تحملي ..كله بثوابه

[راجيه الرضا]

معلش يا بنتي استحملي جوزك اللي بيضربك كل شوية واهو كله بثوابه

اهل زوجك ظالمينك استحملي اذى اهل زوجك وتطاولهم عليكي واهو كله بثوابه

معلش يا بنتي استحملي جوزك وقلة شغله اصله مش لاقي شغلانة تليق بيه واهو كله بثوابه

الست الأصيلة تستحمل عدم عفة زوجها ليها اصله غشيم واهو يا بنتي كله بثوابه

معلش يا بنتي استحملي واستحملي واستحملي

ايه ده انتِ دِبلتي واطفيتي معلش اهو كله بثوابه انتي عارفة بقى يا بنتي لقد خلقنا الانسان في كبد

لااااااااا (الكبد) هو المجاهدة تكون عايش في حالة جهاد وتحاول في تحديات الحياة لكن مش تيجوا على الطرف المظلوم ونقوله ارضى
اللي انتم عايزنا نرضى بيه ده نستشهد بيه ب اية تانية
وَمَا ظلمناهم وَلَٰكِن كَانُوا أَنفُسَهُمْ يَظْلِمُونَ

الانسان لما يتعرض لظلم ماتطلبوش منه يبقى امر واقع لانه كده هو اللي ظلم نفسه مايلومش على الزمن ولا النصيب

الناس بتشوفك شرير لمجرد انك بتطلب بحقك او بتعرف تقول لأ للي يظلمك

حلو ندور على استمرار الجوازة ونبعد عن استسهال فكرة الانفصال ونحاول ونحاول عشان الجوازة تستمر

لكن لما يبقى في حد واقع عليه ظلم لازم ياخد موقف
يطور من نفسه لحد ما يوصل ان شخصيته تبقى اقوى ويوصل ان عيوب شريك حياته مأترثش عليه زي الاول
يلجأ لكبير عيلة يوصل معاه لحل
يبعد فترة لحد ما الطرف التاني يقول ان الله حق

لكن طبعا مش بتكلم انها تنفصل كل اللي بتكلم فيه انها ترفع من على نفسها الظلم بالشكل المناسب او المتاح لها?

احنا بنتجوز عشان نفسيتنا تكون للاحسن مش عشان نموت من القهر والتعب الجسدي
انت مش بس بتتصرف بسلبية
انت بتاخد وزر ظلم النفس وترجع تقول اعمل ايه نصيب ربنا رايدلي اتضرب واتهان
فعلا وما ظلمناهم ولكن كانوا انفسهم يظلمون
مايسة كمال
محو الاميه الزوجيه