تعالى اتأسسى واتعلمى الانجليزى من الصفر معايا وحصرى مـــــجـــــــــــــــانـــــآ

السلام عليكم
انا ميس نودى مدرسة انجليزى
قررت اعلمكم الانجليزى من الصفر وحتى الاحتراف
مــــــــــجـــــــانــــــا
الدروس هتكون على شكل دروس مكتوبه هنا فى المنتدى
;g d,l ]vs []d]
ومش طالبه غير دعوة منكم بظهر الغيب
---------------------------------------
يلا نبدأ علطول
فى الدرس الاول
جاهزين ؟
نبدأ بسم الله
اولا احنا بنقسم حروف الانجليزيه لقسمين او بالبلدى كل حرف ليه اخ توأم
يعنى ايه ؟
يعنى الحروف بنقسمها لحروف كبيره ودى اسمها ( capital letters)كابيتال ليترز
وده شكلهم
A.B.C,D,E,F,G,H,I,J,K,L,M,N,O,P,Q,R,S,T,U,V,W,X,Y,Z
طيب واخواتهم التوأم بنفس الترتيب اسمهم ايه ؟
اسمهم حروف صغيره ( small letters ) اسمول ليترز
وده شكلهم
a,b,c,d,e,f,g,h,i,j,k,l,m,n,o,p,q,r,s,t,u,v,w,x,y,z
تمام لحد كده ؟
طيب ايه فايده التقسيمه دى فى اللغه ؟ اقولك
فى اى كلمه انجليزيه لازم نكتب اول حرف كابيتال وباقى الحروف اسمول
نيجى بقى لتقسيمة الحروف دى فى نطق الكلمات
احنا بنقسم الحروف دى للنطق لقسمين
اولا : حروف متحركه صوتيه ( vowel letters )
هما ايه الحروف دى ( a-e-o-i-u )
اما بقية الحروف فتسمى احرف ساكنه ( consonant letters )
طيب ليه التقسيمه دى ؟ اقولك
الحروف الصوتيه دى بعدين هتفرق معاكى فى وضع ادوات التعريف والتنكير هندرسهم بعدين
مش مطلوب منك حاجه دلوقتى غير انك تحفظيهم وبس
طيب نشوف كده مثال بسيط
شوفى حرف ال ( u ) فى كلمة شمسيه ( umbrella )
بينطق ازاى آمبريلا شوفى حرف ال u ادانا نغمه
طيب بصى هنا كده فى كلمة جامعه ( university )
بينطق ازاى يونيفرستى
شوفى اتغير ازاى
طيب ليه بيتغير ؟ عشان فيه استثنائات دايما وهندرسها كلها بعدين
تمام ؟ .... تمام
________________________________
نيجى بقى لأرقامنا الانجليزيه
انا بقسمهم لأرقام فرديه من واحد لغاية عشره
بالترتيب كده اهم
واحد - اثنان - ثلاثه - اربعه - خمسه - سته - سبعه - ثمانيه - تسعه - عشره
ترجمتهم الانجليزيه
one,two,three,four,five,six,seven,eight,nine,ten
ودول للحفظ
تمام ؟ .... تمام
نيجى بقى لأرقامنا الزوجيه عاملين زى القطار بالظبط
عشان نهايتهم شبه بعض تماما بس خدوا بالكم ده القطار الصغير لسه القطر الكبير
