بموت والله

[المسكينه999]

السلام عليكم ورحمة الله وبركاته

بنات بموت والله مقهوره جد وماعرف شااسوي بنت عمي لاعابه وماخلت شي ماسوته

انصدمت امس تقولي ان سيرتج انا وبنت عمي على كل لسان وان واحد من الشباب متكلم

عني انا وياها مع ان العلم انا مالي هاي السوالف هي الي لها وتكلم تخيلو امي جاتها حاله

وانا بعد نفس الشي احس اني مقهوره منها امي مصدقه ان مافيني شي بس من الصدمه

ماتبي تكلمني بنات انا صارلي يومين مااكلت شي ماعرف شااسوي ارجوكم السالفه حياة او موت

تخيلو كل ماانام اصحى من نومي لاشعوريا وادعى عليها وعلى الي متكلم عني امي حرمتني من الجامعه ومن شغلي بنات جد تعبانه دعيت ربي واستغفرت وايد واتمنى ان الله ينصرني
ولايخليني تحت رحمتهم تعباااانه وايد بنات حتى الجوال خذته مني تخيلو ترى السالفه مب سهله هاي عرضي يجي حد يتكلم عنه زور والله مب عدله قولولي بنات شااسوي امي ماتبي تكلمني الله يخليكم ادعو لي والي تدعي لي بظهر الغيب جعل مثواها الجنه يارب ماعندي حد اشتكي له غيركم

 

[}وردة{]

حبيبتي...
هم شو قالوا عنج بالضبط؟؟؟​

 

[يابعدها سماي]

دام أمك مو مصدقه ليه تأخذ منك الجوال وتعاقبك وكأن اللي صار صدق ؟!!
امك بها التصرفات اعطت مجال لإي شخص انه يصدق !!
بعدين متعبه نفسك وتعتبرين المسأله حياة او موت بسبب بنت عمك ؟!!!
أنت المفروض تدفعينها ثمن لعبها في عرضك غالي !
ترى كلها بنت عم ماهي ام ولا اب ! يعني لازم تتعاقب عقاب يخليها تعض اناملها ندم !!
هذي النوعية لو ما تواجهينها وتعرفينها خطوطها الحمراء تتمادى أكثر
دخلي الرجال في العائله مافيها شي أنت ما غلطتي واللي ما يغلط ما يخاف
كلمي الوالد او عمك (ابوها) او اخوانك
لا تتركين الموضوع يمر مرور الكرام
هذي النوعيه اللي يخليهم تمادون اذا حسوا خوف من الطرف الثاني
أمك بدل لا تعاقبك بذنب ماهو ذنبك اطلبي منها تكلم ام بنت عمك او اي احد يوقف ها البنت عند حدها
امك تعبانه ومتعبتك وانت مظلومين ؟!!
وهي عايشها حياته وكأنها مااعتدى على عرضك ؟!!

أنا مع العفو عند المقدره والتسامح !
لكن ضد الظلم والإعتداء والسلبيه
اللي يصير لك المفروض والعدل انه يصير لها هي مو لك !
ما يضيع حق وراه مطالب !

رددي ( حسبي الله ونعم الوكيل ) و ( اللهم أكفنيهم بما شئت )


​

 

[المسكينه999]

هم قالو اني طالعه مع شباب واني اعرف شباب مع العلم ويشهد ربي علي اني ماعرف حد
امي من الصدمه قامت اتشك

وبعدين بنت عمي اكثر من مره مكلمين امها واهلها واكثر من مره مسويه مشاكل مع اختي الثانيه

الله يخليكم ادعو ان امي تكلمني

 

[}وردة{]

هاي بنت عمج ما عندها أهل يعاقبونها يراقبونهاأو مسؤولين عنها؟؟؟؟!!

أعرفي عزيزتي أنه الله فوق
وداااائماً دائماً ينصر المظلموم

كلمي أمج بهدوء وقوليلها
عمرج يما شفتي مني تصرف ما يرضيج؟
أنا إنسانة أحافظ على ذكر الله وصلاتي
مقوووولة أسوي شي بهذ الدناءة؟؟
أنا إنسانة نظيفة وأشرف من بنت عمي بمليون مرة
وإذا تبين تسـألين أي وحدة من تعرفينهاعني في الجامعة
بتأكد لج كلامي

وحبيبتي إنت اطلعي دايماً مع أمج
وإذا تطلعين مع ربيعاتج وقفي الطلعات شوي
وخليهم هم يزورونج إذا تحبين
واتمسكي بذكر الله والدعاء

وأنا متأكدة أنه الله بينصرج
عاجلاً غير آجل =)
بس خلي أملج وظنج في الله حسن​

 

[المسكينه999]

حبيبتي انا مااطلع مع ربعي لان امي ماترضى الله يشهد علي من الدوام لين الجامعه والبيت

بس انا قلبي يحترق وقاعده اكتب واصيح والله ماحب امي تزعل علي وحسبي الله ونعم الوكيل في كل من تكلم عني

 

[عطر أبوي]

لا والله


الدنيا سايبه ولا سايبه


لا تسكتين عن حقج ،، موب اهيا الي تسوي فيج جذي ،، قلبي الدنيا على راسها ..

