الخطبه قصة قصيره ,,,

[Noufshamri]

-لو بشوف وحدة منكم طلعت قدام العريس والله لأنتفها تنتيف! بس منيرة اللي تطلع و لما أنادي عليها أنا..يللا روحوا كملوا دراسة امتحان العربي...
- ماماااا كل مرة بيجي عريس لمنيرة بتخلينا نروح على غرفتنا مش عدل! خلينا نشوف شو شكله و كيف متكركب بكون هههههههه....
منيرة بتزبط مزهرية الورد ووصلت عند آخر الكلام...لابسة فستان كمامه طويلة والحجاب ع لونه...طالعة فعلا عروس..
- اسمعوا كلام ماما يللا ماشاء الله لسانكم اطول منكم ولكم لما كنت بعمركم ما كنت أعرف تلت التلاتة كم...
-طب أمانة أمانة يا منيرة لو عجبك إنك بس تغمزينا رح نكون واقفين ورا الحيط...
ركضت عليهم إمهم بحنية...
- امشوا انقلعوا منك إلها والله يا وداد و يا رنا ازا لمحتكم بس...
بيطلع أبوهم من الغرفة...
بتنجن أم منيرة...
-و انت!!!! لسا ما لبست، شو هالعيلة هاي الجماعة صاروا تحت...
بحك أبو منيرة راسه،
- أي جماعة؟ اه صح ههههههه يللا...

بيركض للبدلة ما غيرها تبعت كل المناسبات من ١٢ سنة...

- زارتنا البركة يا أهلا وسهلا...
وداد و رنا بيتدافشوا من ورا البرداية حتى يلمحوا العريس...
- تعالي يا منيرة هاتي الشاي...
منيرة بتكزدر و خجلانة حاملة الصينية...
بتلتفت بدون ما حدا ينتبه و بتغمز اخواتها البنات...
- يس يس عجبها، من هلأ خزانتها البنية إلي...
-طيب بس اواعي الصيفي كلهم إلي مش تصيري بدك الفستان الوردي و النضارة الشمسية...

العريس حلو، مرتب، إمه ماشي حالها بس لابد من شوية حركات حموات...
العرسان ارتاحوا لبعض على ما يبدو...

-طيب ممكن يوسف يقعد مع منيرة شوي؟
منيرة انخنقت من الإحراج و قلبها بدق بسرعة...
يوسف عارف شو بده...
خلوهم يقعدوا قبالهم بآخر الغرفة...
لسا وداد و رنا بيتقاتلوا على اغراض منيرة...
فجأة بيطلع صوت نقاش حاد...
- مش فاهمة؟
- عفوا؟ مالك آنسة منيرة؟
- إنت مو شايف حالك شو بتحكي؟ يعني انا لو مش موظفة ما كنت جيت طلبت إيدي؟
بتتدخل إم يوسف...
- ما هو يا بنتي بتعينوا بعض شو فيها؟ انتي كم راتبك؟ يوسف عليه أقساط للسيارة لسا و أكيد رح تطلع مصاريف للعرس... بتتساعدوا عليها.... ما هي الحياة الزوجية شو إلا شراكة؟
بتنزل دموع منيرة، خاب أملها...بتدخل عند إخواتها ركض... بيصيروا وداد و و رنا ييكوا معها على زعلها...
بيوقف أبو منيرة بكل هدوء و احترام...
- خطوة عزيزة، اشربوا قهوتكم و إن شاء الله بتلاقوا الموظفة اللي على طلبكم، بنتي بدها تكمل ماجستير بالفترة الحالية و مش ناقصها إشي الحمدلله، أنا مش موافق أزوجها لناس بتشوف شغل البنت ميزة مادية...هي حرة بتشتغل، بتدرس، بتعمل اللي بدها ياه، بنتي مش للاستثمار...
أهل يوسف متشنجين من الصدمة وردة الفعل...
بينفتح الباب بينزلوا ع الدرج...
يوسف وجهه أحمر من الدرس اللي سمعه...
إمه بدها تراضيه...
- ما تزعل يمّا والله لأزوجك مديرة مديرتها و عندها كمان بيت و سيارة و راتب تقاعد...لا تخاف هاجر بنت عمك بعتتلي كشف كامل باسماء الموظفات بشركتها...عندهم ٢٧ موظفة بقسم ال IT...

 

[راجيه الرضا]

هم يضحك وهم يبكي والله نوف ...وهو ما فهم الدرس ولا امه اعتبرت ...في انتظار كشف هاجر ابنة عمه

 

[Noufshamri]

هم يضحك وهم يبكي والله نوف ...وهو ما فهم الدرس ولا امه اعتبرت ...في انتظار كشف هاجر ابنة عمه

ههههههههههههه اي والله هاجر شكلها تشتغل خطابه ههههه
فعلا كلامك صحيح راجيه والمشكله الحين اغلب الرجال يطلبون الوحده تكون تشتغل حتى تساعده بالمصروف

 

[راجيه الرضا]

ههههههههههههه اي والله هاجر شكلها تشتغل خطابه ههههه
فعلا كلامك صحيح راجيه والمشكله الحين اغلب الرجال يطلبون الوحده تكون تشتغل حتى تساعده بالمصروف

هاجر ليست خطابة عادية تقتنص العاملات.انتكست الفطر ولا حول ولا قوة إلا بالله