست و قلتلو سدئتني؟؟؟
قبل ما يحكي رن الجرس… فورا عرفت انها جمانه
راح فتحلها الباب و طلع من البيت
حكيتلها كل شي و انا عم ابكي و هي صارت تبكي معي

روان: بدي احكي مع حمزة و افهم شو هدفو النا 5 سنين تاركين شو زكرو فيني
جمانه: لا لا اوعي والله جوزك بيجن لا لا تعملي لا لا
استغربت و خفت من حكيها
روان: بس انا لازم خليه يبعتلي الجزء التاني من المحادثه وورجيها لقصي يا جمانه انا عم موت والله حرام الي بصير فيني انا مظلومه
يا رفيئتي انتي بتعرفي الحقيقه.. انا مابدي شي
و ما عاد بدي قصي والله طلع من نفسي
طيب هو شافني كل فترة الخطوبة و هو خطيبي ما كنت خليه يلمس شعره مني
ما فكر
ما عندو ابدا ثقه بأخلاقي ليش ليش ليش ياربي

جمانه: خلص انا.. انا رح ابعتلك الجزء التاني من المحادثه

انا انصدمت… ضليت ساكته ما عرفت شو رد، يعني انا امبارح ما ضل الا بوس ايديها و هي تقلي حزفتهن… ما نطقت بحرف و هي لاحظت
ردت كملت و قالت يعني رح روح ع محل موبايلات و خليه يرجعلي الصور…

ضل في شك بقلبي تصرفها غريب بس الغريق بيتعلق بقشه..

روان: ياعمري انتي كتر خيرك مع كل شي صار بيناتنا بس ما الي غيرك انتي اختي و اغلى كمان.. وضلت هي تقنعني انو شو ما صار ما احكي مع حمزة
بس انا كنت مصره احكي معو لجيب الجزء التاني من المحادثه
بس من كتر ما الحت عملت حالي ما رح احكي معو

و هيك حكينا و بعدا راحت… صارت تزورني كل يوم كل يوم كل يوم

و انا و قصي علاقتنا من سيء لأسوء
كل يوم حس بالاهانه و الذل…
بيوم حطيتلو العشا و قعدت لاكول معو..

قصي: ممكن اكل لحالي؟
روان: اها طبعا ممكن فوت كول بالمطبخ… و صرت اكول و قررت ما عاد اتخبى و انكسر انا مو عامله شي
انا غلطت غلط صغير ما بستاهل هالاهانه

قصي: شو ياه قويانه..
روان: لا ابدا لا قويانه و لا شي بس بدي اكول هون هي كل القصه
قصي: بتعرفي عادي ماني مستغرب وقاحتك
الي عملت عملتك بطلع معها كل شي.. و ترك الاكل و قام
و انا غصيت باللقمه و حسيت نفسي داق و صارو دموعي متل النهر..
جمانه كانت يوميا تزورني و كل ما اسألها شو صار بالصورة تقلي طولي بالك علي و انا هون خلص صبري
قمت اخدت موبايلي وفتت ع غرفتي و قفلت الباب
و دقيت على حمزة لسه حافظة رقمو..

روان: الو
حمزة: هلاااا يا اهلا و سهلا
روان: عرفتني؟
حمزة: لا والله بس اكيد انتي حلوة متل صوتك

استغربت انو مو عارفني

روان: انا روان
حمزة: و انا حمزة يا عسل
روان: لك شبك انت مو متزكرني؟؟؟
حمزة: اه!! مين!؟ لا!
روان: لا تمثل علي انا روان وقت كنت بالصف العاشر كنا نحكي
حمزة: اوووووف هي انتي!!!

انا انصدمت كتير و فهمت انو هو ناسيني كلي على بعضي

ما عرفت كيف اتخلص منو قلتلو والله يا اخي انا بدي اتزوج و حبيت اتصل عليك تسامحني و سامحك… لأتاكد ازا عندو خبر بزواجي او لا

حمزة: هههااااي والله و كبرتي ريتو الف مبروك اختي جوازة الدهر…

و سكر!!!
العمى…
شو هاد!

