الاطفال والبرد وكورونا

[راجيه الرضا]

برد الأطفال مش محتاج أى حاجه غير إنك تسيبه لوحده من غير ما تتدخل بأدويه تعقد الأمور وتزود المشاكل .
البرد ببساطه عباره رشح أو زكام محتاج تسليك أنف بسيط .
سوايل دافيه .
راحة جسم .
اصبرى معايا يا ست الكل من ٧-١٤ يوم والبرد ياخد دورته ويتكل على الله .
لما يتكرر بشكل مستفز ده يبقى موضوع تانى يا التهاب أنف مزمن أو حساسية أنف على حسب الأعراض .
إنما اللى بنعمله فى عيالنا ده أكبر غلط الصراحه .
كل الدراسات والمشاهدات و التجارب بتثبت إن الكحة البسيطه الى مش معاها نهجان نصدر أو ضيق نفس ولا مأثرة عالمجهود للكبار ولا الرضاعه للرُّضَّع مش محتاجه غير سوايل دافيه وفقط.
تأثير أدوية الرشح ( مضادات الهيستامين ) كتير من الأحيان بيكون عكسى ؛ فى حين إنها مش موصوفه علمياً غير للرشح المُصاحب ب عطس متكرر ، هرش شديد فى الأنف وحكّه ، احمرار عين مع دموع ( رشح تحسسى ).
إنما للأسف استخدامها " عمال على بطال " فى أى دور رشح عادى ممكن يضر لإنها بتنشف المخاط تماماً خاصة بجرعات عاليه Anticholenergic effect فبييجى الطفل ببرد بسيط يبدأ زرتك أو تلفاست أو اخواتهم تيجى الأم تشتكى من كحة ناشفه جداً ، أول ما نوقف الأدوية ونشتغل عالسوايل و تسليك الأنف الطفل يتحسن .
كذلك موسعات الشعب فى غير محلها ممكن يزود الكحة ، موسعات الشعب زى فاركولين وفنتولين وروتاهيلكس استخدامها بيكون فى نطاق محدود من ضيق الشعب الهوائية اللى مع الحساسية وبعض أنواع البرد ، غير كده ، مش مضمون نتايجها وكتير تزود كحة مش موجوده من الأساس .
حاجه كمان ؛ أى طفل دلوقتى يجيله دور برد ، وبالذات لو معاه حراره ، ده كورونا حتى يثبت العكس ، بمعنى - وعلى قد ما نقدر - بلاش تقبيل ، نوم نفَس فى النفس ، لو نقدر نبعد متر ونص نبعد ، لو نقدر يستخدم فوط خاصه بيه و أدوات خاصه نعمل ، عالأقل لمدة ٣ أيام بعد اختفاء الحراره .
لأ مش محتاج علاج معين غير الخوافض والمسكنات والسوايل و مش هنحتاح آشعات ولا تحاليل غير لو فى أعراض شديده .
ما زال الكورونا فى الأطفال تعتبر برد عادى ، ونسبة المضاعفات والوفيات أقل النسب الحمد لله .
نورتونا الحبة دول

الخطيب كيدز كلينيك

 

[Lena Dareen]

اللهم احفظ اطفالنا و اطفال كل الامه المسلمه

شكرا علي الطرح ?​