بغيت شور كل وحدة في المنتدى بليز

[فديت دار الحي]

بسم الله الرحمن الرحيم
انا اعرف ان مالي غنى عن هالمنتدى و من سنة تقريبا كنت اطالع المواضيع بس اتعايز اسجل و اشارك بس هالمرة صدق صدق اضطريت اني اسجل و اشارك عشان تحلولي مشكلتي خواتي انا اليوم في حيرة فبلييز اللي تدخل على الاقل تبدي رايها و تطلع عشان انا صدق صدق محتارة و ابي اقتنع
زوجي مديون ب 500 الف درهم ديون السيارة و الزواج و البيت و ما يصفى له نهاية الشهر غير 1200 درهم
و هو الحين وااايد متوهق يبا يدرس و ماعنده مصاريف الدراسة ..
انا عندي باجي من بيزات المهر شوركم اساعده و له عقب بيتعود اني باجر لو داوت عادي يطلب مني؟؟؟؟؟؟
بلييييييييز اشاوركم :tears:

 

[حور السلطنة]

انا من رايي تشوفي انتي بنفسج اذا تعطيه او لا لانج انتي اللي تعرفي اذا يستاهل او لا
اذا تشوفي انه مش طماع وعمل لج الكثير ومحتاج فعلا للفلوس حتى يقدر يعيشج مثل ما انتي تبين

الله يساعدكم

 

[أنثى حالمهـ]

والله مقدر اقولك شي حتى انا محتاره معك

بس اتوقع لوتعطينه بيتعود على كذا

 

[فديت دار الحي]

شكرا حور السلطنة و انثى حالمة عالردود
والله انا واااااااااايد محتارة

 

[سلامي26]

السلام عليكم

أأيد شور أختي حور إذا يستاهل هذا ريلج وأنتي وهو واحد بس يمكن تقدرين تعطينه نص الفلوس اللي عندج وأعتقد بدراسته هذا بيترقى فدوامه وبتعوضون الفلوس ... وصدقيني بتكبرين في عينه وايد ..
والسموحة

 

[روح تائهه]

رد

على حسب طبيعة زوجك


بعض الرجال يزيد طمعه وشجعه ولايعترف بفضل زوجته

والبعض الاخر عكسه

والرجال يدبر نفسه ماله داعي تفتحي لنفسك باب مايتسكر اذا كان زوجك من الرجال الطماعين

 

[نجد33]

والله لو يستاهل ممكن تساعدينه


وممكن تقتصدون شوي بالمشتريات

 

[تمر حنة]

حبيبتي هذا زوجك وانتي ادرئ فية ومن نظري انا ان الفلوس تروح وتجي وراح اعطية :c045:

 

[ام يزيد الحلو]

بالعكس ساعديه واحتسبي الاجر من الله بدون ماتمنين عليه ولا شيء
وانت بتشوفين ردة فعله ادا طلع اصيل الحمد لله وان طلع ندل لا عاد تكررينها

 

[أحلى رباط]

انا مثلج والله احترت وايد عقب ساعدت زوجي و صدق طلع يتعود انه كل ما يحتاج فلوس ايي يطلب مني على شكل سلفية و انا اضطر اني اعطيه و استحي عقب اخذهن

 

[امل رحيل]

الزوجة الاصيلة ما تتاخر عن زوجها في الشدة

اذا ما ساعدتيه من بتساعدي؟

 

[امل رحيل]

مو ضروري يحصلك مثل الاخت لي ردت

انتي انويها لله ..

هل الفلوس اغلى عندك منه؟

 

[najla11]

الله يكون في عونكم يارب العالمين

 

[العنود 19]

بالعكس اعطيه هو مو مايشتغل بس يبي منك
لا هو مديون وحالته صعيه
اذا انتي عندك وماوقفتي معه اجل منو بيوقف معه
لاتترددين اعطيه بس اذا حسيتي حالته تحسنت لاتعطينه

 

[فديت دار الحي]

مشكووووووووووووووووووووووووووووورات كل من ساعدني في حلوله والله انكن بنات اصيلات رديتن علي بكل صراحة اللي ايدت و اللي رفضت
و الحمدلله الحين انا اقتنعت اني بعطيه و بساعده
و انا واثقة فيه هو مب من النووع اللي ماستحي يعتمد على فلوس حرمته
شكرا خواتي
يزاكن الله الف خير

 

[مدري شسوي]

بعض الرجال لاحمداً ولا شكورا وبعضهم يشيل لك الجميل وانت شوفي زوجك من اي نوع
بس انا اشوف الرجال نكارين للجميل اختي معلمة وتعطي زوجها ويشوفها مقصرة بعد

 

[كاتياباسل]

والله ياقلبي أنتي قبل وبعد كل شي أكثر وحده تعرفيه وتقدري هل هو أنسان ماشي معاك تمام وأخلاقه معك وتعامله زين وقبل كل شي يخاف ربه
وبعدين ترى هذا زوجك ومن حقه عليك (أذا كان بالمواصفات السابقة )
أنك تساعديه وبالعكس هذا الشي يمكن تؤجري عليه لأن فيه حديث للرسول فيما معناه أن الله في عون العبد ماكان العبد في عون أخيه
فمابالك بالزوج اللي لو أمر الرسول أحد أن يسجد لأحد أمرنا أن نسجد له
وأنتي توكلي على ربك والله يعلم بالنيات وأسألي ربك وأدعيه أنو يجعل زوجك عند حسن ظنك
بس لاتفوتي الأجر ومثل ماقلتي أنه بحاله صعبه والمديون سبحان الله مايحس بطعم الراحة وتكوني سبب بعد الله في سعادته وسعادتكم معا وقال عليه السلام (من فرج عن مسلم كربة من كرب الدنيا فرج الله عنها كربه من كرب يوم القيامة) بغض النظر أذا كان هذا الشخص يستاهل أومايستاهل ولعله أن شاء الله يستاهل
والله أرجوا أن يفرج هم زوجك ويريك الحق حقا ويرزقك أتباعه وآسفه للأطالة
************************************

ودمتي بود

 

[روزينا]

فعلا"حبيبتي اذا كان يستاهل وهذا من معاملتة معك عطيه روحك لو تقدرين
لأن الدنيا ماتسوى لحظة ضيق اشوفها بعينه...

 

[moon sonnet]

اول شي شوفي يستاهل او لا ..

لا تصيرين عبيطه زيي .. .. وتضيع فلوسك على واحد نذل ..


اذا معدنه ذهب.. عطيه روحك لو يبغى




موفقه

 

[Miss Purple]

أنا أجوف أنه رياااااال و المراة وااااااااااااحد أذا أزوجوووا


أنا لما كان ريلي في محنة أظطريت أبيع كل ذهبي عشاانه



وبعدها الله فرجها علينا



والحمد لله على كل حال