لك مستحيييييل يكون هو مستحيييييل
لا باعتهن و لا حاطني ببالو اصلا …
وقفت عالشباك… و لسه مصدومه

و تحت البنايه شفت جمانه… كانت ماشي مع واحد
كانت ماشيه مع سلفي عمر!!
و عم يضحكو مع بعض!!
حطيت ع راسي و نزلت بسرعه…
سألني قصي وين رايحه ما رديت عليه
و نزلت لعندهن

4-
روان: اهلين جمانه تعي بدي ياكي ضرورررري
جمانه: روان والله كنت جايه لعندك و بالصددددفه شفت عمر ف كنت عم سلم عليه
و عمر ضل ساكت..
سحبت جمانه و عقلي كان كلو بالي صار معي فوتتها عالغرفه و سكرت الباب و قعدت حكيتلها الي صار
وهي وشها صار 100 لون
وصارت تعيط علي و تخانئني و تقلي انا مو قلتلك لا تحكي معو!!
و انا مستغربة ردت فعلها..
هي لاحظت ع حالها و قعدت و هديت شوي..
جمانه: حبيبتي يعني هو اكيد ما رج يعترف
فهميني مين رح يعمل هالعمله غيرو، بس ما رح يعترف ع حالو
و انا كان همي ما بتحملو جبال… ياربي طيب ازا هيك و لهل درجة متلئمن علي كيف بدو يبعتلي الصور
و رجعت اترجاها تروح تخلصنا و ترجع الصور لنلاقي صورة المحادثه
صرت ابكي وقلها والله روحي رح تطلع انتي ما بتعرفي كيف عايشه انا كرهت حياتي، لك والله. تعبت تعبت تعبببببببت
و ضمتني و ضليت ابكي لنشفو دموعي

راح الموضوع يومين و نزلت زياره ع بيت حماي و بالصدفه شفت عمر… ضل يلف و يحوم حوالي بعدين اجا قعد مقابيلي..

عمر: كيفك مرت اخي؟ و كيفو قصي معك؟
روان: تمام.. الحمد لله
عمر: كيفها جمانه؟
روان: جمانه! منيحة ليه بتسأل؟
عمر: بدك الصراحه؟
روان: ايه طبعا
عمر: انا حابب اخطب هالبنت عاجبتني كتير و واضح انو اخلاقها عاليه متلك، شو رأيك؟
روان: اوف… ايمت حلك تحبا و تقررتخطبا
عمر: ههههه شو ايمت كل يوم بشوفا و منحكي و منقعد سوا بالكفتيريا هون جنب البيت

انا انصدمت
هي كانت تجي توقف جنبي و لا كانت تجي تطبق سلفي!!
لك انا كيف مرقت علي
الي سنه ونص بشحد الحكي منها شحاده و فجأة صارت تزورني كل يوم و ما تقطع السؤال عني و انا الحمارة فكرت بدا توقف جنبي…
قلتلو سلفي معليه ما تجيب سيرة لجمانه انك قلتلي؟ و بكرة بدي ياك بحديث خاص من بعد اذنك
بنزل لعندك بهل وقت و بقلك ياه

عمر: والله شغلتي بالي البنت مو منيحه؟

روان: لك لا بس طول بالك علي لبكرة من بعد اذنك

انا طالعه ع بيتي…. و امانه ما تقلها انك خبرتني…
عن ازنك…

انا فوق كانت نار و شاعله بصدري
لك ليش
ليش عم تنزلي من عيني اكتر و اكتر يا جمانه…
بس لا
لك الصور ما الي غيرها لاثبت برائتي مافيني احكي شي. عليها لعمر… ما في حدا معو الصور غيرها..
لك لحظة
العمى
لك عنجد محدا معو الصور غيرها
لااااا
لا شو عم خبص انا
ياربي. لك كيف ما خطرلي للحظة
كيف كان كل عقلي عم يفكر بحل و نسيت فتح عيوني
لك حتى هي ما عاتبتني على عزيمة عرسي و خطبتي
و الصور الي طالبتها شهر و شوي و عم تأجلني…
انا ما الي الا عمر
كيف ما كان بضلو متل اخي و بتهمو سمعتي
لك بس هو طاير عقلو فيها
كيف بدي اقنعوووو
لحظة… لقيتا
خلص… مافي غير هالحل لاثبت برائتي و لاخد حقي منها
مافي غير هيك

_5-

نزلت لعند سلفي ... قعدنا و سلمت عليه عادي ونطرت حتى هو يفتح الموضوع ..

