الفرق بين حساسية اللبن والإسهال الوظيفي عند الاطفال

احصائياتى
الردود
0
المشاهدات
274

راجيه الرضا

مراقبة و متميزة أقسام نسوة
معلومات راجيه الرضا
إنضم
18 فبراير 2017
المشاركات
14,538
مستوى التفاعل
9,650
النقاط
113
الفرق بين حساسية اللبن والإسهال الوظيفي عند الاطفال
"يعنى اللى عند بنتنا ده يا دكتور مش حساسية لبن !؟"

- لا يا ستى والله ما حساسية لبن ..

يعنى إيه !! أومّال الإسهال الفظيع ده سببه إيه !!
أمّال لما منعت منتجات الألبان اتحسن ليه !!

- أيوا ماهو اللى يمنع منتجات الألبان ويتحسن ده مش ضروره حساسية لبن ، ده ممكن عدم تحمل "سكر لاكتوز" مؤقت و بيخف ، ممكن قولون عصبى ودول بيتضايقوا من أكلات كتير منها اللبن وسكر اللبن ومش بيحتاجوا منع طويل ولا منع كل حاجه ، ومنها اللى عند بنتكم ده ..

إيه بقى اللى عند بنتنا ده !!

ده " إسهال وظيفى " أو Toddlers diarrhea Functional or

- أيوا يعنى إيه ؟؟

يعنى الأمعاء الدقيقة مبتتحملش السكريات ، بالذات "ذات النشاط الإسموزى العالى وسكر الفركتوز " زى التفاح والخوخ والكمثرى ، كل العصاير سواء بيتى أو مُعلّبه ، سكر اللبن كمان ممكن يضايقنا ، فبندّى لبن خالى لاكتوز مؤقتاً أو الأطفال دول يقدروا يتحمّلوا اللبن كامل الدسم و الزبده والسمنة كمان ..

- اشمعنا يعنى يا دكتور ؟

عشان الدهون والزبده والسمنه والزيوت ب"تبطّأ" تفريغ المعده فالأكل يخرج منها على دفعات ويدّى فرصة للأمعاء إنها تمتص السكريات دى ..

- آه !! عشان كده لما اديت لبن كامل الدسم متعبتش ولما اديت خالى الدسم عملت إسهال ?

بالضبط ، والآيس كريم ، متنسيش إنه "كريم " مبيتعبناش قد كده .

- يا نهار ابيض يا دكتور !! انتا كده غيرت تفكيرى خالص عن الموضوع !! انا كنت مفكره ان لازم امنعها سنة كامله من اللبن و مشتقاته !!

لأ طبعاً يا مدام ؛ ده مرض تانى خالص غير حساسية اللبن و بالمناسبة ممكن بعد تظبيط كل النظام ده يفضل عدد مرات البراز من ٤-١١ مره يومياً ، ويفضل سايل مرات كتير ، لإن ببساطه ، قدرة الأمعاء على "تحمّل السكريات " دى بتكتمل عند ٤-٥ سنين تقريباً .

يعنى مقلقش ؟

لأ ، متقلقيش ، طالما الوزن بيزيد فى المعقول ، ومفيش ألم بطن مأثر عالأكل والنشاط ومتقعديش تفتشى فى الستول بتاع بنتك ، سيبيها تنطلق ?

أيوا بس انا برضه عاوزه أعرف حضرتك ازاى فرقت بينها وبين حساسية اللبن ؟

ببساطه شديده ،
الطفلة أعراضها ظهرت مع بداية المشى Toddlers diarrhea كمان معنديش علامات خطوره تخليني أطلب تحاليل عالفاضى ( ضعف وزن وألم) كمان الحاله مفهاش أعراض حساسية الطعام الصريحة اللى بنشخص عليها ( دم فى البراز قبل السنة -على تفصيل-، ترجيع حتى الجفاف بعد الأكل من ساعة ل ٤ ساعات ، تورم وانتفاخ الجسم مع ضيق تنفس خلال ثوانى لدقائق من الأكل )
وللتفاصيل أكتر تابعى الفيديوهات للأمهات والمتخصصين فى الكومنتات .

الأموره دى بفضل الله اتحسنت جداً على نظام العلاج الغذائى للإسهال الوظيفى وأنا هنزله فى أول كومنت للى عاوز يستفيد بيه ?

طيب ده النظام الغذائى للى مش لاقيه فى الكومنتات :

الطعام الموصى به لتقليل الإسهال الوظيفى

1. منع الفواكه الآتية ( التفاح - الخوخ - عصير الكمثرى )
2. منع كل العصائر .
3. زيادة الدهون فى الأكل ( الزبد - السمن - الزيت )
4. منع منتجات الألبان بشكل مؤقت أو إعطاء لبن خالى لاكتوز فى حالة الرضاعه الصناعية .


منقول عن صفحة ..الخطيب كيدز كلينيك
 

من نحن ؟؟

موقع نسوة : هي شبكه عربيه تهتم بكل ما يخص المرآه وحياتها اليوميه يعمل منذ سنوات لمساعدة والمساهمه في انجاح كافة الامور الحياتيه للمرآه العربيه