كلمي أمج وقعدي معاها ،، وقولي لها اني انه تربيتج وانج انتي ماتسوين هالشي مستحيل ،،

حاجيها بالطيب وقولي لها عن سوالف بنت عمج الشينه


لا تسكتين ..

 

[المسكينه999]

انشاء الله بقولها اتمنى انها تسمعني بصيح وببوس رجولها انا خايفه تقول حق اخوي لانه مسافر واخوي يذبحني وانا ابوي متوفي ادعو لي انتو بس ان الله يخفف عني وينتقم منها وترجع حياتي نفس قبل مع امي
لاني بنتها الكبيره وانا قدوه لاخواني ماحبهم يشوفوني بهالمظهر وعلى فكره انا عمري 23 وبنت عمي عمرها 20

الله ينتقم منهااااااااااااااا ادعولي ان امي ترضى علي تكفون ادعو لي بكره عندي امتحان وامي ماعتقد بتخليني اروح مع انه امتحان نص السنه مال الجامعه ولازم اروح وهي رافضه ياالله يارب حنن قلب امي علي واكد لها اني مش مالت هالسوالف يااااااااااااااااااارب مالي غيرك ادعو يابناااات الله يفرج كربتكم يارب

 

[عصور]

أكثري من قول وترديد : ( حسبنا الله ونعم الوكيل ) بإحساس ويقين ,,,

يكفيك الله شرهم ...

 

[المسكينه999]

تسلمين حبيبتي والله ينصرني عليهم يارب وبإذن الله برفع راسي وراس اهلي وامي المسكينه اخواني الصغار لين شافوني اصيح يصيحون وياي الله ياخذ بحقي ودعوة اليتيم مستجابه اذا حد ظلمه

 

[عطر أبوي]

لازم تروحين واتقديمين الامتحان ،،

كلميها غلاتي الليله توكلي على الله وكلميها بثقه و ماله داعي تخافين من شي انتي ماسويتي شي ..


خلج قووووية وربي معا الحق = )


بدعيلج اختي ربي ييسر امورج وخبرينا بالي يصير معاج = )

 

[انسه طفشانه]

وين ابوك او اخوانك طيب
لازم يعرفون انها تتكلم عنك وفاضحتك بين الشباب

 

[anime]

مو بنت عم هاي شيطانه

 

[المسكينه999]

بنات انا كلمت خالي الكبير بالموضوع وقعدت اصيح عنده واقوله انا تربيتكم من عقب وفاة ابوي انتو وامي ماقصرتو عني وحبيت اقولكم ان امي خلتني اروح الامتحان وخلتني اروح الدوام بس لين الحين ماتكلمني
بنات صار معاي شي غريب وانا خايفه منه وااايد انا وايد دعيت ربي وتمسكت بديني بزياده وطول هالفترة كنت ادعي ربي واصلي ركعتين للحاجه وافضفض لربي في الي بقلبي ,, بنات امس فاليل حلمت اني انخطبت حق ولد عمي واليوم الظهر حلمت اني انخطبت بعد بس الي خطبني هالمره شخص كان خاطبني قبل وامي ردته وفي الحلم كنت اشوف ان امه تصيح عند امي تبي تقنعها انها توافق ان الولد يتزوجني وشوي الا امي صاحت وياها وانا قاعده اطالعهم ومستغربه من الموضوع ,,, بنات انا خايفه من الحلم علمآ اني قبل لا انام كنت اقرى سورة يس والكوثر والكافرون

بنات لحد يهمل موضوعي جزاكم الله خير الي عنده دعوه تحطها لي والله يفرج كل هم مظلوم ويحمل كل وحده ماتحمل وكل وحده متهاوشه مع زوجها الله يقربكم لبعض امين يارب

 

[}وردة{]

ما اعرف في تفسير الأحلام..
وما اعتقد انه البنات بيساعدونج من هالناحية
بس إن شاء الله خير =)
والله يوفقج عزيزتي​

 

[المسكينه999]

تسلمين اختي ورده على ردج لي وزيارتج صفحتي جعلج تنولين الجنه يارب والله يوفقج يارب ويبعد عنج كل ضيقه وكل سوء

 

[عطر أبوي]

يلا الحمد لله الي قاعد يفتحها بويهج اختي

التزمي بصلاتج وخلج واثقه من نفسج ،، وبري امج ولا تحاتين بأذن الله راح ينصرج ..