عمر : ايه مرت اخي هلأ احكيلي شبها جمانه
روان : والله ما بعرف شو بدي قلك محتارة يعني
عمر : لك البنت في عليها شي ... والله شغلتي بالي
روان : (( بقلبها عم تقول هلا اذا بقلو ممكن يكون متل اخوه و يظلمني هو كمان ويحط بعرضي و بكرامتي لا ما لازم احكيلو ))
عمر : مرت اخي معي انتي ؟
روان : اه ؟؟ ايه ايه ... هلأ ليك انا مو متأكدة بس شاكه ... في بنات حكولي انها على علاقه مع واحد و سمعتو كتير سيئة و عم يهددها بصورها و هيك ، بس انا
ما سدئت قلتلهن مستحييييييييييييييييل جمانه ما بتعمل هيك شي لو بشوفا بعيوني ما بسدء

هداك انجدب وبحلق فيني وفتح تمو .. قمت اطمنت انو سدئني و كملت حكيي

روان : ايه ايه ودافعت عنا كتير بس والله بصراحه .. يعني انا مره لمحت روان عم تحكي مع حدا عالواتس وما حسنت اتأكد منيح
شو اسمو .. بقى قلبي نقزني وخفت تتجوزها و تشوف عليها شي وتقول روان ما صارحتني وانت غالي علي

عمر : العمى طيب وكيف بدنا نتأكد !!

روان : ايووووه وانت عيني انا هاد الي بدي ياه بدي ما نظلم البنت ونتأكد انا فكرت انك تسألها بس اذا طلع
الحكي كذب رح تزعل منك وما تعود توافق عليك و جمانه بنت متل القمر مو كل يوم بصحلك متلها

عمر : ايه والله معك حق لا ما رح اسألها بس بدي اتطمن يعني انا كمان خفت بصراحه

روان (( هه وانت متل اخوك بدك وحده ما باس تمها الا امها والله وعرفت مفتاحك )) ايه ايه طبعا انا فكرت بهاد الشي لهيك انا لقيت حل
هلأ انت بس تجي لعندي جمانه انا بتصرف وباخد جوالها وانت حاول تشغلها قد ما فيك لوقت ما انا اتأكد من جوالها و بطمنك و هيك لا منظلم المخلوقه
ولا منتورط شو قلت ؟

عمر : نعم!!!!!!!!!!!! شو هاد بدك تفتشي موبايلها

ارتعبت من ردت فعلو عملت حالي مو سائلة و رديت عليله : سلفي الله يرضى عليك البنت عليها حكي
وانا خايفه ع سمعتك
وبدي ساعدك لا تقعد تعملي عي ووجع راس حابب ساعدك انا هاد الي عندي
مو حابب روح اتجوزا انا شو بضرني بالعكس بنبسط كتير بس بعدين مو تجي وتقلي انا ندمان او انا مو مرتاح
انا هيك ريحت ضميري .. عن ازنك
ولفيت ضهري و انا عم ادعي ربي تمشي عليه و لسه ما وصلت ع الباب الا وهو عم يقلي روان روان رني عليها اليوم خلينا
نتطمن و نرتاح والله انشغل بالي ...

فرفح قلبي و فورا قلتلو يلا على عيني دقيتلها عالسريع و قلتلها تعي صار معي تطورات ، طبعا هي خافت من كلمة تطورات
اجتني على ملا وشها

جمانة : بسرعه احكيييييييييي
روان : يلا حبيبتي رح قلك هي يا ستي
(( دق جرس البيت ))
روان : يييه مين جاي هلأ خليني شوف ..

