معلومات ~UniQuE~
تستغفرين و مافي اي فرق بحياتك ! تعالي هنا السر
السلام عليكم و رحمة الله و بركاته
مبدأيا وقبل مااتكلم فى الموضوع الاساسى اللى كتبت عشانه الموضوع ده عايزة اقول ان ربنا وضح لنا فوايد الاستغفار فى القرأن لأنه عارف النفس ايه اللى بيحمسها ويجذبها لعمل شئ وهو نظام المكافآت والواحد مننا لما بيعمل حاجة ويحس انه مبيشوفش اى تغيير او فرق طبيعى بيزهق فى الاخر دى طبيعة النفس - بقول الكلمتين دول بس عشان الناس اللى بتقول استغفر ومتستناش نتيجة - فى ناس بتكون عندها مشاكل وبتلجأ لربنا خوفا وطمعا وطبيعى تبقى حاسة انها محتاجة تشوف اثر للاستغفار
نخش بقى الموضوع ( ليه ممكن يكون حد بيسغفر ومش بيشوف اى نتيجة ):
وارد جدا ان يكون الاستغفار قليل بالنسبة لحجم الذنوب اللى الواحد بيعملها فيكون اي نعم الواحد بيستغفر لكن الاستغفار ده لأنه قليل يدوب بيمنع المشاكل انها تحصلك لكن مش بيخلى الخير يظهر فى حياتك يعنى تخيلوا معايا واحد عنده ذنوب اكتر من الخير اللى بيعمله ومش بيستغفر وقتها المشاكل هتيجى كتير لأن ربنا قال " وما كان الله معذبهم وهم يستغفرون" وده معناه ان عدم الاستغفار بيسبب العذاب مشاكل مادية بقى امراض تعب نفسى خناقات اى حاجة تسبب الم بشكل عام تخيلوا بقى صاحبنا ده اللى عنده ذنوب اكتر من اعماله الخير ابتدى يستغفر بس قليل شوية وقتها اللى هيحصل انه مفيش مشاكل جديدة هتحصل معاه يعنى استغفاره هيبقى يدوب بيحجب عنه المصايب الجديدة لكنه مش كتير كفاية لدرجة انه يمحى المشاكل القديمة اللى عنده
انا ليه بقول الكلام ده لأن الكلام ده انا عشته وجربته
شفت لما كنت بستغفر كتير وعايشة بالاستغفار كانت الامور السلبية وقفت وابتدت كمان تحصل حاجات ايجابية كان الكلام ده فى 2018 ولحد دلوقتى بحسها من اسعد اياام حياتى ولكن فى فترة تانية من حياتى كنت بعيدة عن الاستغفار (اللى بيطهرنى اول بأول ) وابتدت وقتها تحصللى مشاكل كتير ولما افتكرت استغفر كنت بستغفر بسيط وقتها لاحظت ان المشاكل وقفت بس انا كنت منتظرة حاجات ايجابية تحصل زى اللى ربنا ذكرها على لسان سيدنا نوح بس مافيش اى حاجة حصلت ووقتها انتبهت ان ربنا اتكلم عن الاستغفار فى القرأن بطريقتين واحدة منهم بتقول انه بيوقف السلبيات (وَمَا كَانَ اللَّهُ لِيُعَذِّبَهُمْ وَأَنتَ فِيهِمْ ۚ وَمَا كَانَ اللَّهُ مُعَذِّبَهُمْ وَهُمْ يَسْتَغْفِرُونَ ) والتانية منهم بتقول انه بتجيب الايجابيات ( فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا** يُرْسِلِ السَّمَاءَ عَلَيْكُم مِّدْرَارًا .....)
اسفة انى طولت عليكم بس نصيحة ليا وليكم لو بتستغفرى وحاسة مفيش اثر لاستغفارك :
حاولى توقفى او تقللى من الذنوب
زودى الاستغفار
كترى من اعمال الخير والقيم
~منقول للإفادة ~
اسم الموضوع : تستغفرين و مافي اي فرق بحياتك ! تعالي هنا السر
|
المصدر : ملاذ الأرواح