الطفل يحتاج المرح من أمه ...الأمهات والمرح

[راجيه الرضا]

- ماما أنا زهقان?
= طب شوف وراك إيه تخلصه ..
.
- ماما أنا مش عارف أنام?
= دا وقت النوم ومحتاجين ننام دلوقتي
.
- ماما أنا جعان?
= الأكل على الترابيزة
- فين على الترابيزة؟?
= هتكون فين يعني، بره في الصالة
.
- مش عاوز أذاكر?
= مش إحنا اتكلمنا عن أهمية العلم قبل كده وإن مخنا محتاج يتطور بالعلم ومينفعش نسيب مخنا من غير .................. بلا بلا بلا?
.
- ماما عاوز ... عاوز ... لا خلاص مفيش?
= متعلقنيش كده تاني لو سمحت?
____________________________________________
مواقف كتير متكررة يوميا ..
مواقف تبدو عادية ..
كل يوم .. كل يوم ..
وردودنا برضو متكررة .. ومملة ..

ونزهق ..
أو نزعق ..
أو نهدد ..
أو نطنش ..?

غالبا المشكلة في منسوب المرح عندنا كأمهات ..

الأمهات بيتقسموا فريقين ..

الأول .. شخصية مرحة بطبعها ?
تحب تمزح وتقول نكت ومتحبش النكد
تحب تعيش اليوم بيومه ومتفكرش كتير في حاجات يا تحصل يا متحصلش

الثاني .. شخصية جادة بطبعها ?
بتحط كل حاجة في قالب الجد والعمل ..
مش بتفصل بين اللعب والشغل ..
تحب يومها يكون مشغول ..
من أهم مبادئها .. لا تؤجل عمل اليوم إلى الغد
بتفكر في بكرة زيادة عن اللزوم...

للوهلة الأولى هنقول النوع الأول هو اللي بنحتاجه وعاوزينه في بيوتنا..

لكن الحقيقة .. لأ ..

إحنا عاوزين نموذج في الوسط ..

مرح وقت المرح ..?
جد وقت الجد ..?

الشخصية المرحة بتقع في مشكلة إنها مش عاوزة مشاكل أصلا ..
فممكن تتخانق عشان مش عاوزة حد ينكد عليها ..
أو تفصل نفسها عن مشاكل الأولاد عشان ما تتخنقش ..

والشخصية الجد ..
أكبر مشاكلها إنها مش بتفصل ..
عاوزة اليوم كله شغل ..
في حركة في البيت ..
لو قعدت شوية تنام ..?

مش محتاجين من ماما تغير طباعها ..
لكن تحاول تمسك العصاية من النصف ..

لكل مقام مقال ..
وقت المرح .. محتاج الأم المرحة ..
وقت الجد .. محتاج الأم الجد ..

مشكلة النوعين المتطرفين في المرح أو الجد تتلخص في ٥ نقاط:

⁦⁩أم غير مرنة⁦⁩
معندهاش مرونة كافية لاحتواء المواقف
ممكن تكون مش قادرة تتقمص شخصية غير شخصيتها عشان تحتوي الموقف قدامها
مش عاوزة تأجل وقت الكسل أو وقت العمل لحاجة تانية مع أولادها
مفهومها عن قضاء وقت مع الأولاد مالوش غير معنى واحد
وقت دمه تقيل ..?

⁦⁩الخلط بين وقت الجد ووقت المرح⁦⁩
بنحتاج نعرف إن الجد بيحتاج جدية حقيقية مننا تجاه أولادنا
ابني جاي بيعيط عشان قلمه اتكسر
وانا أهزر وأقوله عادي يعني كبر دماغك تعالى كل الحلوى دي
كده قلبت الجد هزار

وبنحتاج نعرف أن المرح بيحتاج مرح حقيقي مننا تجاه أولادنا
ابني عاوز يلعب استغماية
بص عندي حاجة أحلى.. إيه رأيك نقرأ عن كتاب علماء الفيزياء اللي جبناه من المكتبة إمبارح
خائفة تضيع وقت في اللعب ?

⁦⁩شايفة إن المرح معاها أصلا مش مهم⁦⁩
ما هو بيروح المدرسة بيلعب مع أصحابه
ما خالته بتلاعبه كل جمعة
ما أبوه بيلاعبه بعد ااصلاة

ماما .. أنت هتفضلي حاجة مختلفة لابنك ..⁦⁩
مهما هزر مع أي حد تاني ..
هيحتاج ضحكتك أنت .. وهزارك أنت ..

⁦⁩لو فرصة المرح جت مش بتعرف تستثمرها⁦⁩
ماما .. هي الطيارة بتطير ببطارية ولا بالكهرباء؟!
الطيارة دي آلة اخترعها العالم اسباجيتي? .. وأول من كان له تجربة للطيران هو عباس ابن فرناس ... ...
الولد غالبا نام في اللقطة دي ?