.
.
.
.

اهلين عمر فوت تفضل اهلا وسهلا

عمر : اهلا وسهلا جمانه انتي هون ؟
جمانة : اه ؟ ايه هون انا كيفك ؟
روان : يا جماعه انا رح دق ل قصي يجي رح قللو انو عمر عنا انتو خدو راحتكن .. ييييه ما معي رصيد
جمانه دخيل عينك ممكن موبايلك رن لقصي ؟

طبعا كانت مشغولة بحبيب القلب وعقلها مو معها فورا اعطتني الموبايل وفتحتلي كلمة السر .. بالأول
ضليت واقفه مكاني غمزت لعمر يبلش حديث معها ليشغلها عني و فعلا بلش يحكي معا وانا
صرت بعد شوي شوي .. وفتت عالمطبخ ..
حسيت هلأ اذا الدنيا كلها بتجتمع علي لتاخد الموبايل ما رح اعطيهن ياه ... فورا فتت ع محادثتنا .. وصرت ارجع لورا لورا بس ياربي كتير
بعيده وين بدي ضل ارجع وين حاطتن ويييييييييييييين

فتحت الاستوديو و صرت دور شوي شوي وخفت يحسو علي ... و اخررررررررر شي وبعد ما صرت ارجف من خوف انها تتزكرني
لقييييييييييييييييييييتهن
ياربي دخييييييييييلك
لك ماني ظالمتها
هي المحادثه كامله
ليش الله لا يسامحك ليييييييييش
من قهري ووجعي نزلو دموعي ... و ضليت جمدانه بمطرحي وعمر يندهلي وانا ما كنت اتحرك من مكاني
اخر شي فاتو لعندي ع المطبخ ... وشافوني فاتحه الموبايل وعم ابكي ...
جمانه شافت هيك وجن جنانها ... قال شو عم تعملي اعطيني الموبايل

ما حسيت الا في سكينه جنبي على المجلى .. قلتلها خليكي مكانك والله اذا بتقربي لهون لادبح حالي و ادبحك يا حقيرة الله لا يسامحك
وهي على صوت عياطي .. فات قصي عم يركض و عم يقلنا شوووفييييييييييي !!!!!!!:
-6-
فات وشافني بهالمنظر بإيدي سكين وعم ابكي
قلي لك شبك روان

احساس الظلم صعب ... صعب كتير
صعب تنطعن من اقررب الناس الك
صعب وقت تحتاج الي بتحبو جنبك يوقف ضدك
صعب الدنيا تقلب عليك بلحظة
صعب تأمن بحدا و يطلع هو سبب تعاستك ..
صعب ...

قلتلو انت قلي .. ئدي ضل ليخلصو الشهرين ؟؟
قصي : انو شهرين عن شو عم تحكي ... و صار يتطلع ع اخوه بمعنى انو لازم اسكوت لانو اخوه موجود ..

و جمانه على اعصابها رجعت حاولت تجي و تقلي ممكن تعطيني موبايل وتهدي؟

روان : ليكي وحيات امي اذا بتقربي ما بصير خير ... قصي انت تعال ..

قصي : لك جنيتي انتي جنيتي ؟
روان : قصي تعال هلأ وبعدا بترمي علي يمين الطلاق ... بس تعال لهون

جمانه فهمت اني شفت الصور .. و صارت تقلو لك لا تروح مو شايفها جانه وبإيدها سكين ..
وعمر يقلو نفس الشي..

قرب مني قصي وقلي جيت .. شو ؟

لفيت الموبايل عليه وقلتلو شوف هي ؟

عمر : شو هي ؟
قربت الموبايل من عيونو وانا ماسكتو بكل قوتي .. كنت خايفه حدا ياخد مني الموبايل
كنت حاسه حالي خايفه ع ابني من كتر ما شفت ايام صعبه و عذاب

قرأ قصي المحادثه كامله ...