يبدأوا بالرقمين دول ( احدى عشر واثنى عشر 11, 12 )
ترجمتهم ( eleven - twelve )
وباقى الارقام اللى هى المركبه القطار يعنى
13 و14و15و16و17و18و19
ترجمتهم الانجليزيه ايه
thirteen ,fourteen , fifteen , sixteen , seventeen
eighteen , nineteen
لاحظا كده معايا ::: اخر الارقام دى كلها بتنتهى ب ( teen )
عشان كده كنت بقولكم زى القطار تمام
ودول هتلاقوهم سهلين فى الحفظ بمجرد ما حفظتم الارقام الفرديه
بسهوله تذودوا بس نهاية القطار ليهم ( teen ) وخلاص
نيجى بقى للارقام الزوجيه الكبيره
ودى كلها بنفس النهايه برضه بس بتختلف عن اللى فاتت
يعنى دى القطار الكبير بتاعنا
اللى ارقامه
20 و 30و 40 و 50 و 60 و 70و 80 و 90
ترجمتهم ايه
بصوا كده ولاحظوا معايا
wenty , thirty , forty , fifty , sixty , seventy , eighty , ninety
ها لاحظتوا ايه ؟ تمام كده صح
انتهوا كلهم بنفس النهايه ( ty )
طيب انا عاوزة اعرف الارقام اللى فى نصهم هقولك تكتبيها ازاى
مثال انا عاوزة اكتب 57 ( فايفتى سيفن )
بصى انا نطقت ايه الاول الفايف 5 اترجمها فورا
ووراها علطول السبعه 7
ازاى يعنى ؟
57 ترجمتها ايه ؟ زى ما نطقتها تمام
fifty-seven
وطبعا كلنا حفظنا الارقام الفرديه والزوجيه وبقى سهل علينا نركبهم ع بعض
مثال تانى
84
تكتب eighty-four
وهكذا
فاضل معانا ايه ؟
المائه - والالف - والمليون
ترجمتهم ايه ؟
100 ( hundred هاندريد )
1000 ( thousand ساوزند )
1000000 ( المليون million مليون )
تمام كده الارقام ؟
-------------------------------------------------------
نيجى بقى للحروف المركبه فى الانجليزيه
ده للناس اللى بتتعلم قراءة الانجليزيه بطريقه صحيحه
sh // تنطق كحرف الشين
مثال شيماء تكتب shymaa
kh // تنطق كحرف الخاء
مثال خالد تكتب khaled
gh // تنطق كحرف الغين
مثال غالى تكتب ghaly
كفايه عليكم لحد كده فى الدرس الاول عشان عندكم كل اللى فات ده حفظ
نيجى بقى لكلمات الحفظ النهارده
الواجب يعنى يا حلوين
النهارده هناخد الحركات اليوميه بتاعتنا
نبدأ بسم الله
يجرى / run ران
يجلس / sit سيت
يشرب / drink درينك
ياكل / eat أييت
ينام / sleep اسلييب
يعطى / give جيف
يمشى / walk ووك
يلعب / play بلاى
شجعونى بقى عشان اكمل باقى الدروس
good luck

