تونكل
New member
- إنضم
- 31 يناير 2008
- المشاركات
- 132
ترددت بالكتابه كثير مادري وين أكتب موضوعي بأي قسم..ولا لقيت مكان ثاني أنسب
أعذروني واتمني ماينقل الموضوع ولا يحذف يامشرفات الله يوفقكم
مابي اطول عليكم وبقول الي عندي بكل صدق..وأرجوكم أسمعوني وسااااعدوني ياخواتي:tears:
الحمد لله والشكر لله...انا مرتاحه بحياتي الزوجية والمركب ماشي تمام
لكن ( مشكلتي ) هي أخوي الله يهديه
بتكلم لكم عنه شوي ..انسان غريب بمعنى الكلمه لايحب أحد ولا يبي أحد يحبه
من يوم واحنا صغار وهو منعزل..بس كان له أصحاب ويمدحونه وايضا المدرسه كانوا يثنون عليه وبعد كان من الأوائل فيها.. وعلاقته بأمي عاديه
وسبحان الله كل سنه يكبر يزيد إنعزاله لدرجة انه لما وصل ثانيه ثنوي ترك الدراسه نهائيا وتعبت معه امي المسكينه حيل حيل وجلس السنه كلها وراحت عليه وعادها وكل هذا بعون من الله واهتمام الوالده..
ولا تسألوني عن والدي ماكان له أي دور بحياة هالولد ..ولا حتى بحياتنا كان محسوب علينا أب وهو وللأسف لايستحق أنه يكون كذلك..والله يعز علي أقول هالكلام عنه
أذكر واحنا صغار ابوي كان يقفل على نفسه وينام كل نهاية الأسبوع ثلاث أيام..ولمايقوم من السبات
ويجي يجلس معنا بالصاله كنا نفرح فيه حيــــــــل ولا أنسى هالفرحه كأنه كان مسافر ورجع
لكن للأسف...الفرحه ماتطول تنقلب حزن ونتمنى لو يرجع ينام ولا يصحى أبدا...
كان خشن بالتعامل ويشب المشاكل بين الاخوان ويخليهم يتعاركون على اتفه الأسباب..ويكرهم في بعضهم
مايرتاح لين يشوف عياله يبكون ويجلس يضحك عليهم ويقلدهم وهم يبكون ..بهالوقت أذكر أمي تقول (نوم الظالم عباده) وقتها ماكنت فاهمه كلامها...هذا غير تخليه عن كل مسؤليات الأب..من تربيه ونصح ودعم
بس يروح لشغله ويرجع منه...وكثر خيره
هذي نبذه عن الأبو..نرجع حق الولد وآه وألف آه
المهم دخل أخوي الجامعه وبدت مصاريفها وكثر خيرها أمي ماقصرت عنه بشي تعطيه مصروف البيت عشان يشتري الي يحتاج والي مايحتاج..وظروف أهلي متوسطه وكان أبوي يعطي أمي مبلغ محدد كل شهر وتصرف أمي الفلوس عالبيت وعلينا.. للاسف أمي كان عطائها ماله حد وضحت بحياتها وعاشت مع شخص ماتحبه شخص أناني عايش حق نفسه وبس ويعاملها أسوأمعامله ويناديها بأقبح الكلام وقدامنا ولاهمه ..عمري ماشفت أمي تشتري لنفسها شي تلبس من الي تعطيها أمها أو الي يجيها هديه قطعة قماش قبيحه وتفصلها وخلاص ...تحرم نفسها وتعطي عيالهاوالله قهرر..
وكان أخوي يوم عن يوم يزيد شبه بأبوه بكل شي...
مع العلم أن العلاقه بينهم ماكانت ذاك الزود لأن الوالد مايحب يقرب احد منه ولو كان اقرب قريب..
وتخرج من الجامعه وامي معه يوم بيوم..وبدال مايعطيها كانت هي الي تعطيه!
أشتغل في شركه بعد التخرج.. وكان لا يطاق بمكان عمله وعليه شكاوي كثييييره من الناس وفصلوه بعدكم شهر..وجلس لنا فالبيت.. يعامل أمي أسوأ معامله ويناديها بعجوز النار.. وأنها حيه من تحت تبن
وامي صابره عليه وتحبه..صدق بعض العيال أعداء..كله عشان الفلوس ويطلب مبالغ كبيره عالطالعه والنازله..هذا غير انه يصرح بكرهه لنا كلنا وبدون سبب...المهم هالإنسان أخلاقه يوم عن يوم تسوء
أكثر وأكثر..تخيلو أخاف ماتصدقوني..يقول مابي أشوف ولا واحد منكم بعيني ولا بالصدفه ولا يمر من جنبي أحد ولا يرفع عينه فيني..وإن حصل تقوم عليه القيامه من السب والشتم والتحقير والضرب والصراااااخ
وحتى أمي يشملها هالكلام..قال ليه يافرعون تفرعنت قالت مالقيت الي يردني!!
صرنا نخاااااااف منه خوف غير طبيعي ونبعد عنه عشان نرحم أنفسنا من الإهانه لأنه واحد بايعها
وأمي تخاف منه ودايما تقفل على نفسها من الخوف..حسبي الله ونعم الوكيل
الحمدلله اني ماعدت عايشه معهم لأني تزوجت واستقريت..حتى أني لما كنت عروس كان زوجي يتحايل علي عشان أروح وأنا أتعذر وأصرف من الخوف وصرت((أكره بيت أهلي كره شديد))
والمعاناة في تزايد مستمر..صار لي الحين خمس سنوات متزوجه..لما أروح هناك أكون على أعصابي ونفسيتي تتعب.. لان الجو مكهرب والكل خايف منه...طول الوقت محجوزين بغرفه وحده كلناا لبنات نجلس فيها..وممنوع الخروج الا الي بايع عمره ونفسه يطيح بيدين هالظالم.. وابوي كان ومازال بصرااااحه عاجبه الوضع حيـــــــــل ويقويه علينا زياده..ولما أمي تقول له كلمه حاول تهديه شوي شوف شنهو الي بخاطره ..يقولها أسكتي والا ناديته يأدبك الحين!! وهذا قطره من بحر..وغير نقل الكلام الكاذب له وشحن قلبه علينا بالحقد والغل.. أمي انسانه طيبه جدا ومسكينه لكنها ذكيه..وماذبحها إلا حبها لعيالها...