قصي : لمين هاد الموبايل ؟

روان : هي المحادثه لطفله .. عمرها 14 سنه .. شوفا منيح ... شوفا شوفاااا شوووفااااا ووقعت السكينه من ايدي ووقعت ع الأرض وضميت الموبايل بكل قوتي وضليت ابكي وقلو شفتااااااا؟
قلي شفتاااا ؟؟
شوفااااا
شوفا ..
نزل لعندي و حط ايدو ع كتفي

قصي : روان انا متلي متلك مظلوم ... والله متلي متلك

روان : لااا .. لا مو متلي متلك لا اانا كنت بحاجتك ..
كنت بحاجتك كنت بحاجة تقول لااا
لا مرتي شريفه و عفيفه
كنت بحاجتك تقلي انا ما بسدئ شو ما شفت
انا كنت كتير بحاجتك تركتني بأصعب اوقات حياتي
هنتني
مشيت عالجمر لاثبتلك اني مظلومه
بس هييييييي
هي عملت كل هاد الشي

واشرت على جمانه ... و كانت عم تبكي

تدخل عمر : شو في فهموني مشان الله

روان : شايف هي الي جيت لعندي بدك تتجوزا ؟ الي كنت بدك تعملها ام ولادك ؟
دمرتلي حياتي ... والله ما عملتلها شي اسألها ليش هيك عملت فيني
اسألها ليش خلتو يشك بأخلاقي
اسألها ليش حرمتني من فرحتي بيوم عرسي ... يلا اسألها
اسألها انا بشو اذيتها انا شو عملتلها ... مشان الله اسألها

عمر اتطلع على جمانه و هو مصددوم : شو عم تحكي فهميني ؟ فهميني شو صااااير

وهون حكت جمانه ..

بنات هي الجزء الأخير
-7-

انا والله ما كان اصدي هيك انا كنت مصدومه انك ما عزمتيني على عرسك ... حبيت زعلك وبس ما كان بدي انزعلك حياتك ما توقعت حالتك توصل لهون
يشهد علي ربي لما جيتك تاني نهار وشفت حالتك وكيف جوزك عمل فيكي انو بكيت دم وندمت وكنت بدي جيبلك الصورة حتى لو تشكي فيني .. بس انا
انا حبيت عمر
وقت شفتو فرح قلبي وصار يدق بسرعه وصرت طول عليكي بالمحادثه حتى ضل اجي وروح لعندك
خفت بس تبطلي محتاجتني تبطلي تدقيلي كل يوم
انا بس كنت بدي يعترفلي بحبو وبعدا بدي ساعدك فورا
كل قصدي كان زعلك شوي بليلة عرسك متل ما زعلتيني
ما لازم تزعلي مني انا الحق ع جوزك كيف بفكر فيكي هيك
كيف خطرلو انك رحتي ع بيت شب غريب لحالكن انا ما تخيلت توصل الأمور لهون والله يا روان مو نيتي
يمكن نحنا علاقتنا خفت وانا انقهرت منك بس ما بتوصل معي لشوفك بهل حالة بس انا حبيتو حبيتو كتييييييييييييير و كنت بدي ياه بأي طريقه ..

و التفتت على عمر الي مصدوم بكل شي سمعو .. ما كان مستوعب انو البنت العاقله الراكزة الي مبينه
كتير اكابر وكتير مزوئة و محترمه يطلع منها كل هالشي

ركضت جمانه لعندو وقالتلو : عمر انت كنت بدك تخطبني صح ؟ انا موافقه
ليك الي صار مو ذنبي
انا روحي تعلقت فيك لا تتركني هلا لا تتركني ... انا ندمانه انا هيك تاخرت عليها كرمالك
لا تتخلى عني هلا
انا متاكده انك بتحبني ... عمررر احكي احكي

قصي : انقلعي من بيتي ... ما بستقبل بنات بلا اخلاق بهل بيت هاد

جمانه : عم تحاكيني انا !!!

انا بلا اخلاق ؟؟؟! شو عم تخبص ؟! عمر سامع اخوك شو بيحكي .. عممممر احكييييي

بعد عمر عنها .. و بعينو دمعه : متل ما قلك اخي اعملي ، انقلعي

انا كنت بعدني قاعده بالأرض وحاضنه الموبايل ، قرب لعندي قصي وقلي اعطيني ياه يا عمري

قلتلو لا ما بدي ما بدي ما رح اعطيه لحدا

قلي حبيبتي اعطيني ياه انا حبيبك اوثقي فيني ..