 

الأميرة ميس

:: مراقبه عامه :: , قسم البنوتات - الطب والأدويه
انا أول المشجعين لك و اذا تحتاجي اي شيء
لحتى اساعدك انا في الخدمه ورح اجلب اعضاء للموضوع
و انشر الموضوع للاستفاده
بارك الله فيك مسبقا أخيتي
ممنونين لك
ان شاء الله في ميزان حسناتك.
 
( الدرس الثانى) تعالى اتأسسى واتعلمى الانجليزى من الصفر معايا مـــجـــانا ميس نودى

الدرس التانى
درسنا النهارده بيتكلم عن الاسماء
ايه هى الاسماء
اى اسم فى الدنيا مفيش فيه حركه ( فعل )
يعنى ايه ؟
زى مثلا
كتاب book
تفاحه apple
مدرسه school
الى اخره
طيب ينفع اقول مثلا اسم زى يشرب drink انه اسم؟
خطأ ... طيب ليه ؟
بصى كويس هتلاقى الكلمه عباره عن حركه او فعل
تمام لحد كده مجرد بدايه
ندخل بقى فى المهم
لكل اسم فى الدنيا اداه لتعريفه
زى فى اللغه العربيه كده اداة التعريف فى العربى هى ( ال )
طيب وفى لغتنا الانجليزيه
اسمها ايه ؟ اسمها ( the ذاا )
تقصدى يا ميس ام ندى ان ( ال... هى the ) ؟
ايوه هى دى بس بالترجمه
طيب نفهم من كده ان اداة التعريف لأى اسم فى اللغه الانجليزيه هو ( the ) ؟
ايوه تمام كده
مثال
انا عاوزه اقول مدرسه ,, بشرط اكون عارفه المدرسه دى
هقول ايه ؟
the school ذا اسكوول
طيب ادخلها فى جمله كده
ذهب احمد الى المدرسه
طبعا لو دى محادثه يعنى مثلا ام بتتكلم عن ابنها فقالت ان ابنها راح المدرسه
طبيعى تكون الام عارفه مدرسة ابنها
هقولك محاثه كده بالبلدى بين ام وجارتها عشان تفهمى قصدى
الجاره : ايه امال احمد ابنك فين يا ام حماده ؟
الام : احمد راح المدرسه
بصى هنا الام عارفه المدرسه
طيب هتكون الجمله ازاى بالانجليزى
ahmad go to the school
تنطق "احمد جو تو ذاا اسكوول
طيب لاحظوا كده معايا ان اداة التعريف (the )
جت لازقه فى school
عشان ايه عشان المدرسه معروفه للأم
افهم ايه انا طيب ان اى اسم معلوم لازم يكون له اداة تعريف واللى هى فى الانجليزيه ( the )
طيب لو انا بتكلم عن مدرسه بس مش عرفاها؟
اقولك " مش هحط قبلها اداة التعريف
ازاى ؟
اقولك يا حلوة بس بالأنجليزى
مثال كده " اشتريت كتابآ
طيب احنا نعرف الكتاب ده ؟
لأ " يبقى خلاص مينفعش احط اداة تعريف
طيب الترجمه كده
اشتريت كتابآ
I bought a book
تنطق آى بووت آ بوك
بصى هنا بقى محطناش اداة تعريف ليه ؟
عشان الكتاب مش معروف
طيب امال نحط ايه مكان اداة التعريف مع الكلمه الغير معروفه ؟
هنحط اداتين اسمهم ادوات التنكير ( a , an )
ايه الادوات دى يا ميس ؟ .. هقولك الدرس الجاى
طيب وامتى برضه لازم نحط اداة تعريف ؟
مع الاسماء المفرده اللى فى حياتنا العاديه ملهاش جمع
زى ايه مثلا / شمس - قمر ... هل فيه شمسين فى العالم ؟
لأ يبقى نيجى نتكلم عن الشمس نقول
the sun .. مينفعش اقول sun
وكمان / القمر
the moon ... مينفعش اقول moon
ايه كمان الاسماء اللى لازم يتحطلها اداة التعريف ؟
امثله من الاسماء وكلهم لو لاحظتوا انهم فى العالم ملهومش غير كيان واحد بس
الملك - الحكومه - رئيس الدوله - المحيط الاطلسى
فصيله معينه من الحيوانات - البحر الاحمر - البحر المتوسط - الامازون
الخ

ملحوظه / فيه اسماء بتكون معلومه صحيح بس مينفعش نحط قبلها the
زى اسماء العلم
زى مثلا ( احمد ahmad )
ينفع اقول the ahmad ؟
غلط اسماء العلم مينفعش نحطلها اداة تعريف
طيب وايه كمان مينفعش احط معاه اداة تعريف ؟
أسماء الدول و المدن
زى ايه مثلا ؟
ذهبت إلى نيويورك
I went to New york
وتنطق " آى وينت تو نيويورك
بصى هنا برضه محطناش اداة تعريف
مثال كمان
مصر دولة عظيمة
egypt is a great country
وتنطق إيجيبت إذ آجريت كنترى بفتح الكاف وتسكين التاء
وشوفى برضه هنا محطناش اداة تعريف
لحد كده تمام ؟ .... تمام
نيجى بقى لكلمات الحفظ النهارده
هناخد كلمات الاسره ( افراد العائله )
جد / grand pa .. جراند با
جده /grand ma ... جراند ما
اب / father .. فازر
ام / mother ... مازر
اخ / brother ... برازر
اخت / sister ... سيستر
ابن / son ... صن
ابنة / daughter .. دوتر
طفل رضيع / baby ... بيبى
كفايه عليكم كده واتمنى يكون الدرس مفهوم وبسيط بالنسبالكم
وياريت مكونش كترت عليكم

 

الأميرة ميس

:: مراقبه عامه :: , قسم البنوتات - الطب والأدويه
ما شاء الله عجبني الدرس
كملي بس رح ادمج الموضوعين مع بعض أحسن و رح أقوم بتثببتو لتستفيد جميع العضوات
مشكوره الاخت ميس نودي.
 
