تأدب .. مات مئة مرة فيومين

[ريم البنفسج]

السلام عليكم ..

بغيت اخبركن عن الشغلة الي سوتها ربيعتي عند ريلها عسب تادبة ..

لانة واحد خواااااااااان .. كل يوم مطيح عند وحدة .. غير السهرات الي فالفنادق وياهن .. وغير الهدايا

ولا والمصيبة الكبيرة انة فالفترة الاخيرة تمادى وايد .. يقولها بسير دبي ادفع مخالفات السيارة

ويوم ترمسة فليل يرمسها وهو يالس فمرقص .. وعلى الساعة 3 تدق علية وما يرد عليها مووول

وقريب الساعة 5 الفير يدق عليها يقولها انا راقد .. بس هي تقول انة كذاب لان صوتة صوت واحد مصحصح على الاخير

والي زاد الطيبن بلة ان مفهمنها ان عندة تلفون واحد .. ومرة كان راد من السفر ويوم فتحت شنطتة لقت فية 4 تلفونات وكلهن برقم سري .. دش مرة عليها الغرفة ولقاها راقدة ويلس يلعب بالتلفون يطرش مسج حق حبيبتة وترد عليها يلسوا جي مسجات رايحة ومسجات جاية تقريبا ساعتين .. وهي مخلية نفسها راقدة ..

والي خلاها تفكر تنهي الموضوع انة قالها انة بيسافر وبياخذ سلفية حق السفر تقريبا مئة الف .. تخيلو مئة الف حق السفر ..

دقت علي وخبرتني قلتلها انتي متاكدة انة عندة علاقات مع بنات قالت متاكد .. قلتلها ما لنا غير حل واحد .. نخلية يحرم يقرب صوب البنات .. قلتاه توثقي فيي قالت 100% قلتها الحل عندي

تقدر اي وحدة اذا تدق من تلفونها الخاص تسوي خدمة اخفاء الرقم حق الشخص المتلقى للمكالمة .. يعني الي توصلة المكالمة توصلة بس ما يكون في رقم طالع عندة يكون عبارة عن 4 ارقام بس واذا رد بيدق علي ما يقدر .. المهم يات ربيعتي عندي ودقيت على ريلها من تلفوني واستخدمنا خدمة اخفاء الرقم .. وكان هالكلام يوم الخميس الساعة 2 الظهر .. دقيت .. رد علي وقلتلة وياك مستشفى ****** وانا اسمي فلانة ( اسم من عندي ) من مختبر الدم الخاص بالمستشفى .. نبغيك اتينا المستشفى يوم الاحد ان شاء الله .. ونبا ناخذ عينة من الدم منك ومن زوجتك .. قال : لييييييييييش .. قلتلة تعال المستشفى وبتعرف .. حسيت من صوتة انة تروع .. قال قوليلي السبب الي يخليني اسوي فحص دم وياكم انا ما فيي شي .. قلتلة يات عندنا وحدة تسوي فحص فالدم وبين عدنا انها مصابة بالايدز .. وجبرناها تخبرنا الاشخاص الي لها علاقة فيهم وعطتنا رقمك .. ونحن نبغيك تسوي الفحص عسب نتاكد انك مب مصاب .. وسكرت التلفون عنة ..

دقينا علية الخميس لان بيكون في اجازة الجمعة والسبت ونحن نباه يتعذب هاليومين ويموت مئة مرة

تقول ربيعتي رد البيت وويهه مصفر .. وكلة ساكت وحتى رقدة ما رقد .. وكل ما تسئلة شفيك يقول تعبان شوي .. حتى تلفوناتة ما قام يرد عليهن ومن يدقن ربيعاتة يسكر فويهن واخر شي قامت تسمعة يسب وهو فالغرفة من يدق تلفونة .. حتى لقت عندة شريحتين مكسرنهن ... تم على هالحالة يومين ويوم الاحد سار بيسوي فحص .. قالولة نحن ما دقينا عليك .. وسلر سيدة مستشفى خاص وسوي فحص بروحة وطلع سليم خخخخخخخخخ

واحين كمل على هالسالفة 3 اسابيع وتقولي انة تغير وصار يهتم فيها وايد وغير ارقام تلفوناتة .. والامور طيبة .. بس ان شاء الله يكون تادب ما يرد حق خرابيطة عقب ما ينسى السالفة

هاا رايكم فينا ؟؟!!

 

[shamashemo]

والله انها حركة خطيرة ، بس يارب يتأدب وما يرد لسوالفه ، يا مأمن الرجالة يا مأمن الميه في الغربال ،آه يا قلبي منهم

 

[NicE-GirL]

يستاهل والله ،،

ماشاء الله عليك حبيبتي ذكية ..

