المشكلة من وجهة نظرها ...ومن وجهة نظره

[راجيه الرضا]

#استشارة_اليوم
هي: مشكلتي الكبيرة اللي فجرت كل المشاكل هي "أهله"..
كنت باصطدم بيهم بسبب كلامهم الجاف معايا وبواجهم دايماً بأني رافضه كلامهم وده كان غلط وده اللي وصلنا لمرحلة أنه قالي"دول أهلي فيعملوا اللي يعملوه ماتشتكيش خالص"!!..

?هو طبعه جامد جداً و بيغير عليا جداً يعني مثلاً لو أخويا دخل عليا بشورت وأنا عند أهلي يزعل جامد ويعمل مشكلة..
في المقابل أخوه قعد معايا 5 شهور في البيت وكان بيبقى متواجد طول الوقت معايا في البيت وجوزي بيبقى في شغله عادي.
?مرة ابن عمي كان في القاهرة وحب يعدي يسلم عليا وعليه فقامت الدنيا وما قعدتش، واتعصب واتصل بعمي أبو الولد نفسه وكلمه وحش و أهانه وبهدلة وزعيق قدام الناس.
كم التناقض ده مضايقني منه ومخليني مش فاهماه..

?حصل صدام أيام الخطوبة.. وغلط في بابا.. هو لما بيتعصب مش بيشوف مين قدامه..
أهله بيجوا لنا زيارات كتير ومرة اختلفنا وهو ضربني قدامهم وأنا مش قادرة أنسى الواقعة دي..

?الغريبة كمان أنه دايماً عايز يعرف كل التفاصيل عن أهلي ولو قلت مفيش حاجة يقولي أنتِ بتداري علي ليه؟!..
وفي المقابل أنا معرفش حاجة عن أهله وبيعتبروني براهم..

قلتله: أنا حاسة إني عايشة مهانة وكأني مواطن درجة تانية في حياتك، مردش علي و لا حتى طيب خاطري بكلمتين عشان الأمور تهدا بيننا..

?اقترح علي نطلع عمره وفعلاً طلعنا وحصل موقف مش هانساه أبداً واحنا هناك في مكة قالي: "عايزك تطلعي اللي في قلبك"..
كنت غبية وصارحته باللي في قلبي وقلت له :
"ماينفعش تفضل في صف واحد طول الوقت مع أهلك"
قام زعق جامد جداً وقالي :"دول أهلي وأهلي على راسي"..

?باهرب من اللي أنا فيه كل شوية وباروح أزور أمي في محافظة تانية ولما بروح عندها ينكد علي وعايز يعرف أنا اتنفست امتى ومع مين!!..
أهله معتبرين أن بيتنا بيته لوحده وأنا ضيفة فيه..
?مرة كان أهله بيزورونا وقالي هانام معاهم برة واعمل اننا متخانقين عشان أرضيهم..
و مرة في أول الجواز كنت بادلعه واكله واحنا عند أهله قام زعق لي وقالي :"باقولك ايه أمي بتغير عليا" ماتجيش جنبي ومتأكلنيش وما تقربليش،
قلت له: "أنا مراتك.. "
قالي: "أنتِ مجنونة أنتِ بتقارني نفسك بأمي!!"

?بيقول لبابا :"هي عايزة تقطعني عن أهلي" وبيقولي أنتِ بتقلبي وشك في وشهم وبتعاملي أهلي وحش..
محتاجة اهدى من ناحيته.. زمان كنت بحبه لكن دلوقتي مش بحبه ومش بكرهه..

هو: مشكلتي معاها موقفها من أهلي..
أهلي بيبجوا لي من محافظة تانية وكل ما ييجوا تعمل لي مشاكل مرة تقولي عن حد من إخواتي"ده بيكلمني بقرف" و"ده فتح التلاجة من غير ما يستأذني".. إلخ
مرة مديت ايدي عليها قدام أهلي وده عمل لها شرخ نفسي كبير في علاقتنا... لكن هي وقتها عصبتني..

?الموقف إن عندي أهلي وماشيين الصبح الساعة 10 صباحا ًوهي أصرت تتكلم في مشكلة ضغطت علي لغاية مانرفزتني ومديت إيدي عليها..
مشاكلها مع أهلي عبار عن تفاهات ستات بالنسبة لي، وأنا دايما ًرد فعل لها.

?رحنا عمرة وفي أخر يوم في العمرة قالت لي : "عايزة أكلمك في موضوع أهلك" فاتنرفزت، قلت لها: "إيه اللي يخليكِ واحنا هنا لوحدنا تجيبي سيرة أهلي"!

?من المشاكل اللي بتعصبني منها أنها ممكن تعمل لاهلي أكل وماتاكلش معاهم وبعدها بنص ساعة تطلب أكل من برة..

?والدتي بتزورني مره كل 6 شهور، ممكن أمي تبقى قاعدة معايا تقوم هي شايلة الأوضة اللي قاعدين فيها وتنضفها عشان تضايقنا!!..
كل ما ييجوا أهلي عندي تفتعل مشكلة تعكنن علينا..

التعليق والرد:
عايزة أقول للزوج أن حب الأهل وبرّهم لازم يكون محترم من الطرفين مش لإثارة غيرة زوجتك منهم..
من مصلحتك عشان تعيش في سلام في بيتك إنك تكون بتقدّر زوجتك زي ما بتقدّر أهلك..
الزوجة لما تحس أنها مواطن درجة تانية، طبيعي تحس بالإهانة وتكره أهلك وكمان رصيدك عندها هيقل مهما حاولت تراضيها في حاجات تانية.
الأهل على العين والراس بس كمان الزوجة بنفس القدر..

من العبارات المرفوضة تماما أنك تقولها:
"أنتِ مجنونة، إزاي بتقارني بين مامتي وبينك"
وافتكر أنك متكيلش بمكيالين زي ما عملت في موقف أخوك،
(الحمو الموت) مقصود بها أي قرابة من أي طرف من الأطراف..

أما الزوجة أقولها:
مينفعش عشان أنتِ غضبانة من زوجك تطلعي غضبك ده على مامته في تصرفاتك يعني مينفعش غضبك يبقى ذريعة لعكننة الزوج وأمه..
اطلبي الاهتمام والتقدير من الزوج لكن من غير شكوى من أهله، وأكرمي أهله وقت وجودهم عندك..

لو هاجمتي الأهل هيتحولوا في نظر زوجك لضحية لازم يحميها منك ومش هتستفيدي حاجة خالص.. بالعكس..

مفيش مشكلة إنك تطلبي منه لنفسك حاجة بتحبيها أو فعل بتحبيه بس متقولوش "عاملني زي أهلك" قولي "بحب قوي لما بتعمل لي كذا"...



د.هويدا الدمرداش