استمري يا عسل نفسي من زمان اتعلم الانجليزي اسلوبك حلوووو في الدرس تاااابعي وبقوة وانا معك في الدروس الله يجزاك الفردوس الاعلى يارب
 
( الدرس الثالث) تعالى اتأسسى واتعلمى الانجليزى من الصفر معايا مـــجـــانا ميس نودى

الدرس الثالث
اتكلمنا الدرس اللى فات عن ادات التعريف وفاكرين اما قلتلكم ان الكلمة اللى مش هينفع نحط قبلها اداة تعريف هنحط قبلها ايه ؟؟؟
ايوة صح كده اداتين اسمهم ادوات التنكير اسمهم ايه ( a - an )
طيب دول نحطهم امتى ومع ايه ؟؟؟ اقولك
( a - an )
ايه الفرق بينهم
توضع ( a ) عندما يكون الحرف الاول من الاسم ساكن
ازاى ؟؟ فاكرين اما قلتلكم ان فيه حروف ساكنه وحروف صوتيه متحركه
الحروف الساكنه هى ايه ؟؟ كل حروف الانجليزيه ماعدا ( a - e - o - i - u )
دول حروف متحركه
بس هخلى الكلام عن الاداة ( a ) بعدين خلينا دلوقتى نتكلم عن :
الاداة ( an )
مش بنحطها الا قبل الحروف الصوتيه المتحركة
اللى هما ايه ( a - e - o - i - u )
مثال
تفاحه / apple.... ينفع اقول ( a apple ) وتنطق آبل؟؟
خطأ .... ليه ؟
بصى كده اول حرف من كلمة تفاحه apple هتلاقيه حرف من الحروف الصوتيه
اذن مينفعش نحط اداة التعريف ( a )
لازم تكون ( an )
مثال تانى
بيضه ( egg ) وتنطق إييج
ها هنحط ايه قبلها ؟؟؟؟
برافو عليكم صح كه ( an )
ونكتبها ازاى بقى ؟؟ ( an egg )
طيب الشاطره اللى هتقوللى .... فيل ( elephant ) وتنطق إليفانت هنحط قبلها ايه اختارى يلا بسرعه .... ها .. عرفتيها
سامعه حد قاللى هنحط ( a )
لألألألأ غلط بصى كده اول حرف من الكلمه ايه وقوليلى
ايوه حرف صوتى طيب ايه ؟ ايوه صح
هنحط ( an ) عشان نكتب صح وتصبح الكلمه
( an elephant )
طيب نيجى بقى للكلمات الشاذه اللى تخص الاداه ( an )
فيه كلمات شاذه مرتبطه بوضع الاداة دى
هى ايه ؟
( hour ) وتنطق آور اللى هى ساعه
ملاحظه ايه ؟؟؟ بصى صحيح الكلمه مش اولها حرف صوتى متحرك ايوة بس هنا بقى الشواذ فى الموضوع ... الفكرة ان آه صحيح مش اولها حرف صوتى بس احنا نطقنا اولها كحرف صوتى انا كتبالك نطقها فوق جنبها
يعنى لو كتبناها زى ما نطقناها هتكتب ازاى ( our ) بصى اتكتبت ازاى
كأن اولها حرف ( o ) يعنى حرف صوتى
اذن فى النهايه تكتب ( an hour )
الاسم الشاذ التانى ( honest ) وينطق أونست اللى هو صادق صفه مش اسم
نفس الحكايه نطقها كأنه ( onest ) يبقى نحطلها برضه ( an )
لتكتب ( an honest)
طيب الكلمه الشاذه العكسيه يعنى ايه يعنى ممكن يكون اولها حرف متحرك بس مينفعش نحطلها الاداة ( an )
زى كلمة ( university ) وتنطق يونيفرستى اللى هى جامعه
بصى صحيح اولها حرف متحرك بس مش هينفع نحطلها ( an ) طيب لييه ؟؟؟؟!!!
عشان هنا نطقنا حرف ال ( u ) عادى كأنه حرف ساكن
اصبح مينفعش نحطله الا الاداة ( a )
ليكتب هكذا ( a university )
طيب لحد كده اخدنا الاداه ( an ) لوحدها منفصله عن الاداة ( a )
ليه ؟؟ عشان منتوهش من بعض
بس لازم ناخد فى نفس الدرس الكلمات اللى مينفعش نحط معاها ادوات تنكير اصلا
زى ايه ؟؟ والكلمات دول حفظ ع فكره
* قاعد مهمه *
لا توضع اداتى التنكير ( a - an ) للأسماء الغير قابله للعد
زى ايه ؟؟
(water وتنطق ووتر اللى هى الماء وهو غير قابل للعد )
( sugar وتنطق شوجر اللى هو السكر وهو برضه غير قابل للعد )
( salt وينطق سولت اللى هو الملح وهو غير قابل للعد )
تمام كده الكلمات دى ؟؟؟ طيب فيه كلمات تانيه كتير غيرهم طبعا بس انا بديكم امثله عشان تفهموا قصدى
والشطوره اللى هتقوللى اسم برضه عندنا فى مطبخنا على فكره بس هسيبكم تحلوها
وتقولولى عليها المره الجايه
طيب برضه لازم ناخد الكلمات دى معانا النهارده
* قاعده 2 *
يجب اضافة اداة التنكير عند التعبير عن الكميات .. ايه الكلمات اللى بتعبر عن الكميات ؟؟؟؟
afew وتنطق آفيو ... قليل او بعض من وتقال احيانا مع الوقت
alittle وتنطق آليتل ... قليل
alot وتنطق آلوت ... كثير
apair of وتنطق آبير أوف ... زوج من
anumber of وتنطق آنمبر أوف .... اعداد من
ahundreds of وتنطق آهندريد أوف ... مئات من
aquarter وتنطق آكورتر ... ربع
ahalf of وتنطق آهاف أوف ... نصف من
acouple of وتنطق آكابل أوف ... زوج من
بصوا كده مع الكلمات دى كلها حطينلها الاداه ( a ) لييه ؟؟
عشان لو لاحظتوا اول حرف من كل كلمه فيهم حرف ساكن مش متحرك

