بنات وش الحل مع زوجي دايما انا الغلطانه وهو الصح ..

[قهوة مارس]

السلام عليكم ..

انا عضوه جديده عندكم وهذي اول مشاركاتي ..

من شوي حصل بيني وبين زوجي نقاش ..

النقاش كان عن اخته .. هي زوجة اخوي .. وهي حالياً عند اهلها لان بينها وبين اخوي مشاكل ..

وبصراحه اغلب المشاكل اللي تصير بينهم بسبتها هي .. لانها انسانه شكاكه .. وفيها غيره فظيعه لدرجة انها تغار عليه من خواته ... وتقول لاخوي انت وخواتك بينكم علاقة حب ..

وتحاول بكل جهدها انها تعزل اخوي عن اهله .. وغيره كثير ..

ويوم تزعل هالمره قالت لاخوانها كل شي .. وقالت لهم ان سبب مشاكلنا اهله يتدخلون في حياتنا .. فقام واحد من اخوانها ومسك اخوي وصب عليه من الهوش ليش تدخل اهلك في حياتكم .. وصارت هوشه بين اخوي واخوها ..

واهلي عمرهم بحياتهم كلها ماتدخلوا في بينهم .. واساسا اهلي بديره واخوي بديره ..

واذا راحوا اهلي للديره اللي فيها اخوي مايجلسون ولايطبون بيته لانها هي تبي كذا .. يجلسون عند اختي .. يعني عند النسيب :no:..

وتعاملها مع اهلي زفت الزفت وبحياتنا مارفعنا السماعه على اخوي وقلنا له ان زوجتك سوت كذا اوكذا ..

وبعد ماسوت كل هالمشاكل .. تبي اخوي يرجعها .. وترسل له رسايل عشان يرجعها ..

واخوي حالياً يبحث له عن زوجه ثانيه ..

ووده يرجعها بس عشان عيالها .. ويقول ياليتها تغير من شخصيتها وتكون افضل .. والله ماتزوج عليها ..

المهم انا قلت لاخوها اللي هو زوجي ..

ان اختك مرسله لاخوي رساله تبيه يرجعها .. واخوي يدور على زوجه ثانيه ..

ويتمنى ان اختك تتعدل ولايتزوج عليها ..

انا وصلت له الكلام عشان ينصحها وترجع بشخصيه افضل ..

قالي انتي هالحين تهدديني باخوك انه بيتزوج على اختي ..

قلت لا مااهددك انا اقولك عشان نتدارك الوضع قبل مايطيح الفاس بالراس ..

وانا قد سمعت كذا وحده عوجا مع زوجها ولا تتسنع الا اذا سمعت انه يخطب وبيتزوج على تتسنع وتسوي اللي هو يبي .. واولهم زوجة صديقك .. ماتسنعت الا لما خطب ..

فيمكن اختك اذا جاها الخبر تتسنع وتغير من شخصيتها واسلوبها ..

تدرون وش قالي ..

باستهزاء واستحار قالي ان حاولتي توصلين الخبر لوحده من خواتي والله ان تحوسك حووووووس ..

سكتته انا وقلت لاتكمل ..

اولا ماعاشت ولا انخلقت اللي بتحوسني حوووس .. واللي يحوسني ادووووووس عليه وافرك خشمه بالتراب ..

وبعدين وش شايفني خبله انا عشان اروح اقولها لوحده من خواتك ..

تدرون وش رد علي قال انتي قليلة ادب ولسانك طويل .. ولك حسااااااب عسير بس مو هالحين بعدين ..

وشرايكم بنات قاعد يهددني بخواته ويبيني اسكت ..

المشكله انه يهين نفسه قبل مايهيني .. اذا حاسوني خواتك معناتها مااحترموك ولاحطوا لك اي اعتبار ..

تكفووووون قولوا لي انا غلطانه بردي ..

ووش اسوي هل اروح اعتذر والا ازعل والا اسكت .. وش اسوي بالضبط ..