تدرون ياخواتي...أن اخوي هذا ماحضر زواجي ولا زواج اختي ولا سمعنا منه ولاكلمة مبروك بالعكس
كان يستهزئ بأزواجنا والكل طايح من عينه..وهوالي كامل مكمل أعوذ بالله منه قمة الغرور وعالفاضي
عشنا فتره..حاول يمنعنا انا واختي من اننا نجي لبيت أهلي نشوف أمي .. وصرنا نجي بالخش والدس
بس بالأوقات الي مايكون موجود.. كلمت امي أخوها وكلمه بالجوال وحاول معه وغير رايه بعد ماعطاه حق هالموافقه..صدق مايستحي..بعدها صاريطلب فلوس من الكل بدون حياء ..وهو رجال وقادر على العمل!!!
أمي المسكينه مابقى أحد ماتسلفت منه حتى الخدامات خذت منهم عشان تعطيه..ولو ماعطته يقلب البيت جحيم ويكسر الأبواب على روسهم..والله ظلم ..
لا تفكرونه مدمن أويشرب.. مستحيل لأن الفلوس الي ياخذها كلها يحرقها بالمطاعم والطلبات منهاعيني عينك
وايضا اشتراكات النت..والي قاهرني أنه نحيف جدا مادري وين يودي هالأكل..اتوقع عنده مرض فقد الشهيه العصبي ..الي ياكلون كثير بعدين يستفرغونه إرادياً..والله أعلم به..وطلعاته من البيت قليله
ولا عنده أصدقاء..والله اني محتاره وتعبانه مووووت
شخص مابقلبه رحمه..
لما يسافر زوجي ولو ان سفراته نادره..أكون مثل الي محكوم عليه بالموت ولا يطوله..
أجلس بين اربع جدران ونتكلم باصوات هاديه عشانه حتى الباب يتسكر بشويش عشان ماينزل ويكسره عاى روسنا..أختي الصغير جتها حاله نفسيه..إذاسمعت صوته يقلب لونها أزرق واطرافها تتصلب..
والله حرام وظلم..
أمي تبكي كل ليله من حرتها والسكر مرتفع عندها من الضغط الي تعانيه يوميا منه
صارت تترجاني وتقول لاتجين أجلسي فبيتك ..تقول والله اني مشتاقه لك ولعيالك بس انت ادرى بالظروف
وبصراحه عيالي مايساعدون ابد عندي ولدين ومزعجين الله يهديهم الكبير..عمره أربع سنوات
أختم لكم بموقف زي الزفت أعذروني..
مره كنت جايه لأهلي وكنت متصله قبل أستأذن..قالت امي تعالي الحين هو طالع
وقدر ربي وتأخرت شويه بالبيت..أول ماوقفت سيارتنا عند الباب ..كان توه بيفتح الباب وكان معه كيس زباله أعزكم الله ورجع يسكر الباب مره ثانيه(نسيت أقول أنه مايسلم على أحد حتى رجال خواته كانه مايعرفهم)المهم نزلت وفتحت الباب وهو وراه...والله اني أرجف واحس بالدم يرتفع لراسي..
سلمت عليه مارد علي قلت لولدي سلم على خالك وسلم عليه بيده..تخيلو قال من هذا الي انت راكبه معه؟؟
بغيت انجن قلت فلان..فلان..وقفت شوي من الروعه وابغى ولدي يمشي معي بس شي ومتعوده عليه...
قال وش تبغين ليه واقفه.. ومباشره مشيت بسرعه وهو ماسك يد الولد..التفت مره ثانيه وأشوفه حاط كيس الزباله القذر على راس ولدي بغيت أموت وشفته يضحك..ولما شافني جلس يصااااااارخ سمعوه الحاره كلهاااااا يقول ليه تطالعين خايفه عليه مني!!والولد يقول ابعد عني ..ماترك كلمه وسخه بالدنيا إلا قالها لي
دخلت عندامي اركض خايفه وهو يلحقني يقول تعال ياواطيه..ودخل الوالد بالسالفه وكمل الناقص وجلس يردد كلامه علي مره ثانيه..يقول ايه صح كلامك ياولدي هي ماتبغاك تلمس ولدها ويشب علينا زياده...
كانت ليله غيييييير..انتظرنا لحد ما طلع حرته وكسر بالأبواب وخرب بالبيت وتكلم على أمي كلام يروع
ماودي أقوله..بعدين هربت مع أخوي الصغير بسيارة أجره ورجعت لبيتي طبعا بدون أذن زوجي وصارت لي سالفه طويييييله معه بس الحمد لله انحلت..
سامحوني عالإطاله. وعلى الأسلوب المتواضع ماعرف ارتب الكلام مثلكم ياأميرات.. بس نفسي ارتاااح
الي عندها حل لهالمشكله أو دعوه لاتبخل علي فيها
ولا أسمح بنقل القصه لأي منتدى مابي أحد يعرفني الله يوفقكم(من حلات القصه)
أشكركم على قرأتكم وعلى صبركم علي
قبل لا أنسى أنا ماأدخل النت كثير..ولاأستغني عن ردودكم