 
( الدرس الرابع) تعالى اتأسسى واتعلمى الانجليزى من الصفر معايا مـــجـــانا ميس نودى

السلام عليكم
ازيكم يا بنات يارب تكونوا بخير
نبدأ الدرس علطول
بسم الله
الدرس الرابع
اتكلمنا الدرس اللى فات عن ادوات التنكير ( a - an )
واخدنا منهم بس الاداة ( an )
وعرفنا ما لها وما عليها
وفى نهاية الدرس اديتلكم الكلمات اللى لازم نحط ليها اداة تنكير
تمام كده ؟؟ ... تمام
درس النهارده بقى اسمه ايه اسمه ( يجوز ولا يجوز )
يعنى ايه ؟؟ يعنى هناخد الكلمات اللى يجوز نضيف ليها ادوات تنكير والكلمات اللى لا يجوز نضيف ليها ادوات تنكير
اولا ::: يجــــــــــوز
1- يجب اضافة اداة تنكير للأسمااء الغير معرفه ( المفرده ) والقابله للعد مثال .
نحن لدينا قطه وكلب
( الترجمه we have acat and adog )وتقرأ وى هاف آكات آند آدوج
لاحظوا كده معايا انا حطيت اداة التنكير ( a ) قبل كلمة cat وكلمة dog
ليه ؟؟ عشان القطه والكلب هنا معروفين لصاحبهم اللى بيتكلم عنهم وكمان هما مفرد يعنى قطه واحدة وكلب واحد وكمان معدودين يعنى مش كلاب كتير ولا قطط كتير
تمام ؟؟؟ ... انشاء الله سهله

2- يجب اضافة اداة تنكير عند التعبير عن المهن اللى هو شغلك مثال.
انا مدرس
( الترجمه iam ateacher ) وتقرأ آيام آتيتشر
برضه هنا حطينا اداة تنكير قبل كلمة teacher
مثال 2
هى ممثله
( الترجمه she is an actress ) وتنطق شى إذ آن اكتريز
هنا برضه حطينا اداة تنكير قبل كلمة actress
تمام ؟؟ ... انشاء الله تمام

ثانيآ ::: لا يجــــــــــوز
1- لا يجوز اضافة اداة تنكير قبل الاسماء دى
( any إنى _ some صم _ some one صم وان _ any body )
ليه مينفعش احطلهم اداة تنكير؟؟؟؟
لأنهم فى الاصل نكره ( مش فاهمه ) هقولك مثال
شخص ما اخبرنى بأنك رحلت
( الترجمه some one told me that you left ) وتنطق صم وان تولد مي زات يو ليفت
هنا قبل كلمة some one محطناش اداة تنكير

2- لا يجوز اضافة اداة تنكير قبل حرف الجر ( by ) وفى دروس جايه هديكم حروف الجر بالتفصيل
مثال ( انا ذهبت بواسطة سياره )
( الترجمه i went by car ) وتنطق آى وينت باى كار
سؤال : هل ينفع فى الجمله اللى فاتت نحط اداة تنكير قبل كلمة car ؟
لأ طبعا وعرفنا ليه عشان قبلها حرف الجر by

