بخصوص موضوعي عن ريل رفيجتي

[كسرني]

السلام عليكم ورحمه الله وبركاته ..

خواتي .. رديت لكم وانا بحاجتكم اكثر عن قبل .. من بعد الله سبحانه وتعالى ..
فيني غيض وضيج وكدر محد يعلم فيه غير ربي عسى ربي يلطف بحالي ..

اللي دخلو من قبل على موضوعي ..
يوم تكلمت وقلت لكم كيف ان زوج ربيعتي تم وراي لين كلمته
وانا ما اعرف انه زوجها .. وبعدها يوم اكتشفت انه ريلها حاولت ابعد
ومن عقب ما هي درت واتصلت علي وسبتني وهزأتني ..

بنات والله العظيم اني تبت لربي توبه نصوح ..
ورديت اعيش حياتي طبيعي من بعد الموضوع .. وأحمد ربي واشكره على هالشي ..
ورب العباد يسامح .. كيف عباده ما يسامحو .. وهم مجرد عباد.؟

المهم للي قرى موضوعي القبلي ..
بغيت مشورتكم ..

من كم يوم وصلني اتصال الصبح ..
وانا ارد بحكم اني اتريا الوظيفه ..
واني مع تواصل مع المكان اللي بتوظف فيه .. واتريا اتصالهم بين الفتره والثانيه بسبب التدريب ..
المهم انه وصلني اتصال ورديت ..
والصدمه الكبيره انه طلع اهو متصل ..
كان يصيح ويصارخ علي ..
قلت له انت شو تبا خلني فحالي وعيش حياتك ويا اهلك ..
مايكفي انك دمرتني ..
مايكفي الجذب اللي جذبته علي ..
يقولي انا ماسويت شي وانتي اللي بعتيني ..
شو انا اللي بعته .؟ بعد كل اللي صار ويقولي انا اللي بعته ..

قلت له انا ماريد شي بس اباك تروح وتخليني فحالي ..
والله العظيم اني انهرت ..

من قبل قلت لكم شكله دخل من دوامه على السستم وطلع كل المعلومات عني ..
قالي تبين صورج .؟ انا برى عند بيتكم ..
تعالي بسلم لج التلفونات وامسحي كل اللي فيه ..
هنيه تخبلت اكثر .. كنت احسبه مسح كل شي ..
قلت له طلعه مب طالعه .. واذا انت قد كلامك جان مسحت اللي عندك .. بس شكلك تبا تذلني ..
قلت له لو عند كلمتك .. خل كل التلفون تحت سيارتي وانا بشله بعدين ..
بس مارضى .. قالي تبي صورج اطلعي .. ابا اشوفج ..
هنيه عصبت وقمت اصارخ عليه .. قلت له انت شوه .؟ انت ماتحس ..
انا بعدني مب قويه عين علشان اطلع معاك .. ولا بعد اطلع معاك من جدام بيت اهلي ..
قالي اوك يعني ما بتطلعين .. خلاص عيل انا رايح .. وانتي تراج اللي جبرتيني ع اللي بسويه ..
يابنات والله العظيم اني اصيح .. وتعبانه هذا شو يبا ..

يكلمني ويصارخ علي ..
ولا بعد قلت له مخطوبه وبتزوج .. ويحلف انه يجتل خطيبي ..
يقولي خبريني من يكون وولد امنوه والله ما اخليه ياخذج ..
انا احبج واموت فيج ومابخليج لغيري ياخذج عني ..حسبي الله ونعم الوكيل فيه ..

ويوم ارد عليه شوي يغني وشوي يصارخ علي .. حسيت جني يالسه اكلم واحد مينون ..
قلت له علشان خاطر ولدك ولي يرحم ووالديك ابعد وخلني فحالي ..
يقولي يعل ولدي الموت .. ويعل اهلي كلهم يحترقو انا اباج انتي ..

ومستعد اني اروح اطلقها .. يقصد زوجته ..
وقام يسبها بكلام انا بروحي ما اقدر اقوله ..

والله العظيم اني تعبت ..
من اسمع القرآن او احاول اني انام اتم اصيح ..
لا اقدر انام ولا اقدر اكل ولا حتى اقدر اضحك او ابتسم ..

صرت اشك انه مينون ويبي يدمرني ..
يا اكون له .. او انه يدمرني ..

ولا شو معناة انه للحين صووري والمسجات عنده ..
شو المعنى من هذا كله ..

حسبي الله ونعم الوكيل ..

يالله يارب انا تبت وبديت حياه يديده .. ماهمي فيها الا رضى اهلي ..
وبعدها هالمصيبه مب راضيه تخليني ..

ما اقدر ارمس حد عن الموضوع .. ولا اعرف شسوي ..