سحبو من ايدي شوي شوي ... و ضمني لحضنو

مسك الموبايل مسح كل شي فيه
واعطاه لجمانه قلها يلا لبرا ...

اتطلعت بعمر قالتلو يعني خلص ؟

ضحك عمر قلها هلا انتي مسدئه انو كنت بدي اخطبك ؟
هالمسرحيه كلها مشان نكشفك انا وروان كنت متفق معها و مين قلك بتعبي عيني وحده متلك
بعدين مبين عليكي وقحه و مو محترمه و انا بدي بنت تصون عرضي و كرامتي

انصدمت جمانه وانا استغربت من حكيو انا شفت بعيونو انو كتير كان حاببها ..

طلعت من البيت جمانه و انا بعدت عن قصي وقلتلو خدني ع بيت اهلي ..
تدخل عمر و صار يقلي استهدي بالرحمن وسامحيه يا بنت الحلال
و قبل ما جاوب قلو قصي لا انا بدي اخدها ع بيت اهلها
قلت بقلبي ما بكفي كل شي عملتو و هلا ما حاولت تعتذر ..
احترق قلبي من كلمتو هي
وبالفعل لبست و نزلت ووصلني ع بيت اهلي حطني عالباب وبدي فوت مسك ايدي
قلتلو شو بدك ؟؟!

قصي : بتعرفي ليش رجعتك ع بيت اهلك ؟
روان : هه لانك بدك تخلص مني
قصي : لا يا عمري ، لان بدي ارجع اخدك من هالبيت عروس معززه مكرمه ... بفستان ابيض و بجهاز جديد و بعراضه و طنه ورنه
بتقبلي تتجوزيني ؟
دمعة الفرحه غلبتني كتير فرحت حسيت اديش حاسس بغلطو واديه نفسو سامحو ..
قلتلو بشرط
قلي شو ؟
قلتلو بدي شهر عسل

قلي من عيوني

و بالفعل جبلي فستان ابيض جديد والكل استغرب شو القصه بس قصي قلهن انو غلط بحقي و كسر بخاطرري وانا عروس لهيك حب يراضيني بطريقه خاصه .
طبعا بلش الحكي انو مرتو بتتحكم فيه بس كان حبو الي كبر كتيييييييير بعد الي صار

بعد ما رجعنا من شهر العسل التقيت بعمر ... باركلنا و من خلال الحديث سالتو ليش هيك حكى لجمانه ؟
قلي مشان اخدلك بحقك حبيت اقهرها متل ما قهرتك باحلى يوم بعرسك انتي اختي بعهد الله وما بهونلي فيكي
و مسح ع شعري وقلي الله يبعتلك ايام بيضا
حسيتو كتيررررررر مقهور و زعلان و حسيت بغصه عليه حبيت ساعدو لهيك قررت قرار صعب بس نفذتو بسرعه
لا يروح فكركن لبعيد اكيد ما صالحتو مع جمانه بس خطبتلو رفيقتي متل القمر ما في بحسنها وجمالها و اخلاقها وهيك طيرتلو جمانه من عقلو
لان بصراحه خفت يرجعلها ، يعني كمان مو معقول بعد كل هالعزاب خليها تتهنى ..
ومنو بتدايئ اني جوزتو رفيقتنا ..
كيد نسوان اللهم عافينا ..

و بالنهاية يمكن العبرة واضحه ... بعممرك لا تثقي برفيقتك قد ما كنتو قراب
الزمن دوار
والشيطان شاطر
وما بتعرفي بكره شو مخبالك
خلي سرك الك
الك ... اتفقنا ؟

#تمت

 

[مال الشام]

صبايااااااا
الله يسعدكن
اخوووااااتي
معقووول ولا تعليق ..طب عالاقل عطوني رأيكن بالقصة ..
شكرا الكن عسولاتي ??