3- لا يجوز اضافة اداة تنكير لأسماء الجمع( فى دروس جايه هنعرف ازاى نجمع الكلمات ) لكن فىالمثال ده اداة الجمع موجوده فى كلمة cat اللى هى حرف ال ( s ) لتصبح الكلمه ( cats ) مثال
س : صحح الكلمه ( i like acats ) طبعآ الجمله فيها كلمة خطأ
( cats تعنى قطط مينفعش فى الجمع نحط اداة تنكير
يبقى الجمله بعد التصحيح
i like cats

4- لا يجوز اضافة اداة تنكير قبل المواد ( قصدى اللى درسناها قبل كده فى كتاب العلوم زى ايه
oxygen اوكسجين - iron معدن - snow ثلج - Sand رمل
الخ
مثال ( water contains an oxygen ) وتنطق ووتر كونتينز آن اوكسجين
ها عرفتوا فين الغلط ؟؟ .. برافو عليكم
صح كده غلط طبعا نحط اداة تنكير قبل المواد
اظن لحد كده سهله انشاء الله
احنا الحمد لله خلصنا ادوات التعريف والتنكير
فيه بنات سألونى عن اجزاء فى الدرس هما ميعرفوهاش
زى مثلا ( ايه هو اسم العلم ده ) وكمان ايه هى ( النكره )
هما طبعا موجودين ودرسناهم فى اللغه العربيه بس مش مهم اشرحهم تانى عشان خاطر عيونكم
فى اللغه الانجليزيه
اولا : اسم العلم
هى اسماء بيتسمى بيهم الاشخاص والاماكن والشهور وايام الاسبوع والمدن الخ
بس ليهم قاعده طبعا تخص الدرس بتاعنا
* القاعده *
لازم يكتب اول حرف من الاسم ده كبير ( capital letter ) مهما كان موقعه فى الجمله وطبعا مينفعش نحط قبله اى اداة تنكير عشان هو فى الاصل معرفه
طيب زى ايه اسم العلم ده ؟ مثال
cairo كايرو... القاهره - ali آلي... على ( اسم مش حرف جر )
monday يوم الاثنين
الخ
ثانيآ : اسماء النكرة
هى اسماء للدلالة على نوعية من الأشخاص أو الأشياء أو الأماكن
وبيتكتب الحرف الاول من الاسماء دى كابيتال اذا كان فى اول الجمله
ويكتب بحرف صغير اذا كان فى وسط الجمله او اخرها
الاسماء دى بنحط قبلهم اداة من ادوات التنكير ( a - an ) اذا كان الاسم مفرد
واداة التعريف ( the ) اذا كان الاسم معروف للشخص المتحدث
مثال الاسماء دى
man - teacher - book - city
وترجمتها من الشمال لليمين
رجل - معلم - كتاب - مدينه
اظن كده كفينا ووفينا فى ادوات التعريف والتنكير
كفايه كده النهارده عليكم
عشان كل كلمة اتقالت فى الدرس حفظ
طبعآ مع الكلمات الجديده
النهارد هناخد حفظ الاعداد الترتيبيه
الاول : First وينطق فيرست
الثانى : Second وينطق سكند
الثالث : third وينطق ثيرد
الرابع : fourth وينطق فورث
الخامس :fifth وينطق فايفث
السادس : sexth وتنطق سيكسز
السابع : seventh وتنطق سيفنز
الثامن : eighth وتنطق إيث
التاسع : ninth وتنطق ناينث
العاشر : tenth وتنطق تينث
* ملحوظه *
الارقام دى ليها رموز بتتكتب بيها كأختصار ليه فى اللغه
ايه هى مثال كده عالسريع
الرابع : fourth رمزه 4th حرفين ال th بيتكتوا جنب الرقم عالشمال من فوق
مثال كمان
الثالث : third رمزه 3rd وبرضه الحرفين بيتكتبوا عالشمال من فوق
طيب ملاحظتوش حاجه ؟؟؟
ايوة صح بناخد اخر حرفين من الكلمه ونحطه جنب رقمها من فوق كرمز ليه

كده احنا خلصنا الدرس النهارده
بتمنالكم التوفيق من كل قلبى

 
أعلى