الله يسعدها ويرزقها الذريه الصالحه اللي ترد علي , هل انا غلطانه ولا زوجي ,

[مزgggن آلشـرق]

السلام عليكم ورحمة الله وبركاته يالغاليات

بختصر لكم السالفه لأن راسي وربي يبي ينفجر من التفكير

طلعت انا وصديقتي لسوق , واخذنا وقتنا بماء فيه الكفايه , ودق زوجي علي قال خلصتي , قلت ايوه تعال خالصه

جاء بالطريق , ونص مسافة الطريق , دقيت عليه وقلت له راح اوصل صديقتي , لأن السواق بيتأخر عليها والسوق بيسكر , وربي ماقصر قال خلاص خليكم جاهزين انا قريب

لما ركبت السياره , قعدت اضحكـ ع صديقتي قالت بقول السلام وماراح اسلم ع زوجك ع انها متزوجه

قلت لها اوصفي لنا الطريق , وتوصف ليه يعني انا قدام وهي خلفي , وتقرب من المرتبه وتكلمني

انا اضحك ع حركتها , وكانت تسوي لي حركات وزوجي مايشوفها , كانت تدخل يدها وتقبصني وتضربني , وغصب عني اضحك

لما نزلنها قاعد يتكلم علي ليه الضحك عيب كذا , والله عيب عليكـ

كنك مع سواق تضحكين

قلت يعني مع السواق عادي اضحك , ومعك انت ممنوع , صرت امون ع السواق اكثر منكـ

قال لا , لكن احترميني اني رجال انت وضحكك الزايد

خلي لي احترام وتقدير

بنات تكفون احس ماسويت شيء غلط

وغير كذا زاد الطين بله , جاء من الدوام وانا بالمقلط مقابلتله وتعداني وراح لغرفته ونام

بالعاده يمر علي يسلم كني شغاله اليوم عنده

بنات تكفون قولولي انا غلطانه ولا الموضوع مايستهال

 

[بقايا فتاه]

والله يالغاليه لو أنا ركبت مع زوجي ومعه أخته وجلسوا يضحكون كذا

لاطق وامووووووووووووت قهر خخخخخخخخخخخ

هو صراحه معاه حقو وأنا انصحك تعتذرين منه بطريقه غير مباشره ..

يعني يالغاليه فهميه لاتحقرينه .. وضحي له إنك غلطتي ترا هذا زوجـــك والله

مابينفعك غيره .. صديقتك الحين ببيت زوجها ووجع الراس لك ..

اعتذري منه وبوسي راســـه والله يالغاليه طيب منه وصلك ووصل خويتك

لو واحد غيره فشلك وكرشك قدام خويتك وانتي تضحكين ويااااااااكثرهم ..

لاتخلين في قلبه شي عليك وترا الاعتذار ماهو عيب .. لاصار في محله


الله يوفقك ويهدي بالك ياااااااااارب

 

[بلقيسه صغيره]

حبيبتي
الصراحه له حق يزعل
بس المفروض مايزودها لهالدرجة
حاولي تلمين الموضوع
وهذي مشاكل عادية
تصير بين كل زوجين

 

[حبيبي ابو بناتي]

الي اشوفة انك غلطتي انك تضحكين مع صديقتك وهو جالس معاك مفروض تسولفين معاه وتضحكين ولا اسكتي واحترمية على الاقل بس حصل خير مرة ثانية انتبهي عالعموم تعذري منة وقولي له ما توقعت انك تزعل وعالعين والرأس حبيبي امسحها بوجهي..
الله يوفقكم ويبعد الزعل عنكم..

 

[سرآب الضامي]

اول شي الحياء من الايمان كيف صاحبتك تسمح لنفسها تسوي كذا وهي بحضرة رجل غريب


ثاني شي زوجك معاه حق في زعله منك لان راح يقول في نفسه انك ماتحترمينه

ولا تقدرينه وانه طايح من عينك لان كان عندكم شخص غريب وهو صديقتك

انصحك انك تروحيت وتعلمين زوجك بالسالفه وان زميلتك كانت تضربك وتقبضك

لكن اخاف انك تطلعين من حفرة وطيحين بدحديرة ويقولك وش الصاحبه الي تجيها كل
هذي الجرائه وتسوي كذا وهي مع رجااال غريب وتبداء مشكله جديده

لكن انت ابخص بطبع جوزك اذا كان اذا قلتيله عادي قوليله واذا تعرفين انها راح تكون مشكلة

اعتذري منه وبوسيه بين عيونه وشفيلك عذر ثاني تعتذرين في


دمت بسعاده​

 

[خجولة بصمت]

حبيبتي انا اشوف الموضوع ما يستااهل

بس اعتذريله عشان تنلم السالفه >>> خذي على قد عقله وكبري عقلك انتي

ولا تضحكين هي السالفه اتزعل بس الحلو زودها حبتين بس يلا وش بتسوين

ان شاء الله خير الله يوفقك ويهنيك يا رب العالمين

 

[مزgggن آلشـرق]

الله يجزاكم خير الجزاء ويسدد خطاكم