انا المسؤلة عن حياتي

[أنثى بعطر الورد]

أنا_المسئولة ،،،

عمرك واجهتي نفسك بالحقيقة دي

إنك انتي المسئولة عن حياتك ، مش أي حد تاني

إنتي المسئولة عن إختياراتك وقراراتك وأفكارك ومشاعرك اللي انتي حاسة بيها دلوقتي.

كلنا عندنا ظروف خاصة وبتحصل في حياتنا أحداث كتيرة جدا ، واحنا اللي بنختار هيكون رد فعلنا فيها إيه
وهنتعامل معاها إزاي

هنواجه ظروفنا ونتحداها ومانسيبهاش تكسرنا

واحنا مؤمنين إن تغير حياتنا للأفضل مسئوليتنا .

ولا هنستسلم ونعيش دور الضحية ، دور المغلوب على أمره اللي مفيش في إيده حل.

معظمنا اتربى على لعب دور الضحية لأنه سهل ومش بيكلفنا أي مجهود وكمان بيكسبنا تعاطف اللي حوالينا .

دايما بنلوم على غيرنا ، لازم يكون في شماعة نعلق عليها
تقصيرنا واستسلامنا للواقع اللي بنعيشه.

عايشين دور المفعول به دايما ، ومش قادرين اننا ناخد خطوة علشان نكون الفاعل في حياتنا.

الظروف اللي بيمر بها كتير مننا غالبا بتكون فعلا صعبة ، ومش هيقدر يغيرها الا لو عرف إنه مسئول .

وقرر يغير ردة فعله ناحيتها

قرر يغير تفكيره ، يغير تصرفاته ، يغير طريقته في التعامل مع الظروف اللي بيمر بيها

قرر ياخد قرارات مختلفة تساعده .

الاستسلام للظروف هيخليكي عايشة حياتك زي الدمية اللي بتتحركي يمين وشمال من غير مايكون لكي أي إرادة في التحكم في حياتك.

لازم نوقف اللوم على الظروف ، ونبدأ نتحمل مسئولية نفسنا واختياراتنا

_اول حاجة علشان تكوني مسئولة عن حياتك ، لازم تغيري طريقة تفكيرك وتعاملك مع الظروف اللي بتمري بيها.

_لازم تعرفي انتي ايه الحاجات اللي مقصرة فيها ، ايه هي نقاط ضعفك ، وإيه هي المشكلات اللي بتواجهك

بيتي ههتم به أفضل
صحتي ههتم بها
وقتي هنظمه
هبطل عناد
هتكلم بصوت واطي
هدور على مصدر دخل

_إيه هي الحاجات اللي المفروض ردود أفعالك فيها تتغير

فلان مش هسمح له بااستغلالي

فلان مش هسمح له إنه يهيني

فلان هعامله بشكل أفضل

_إسألي نفسك إيه الحاجات اللي دايما بغلط فيها ومحتاجة أصلحها في حياتي وابدئي في اصلاحها بالتدريج.

علاقاتي مع صاحباتي أو مع زوجك واولادك مثلا

وإيه الحاجات اللي محتاجة تعمليها أفضل وبإتقان

وابدئي خدي قرارات بسيطة ناحية التغيير للأفضل

اعملي لنفسك اهداف صغيرة وحطي خطة علشان تقدري تحققيها وحطي دايما امام عينيكي هدف كبير .

هدف التغيير للافضل

استعيني بالله ولا تعجزي

ساعدي نفسك بنفسك

قولي دايما

انا_مسئولة_عن_حياتي