انتظركم

 

[سلــمى]

انا من راي غلاتي انك تطنيشه
انتي ما قلتي شئ غلط انتي وصلتي له وجهة نظر اخوك الي هو زوج اخته
يعني وبصراحة لو صحيح مثل ما تقولين طباع حرمته اجل انا معه انه يدور راحة البال ويعيش حياته من غير ما يظلم الأولى ولا يجي على حقها ولا حق عيالها
بس ربنا حلل التعدد وهو شئ حلال ويمكن انها اذا سمعت انه ما همه زعلها ولا فارق معه غيرتها ولا وجودها عند اهلها تتعدل وتحاول تحافظ على بيتها وزوجها
فكره حتى لو تهويش وتهديد
رد زوجك مرة مو بمحله
وش دخل اخواته في الموضوع ؟؟؟ وش دخل الي قاله في الشئ الي تتكلمين فيه ؟؟؟
يمكن ما فهم كلامك وحسب انك تهدديه وتنافخين عليه وعلى اهله قام رد هالرد الغريب ؟؟؟
على العموم غلاتي
انتي ما غلطتي من وجهة نظري والاعتذار هنا مو في صالحك يعني خله يطلع الي في راسه وخله يوريك الحساب العسير الي رح يسويه
وانتي اتعاملي معه بهدوء وبعدم اهتمام
خله يحس انه انتي مانتي خايفة من كلامه ولا فارق معك زعله الغير مبرر
طنشيه
التنطيش اوقات يجيب نتجية بس لو كان بذكاء وحكمة
قومي بكامل حقوقه من غير تقصير بس بيني له انك مو مهتمة لزعله ولا فارق معك ولو حسيتي انه قاعد يعاقبك بشئ معين لا تعانديه خله شوي لين ينسى او يعدي الموضوع بعدين عاتبيه بهدوء
واعطيه الكلام من تحت لتحت انه احترامك من احترامه وانه لو احد استهبل عليك حتى لو من اهلك يعني استهبل عليه هو كمان لانكم انتم الاثنين واحد والي يضرك يضره والي يهينك يهينه وما يصح انه يقول كده عليك ولاحتى عن اخواته
اكثري من الدعاء والاستغفار غلاتي وربنا يوفقك

 

[ماء الهنا]

ياويلك تعتذرين انتي ماخطيتي ورائي من رائي اختي عليك بالتطنيش قد ماتقدرين حبيبتي يدري ان اخته ع غلط موب منزل راسه ويقول الحق معك والله انه سوة كيت وكيت وكيت طنش تعش تنتعش وبس الله يكون بعونك ويسخرلك زوجك يارب​

 

[ام ولة]

ياقلبي بنصحك نصيحه انتي في موضع حساس لان اخوك واخته في الموضوع ويمكن يصير ينتقم منك او خواته ينتقمون منك لو اني منك مااتدخل نهائى ولا كان اخوي قد تزوج اخته انا اخوي راح يتزوج اخت زوجي وانا والله كارهه الموضوع لكن النصيب وعاهدت نفسي اني ماتدخل في الموضوع ابدا لا من قريب ولا من بعيد

 

[ام ولة]

لو اني منك اروح واعتذر لانك غلطتي وفعلا طولتي لسانك وهو بين لك ان خواته شرانيات وانتي اللحين بينتي له ان عندك خير وانك تقدرين عليهم

 

[محرومه من زوجي]

حبيبتي المقصود وحصلتيه ومصيره يقول لاخته لكنه بيكابر قدامك وما يبغاك تنتقصين من اخته
لذلك طنشيه نهائيا ولا تفتحين السالفه نهائي
واذا حاول هو يفتحها
قولي اخوي واختك لهم بيت خاص ومشاكلهم الخاصه
وش دخلنا
لا قالك هذه اختي بوقف معها قولي الله يكون بعونك وانا مالي دخل فيهم
وحاولي نصيحه مني عشان ما يكون مشاكل بينك وبين زوجك لا تتدخلي ولا تتكلمي عن اخوك وزوجته
واذا هو تكلم اسمعي بدون نقاش
واذا سالك عن اي شي بخصوصهم قولي ماادري حتى لو كنت تعرفين الاجابه