اهم قاعدة في البيزنس :المكسب خط أحمر
.

انت فاتح مشروع هدفه المكسب مش البيع ولا مجرد التواجد

عمال تعمل خصومات وتخفيضات عشان تبيع وتكمل وتفضل متواجد
الركود هيجننك فبتضحي بمكسبك
.
السؤال : لحد إمتى هتفضل تضحي بمكسبك ؟
.
ارقام البيع بتعلى وبتزيد = طظ
بتكسب ؟
مكسب واضح ؟
يغطي المصاريف والاهلاك والضرايب ويتبقى لك مكسب يتناسب مع مجهودك وتعبك وحرقة دمك وقلقك وتوترك والضغوط الرهيبة اللي بتعيشها ؟

من كام شهر واحد تاجر كبير ( هيقرا المنشور ده ) وعنده فروع كتير كان عامل خصومات انا عارف انها تخسره
سألته انت بتخسر ليه : قال لي عشان عاوز سيولة
قولت له : بتحل مشكلة السيولة بحل انتحاري
انت بتهرب لقدام
بتحل مشكلة بكارثة
يا ابني المكسب خط أحمر

انت فاتح مشروع هدفه المكسب
مش هدفه البيع
البيع وسيلة للمكسب

حليت مشكلة السيولة ؟

بقالك اد ايه بتحل مشكلة السيولة بالتضحية بربحك؟

ماعنديش مانع انك تعمل كده احيانا وعلى فترات متباعدة وبحسابات دقيقة وبعد ما تكون استنفذت كل الطرق

انما طول عمر المشروع وهو مضطر يتنازل عن ربحه أو يقبل بأرباح تافهة ، دا موت بالبطيء وحاجة تمرض

قريبا من هذا الموضوع هناك موضوع آخر = النجاح الباهت
.
النجاح الباهت أسوأ في رأيي من الفشل

الفشل واضح والقرار فيه محسوم
والنجاح الباهر واضح ومافيش فيه خلاف

انما النجاح الباهت دا حاجة تجيب المرض

مشروع بيخسر خسارة ضعيفة او يكسب مكسب ضعيف

عامل زي واحد متجوز واحدة وشاكك في اخلاقها
لا هو عرف انها خاينة فيخلص منها ولا هو متاكد انها بتصونه فيرتاح
عايش معاها في جحيم الشك


ا/خالد الشافعي