المرض ارض خصبة للوساوس

[راجيه الرضا]

#إعادة_نشر
نظرا لعودة الإصابات بفيروس كورونا

المرض أرض خصبة للوساوس ...
نفسية المريض عاملة زي مركب صغير في بحر عالي ، أمواجه بتخبط فيها من كل ناحية ...
خوف من الموت ...
خوف على اللي هيسيبهم من بعده ..
خوف من احتياج مادي أو معنوي فترة المرض ...
خوف من العجز والضعف ...
كل الأفكار السلبية ممكن تصطف أدام عينيه في وقت واحد ..

القرءان وصف استغلال الشيطان للتأثير السلبي على نفسية المريض في قصة سيدنا أيوب عليه السلام " وَاذْكُرْ عَبْدَنَا أَيُّوبَ إِذْ نَادَىٰ رَبَّهُ أَنِّي مَسَّنِيَ الشَّيْطَانُ بِنُصْبٍ وَعَذَابٍ"

علشان كدة ماتستغربش لما تلاقي أحاديث عيادة المريض بمعاني عالية جدا وجزاءها يبدو للي يسمعها أنه أعلى من المتصور
زي حديث رسول الله صلى الله عليه وسلم " مَا مِنْ مُسْلِمٍ يَعُودُ مُسْلِمًا غُدْوَةً إِلَّا صَلَّى عَلَيْهِ سَبْعُونَ أَلْفَ مَلَكٍ حَتَّى يُمْسِيَ، وَإِنْ عَادَهُ عَشِيَّةً إِلَّا صَلَّى عَلَيْهِ سَبْعُونَ أَلْفَ مَلَكٍ حَتَّى يُصْبِحَ وَكَانَ لَهُ خَرِيفٌ فِي الْجَنَّةِ
سبعين ألف ملك يصلو عليه علشان مشوار ؟
أيوه ...
لأن نفسية المريض المسلم عند ربنا تساوي إنه يصلى على اللي يعوده ويطيب بخاطره سبعين ألف ملك
هي قيمة المسلم عند ربنا لما يكون مريض بتكون عالية كدة
طيب ..مفيش فرصة للزيارات ؟
يبقي الكلمة الطيبة من بعيد ،
برسالة أو مكالمة أو توصلهاله بأي صورة تناسبك ..
لو مفيش فرصة لكلمة طيبة تتقال ؟
يبقى على الأقل مايسمعش كلام سلبي يأثر بزيادة على حالته النفسية المضطربة
العلاقة بين الحالة النفسية والحالة العضوية ثابتة بالأدلة العلمية
وفي كتب ومؤلفات اتكتبت في تأثير النفسية على المرض العضوي بالإيجاب وبالسلب
يعني مناعة الجسم بتزيد لما الإنسان يكون سعيد ومرتاح نفسيا ولما مناعته تزيد حالته الجسدية والعضوية تتحسن ،والألم يختفي !!
والعكس صحيح ... المناعة بتقل بالحزن والهم والأخبار السيئة ، و ممكن يحس بالألم ويشتكي من أعضاء بعينها في جسمه لو ساءت حالته النفسية لأي سبب ..

الخلاصة :
موقفك الإنساني تجاه أخوك حال مرضه هيترتب عليه حاجة من اتنين :
لو ربنا قدر شفاءه ..هتكون ذكرى جميلة بينكم مش هينساها لك بعد الشفاء
ولو ربنا قدر له انقضاء أجله هتكون راضي عن نفسك إنك ماقصرتش في حقه وبرضو هتكون ذكرى جميلة بينكم تجمعكم في الجنة على سرر متقابلين .
دمتم وجميع المسلمين في خير وعافية .


د.ولاء