والله اعلم بتفسير الاحلام.. اقري عنها في النت وفسيره ..

والله يوفقج يارب = )

 

[..ماريا..]

قال الحسن البصري : عجباً لمكروب غفل عن خمس آيات من كتاب الله عز وجل وعلم فوائدها. قال تعالى:





• "وَلَنَبْلُوَنَّكُمْ بِشَيْءٍ مِّنَ الْخَوفْ وَالْجُوعِ وَنَقْصٍ مِّنَ الأَمَوَالِ وَالأنفُسِ وَالثَّمَرَاتِ وَبَشِّرِ الصَّابِرِينَ . الَّذِينَ إِذَاأَصَابَتْهُم مُّصِيبَةٌ قَالُواْ إِنَّا لِلّهِ وَإِنَّـا إِلَيْهِ رَاجِعونَ . أُولَـئِكَ عَلَيْهِمْ صَلَوَاتٌ مِّن رَّبِّهِمْ وَرَحْمَةٌ وَأُولَـئِكَ هُمُ الْمُهْتَدُونَ " [البقرة 157:155]



• " وَأُفَوِّضُ أَمْرِي إِلَى اللَّهِ إِنَّ اللَّهَ بَصِيرٌ بِالْعِبَادِ . فَوَقَاهُ اللَّهُ سَيِّئَاتِ مَا مَكَرُوا وَحَاقَ بِآلِ فِرْعَوْنَ سُوءُ الْعَذَابِ " غافر 44].



• " الَّذِينَ قَالَ لَهُمُ النَّاسُ إِنَّ النَّاسَ قَدْجَمَعُواْ لَكُمْ فَاخْشَوْهُمْ فَزَادَهُمْ إِيمَاناً وَقَالُواْ حَسْبُنَا اللّهُ وَنِعْمَ الْوَكِيلُ . فَانقَلَبُواْ بِنِعْمَةٍ مِّنَ اللّهِ وَفَضْلٍ لَّمْ يَمْسَسْهُمْ سُوءٌ وَاتَّبَعُواْ رِضْوَانَ اللّهِ وَاللّهُ ذُو فَضْلٍ عَظِيمٍ " [آل عمران ******."



"وَذَا النُّونِ إِذ ذَّهَبَ مُغَاضِبًا فَظَنَّ أَن لَّن نَّقْدِرَ عَلَيْهِ فَنَادَى فِي الظُّلُمَاتِ أَن لَّا إِلَهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ . فَاسْتَجَبْنَا لَهُ وَنَجَّيْنَاهُ مِنَ الْغَمِّ وَكَذَلِكَ نُنجِي الْمُؤْمِنِينَ " الأنبياء 88



• " وَأَيُّوبَ إِذْ نَادَى رَبَّهُ أَنِّي مَسَّنِيَ الضُّرُّوَأَنتَ أَرْحَمُ الرَّاحِمِينَ . فَاسْتَجَبْنَا لَهُ فَكَشَفْنَا مَا بِهِ مِن ضُرٍّ وَآتَيْنَاهُ أَهْلَهُ وَمِثْلَهُم مَّعَهُمْ رَحْمَةً مِّنْ عِندِنَاوَذِكْرَى لِلْعَابِدِينَ " الأنبياء 83.








العسر يتبعه اليسر



عسى ما ترى ألا يدوم وإن ترى ‍
عسى فرج يأتي به الله إنه ‍
إذا لاح عسر فارتج اليسر إنه ‍





له فرجا مما ألح به الدهر
له كل يوم في خليقته أمر
قضى الله أن العسر يتبعه اليسر







دعوة ذي النون
دعوة ذي النون إذ دعا بها وهو في بطن الحوت : لا إله إلا أنت ،سبحانك إني كنت من الظالمين لم يدع بها رجل مسلم في شيء قط ، إلا استجاب الله له.




اللهم اغفر لي ولوالدي وللمؤمنين والمؤمنات اللهم اغفر للمؤمنين والمؤمنات



اسأل الله يفرج همك ويكشف ضرك

 

[المسكينه999]

عطر ابوي وماريا تسلمون على ردودكم والله يجزاكم خير بس بغيت منكم خدمه صغيره ابي ادعيه اتم مستمره عليها عشان ماانظلم مره ثانيه ولو اني مافتكيت من هالمشكله

 

[قمر بلامنازع]

الله ينصرك يارب ويقويكي عليهم .. ويبان الحق .. ياقلبي امناا عائشه رضي الله عنهاا اتهمت في عهد الرسول .. وربي برائهااا .. اقرائي حادثتهااا وتعلمي منهااا ..

​