.أنا (أقول أمشئ عدل يحتار عدوك فيك) وأم الزوج مو عدو بس المثل للتقريب المهم لما تكون الوحدة على نياتها وتحكي كل شيء لأهل زوجها يقولون فاهيه و خبله وكل شيء تقوله و اذا صارت رسميه و غامضة قالوا سوسة ويصيرون يتدخلون بحياتها وينبشون من وراها الأفضل التوسط لا تصير الوحدة واضحة عالأخر و لا غامضة كذا راح تحسسهم أنها غريبة عنهم وبيحقدون عليها وفي شيء ثاني أنا أنصح كل وحدة تخصص أم زوجها بحوارات هادية بين فترة و فترة تدق على أم زوجها و تسولف لها أو تزورها و تحكي لها عن الأشياء العادية و أحيانا تتظاهر أنها تأخذ رأيها وتطلب منها النصيحة بتربية الأولاد أو إيش أفضل جنسية للشغالة اللي مفكرة تقدمين عليها المهم موضوع يخليها تحس أنها مهمة و عندها خبره وانك تحبينها وتثقين فيها عشان كذا تشاورينها صدقوني شوي شوي تتغير و تقل تدخلاتها حتى لو أحد حرشها ما راح تتأثر بكلامهم ولا ننسى ( تهادوا تحابوا ) قدمي لها هدية بين فترة وفترة و اذا كنتي صائمة وصدف هي صائمة بنفس اليوم مثلا 6 شوال أو الأيام البيض سوي فطور خفيف وناديها تشاركك أو روحي لها وافطري معاها أو إذا عجبها شيء عندك جيبي لها مثله بخور عطر حتى لو كان ترمس قهوة ؤاذا رحتي لهم ادخلي وبيدك شيء مسويته وقبل كل شيء خلي نيتك صافية واحتسبي الأجر مهما كان عمرها و قوة شخصيتها بالتعامل الطيب راح تتغير وتنحرج من نفسها ؤلا تعصبين لما تسألك عن شيء و انتي ما ودك تتكلمين عنه و لا تجادلينها بالنقاشات تذكري أنها أم و بيجي يوم تصيرين أم زوج و تتدخلين من باب تتطمنين على ولدك وحياته .