الله يعينها على زوجها

 

[قطـــــريه]

ههههههههههههه والله يبي لهم هالرياييل الخونه هالحركات ..

 

[دنيا حظوظ]

والله اتمنى القى صديقه مثلك بس
الله يحفظكم لبعض وترااااااك سوسه
لاوالله امزح الا شطوووووووووووره

 

[عيون عزيز]

جدعه يا بنت ههههههههه.....
زين ما ياته سكتة قلبية خخخخ....من الامراض يتنافضون يامال العافية ومن ربهم ماكو خوف......
زين سويتوا فيه .....

 

[الضحكة الزائفة]

والله انكم حركات ههههههه

زين اللي سويتوا فيه

بس اللي متعود على هالشي مستحيل يرجع عنه بهالسهولة

ان شاء الله الله يهديه على طول ..

 

[هيلين]

هههههههههههههههه..
حركة خطييييرة..
موسهلة..الله يحفظك..

 

[أنا حره]

هههههههههههههههه

وربي خطيره انتي والفكره بعد ما شاء الله تبارك الله

الله يكملك بعقلك يارب

ويهديه ويخليه ما تروح عينه مني او مني

 

[bentbnoot]

يمكن أحلى مكيدة قرأتها بالمنتدى
طيب انا عندي مشكلة بسيطة لكن عوييييصة وتعبت تعبت ما لاقيتلها حل
رحت يمين تيجي شمال والعكس
ممكن اراسلك على الخاص ؟؟

 

[ريم البنفسج]

والله تبون الصدق انا كنت اسئل نفسي هذيلا ما يخافون من المرض وخاصة ان الي يطلعون وياهن مرن على شرات غيرة

هذا الي خلى الفكرة تيي فراسي .. انة كيف بيكون شعورة اذا يلس يومين حاس ان احتمال يكون فية المرض بنسبة 50% وبعد ما يكتشف انة مب مريض كيف بيتصدف .. احتمال 50% انة يحرم ..

والحمد لله ان ريل ربيعتي تغير .. وهي بعد حاولت ترد علاقتها فية من يديد .. وتجبر نفسها انها تنسى وفي نفس الوقت تراقبة بحذر

مشكورات خواتي على المرور .. ربي يسعدكن

 

[ريم البنفسج]

يمكن أحلى مكيدة قرأتها بالمنتدى
طيب انا عندي مشكلة بسيطة لكن عوييييصة وتعبت تعبت ما لاقيتلها حل
رحت يمين تيجي شمال والعكس
ممكن اراسلك على الخاص ؟؟

هلا اختي .. شاكرة لج اطرائج للفكرة

تبين الصدق اول مرة افكر بحل مشكلة وصابت عند ربيعتي :nosweat:

انتي طرشيلي على الخاص الي عندج واذا لقيت المناسب لج ما بقصر

مشكورة على مرورج

 

[أحلى مدام]

ههههههههههههههههههههههه والله اننك خطييرررره يا بنت ,,,تعجبيني والله

 

[×ألوان×]

ما شالله عليك خوش فكرة ..

الله يهديه ويصلحة وكل اللي ماشييين بهالطريق ...

 

[وزني ذهب]

بارك الله فيك

زين ما سويتو فيه

ان شاء الله يكون أخذ الدرس و ما ينساه طول عمره

يا رب رد لكل زوجات المسلمين أزواجهم ردا حسنا عاجلا غير آجل​

 

[غدير الكويت]

الله يعينج على المساعده دوووم
تسلمين

 

[بانداعزيز]

هههههههههههههههههههههههههههههههههههه
اضحك الله سنك وذكرتيني بواحد مسوي علاقه مع الخدامه الله يقرفه وكان راعي سفر في يوم سافر واخذت الشغاله وسفرتها ولما رجع سأل عنها .قالت سفرتها لاني سويت لها فحص وقالوا فيها الايدز .الرجال مرض وتعب نفسيا لمده تقارب الشهر بس يستاهل اللي يتساهل في محارم الله

 

[دلــ زوجي ــوعة]

الله عليك وعلى افكارك
شفت هالفكرة في طاش 14 أعتقد

مشكورة عالمووووضوووع

 

[ملكة عرشي]

ههههههههههه فكرة روووووووووووعة جنااااااان
لكن الرجل يستااااااااااااااااااااااااااهل

 

[بنت الشام]

حركة روووووووووووووووووووعة
يا رب دخيلك بهالأيام الفضيلة أنه يثبته ولا يرده لطريق السوء