تخيلي نفس الموقف دا ودا كان رد ماما..
الطيارة أكيد بتطير عشان عندها جناحات زي العصفورة .. فوووو فووو (نحرك دراعنا أمننا ينطير)
يلا نطير سوا يا عموري ..
وبعد رحلة الطيران القصيرة دي ..
ما تيجي نسأل عمو جوجل كده
يا عمو .. رد يا عمو .. كيف تطير الطائرة؟!?

⁦⁩بتشيل هم الوقت الضائع⁦⁩
عاوزة الولاد أغلب الوقت ماسك كتاب ..
أو بيرسم ..
أو بيحل مسائل رياضية. .?
أو بيتعلم لغة جديدة ..
عاوزة أي حاجة مفيدة من الحاجات اللي بنفخر بأولادنا بيها دي ..
بدل ما نلعب.. ما نذاكر ولا نقرأ ولا تعمل حاجة أحس إن وقتي معاهم ما ضاعش هباء كده ..

نفس ماما ممكن تضيع وقت على الإنترنت أو في متابعة فيديوهات أو مسلسل وهي مش حاسة إن الوقت بيضيع. .?

النوعين عندهم نفس المشاكل؟!
اه للأسف ..
ولا أستثني أحدا ..?

?طب إيه اللي ممكن تسببه الصفات دي؟!?

?وقت البيت وقت ممل وغير مرح?
يفضل بيت تيتا أو بيت عمو فلان أو بيت صاحبه
عن بيتنا
ودا بيعمل جزء من إحساس بعدم الانتماء عند الطفل
مش حاسس إنه بيته
مش حاسس إنه شبهه?

?نفور الأولاد من شخصية الأم?
ماما جت .. لم الكوتشينه ..
ماما جت .. اقفل التليفزيون ..
ماما جت .. اعمل نفسك ميت?

ماما بتاعة الأوامر ..
بتاعة خلصت اللي وراك؟!
بتاعة سيب اللي في إيدك أحسن لك ..

ماما ..
حقك تخافي على مصلحة ابنك
لكن مينفعش طول الوقت أوامر ..
اللي بيسمع كلامك دلوقتي .. هيجي يوم ومش هينفع معاه الأسلوب دا ..

?بحث الأولاد عن بديل مرح?
طنط فلانة أحسن من ماما
عاوز ميس علانة عشان بتضحك معي ..
عاوز تيتا عشان بتقعدني على حجرها وبتحضني ..
عاوز حد غير ماما لأنها مش بتضحك ..?

?عدم قبول الأولاد لأوامرها ونواهيها?
الأمر والنهي بقوا حاجة تقيلة عليهم
ماما طول الوقت مش شايفانا ..
بتأمر وتنهى
مفيش وقت خاص بينا وبينها
مش بتضحك لنا .. بس بتضحك لأختها .. بتضحك لصاحبتها .. بتضحك للموبايل ..?

?استخدام الحزم أكثر من الحنان?
كتر الحنية تعمل انفلات ..
كتر الحزم .. بيعمل انفلات برضو
الوسطية أفضل شيء عشان أولادنا مش يفلتوا مننا

يمكن المرة دي اللهجة صعبة شوية ..
بس لازم تحط إيدينا على المشاكل ونحاول نصلحها ..

?هل الطباع دي مش بتتصلح؟!?
لا طبعا. .

بتتصلح ونص?

هنتكلم سوا المرة الجاية عن خطوات بسيطة نعملها عشان تضفي على علاقتنا مع أولادنا روح مرحة طول الوقت بإذن الله ..

ونمسك العصاية من النص?



منقول عن صفحه كوكبنا

 

[راجيه الرضا]

المقال له بقيه عباره عن روابط حلقات مفيده ممكن إرسالها ع الخاص لمن احب المنتدي يمنع نشر روابط

 

[mhaanwar]

المقال له بقيه عباره عن روابط حلقات مفيده ممكن إرسالها ع الخاص لمن احب المنتدي يمنع نشر روابط
[/QU .OTE] جزاك الله خير اختي راجية الموضوع اثار اهتمامي ارجوك رسلي لي روابط الحلقات

 

[راجيه الرضا]

اختي تم ارسال لروابط لك ع الحاص

 

[ها أنا ذا]

انا اول من يحتاج ترسلين لي ع الخاص..

مثل هالمواضيع تشبعني نفسيا واحتاجها بشده..

شكرا جزيلا..،،

 

[راجيه الرضا]

@ها أنا ذا إن شاء الله حبيبتي

 

[راجيه الرضا]

@ها أنا ذا إن شاء الله حبيبتي